22
ዬሱሳ ቦላ ማቄቴꬅ
(ማቶ 26፡1-5፤ 14፡16፤ ማር 14፡1-2፤ ዮሃ 11፡45-53)
1 ሄ ዎዴ ፓዚጋ ጌቴቲዛ ኡኬꬃራ ቦንቼቲዛ ባኣሌይ ማቲ ኡቲዴስ። ኬሳ 12፡1-27 2 ቄሴታ ሃላቃቲኔ ጻፌቲ ሃንኮ ዴሬ ኣሳስ ባቢዛ ጊሻስ ዬሱሳ ꬋይሳና ኦጌ ኮዪዳ።
ዬሱሳ ኣꬂ ኢማናስ ዩሁዳ ዞሬቴꬅ
(ማቶ 26፡14-16፤ ማር 14፡10-11)
3 ዬሱሳ ካሊዛ ታማኔ ናምኣታፔ ኣስቆሮንቶ ዴሬ ኣስ ዩሁዳ ጌቴቲዛይሳን ጻላኤይ ጌሊዴስ። 4 ዩሁዳይካ ቄሴታ ሃላቃታኮኔ ጾሳ ኬꬃ ኣላፌታኮ ቢዲ ኢስታስ ዬሱሳ ዎስቲ ኣꬂ ኢማናኮ ኢስታራ ዞሬቲዴስ። 5 ኢስቲካ ሄሳን ኡፋዬቲዲ ሚሼ ኢማናስ ኢዛራ ጊጊዳ። 6-7 ዩሁዳይካ ኢስታ ቆፋ ዶሲዴስ፤ ዬሱሳ ኢስታስ ኣሲ ቤኦንታ ኣꬂ ኢማናስ ኢንጄ ዎዴ ናጊሺን ፓዚጋ ዶርሳ ሹኪዲ ኡኬꬃራ ቦንቺዛ ባኣሌ ጋላሲ ጋኪዴስ።
ዬሱሲ ባና ካሊዛይታራ ፓዚጋ ካዎ ሙስ
(ማቶ 26፡17-25፤ ማር 14፡12-21፤ ዮሃ 13፡21-30)
8 ዬሱሲካ ባና ካሊዛይታ፥ «ፓዚጋ ካዎ ማናስ ቢዲ ኑስ ጊግሲቴ» ጊዲ ጴጽሮሳኔ ዮሃኒሳ ኪቲዴስ።
9 ኢስቲካ፥ «ኑ ኣዋን ጊጊሳና ማላ ኮያይ?» ጊዳ።
10 ኢዚካ ዛሪዲ፥ «ኢንቴ ጌዴ ዬሩሳላሜ ካታማ ጌሊሺን ሃꬃ ኦቶ ቶኪዳ ኣሲ ኢንቴና ዴማና፤ ኢንቴካ ኢዚ ቢዲ ጌሊዛ ኬꬄ ጋካናስ ኢዛ ካሊቴ። 11 ኬꬃዴስ፥ ‹ኣስታማሬይ ታና ካሊዛይታራ ፓዚጋ ካዎ ማናስ ኢማꬃ ኬꬂ ኣዋን ዲዜ?› ጌስ ጊቴ። 12 ኢዚካ ኢማꬃስ ጊጌቲዳ ኣሆሶ ኢንቴና ቤሳና፤ ኢዚ ቤሲዛሶን ጊግሲቴ» ጊዴስ። 13 ኢስቲካ ቢዲ ዬሱሲ ጊዳ ማላ ኬꬃ ዴሚዲ ፓዚጋ ሄን ጊግሲዳ።
ጎዳ ካዎ ኤኮ ዎጋ
(ማቶ 26፡26-30፤ ማር 14፡22-26፤ 1ቆሮ 11፡23-25)
14-15 ዎዴይ ጋኪዳ ማላ ዬሱሲ ሃዋሬታራ ቁማ ማዳን ኡቲዲ፥ «ታኒ ዋዬ ቤያናፔ ካሴታዳ ሃይሳ ፓዚጋ ኢንቴናራ ኢሲፌ ማናስ ኬሃ ኣሞታዲስ። 16 ታ ኢንቴስ ቱሙ ጋይስ፤ ጾሳ ካዎቴꬃን ሃይሳ ቢርሼꬂ ፖሌታና ጋካናስ ሃይሳ ፓዚጋ ናምኣንꬆ ታ ኢንቴናራ ሚኬ» ጊዴስ።
17 ዎይኔፔ ኦሴቲዳ ኡሻ ጹኣራ ኤኪዲ ጾሳ ጋላቲ ሲሚዲ፥ «ሄኢቴ፤ ዉሪካ ኢዛፔ ኡዪቴ» ጊዲ ኢስታስ ኢሚዴስ። 18 «ታ ኢንቴስ ቱሙ ጋይስ፤ ሃይሳፌ ጉዬ ጾሳ ካዎቴꬂ ያና ጋካናስ ናምኣንꬆ ሃ ዎይኔ ኡሻፌ ኡዪኬ» ጊዴስ።
19 ኡኬꬃ ኤኪዲ ጾሳ ጋላቲዴስ፤ ኢዛፔ ኢስታስ ሜንꬂ ኢሚዲ፥ «ሃይሲ ኢንቴ ጊሻስ ኢሜታና ታ ኣሾ ሌሚሶ ጊዲዛ ጊሻስ ሃይሳ ኡባ ዎዴ ታና ቆፓናስ ኦꬂቴ» ጊዴስ። 20 ኢዛꬆካ ካዎፔ ጉዬ ኡሻ ጹኣ ዴንꬂዲ፥ «ሃይሲ ኡሻይ ኢንቴ ጊሻስ ታ ሱꬃን ሃናና ኦራꬃ ጫቆ ዎጋ። ኤር 31፡31-34
21 «ጊዶ ኣቲን ታና ኣꬂ ኢማናዴ ኩሼይ ታ ኩሼራ ኢሲፌ ማዳን ዴስ። ማዛ 41፡9 22 ኣሳ ናይ ካሴቲዲ ኢዛ ጊሻስ ሃናናይሲ ዉሪ ኡቲዳ ማላ ኢዚ ባና፤ ጊዶ ኣቲን ኢዛ ኣꬂ ኢሚዛዴስ ኣዬ ኣና!» ጊዴስ።
23 ኢስቲካ ሄሳ ኦꬃናይ ኦኔ? ጊዲ ባ ጊዶን ኢሶይ ኢሳ ኦይሼሬꬂዳ።
24 ቃሴካ፥ «ኦኒ ኦናፔ ኣꬊዛኮ» ጊዲ ባ ጊዶን ኢሶይ ኢሳራ ፓላሜቲዳ። ማቶ 18፡1፤ ማር 9፡34፤ ሉቃ 9፡46 25 ዬሱሲካ ኢስታ፥ «ዴሬ ሃሪዛ ካዎቲ ባ ዴሬ ኣሳ ዎልቃራ ሃሬቴሲኔ ኢስቲካ ሎኦ ካዎታ ጌቴቲዲ ጼይጌቴቴስ። ማቶ 20፡25-27፤ ማር 10፡42-44 26 ኢንቴ ጊዲኮ ሄሳꬆ ሃኖፒቴ፤ ኢንቴፌ ጊታ ጊዲዳዴይ ዎይኮ ታ ኦፔካ ኣꬋይስ ጊዛ ኣሲ ኡባፌ ቄሪ ና ማላ ጊዶ፤ ሃሪዛዴይ ሃሬቲዛዴ ማላ ጊዶ። ማቶ 23፡11፤ ማር 9፡35 27 ቁማ ኤቂዲ ሚዚዳዴፌኔ ኡቲዲ ሚዛዴፌ ኦኒ ኣꬊዜ? ኡቲዲ ሚዛዴ ጊዴኔ? ታኒ ቃሴ ኢንቴ ጊዶን ኣሽካራ ማላ ዳይስ። ዮሃ 13፡12-15
28 «ኢንቴ ጊዲኮ ታፔ ሻኬቶንታ ታ ዋዪሺን ታ ማታን ኤቂዳይታ። 29 ታ ኣዋይ ታና ካዎꬂዳይሳ ማላ ታኒካ ታ ካዎቴꬃን ኢንቴና ካዎꬃና። 30 ሄሲካ ታ ካዎቴꬃን ታ ማዳፌ ኢንቴ ማና ማላኔ ኡያና ማላ፤ ቃሴካ ታ ካዎቴꬃ ኣልጋን ኡቲዲ ታማኔ ናምኡ ኢስራኤሌ ናይታ ቦላ ፒርዳናሳ» ጊዴስ። ማቶ 19፡28
ጴጽሮሲ ኢዛ ካዳናይሳ ዬሱሲ ካሴቲዲ ዮቲዴስ
(ማቶ 26፡31-35፤ ማር 14፡27-31፤ ዮሃ 13፡36-38)
31 ቃሴካ ዬሱሲ ሲሞና ጼይጊዲ፥ «ሲሞና! ጻላኤይ ኢንቴና ጊስቴ ማላ ሱራጋናስ ዎሲዴስ። 32 ጊዶ ኣቲን ታኒ ኔፔ ኣማኖይ ꬋዮንታ ማላ ኔ ጊሻስ ጾሳ ዎሳዲስ፤ ኔካ ሲሚዳ ዎዴ ኔ ኢሻታ ሚንꬄꬃ» ጊዴስ።
33 ሲሞኒካ ዛሪዲ፥ «ጎዶ! ታ ኔናራ ቃሼታናሲኔ ሃይቃናስ ጊጋ ኡታዲስ» ጊዴስ።
34 ዬሱሲካ ዛሪዲ፥ «ጴጽሮሳ! ሃች ኩቶይ ኢሲቶ ዋሳናስ፥ ‹ታ ኢዛ ኤሪኬ› ጋዳ ሄꬑቶ ኔ ታና ካዳና» ጊዴስ።
35 ቃሴካ ዬሱሲ ኢስታ፥ «ታ ኢንቴና ካሴ ጫማይ፥ ኮሮጆይኔ ቃራጺቴይ ባይንዳ ኪቲዳ ዎዴ ኢንቴስ ኣዚ ፓጪዴ?» ጊ ኦይቺዴስ። ኢስቲካ፥ «ኣይኮይካ ፓጪቤና» ጊዳ። ማቶ 10፡9-10፤ ማር 6፡8-9፤ ሉቃ 9፡3፤ 10፡4
36 ኢዚካ ዛሪዲ፥ «ሃኢ ጊዲኮ ኮሮጆይካ፥ ቃራጺቴይካ ዲዛዴይ ኦይኮ፤ ጊꬃ ማሻይ ባይንዳዴይ ባ ማይኦ ባይዚዲ ሻሞ። 37 ታ ኢንቴስ ቱማ ጋይስ፤ ‹ማካላታራ ኢዚ ኢሲፌ ታይቤቲዴስ› ጌቴቲ ካሴ ጻፌቲዳ ቃላይ ታ ቦላ ፖሌታና ቤሴስ፤ ታ ጊሻስ ጻፌቲዳይሳስ ፖሎይ ቱማፔ ጋኪዴስ» ጊዴስ። ኢሳ 53፡12
38 ኢዛ ካሊዛይቲ ቃሴ፥ «ጎዶ! ሄኮ ናምኡ ጊꬃ ማሻቲ ሃይሳን ዴቴስ» ጊዳ። ኢዚካ ኢዛ ጊሻስ፥ «ሃይሲ ጊዳና» ጊዴስ።
39 ካሴ ኢዛስ ሎሴ ጊዲዳ ማላ ፑዴ ዳብራዛይቴ ጌቴቲዛ ዙማ ቦላ ኬዚ ቢዴስ። ኢዛ ካሊዛይቲካ ኢዛ ካሊ ቢዳ። 40 ሄ ጋኪዳ ማላ፥ «ኢንቴ ፓጬን ጌሎንታ ማላ ዎሲቴ» ጊዴስ። 41 ዬሱሲ ባና ካሊዛይታፔ ኣሲ ሹች ኦሊዲ ጋꬃናሶ ማላ ሃኪ ቢዲ ጉልባቲ ዎሲዴስ። 42 «ታ ኣዋዉ! ኔ ሼኔ ጊዲኮ ሃኖ ሜቶዮ ታፔ ዲጋ፤ ጊዶ ኣቲን ኔ ሼኔይ ሃኖፔ ኣቲን ታ ሼኔይ ሃኖፖ» ጊዲ ዎሲዴስ። 43 ሳሎፔ ኪታንቻይ ቆንጪዲ ዬሱሳ ሚንꬄꬂዴስ። 44 ኢዚካ ኬሂ ጹጌቲዲ ዎሲሺን ኢዛ ኣሳቴꬃፌ ጫዋይ ሱꬃ ማላ ጉኪዴስ።
45 ዎሳፔ ዴንዲዲ ባና ካሊዛይታኮ ቢዴስ። ኢስቲካ ኢዛስ ሚሼቲዲ ቆፒሺን ꬊስኮይ ኤፊዳሼ ዬሱሲ ኢስታኮ ዪዲ፥ 46 «ኣይስ ꬊስኬቲ? ኢንቴ ፓጬን ጌሎንታ ማላ ሃኢ ዴንዲዲ ዎሲቴ» ጊዴስ።
ዬሱሲ ኣꬊ ኢሜቴꬂኔ ኦይኬቴꬅ
(ማቶ 26፡47-56፤ ማር 14፡43-50፤ ዮሃ 18፡3-11)
47 ኢዚ ቡሮ ሃሳያን ዲሺን ዬሱሳ ካሊዛይታፔ ኢሶይ ዩሁዳ ጌቴቲዛይሲ ባናራ ዳሮ ኣሳ ካሌꬂ ኤኪ ዪዲ ዬሱሳ ዬራናስ ኢዛኮ ሺቂዴስ። 48 ጊዶ ኣቲን ዬሱሲ ኢዛ፥ «ዩሁዳ! ታና ኣሳ ና ዬሮን ኣꬃ ኢማይ?» ጊዴስ።
49 ዬሱሳ ዩዪ ኣꬊ ዲዛ ኣሳይ ሃኖዛ ሎኤꬂ ጼሊዲ፥ «ጎዶ! ሃይታንታ ማሻራ ቡꬂኖ?» ጊዳ። 50 ኢስታፌ ኢሶይ ቄሴታ ኣላፌ ኣሽካራዛ ኡሻቻ ሃይꬅ ማሻራ ቃንጺዴስ።
51 ዬሱሲ ኢስታ፥ «ኢንቴ ሃኢ ታስ ኣጊቴ!» ጊዲ ኣሽካራዛ ሃይꬅ ቦቺዲ ፓꬂዴስ።
52 ቃሴካ ኢዛ ኦይካና ዪዳ ቄሴታ ሃላቃታ ጾሳ ኬꬃ ኣላፌታኔ ጪማታ፥ «ፓንጋ ኦይኪዛ ኣሳ ማላ ጊꬃ ማሻኔ ዱርቃ ኤኪዲ ዪዴቲ? 53 ጋላስ ጋላስ ታ ኢንቴናራ ጾሳ ኬꬃን ዲሺን ታ ቦላ ኩሼ ዎꬂቤኬታ፤ ሃይሲ ꬉማይ ካዎቲዳ ኢንቴ ዎዴ» ጊዴስ።
54 ሄሳፌ ጉዬ ዬሱሳ ኦይኪ ኤኪዲ ቄሴታ ሃላቃሶ ጌሊዳ፤ ጴጽሮሲካ ዬሱሳ ሃሆራ ካሊዴስ። 55 ኣሳይ ቄሴታ ሃላቃ ጊቤ ጊዶን ታማ ኤꬂዲ ሆኢሼ ኢሲ ቦላ ኡቲዳሼ ጴጽሮሲካ ኢስታራ ኢሲፌ ኡቲዴስ። 56 ኢሲ ጋራዴያ ጴጽሮሲ ታማ ሆኢዛይታራ ኡቲዳይሳ ቤያዳኔ ቲሺ ሂስታ ጼላዳ፥ «ሃይሲ ኣዴዚካ ዬሱሳራ ዴስ!» ጋዱስ።
57 ጴጽሮሲካ፥ «ሃኔ ማጫሳዬ! ታ ኢዛ ኤሪኬ» ጊዲ ካዲዴስ።
58 ጉꬅ ጋምኢሺን ሃራ ኢሳዴይ ኢዛ ቤኢዲ፥ «ኔካ ኢዛራ ዲዛይታፔ ኢሳ ጊዲኪ?» ጊዴስ። ጴጽሮሲካ፥ «ሃይሶ ታኒ ኢስታራ ዲኬ!» ጊዴስ።
59 ኢሲ ሳቴ ማላ ጋምኢሺን ሃራ ኣሲ ቃሴካ፥ «ጋሊላ ኣስ ጊዲዛ ጊሻስ ሲꬌይ ባይንዳ ሃይሲ ኢዛራ ዴስ» ጊዴስ።
60 ጴጽሮሲካ ቃሴ፥ «ሃይሶ ኔ ጊዛዴ ታ ኤሪኬ!» ጊዴስ። ሂኖ ጊ ኬሶንታ ዲሺን ኩቶይ ዋሲዴስ። 61 ጎዳይካ ጴጽሮሳኮ ዪሼ ጼሊን ጴጽሮሲ፥ «ሃች ኩቶይ ዋሳናስ ኔ ታና ሄꬑቶ ካዳና» ጊዲ ጎዳይ ካሴ ዮቶ ቃላይ ኢዛ ዎዚናን ካርፒ ጊዴስ። 62 ጴጽሮሲካ ካሬ ኬዚዲ ሂቂሚ ዬኪዴስ።
63 ዬሱሳ ቃቺዲ ናጊዛ ኣሳቲካ ኢዛ ቦላ ቂꬊ ቂꬊ ካኢሼ ሾጬሬꬂዳ። 64 ኢዛ ኣይፌ ጎዚዲ፥ «ኔ ናቤ ጊዲኮ ኔና ሾጪዳይ ኦናኮ ኣኔ ኤራ!» ጊዲ ኦይቺዳ። 65 ሃራ ዳሮ ጫሻ ቃላራ ካዉሺዳ።
ዬሱሳ ኣይሁዳታ ፒርዳ ዱላታ ሲንꬅ ኤፊዳ
(ማቶ 26፡59-66፤ ማር 14፡55-64፤ ዮሃ 18፡19-24)
66 ጋዴይ ዎንቲን ዴሬ ጪማቲ፥ ቄሴታ ሃላቃቲኔ ሙሴ ዎጋ ታማርሲዛይቲ ዱላታ ሺቂዲ ዬሱሳ ዱላታኮ ሺሺዳ። 67 ኢስቲካ ዬሱሳ፥ «ኔ ኪርስቶሳ? ኣኔ ኑስ ዮታ» ጊዳ። ዬሱሲካ፥ «ታ ኢንቴስ ዮቲዳኮካ ታና ኣማኔኬታ። 68 ታ ኢንቴና ኦይቺዳኮ ታስ ዛሬኬታ። 69 ጊዶ ኣቲን ሃኢፔ ዶሚዲ ኣሳ ናይ ዎልቃማ ጾሳ ኡሻቻን ኡታና» ጊዴስ።
70 ሄ ዎዴ ዉሪካ፥ «ሂስቲን ኔ ጾሳ ና?»*ጾሳ ና? ጊዛ ኦይሻይ ኢሲ ኢሲ ባጋ ጋሞꬆ ቃላን ጾሳ ናይ? ጌቴቲ ኦይሼቴስ። ጊዲ ኦይቺዳ። ኢዚካ፥ «ታ ጾሳ ና ጊዲዳይሳ ኢንቴካ ጌታ» ጊዴስ።
71 ኢስቲካ፥ «ሄኮ ኢዚ ባ ዶናራ ማርካቲሺን ኑ ሃይꬃራ ሲዪዶስ፤ ሃይሳፌ ሃራ ማርካ ኣዛስ ኮሺዜ?» ጊዳ።