21
ኣምኤይ ኢሞታ
(ማር 12፡41-44)
1 ዬሱሲ ꬎቁ ጊ ጼሊሺን ዱሬ ኣሳቲ ጾሳ ኬꬄን ሙጹዋታ ኢዛን ሺሺዛይሳ ጊዶን ሙጹዋታ ዬጊሺን ቤዪዴስ። 2 ቃሴካ ኢሲ ኣምኦ ዲዛራ ናምኡ ሲኪና ጊዲዛ ናምኡ ጻርቂማላ ሄ ሙጹዋታ ኢዛን ሺሺዛይሳን ዬጊሺን ጼሊዲ፥ 3 «ታ ኢንቴስ ቱሙ ጋይስ፤ ሃና ኣምኤያ ኡባ ኣሳፔ ቦላራ ኣꬌꬅ ኢማዱስ። 4 ሃይቲ ኣሳቲ ኢሚዳይ ባስ ዲዛ ቲርፓፌ ጊዲሺን ኢዛ ጊዲኮ ባስ ባይንዳ ዎልቃፌ ባስ ዲዛሮኔ ባ ዱሳስ ኮሺዛሮ ዉርሳ ዬጋዱስ» ጊዴስ።
ጾሳ ኬꬂ ላሌታናይሳ ዬሱሲ ካሴቲ ዮቲዳ ቃላ
(ማቶ 24፡1-2፤ ማር 13፡1-2)
5-6 ኢዛ ካሊዛይታፔ ኢሲ ኢሲ ኣሳቲ ጾሳ ኬꬃይ ሎኦ ሹቻኒኔ ኣሳይ ኢሚዳ ኢሞታን ኣይ ማላ ሎኢ ኬጼቲዳኮ ጊዲ ባ ጊዶን ሃሳዬቲሺን ዬሱሲ ሲዪዲ፥ «ሃይሲ ኢንቴ ቤኢዛይሲ ዉሪ ላሌቶንታ ሹቺ ሹቻ ቦላ ኬሌቲዳ ማላ ኣቶንታ ዎዴይ ያና» ጊዴስ።
7 ኢስቲካ ኢዛ፥ «ኣስታማሬ! ሃይሲ ዉሪ ኣይዴ ሃናኔ? ቃሴ ሃይሲ ሃናናይሳስ ማላታይ ኣዜ?» ጊዲ ኦይቺዳ።
8 ኢዚካ ኢስታስ፥ «ኢንቴ ባሌቶንታ ማላ ናጌቲቴ፤ ዳሮቲ ባና፥ ‹ታ ኪርስቶሳኮ! ዎዴይካ ማቲዴስ› ጊሼ ታ ሱንꬃራ ያና ሺን ኢንቴ ኢስታ ካሎፍቴ። 9 ኦላ ጊሻሲኔ ዴሬ ማካላቴꬃ ጊሻስ ሲዪዛ ዎዴ ዳጋሞፍቴ። ሄሲ ዉሪ ካሴቲዲ ሃናናስ ቤሴስ፤ ዉርሴꬂ ጋኪዴስ፤ ጊዶ ኣቲን ሄራካ ሃኔና» ጊዴስ።
10 ቃሴ፥ «ዴሬይ ዴሬ ቦላ፥ ካዎይ ካዎ ቦላ ዴንዳና። 11 ቢታይ ዎልቃማ ቃꬅ ቃጻና፤ ኮሻይኔ ቦሻይ ዱማ ዱማሶን ሃናና፤ ዳሮ ባቢሲዛዚኔ ሳሎፔ ጊታ ማላታይ ቤታና።
12 «ሄሲ ዉሪ ሃናናፔ ካሴቲዲ ኣሳይ ኢንቴና ኦይካናኔ ጎዳና፤ ኣይሁዳ ዎሳ ኬꬂኔ ቃሾ ኬꬅ ጌልꬃና፤ ካዎታ ሲንꬂኔ ዳናታ ሲንꬅ ሺሻና። ሄሲ ዉሪ ታ ሱንꬃ ጊሻስ ኢንቴ ቦላ ጋካና። 13 ሄሲ ዉሪካ ማርካታናስ ሎኦ ቃዳ ጊዳና። 14 ሄሳ ጊሻስ ኑና ኦይቺዛይታስ ኑ ኣይ ዛሪኖ? ጊዲ ካሴቲዲ ሂርጎንታ ማላ ሃይሳ ዎዚናን ዎꬂቴ።ሉቃ 12፡11-12 15 ኢንቴ ሞርኬታፔ ኦኒካ ኢንቴናራ ኤቄታናሲኔ ባሌꬃናስ ዳንዳዮንታ ቃላኔ ጪንጫቴꬅ ታ ኢንቴስ ኢማና። 16 ኢንቴና ዬሊዳይቲኔ ኢንቴ ኢሻቲ፥ ኢንቴ ዳቦቲኔ ኢንቴ ላጌቲ ዉሪ ኢንቴና ኣꬂ ኢማና፤ ኢንቴፌ ባጋታ ዎꬋና። 17 ታ ሱንꬃ ጊሻስ ኡባ ኣሳ ኣቻን ኢንቴ ኢጼታና። 18 ጊዶ ኣቲን ኢንቴ ሁኤ ቢናናታፔ ኢሲናካ ꬋዩኩ። 19 ኢንቴ ሚኒ ኤቂኮ ኢንቴ ሼምፖ ኣሻና።
ዬሱሲ ዬሩሳላሜ ꬋዮ ጊሻስ ካሴቲዲ ዮቲዳ ቃላ
(ማቶ 24፡15-21፤ ማር 13፡14-19)
20 «ኦላ ኣሳይ ዬሩሳላሜ ጊዶꬂሺን ቤዪኮ ኢዚስ ꬋይዛ ዎዴይ ማቲዳይሳ ኤሪቴ። 21 ሄ ዎዴ ዩሁዳን ዲዛይቲ ፑዴ ዙማ ቦላ ጋንጌቶ፤ ካታማን ዲዛይቲካ ካታማፔ ኬዚቴ፤ ዴሬ ጊዶን ዲዛይቲካ ሄ ካታማዮ ጌሎፔቶ። 22 ጻፌቲዳይሲ ዉሪ ፖሌታናስ ሃና ሃሎ ኬሲዛ ዎዴ። ሆሴ 9፡7 23 ቢታ ቦላ ጊታ ሜቶይ ሃናና፤ ሃይሳ ዴሬዛ ቦላ ሃንቆይ ያና፤ ሄሳ ጊሻስ ሄ ዎዴ ቃንꬃራ ዲዛ ማጫሳታሲኔ ꬋንꬂዛ ኣዬታስ ኣዬ ኣና! 24 ባጋ ኣሳይ ማሻን ሃይቃና፤ ባ ዴሬፔ ሃራ ዴሬ ዲኤታና፤ ዬሩሳላሜይካ ጾስ ኤሮንታ ዴሬታ ዎዴይ ፖሌታና ጋካናስ፥ ጾስ ኤሮንታ ኣሳታን ዬꬌቲዳሮ ጊዳና።
ኣሳ ናስ ናምኣንꬆ ዩስ
(ማቶ 24፡29-31፤ ማር 13፡24-27)
25 «ኣርሼ ቦላ፥ ኣጊና ቦላኔ ጾሊንቴ ቦላ ማላታይ ቤታና፤ ኣባፌኔ ኣባ ዳምባላ ጊሪሳፌ ዴንዲዳይሳን ቢታ ቦላ ዲዛ ዴሬይ ሂርጋናኔ ሜቶታና። ኢሳ 13፡10፤ ሂዚ 32፡7፤ ኢዩ 2፡31፤ ኣጁ 6፡12-13 26 ሳሎ ዎልቃማቲ ቃጺዛ ጊሻስ ኣሳይ ቢታ ቦላ ኣዜ ሃናኔሻ ጉሳኒኔ ናጎን ጻላ ዳቡራና። 27 ሄ ዎዴ ኣሳ ናይ ዎልቃራ፥ ጊታ ቦንቾራኔ ሻራራ ዪሺን ቤያና። ዳኔ 7፡13፤ ኣጁ 1፡7 28 ኢንቴካ ሃይቲ ሃ ታ ጊዳይቲ ፖሌቴꬅ ኦይኪሺን ኢንቴስ ኣቴꬃ ዎዴይ ማቲዳ ጊሻስ ሲቲ ጊ ኤቂቴ፤ ኢንቴ ኣይፌ ፑዴ ꬎቁ ሂስቲቴ» ጊዴስ።
ጎዳ ዩሳ ማላቲዛ ባላሴ ሚꬃይ ሌሚሶ
29-30 ካሌꬂዲ፥ «ባላሴ ሚꬂኔ ሃራ ሚꬃታ ኡባ ጼሊቴ፤ ሄ ሚꬃቲ ሃይꬅ ኬሲሺን ኢንቴ ቤኢዛ ዎዴ ቦኔይ ማቲዳይሳ ኢንቴ ኤሬታ። 31 ሄሳꬆካ ሃይታንቲ ጌቴቲዳይቲ ፖሌቲሺን ኢንቴ ቤኢዛ ዎዴ ጾሳ ካዎቴꬂ ኢንቴኮ ማቲዳይሳ ኤሪቴ።
32 «ታ ኢንቴስ ቱሙ ጋይስ፤ ሃይሲ ዉሪ ፖሌታና ጋካናስ ሃ ዬሌታይ ኣꬌና። 33 ሳሎይኔ ሳኣይ ኣꬋና ሺን ታ ቃላይ ኣꬌና።
34 «ሂስቲኮ ዎጋይ ባይንዳ ዱሳን፥ ዳሮ ኡሻኒኔ ዱሳስ ሂርጋን ኢንቴ ዎዚናይ ዳቡሮፖ፤ ሄሳ ኦꬆንታ ኢጺኮ ሄ ጋላሳይ ኢንቴ ቆፖንታ ናርጻ ማላ ኢንቴ ቦላ ጋኮንታ ማላ ናጌቲቴ። 35 ሃይሲ ቢታ ቦላን ዲዛ ኣሳ ኡባ ቦላ ጋካና። 36 ሄሳ ጊሻስ ቡሮ ያናይሳፌ ኢንቴ ኬሲ ኤካና ማላኔ ኣሳ ና ሲንꬃን ኤቃናስ ዳንዳያና ማላ ኡባ ጋላስ ሚኒዲ ዎሲቴ» ጊዴስ።
37 ዬሱሲ ጋላስ ጋላስ ጾሳ ኬꬃን ታማርሲ ታማርሲዲ ኦማርስ ኦማርስ ዳብራዛይቴ ጌቴቲዛ ዙማ ቦላ ኬዚ ኬዚ ኣቄስ። ሉቃ 19፡47 38 ኣሳይ ዉሪካ ኢዛፔ ሲያናስ ማላዶ ዎንታራ ዬሱሳኮ ጾሳ ኬꬄ ዬስ።