1 ጎዳይ ሙሴ ሂዝጊዴስ፥ 2 «ኢስራኤሌ ኣሳስ ዱማ ሺቆ ጊ ኣዋጂዲ ኢንቴ ቦንቻናስ ቤሲዛ ዶሬቲዳ ባኣሌቲ ሃይሳፌ ካሊ ዲዛይታ፤

3 «ኢንቴ ኢንቴስ ኦꬃናስ ኡሱፑን ጋላሳቲ ዴቴስ፤ ላፑንꬃ ጋላሳይ ጊዲኮ ኢንቴስ ሼምፒዛ ሳምባታ ጋላሳ፤ ሄ ጋላስ ኢንቴ ጾሳ ጎይናናስ ሺቂቴ ኣቲን ኣይ ኦሶካ ኦꬆፍቴ፤ ኢንቴ ዲዛሶ ኡባን ሄሲ ኢንቴ ጾሳ ቦንቻና ሳምባታ ጋላሳ። ኬሳ 20፡8-10፤ 23፡12፤ 31፡15፤ 34፡21፤ 35፡2፤ ዛሬ 5፡12-14

4 «ኢስታስ ዎꬊዳ ዎዴን ጌሻ ሺቆ ኦꬂ ኣዋጂዲ ኢንቴ ቦንቻናስ ቤሲዛ ጎዳ ባኣሌቲ ሃይሳፌ ካሊዛይታ፥ 5 ጎዳይ ኢዛን ቦንቼቲዛ ፓዚጋ ባኣሌይ ኮይሮ ኣጊናይ ጌሊዳ ታማኔ ኦይዳንꬆ ጋላስ ኣርሼይ ዉሊን ጋዴይ ሌምኢ ሌምኢሺን ኦይኬቴስ። ኬሳ 12፡1-13፤ ዛሬ 16፡1-2 6 ሄ ኣጊናዛን ታማኔ ኢቻሻንꬆ ጋላስ ኡኬꬃ ባኣሌይ ኦይኬቴስ፤ ሄሳፌ ጉዬ ላፑን ጋላስ ጋካናስ ኢርሾይ ጌሎንታ ኡኬꬅ ሚቴ። 7 ሄ ጋላሳታፔ ኮይሮ ጋላስ ጾሳ ጎይናናስ ሺቂቴ፤ ሄ ጋላስ ኢንቴ ኦሶ ኦꬆፍቴ። 8 ላፑን ጋላስ ጋካናስ ጹጌቲዛ ያርሾ ጎዳስ ሺሺቴ፤ ኢንቴ ኦሶ ኣጊዲ ላፑንꬃ ጋላስ ጎዳ ጎይናናስ ሺቂቴ።»ኬሳ 12፡14-20፤ 23፡15፤ 34፡18፤ ዛሬ 16፡3-8

9 ጎዳይ ሙሴ ሂዝጊዴስ፥ 10 «ኢስራኤሌ ኣሳስ ታኒ ኢንቴስ ኢሚዛ ቢታ ጌሊዲ ኢንቴ ካꬅ ሺሺዛ ዎዴ ካꬃ ጼራ ቄሴኮ ኤሂቴ። 11 ጎዳ ሲንꬃን ኢንቴ ሺሺዛይሲ ኤኬታና ማላ ቄሴዚ ቃሴ ካꬃ ጼራ ኤኪዲ ያኔ ሃ ቃꬂዛ ያርሾ ሂስቲ ጾሳስ ሺሾ፤ ቄሴዚ ሄ ጼራ ካꬃ ያኔ ሃ ቃሴꬂዛ ያርሾ ሂስቲ ሺሻናስ ቤሲዛይ ሳምባታ ጋላሳፌ ዎንቴꬃ ጋላስ ጊዶ። 12 ኢንቴ ሄ ያርሾ ሺሺዛ ጋላስ ኢዛ ቦላ ቦሬይ ባይንዳ ኢሲ ላይꬃ ꬋርሾ ላቃ ጹጌቲዛ ያርሾ ኦꬂዲ ኢሲ ቦላ ጾሳስ ሺሺቴ። 13 ኢዛራ ኢሲፌ ዎጋራ ሚꬃ ዛይቴን ሙኑቄቲዳ ናምኡ ኪሎ ጊዲዛ ሊቆ ꬊሌ ካꬃ ያርሾ ሂስቲ ሺሺቴ፤ ሄሲካ ኢዛ ሳዎይ ጎዳ ኡፋይሲዛ ጹጌቲዛ ያርሾ ጊዳና፤ ኢዛራ ኢሲፌ ኢሲ ሊቲሮ ጊዲዛ ዎይኔ ኡሹ ኢሞታ ሺሺቴ። 14 ኢንቴ ሄይታ ጎዳስ ኢማናፔ ኮይሮ ጋኪዳ ካꬃ ኣይፌ ቃዬ ጊዲን ዎይኮ ሻሽ ዎይኮ ኡኬꬅ ኡኪዲ ሞፒቴ፤ ሃይሳ ሃ ዎጋዛ ኢንቴ ዲዛሶ ኡባን ጉዬፔ ያና ኢንቴ ዬሌታስ ኤቂ ዲዛ ሜርና ዎጋ ጊዶ።

15 «ኢንቴ ጎዳስ ያኔ ሃ ቃሴꬂ ሺሺዛ ያርሾ ያርሺዳ ሳምባታ ጋላሳ ዎንቴꬃፌ ዶሚዲ ላፑን ሳምባታ ቆዲቴ፤ 16 ላፑንꬃ ሳምባታፔ ጉዬ ኢቻሽ ታማንꬆ ጋላስ ቃሴካ ሃራ ኦራꬃ ካꬃ ያርሾ ጎዳስ ሺሺቴ። 17 ናምኡ ኪሎ ጊዲዛ ሊቆ ꬊሌ ኢንቴ ሶፔ ኢርሾን ሙኑቄቲ ኡኬቲዳ ናምኡ ኡኬꬅ ያኔ ሃ ቃሴꬂዛ ያርሾ ሂስቲ ኤኪ ዪቴ፤ ሄሲካ ኦራꬅ ሺቂዛ ካꬃ ጊሻስ ጾሳስ ሺቂዛ ካꬃ ያርሾ ጊዶ። 18 ሄ ኡኬꬃራካ ኢሲፌ ኢስታ ቦላ ዎሶይ ባይንዳ ኢሲ ላይꬅ ጊዲዛ ላፑን ꬋርሾ ላቃታ ኢሲ ኮርማ ቦራራ ናምኡ ꬋርሾታ ሺሺቴ፤ ካꬃ ያርሾዛራኔ ዎይኔ ኡሻ ያርሾዛራ ኢሲፌ ጎዳስ ጹጌቲዛ ያርሾኔ ሳዎ ቱኑ ጊዛ ያርሾ ሂስቲ ሺሺቴ። ኬሳ 23፡16፤ 34፡22፤ ዛሬ 16፡9-12 19 ቃሴካ ናጋራ ጊሻስ ሺቂዛ ያርሾስ ኢሲ ዴይሻ ኦርጌ፥ ኢሲፌቴꬃ ያርሾስ ኢሲ ላይꬅ ꬋርሾ ላቃ ናምኣታ ያርሾስ ሺሺቴ። 20 ቄሴይ ኡኬꬃ ናምኡ ላቃታራ ያኔ ሃ ቃሴꬂዲ ጎዳስ ዱማ ያርሾ ሂስቲ ሺሾ፤ ሄሲካ ቄሴታ ጊሻ ጊዶ፤ ሄይቲ ሄ ኢሞታቲ ሃራፔ ዱማ ኢሞታ። 21 ሄ ጋላስ ኣዋጃ ኣዋጂዲ ጎዳ ጎይናናስ ኢሲ ቦላ ሺቂቴ ኣቲን ሃራ ኦሶ ኦꬆፍቴ፤ ሃይሲ ኢንቴ ዲዛሶ ኡባን ኢንቴፌ ጉዬራ ዪዛ ዬሌታስ ሜርናስ ኤቂ ዲዛ ዎጋ ጊዶ። 22 ኢንቴ ኢንቴ ቢታን ካꬅ ሺሺዛ ዎዴ ꬋሳ ቦላ ዲዛ ካꬃ ማጾፒቴ፤ ማጺሺን ጉዬን ኣቲዳይሳ ማጻናስ ጉዬ ሲሞፍቴ፤ ጉዬን ኣቲዳይሲ ማንቆታሲኔ ሃራ ቢታፌ ቤቴ ዪዳ ኣሳታስ ኣቶ፤ ታኒ ጎዳ ኢንቴ ጾሳ።»ሌዌ 19፡9-10፤ ዛሬ 24፡19-22

23 ጎዳይ ሙሴስ ሂዝጊዴስ፥ 24 «ኢስራኤሌ ኣሳስ ላፑንꬃ ኣጊናይ ጌሊዳ ኮይሮ ጋላሳይ ኢንቴስ ሼምፖ ጋላስ ጊዶ፤ ሄ ዎዴ ዛዬይ ፑኔቲሺን ኢንቴ ጎዳ ጎይናናስ ሺቂዛ ዱማ ሺቆ ጊዶ። 25 ሄ ጋላስ ጎዳስ ታማን ጹጌቲዛ ካꬃ ያርሾ ሺሺቴ ኣቲን ሄ ጋላስ ኣይኮካ ኦꬆፍቴ።»

26 ጎዳይ ሙሴስ ሂዝጊዴስ፥ 27 «ላፑንꬆ ኣጊናይ ጌሊዳፔ ጉዬ ታማንꬃ ጋላሳይ ናጋራፔ ማሬቴꬃ ጋላሳ፤ ሄ ጋላስ ኣይ ካꬂካ ሞፒቴ፤ ጎዳ ጎይናናስ ሺቂቴ፤ ጾሳስ ታማን ጹጌቲዛ ያርሾ ሺሺቴ። 28 ሄ ጋላሳይ ጎዳ ኢንቴ ጾሳ ሲንꬃን ኣሳ ናጋራ ዉርሶ ጋላስ ጊዲዳ ጊሻስ ሄ ጋላስ ኣይኮካ ኦꬆፍቴ። 29 ሄ ጋላስ ባናቴꬃ ካዉሺዲ ማሬቶንታ ኣይ ኣሲካ ዴራ ጊዶፌ ሻኬቲ ꬋዮ። 30 ሄ ጋላስ ኣይ ኦሶ ጊዲን ኦꬂዛዴ ታኒ ኢዛ ኢዛ ዴራ ጊዶፌ ሻካ ꬋይሳና፤ 31 ሄሳ ጊሻስ ሄ ጋላስ ኢንቴ ኣይ ኦሶካ ኦꬆፍቴ፤ ሃይሲ ሃ ዎጋዚ ኢንቴ ዲዛሶ ኡባን ኢንቴፌ ጉዬ ያና ኢንቴ ዬሌታስ ኤቂ ዲዛ ሜርና ዎጋ ጊዶ። 32 ሄ ኣጊናይ ጌሊዳ ኡዱፉንꬆ ጋላሳ ኦማርሳፌ ቢዲ ታማንꬆ ጋላሳ ኦማርስ ጋካናስ ኢንቴናቴꬃ ካዉሺዲ ሄ ጋላሳ ሳምባታ ሂስቲ ቦንቺቴ።»ሌዌ 16፡29-34

33 ጎዳይ ሙሴስ ሂዝጊዴስ፥ 34 «ጎዳስ ዳሴ ባኣሌይ ላፑንꬃ ኣጊናይ ጌሊዳ ታማኔ ኢቻሻንꬆ ጋላሳፌ ዶሚዲ ላፑን ጋላስ ጋካናስ ቦንቼቶ። 35 ሄ ጋላሳታፔ ኮይሮ ጋላስ ጎዳ ጎይናናስ ሺቂቴ ኣቲን ኣይ ኦሶካ ኦꬆፍቴ። 36 ላፑን ጋላሳታን ኢሳን ኢሳን ጎዳስ ጹጌቲዛ ያርሾ ሺሺቴ፤ ኦስፑንꬃ ጋላስ ቃሴካ ጎዳ ጎይናናስ ሺቂቴ፤ ጎዳስ ጹጌቲዛ ካꬃ ያርሾ ያርሺቴ፤ ሄ ጋላሳይ ኢንቴ ሺቆዛ ዉርሲዛ ጋላስ ጊዲዳ ጊሻስ ሄ ጋላስ ኣይኮካ ኦꬆፍቴ።ዛሬ 16፡13-15

37 «ኢንቴ ታማን ጹጌቲዛ ያርሾኔ ካꬃ ያርሾ ቃሴ ሃራ ያርሾታ ኡባኔ ኡሻ ያርሾ ኮሺዛ ኬና ዎꬂዳ ጋላሳን ጎዳስ ሺሻናስ ኢንቴ ጌሻ ሺቆ ኦꬂዲ ኣዋጃናስ ቤሲዛ ጎዳስ ዶሬቲዳ ባኣሌቲ ሃይታንታ። 38 ሃይቲ ሃ ያርሾቲ ጎዳ ሳምባታ ጋላሳታን ኢንቴ ሺሺዛይታፔ ጾሳስ ኢሚዛ ኢሞታታፔ ኣዲና ጋꬂዛይታፔኔ ኢንቴ ኢንቴ ዶሳን ጮ ኢሚዛይታፔ ቦላራ ጉጂዲ ኢንቴ ኢሚዛ ኢሞታታ።

39 «ኢንቴ ካꬅ ሺሺዳፔ ጉዬ ላፑንꬃ ኣጊናይ ጌሊዳ ታማኔ ኢቻሻንꬃ ጋላስ ኮይሮራ ሃይሳ ኡፋይሳ ባኣሌዛ ጎዳ ሲንꬃን ላፑን ጋላስ ጋካናስ ቦንቺቴ፤ ኮይሮ ጋላሲኔ ኦስፑንꬃ ጋላሳይ ኢንቴስ ዱማ ሼምፖ ጋላስ ጊዶ። 40 ሄ ኮይሮ ጋላስ ኢንቴ ቢታን ካጺዛ ሎኦ ሚꬃ ኣይፌፔ፥ ዛምባ ሃይꬅ፥ ጪሊላ ሚꬃ ሃጋኔ ሃꬂናጌ*ሃꬂናጌ፡ ሃꬂናጌ ጊዛይሳ ኢሲ ኢሲ ባጋ ጋሞꬆ ቃላን ሃꬂናጎ ጌቴቴስ። ሚꬃ ሃጋ ኦይኪዲ ጎዳ ኢንቴ ጾሳ ሲንꬃን ኡፋዬቲሼ ላፑን ጋላስ ጋካናስ ባኣሌ ኦꬂቴ። 41 ሃይሳካ ላይꬃን ላይꬃን ላፑንꬃ ኣጊናን ላፑን ጋላስ ጋካናስ ጎዳ ሲንꬃን ቦንቺቴ፤ ሃይሲ ሃ ዎጋይ ኢንቴስ ና ና ጋካናስ ሜርና ዎጋ ጊዲ ቦንቼቶ። 42 ኩሜꬃ ኢስራኤሌ ዴሬይ ላፑን ጋላስ ጋካናስ ዳሴን ኡቶ። 43 ሃይሳንካ ታኒ ኢስራኤሌ ናይታ ጊብጼ ቢታፌ ኬሲዳ ዎዴ ኢስቲ ዳሴን ኡታና ማላ ታ ኦꬂዳይሳ ኢንቴፌ ጉዬ ዪዛ ዬሌታይ ኤራና። ታኒ ጎዳ ኢንቴ ጾሳ።»

44 ሙሴይ ሃይሳꬆ ኦꬂዲ ጎዳ ባኣሌታ ቦንቺዛ ዎጋ ኢስራኤሌ ኣሳ ኤሪሲዴስ።