1 ጎዳይ ሙሴስ ሂዝጊዴስ፥ 2 «ዱንካኔዛን ፓጬይ ባይንዳ ፖኣና ማላ ኦꬃናስ ዎጋራ ሚꬃፌ ጉምኢ ጺሊሲ ኬሲዳ ዛይቴ ኢስራኤሌ ዴሬ ኣሳይ ኔስ ኤሃና ማላ ኣዛዛ። 3 ኣሮኔይ ኦማርስ ኦማርስ ጾምፔዛ ኦይሴꬆ፤ ሄሲካ ጋይቶቴꬃ ዱንካኔዛ ጊዶን ዲዛ ጫቆ ቃላ ታቦታዛፔ ሲንꬃ ባጋራ ዲዛ ማጋላሻፔ ካሬ ባጋራ ጎዳ ሲንꬃን ጋዴይ ዎንታና ጋካናስ ፖኢሼ ኣቆ፤ ሃይሲ ሃ ዎጋዚ ሲንꬃፌ ያና ዬሌታስ ሜርና ዎጋ ጊዶ። 4 ኣሮኔይ ሄ ጾምፔታ ዎꬂዛ ዋላካይ ባይንዳ ዎርቃፌ ኦሴቲዳ ባላዛ ቦላ ዲዛ ጾምፔቲ ፓጬይ ባይንዳ ጎዳ ሲንꬃን ፖኣና ማላ ናጎ።

5 «ታማኔ ናምኡ ኪሎ ጊዲዛ ሊቆ ꬊሌ ኤካዳ ታማኔ ናምኡ ኡኬꬅ ኡካ። 6 ኡኬꬃታፔ ኡሱፑናታ ቦላራ ዋላካይ ባይንዳ ዎርቃን ቲዬቲዳ ጻራጴዛ ቦላ ኢሲ ባጋራ ዎꬃ፤ ቃሴ ሃንኮ ኡሱፑናታ ሃንኮ ባጋራ ዲዛ ማዳ ቦላ ማራን ማራን ዎꬃ።ኬሳ 25፡30 7 ጎዳስ ታማን ጹጌቲ ያርሼቲዛ ካꬃ ያርሾ ጊዲዳይሳ ቆፍሳናስ ሙሩታ ኤጻኔ ናምኡ ባጋራካ ዎꬃ። 8 ሃይሳ ሃ ኡኬꬃዛ ሳምባታን ሳምባታን ኡባ ዎዴ ኣሮኔይ ጎዳ ሲንꬃን ኢስራኤሌ ኣሳ ጊሻስ ዎꬆ፤ ሃይሲ ኢስራኤሌ ኣሳይ ፓጬይ ባይንዳ ኦꬃና ማላ ቤሲዛ ጫቆ ቃላ። 9 ኡኬꬃይ ኣሮኔሲኔ ኢዛ ዜሬꬃታስ ጊሻ ጊዶ፤ ኢስቲ ኡኬꬃ ጎዳስ ዱማቲዳሶን ሜቶ፤ ሄሲካ ጎዳስ ታማን ጹጌቲ ሺቂዛ ያርሾታፔ ኬሂ ዱማቲዳ ኣሮኔሲኔ ኢዛ ዜሬꬃታስ ኢሜቲዳ ጊሻ ጊዶ።»ማቶ 12፡4፤ ማር 2፡26፤ ሉቃ 6፡4

10 ኣዪ ባጋራ ኢስራኤሌ፥ ኣዋ ባጋራ ጊብጼ ዴሬ ኣስ ጊዲዳ ኢሳዴይ ዴስ፤ ኢዚካ ኢሲ ጋላስ ባ ዲዛ ሄራን ዲዛ ኢሲ ኢስራኤሌ ኣስ ጊዲዳሪራ ኦዬቲዴስ። 11 ሄ ኣዬይ ባጋራ ኢስራኤሌ ኣስ ጊዲዳይሲ ኦዬቲሼ ጎዳ ሱንꬅ ጫዪዴስ፤ ሂስቲን ኢዛዴ ሙሴኮ ኤሂዳ፤ ሄ ኣዴዛ ኣያ ዳኔ ባጋፌ ጊዲዳ ዲብራዬ ና ሻሎሚቶ ጌቴታዉስ። 12 ኢስቲ ኢዛ ቦላ ኣይ ቂጻቴ ዬጋናስ ቤሲዛኮ ጎዳይ ኢስታስ ዮታና ጋካናስ ኢዛ ቃሾ ኬꬃን ዬጊዳ።

13 ጎዳይ ሙሴስ ሂዝጊዴስ፥ 14 «ሄ ኣዴዛ ኣሳይ ዲዛሶፔ ጌዴ ሃራሶ ኬሳ፤ ኢዚ ጾሳ ጫዪሺን ሲዪዳ ኡባይ ሄሳዴይ ሞሮ ኦꬂዳይሳ ማርካታናስ ኢሶይ ኢሶይ ባ ኩሼ ሄ ኣዴዛ ሁኤ ቦላ ዎꬆ፤ ሄሳፌ ካሊዲ ኩሜꬃ ኢስራኤሌ ዴሬይ ኢዛ ሹቻን ጫዲ ዎꬎ። 15 ታና ጾሳ ጫዪዳ ኣይ ኣሲካ ሄሳꬆካ ባ ቂጻቴ ኤኮ። 16 ጎዳ ጫዪዳ ኣይ ኣስ ጊዲንካ ዴሬይ ኡባይ ኢዛ ሹቻን ጫዲ ዎꬎ፤ ኢስራኤሌ ኣስ ጊዲን ዎይኮ ኢስራኤሌ ዴሬ ጋርሳን ዲዛ ሃራ ዴሬ ኣስ ጊዲን ጎዳ ጫዪዳዴይ ሹቻን ጫዴቲ ሃይቆ።

17 «ኣሴ ዎꬊዳዴይ ኦኒካ ሃይቆን ቃጻዬቶ። ኬሳ 21፡12 18 ኣሳ ሜሄ ዎꬊዳዴይ ኢዛ ማላ ሜሄ ቃንጾ፤ ሄሲ ሄ ዋጋዚ ሼምፖ ጊሻስ ሼምፖ ቃንጺዛ ዎጋ።

19 «ኣይ ኣሲካ ሃራ ኣሳ ቦላ ቆሆ ጋꬂኮ ኢዛዴይ ቆሆ ጋꬂዳይሳ ማላ ቆሆይ ሄ ጋꬂዳዴ ቦላ ጋኮ። 20 ሜቄꬅ ሜንꬂዳዴስ ሜቄꬂ ሜቆ፤ ኣይፌ ቶይሲዳዴስ ኣይፌይ ቶኦ፤ ኣች ሜንꬂዳዴስ ኣቺ ሜቆ፤ ሃራ ኣሳ ቦላ ኣይ ቆሆካ ጋꬂዳዴስ ኢዚ ጋꬂዳ ቆሆዛ ማላይ ኢዛ ቦላ ጋኮ። ኬሳ 21፡23-25፤ ዛሬ 19፡21፤ ማቶ 5፡38 21 ሜሄ ዎꬊዳዴይ ሜሄ ቃንጾ፤ ኣሴ ዎꬊዳዴይ ጊዲኮ ሃይቆን ቃጻዬቶ። 22 ሃይሲ ዎጋዚ ኢንቴስ ኢስራኤሌ ናይታስ ጊዲን ዎይኮ ኢንቴ ጊዶን ዲዛ ሃራ ዴሬ ኣሳ ኡባሳ፤ ጋሶይካ ታኒ ጎዳ ኢንቴ ጾሳ።»ታይ 15፡16

23 ሙሴይ ሄሳ ኡባ ዴሬዛስ ዮቲ ፖሊዳፔ ጉዬ ሄ ጾሳ ጫዪዳ ኣዴዛ ኣሲ ዲዛሶፔ ሃራሶ ኬሲዲ ሹቻራ ጫዲ ዎꬊዳ፤ ሄሳꬆካ ኢስራኤሌ ኣሳይ ጎዳይ ሙሴ ኣዛዚዳ ማላ ኦꬂዳ።