ማርቆሲ ጻፊዳ
ኑ ጎዳ ዬሱስ ኪርስቶሳ ሚሺራቾ ቃላ
ጊዶ ቆፋ
ማርቆሳ ሚሺራቾ ቃላይ፥ «ሃይሲ ጾሳ ና ዬሱስ ኪርስቶሳ ሚሺራቾ ቃላስ ኮይሮ» ጉሳን ዶሜስ። ሃይሳ ሃ ሚሺራቾ ቃላዛ ጊዶን ዬሱሲ ኦሳንቻኔ ኢዚ ጎዳቴꬃራ ዲዛዴ ጊዲ ሺቂዴስ። ጎዳቴꬂካ ኢዛ ቲሚርቴን፥ ዳይዳንꬃታ ቦላ ዲዛ ዎልቃኒኔ ኢዚ ኣሳ ናጋራ ኣቶ ጊዳይሳን ኤሬቲዴስ። ዬሱሲ፥ «ናጋራ ኣይሌቴꬃፌ ኣሳ ኬሲ ኤካናስ ታ ሼምፖ ኣሳ ጊሻስ ኣꬃ ኢማናስ ዪዳ ኣሳ ናይ ታና» ጊዲ ባርካ ዮቲዴስ።
ማርቆሲ ዬሱሳ ታሪኬ ሺሺዳይ ቆንጬኒኔ ዎልቃይ ኩሚዳ ኦጌራ ጊዲሺን ኢዚ ቲሺ ሂስቲ ጼሊዳይ ዬሱሳ ቃላኔ ኢዛ ቲሚርቴዛ ጊዶንታ ኢዚ ኦꬂዳ ጊታ ማላታ ኦሶታ። ኢዚ ጻማቂዛ ዮሃኒሳ ጊሻስ፥ ዬሱሳ ጺንቃታ ጊሻሲኔ ኢዚ ኤኪዳ ሜቶዛ ጊሻስ ቃንꬃራ ዮቲዳፔ ጉዬ ዬሱሲ ታማርሲዳ ቲሚርቴዛ ጊሻሲኔ ኢዚ ሃርጋንቻታ ፓꬂዳይሳ ቢርሺ ዮቴስ። ዬሱሳ ካሊዛይቲ ጉዬፔ ዬሱሳ ሎኤꬂ ኤሪ ኤሪ ቢዳ ማላ ዬሱሳራ ኤቄቲዛይቲ ቃሴ ዬሱሳ ካሴፔ ኣꬂ ኢጺ ኢጺ ቢዳ። ማጻፋስ ዉርሴꬃ ሼምፖቲ ዬሱሲ ቢታ ቦላ ዴኢዳ ዉርሴꬃ ላይꬃን ዉርሴꬃ ሳሚንታን ፖሌቲዳ ኦሶታ፥ ሃራፔካ ኢዛ ካቄቴꬃ ጊሻሲኔ ኢዛ ዴንꬃ ጊሻስ ዮቴቴስ።
ማርቆሳ ሚሺራቾ ቃላስ ዉርሴꬃን ዲዛ ናምኡ ኪፊሌቲ ኢሲ ኢሲ ማጻፋታን ጻላ ዴቴስ።
ሃ ማጻፋይ ኦይኪዳ ኩሜꬃ ቆፋ
ሚሺራቾ ቃላስ ኮይሮ ዶሜꬅ 1፡1-13
ዬሱሲ ባ ኦሶ ኮይሮ ጋሊላን ዶሚዴስ 1፡14—9፡50
ዬሩሳላሜን ዬሱሳ ኦሶ 10፡1-52
ዬሩሳላሜኒኔ ሄ ሄራን ዉርሴꬃ ሳሚንታን ዬሱሳ ጋኪዳ ሜቶ 11፡1—15፡47
ሃይቆፔ ጎዳ ዴንꬅ 16፡1-8
ሃይቆፔ ዴንዲዳ ጎዳ ቆንጬꬂኔ ፑዴ ሳሎ ቡስ 16፡9-20
1
ጻማቂዛ ዮሃኒሳ ማርካቴꬅ
(ማቶ 3፡1-12፤ ሉቃ 3፡1-18፤ ዮሃ 1፡19-28)
«ሄኮ ኔስ ኦጌ ሎኤꬃናስ
ታ ኪታናዴ
ኔፔ ሲንꬃራ ዬዳና። ሚል 3፡1
3 ‹ጎዳስ ኦጌ ጊግሲቴ፤
ኢዚ ባና ኦጌ ሱሪሲዲ ኦꬂቴ›
ጊሼ ባዞ ቢታን
ዋሲዛ ጊሪስ»
ጌቴቲ ጻፌቲዴስ። ኢሳ 40፡3
4 ሄሳꬆካ ጻማቂዛ ዮሃኒሲ ኣሳ ጻማቂሼ፥ «ኢንቴ ናጋራፔ ሲሚዲ ጻማቄቲቴ፥ ጾሲ ኢንቴ ናጋራ ኣቶ ጋና» ጊ ኣዋጂሼ ባዞራ ኬዚ ዎꬊዴስ። 5 ዩሁዳ ዴሬይ ኩሜꬅ ዬሩሳላሜ ኣሳይ ዉሪ ዮሃኒሳኮ ቢ ቢዲ ባ ናጋራ ናጋራ ፓጺ ፓጺ ዮርዳኖሴ ሻፋን ዮሃኒሳ ኩሼን ጻማቄቲዴስ። 6 ሄ ዎዴ ዮሃኒሲ ማይኢዛይ ጋሜላ ኢስኬፌ ኦሴቲዳ ማይኦ፤ ቃሴ ባ ጼሳን ዳፎ ጊጼስ፤ ኢዚ ሚዛ ቁማይ ቦሌኔ ዴጌራ ኤሳ። 2ካዎ 1፡8 7 ኢዚ፥ «ታኒ ሆካዳ ኢዛ ጫማ ቃሾ ቢርሻናስ ቤሶንታዴይ፥ ታፔ ኣꬊዛዴይ ታፔ ጉዬራ ያና። 8 ታኒ ኢንቴና ሃꬃን ጻማቃይስ፤ ኢዚ ጊዲኮ ኢንቴና ጺሎ ኣያናን ጻማቃና» ጊ ሳባኪዴስ።
ዬሱሳ ጻማቄቴꬂኔ ፓጬቴꬅ
9 ሄ ዎዴ ዬሱሲ ጋሊላ ጊዶን ዲዛ ናዚሬቴ ጌቴቲዛ ካታማይፔ ዮርዳኖሴ ሻፋ ዪዲ ዮሃኒሳ ኩሼን ጻማቄቲዴስ። 10 ዬሱሲ ጻማቄቲዲ ሃꬃፌ ኬዚዳ ማላ ሳሎይ ዶዬቲን ጺሎ ኣያናይ ኢዛ ቦላ ሃራጴ ሚሳቲዲ ዎꬊሺን ቤዪዴስ። 11 ቃሴካ፥ «ታ ዶሲዛ ናይ ኔና፥ ኔናን ታ ኡፋዬታይስ» ጊዛ ቃላ ጊሪሲ ፑዴ ሳሎፔ ሴቴቲዴስ። ሜꬌ 22፡2፤ ማዛ 2፡7፤ ኢሳ 42፡1፤ ማቶ 3፡17፤ 12፡18፤ ማር 9፡7፤ ሉቃ 3፡22
12 ሄራካ ጺሎ ኣያናይ ኢዛ ዱጌ ባዞ ካሌꬂ ኤፊዴስ። 13 ሄን ባዞንካ ኦይዱ ታሙ ጋላስ ጋካናስ ጻላኤራ ፓጬቲሼ ጋምኢዴስ፤ ዶኣታራ ኢሲፌ ዴኢዴስ፤ ኪታንቻቲካ ኢዛ ማዲዳ።
ዬሱሳ ካላና ማላ ኦይዱ ኣሳታ ጼይጌቴꬅ
14-15 ዮሃኒሲ ቃሾ ኬꬅ ጌሊዳፔ ጉዬ ዬሱሲ ጾሳ ሚሺራቾ ቃላ ሳባኪሼ ጋሊላ ቢዲ፥ «ዎዴይ ጋኪዴስ፤ ጾሳ ካዎቴꬂ ማቲዴስ፤ ናጋራፔ ሲሚቴ፤ ሚሺራቾ ቃላን ኣማኒቴ» ጊዲ ሳባኪዴስ።
16 ዬሱሲ ጋሊላ ኣባ ኣቻራ ኣꬊን ሲሞኒኔ ኢዛ ኢሻ ኢንዲራሲ ሞሌ ኦይኪዛይታ ጊዲዳ ጊሻስ ኢስቲ ሞሌ ኦይኪዛ ጊቴ ኣባን ዬጊሺን ቤዪዴስ። 17 ዬሱሲ ኢስታ፥ «ሃ ዪቴ! ታና ካሊቴ፤ ኢንቴ ሞሌ ኦይኪ ሺሺዛ ማላ ታ ኢንቴና ኣስ ኦይኪዛይታ ኦꬃና» ጊዴስ። 18 ኢስቲ ሄራካ ሞሌ ጊቴዛ ዬጊ ኣጊዲ ዬሱሳ ካሊዳ።
19 ጉꬅ ጌዴ ሲንꬄ ኣꬊዲ ዛብዶሳ ና ያቆቤይኔ ኢዛ ኢሻ ዮሃኒሲ ዎጎሎን ኡቲዲ ሞሌ ጊቴ ጊግሲሺን ቤኢዲ ሄራካ ኢስታ ጼይጊዴስ። 20 ኢስቲካ ባ ኣዋ ዛብዶሳኔ ኢዛስ ቃጻሬቲ ኦꬂዛ ኣሳታራ ኢሲፌ ዎጎሎዛ ጊዶን ኣጊዲ ዬሱሳ ካሊ ቢዳ።
ዬሱሲ ፓꬂዳ ቱና ኣያናይ ኢዛ ቦላ ዲዛዴ
21 ሄፔካ ቂፊርናሆሜ ቢዳ። ሄራካ ዬሱሲ ኣይሁዳታ ሳምባታ ጋላስ ኣይሁዳታ ዎሳ ኬꬅ†ኣይሁዳታ ዎሳ ኬꬅ ጌቴቲዛይሲ ኣማራꬆ ቃላን «ሚኩራቤ» ጌቴቴስ። ጌሊዲ ታማርሶ ኦይኪዴስ። 22 ጻፌታ ማላ ጊዶንታ ጎዳቴꬃራ ዲዛ ኣሳ ማላ ኢዚ ታማርሲን ኣሳይ ዉሪ ኢዛ ቲሚርቴዛን ማላሌቲዴስ።
23 ሄ ዎዴ ኣይሁዳታ ዎሳ ኬꬃን ቱና ኣያናይ ኢዛ ቦላ ዲዛ ኢሳዴይ፥ 24 «ናዚሬቴ ዬሱሳ ኔ ኑፔ ኣይ ኮያይ? ኑና ꬋይሳና ያዲ? ኔ ኦናኮ ታ ኔና ኤራይስ፤ ኔኒ ጾሳ ጌሻዛ» ጊዲ ዋሲዴስ።
25 ዬሱስካ ቱና ኣያናዛ፥ «ጮኡ ጋዳ ኢዛፔ ኬዛ!» ጊ ሃንቂዴስ።
26 ቱና ኣያናይ ኣዴዛ ጌንዴሪሲዲ ኢዚ ቃኬቲሺን ኢዛፔ ዋሲሼ ኬዚዴስ። 27 ዴሬይ ዉሪ፥ «ኣሶ ሃይሲ ኣዛ ፓላ? ሃይሲ ጎዳቴꬃራ ዲዛ ኦራꬃ ቲሚርቴ፤ ቱና ኣያናታካ ኣዛዜስ፤ ኢስቲካ ኢዛስ ኣዛዜቴቴስ» ጊ ማላሌቲሼ ኣሳይ ባ ጊዶን ኢሶይ ኢሳ ኦይሼቾ ኦይኪዴስ።
28 ሄራካ ኢዛ ኦሶ ዎሬይ ጋሊላ ዩሾን ዲዛ ዴሬ ኡባን ሲዬቲዴስ።
ዬሱሲ ዳሮ ሃርጋንቻታ ፓꬂዴስ
29 ኣይሁዳታ ዎሳ ኬꬃፌ ኬዚዳ ማላ ያቆቤራኔ ዮሃኒሳራ ኢሲፌ ጌዴ ሲሞናሶኔ ኢንዲራሳሶ ጌሊዳ። 30 ሄ ጌሊዳ ማላ ሲሞና ቦሎቴያ ሚሻ ሃርጌ ሳኬታዳ ኢቺዳይሳ ኢዛስ ዮቲዳ። 31 ሄሳ ጊሻስ ዬሱሲ ኢዚኮ ሺቂዲ ኢዚ ኩሼ ኦይኪ ዴንꬂዴስ። ሚሻይ ኣጊን ኢዛ ዴንዳዳ ኢስታ ሞካዱስ።
32 ኣርሼይ ዉሊዳፔ ጉዬ ጋዴይ ꬉሚሺን ኣሳይ ሃርጋንቻታኔ ዳይዳንꬂ ኦይኪዳ ኣሳ ዉርሲ ዬሱሳኮ ኤኪ ዪዴስ። 33 ሄ ካታማዪን ዲዛ ኣሳይ ዉሪ ኬꬃ ካሬን ሺቂዴስ። 34 ኢዚካ ዱማ ዱማ ሃርጌን ሳኬቲዳይታ ዳሮታ ፓꬂዴስ፤ ዳሮ ዳይዳንꬃታካ ኬሲዴስ፤ ጊዶ ኣቲን ዳይዳንꬃቲ ዬሱሲ ኦናኮ ኤሪዛ ጊሻስ ኢስቲ ሃሳያና ማላ ዬሱሲ ኮዪቤና።
ዬሱሲ ጋሊላን ታማርሲዳ ሚሺራቾ ቃላ
35 ባዞይ ዞኦንታ ዬሱሲ ማላዶ ዎንታራ ዴንዲዲ ኣሲ ባይንዳሶ ቢዲ ሄን ዎሳ ኦይኪዴስ። 36 ሲሞኒኔ ኢዛራ ዲዛይቲ ዬሱሳ ኮያና ኬዚ ቢዳ። 37 ኢስቲ ኢዛ ዴሚዲ፥ «ኣሲ ዉሪ ኔና ኮሻን ዴስ» ጊዳ።
38 ዬሱሲካ፥ «ታ ዪዳይ ታማርሳናስ ጊዲዳ ጊሻስ ሚሺራቾ ቃላ ዮታናስ ማታን ዲዛ ጉታታ ኣኔ ቦስ» ጊዴስ።
39 ሄሳ ጊሻስ ኣይሁዳታ ዎሳ ኬꬃን ጌሊ ጌሊ ሳባኪሼኔ ዳይዳንꬅ ኬሲሼ ጋሊላ ካታማ ኩሜꬃን ዩዪዴስ።
ዬሱሲ ኢንቺራቻ ሃርጊዛዴ ፓꬂዴስ
40 ኢሲ ኢንቺራቻ ሃርጊዛዴይ ዬሱሳኮ ሺቂዲኔ ኢዛ ሲንꬃን ጉልባቲዲ፥ «ኔ ሼኔ ጊዲኮ ኔ ታና ፓꬃና ዳንዳያሳ» ጊ ዎሲዴስ።
41 ዬሱሲካ ኣዴዛስ ሚሼቲዲ ባ ኩሼ ዬዲ ኢዛ ቦቺዲ፥ «ኔ ፓጻና ማላ ታ ኮያይስ፤ ፓጻ!» ጊዴስ።
42 ሄራካ ኣዴዛ ኢንቺራቻ ሃርጌይ ኣጊን ኣዴዚ ፓጺዴስ። 43-44 ዬሱሲካ ኣዴዛስ፥ «ኦናስካ ሃይሳ ኔ ዮቶንታ ማላ ናጌታ፤ ጊዶ ኣቲን ባዳ ቄሴስ ኔና ቤሳ። ዴሬዛስ ማርካ ጊዳና ማላ ኔ ፓጺዳይሳስ ሙሴይ ኣዛዚዳ ያርሾ ሺሻ» ጊዲ ኬሂ ሚንꬂ ዮቲዴስ።
45 ጊዶ ኣቲን ኣዴዚ ኬዚ ቢዲ ባ ቢዳ ኡባሶን ዎሬ ዳርሲ ꬋርጪዴስ። ሄሳ ጋሶን ዬሱሲ ኣይ ካታማንካ ቆንጬራ ጌላናስ ዳንዳይቤና። ሄሳፌ ዴንዲዳይሳን ካታማፔ ካሬራ ኣሲ ባይንዳሶን ዱስ ኦይኪዴስ። ኣሳይ ጊዲኮ ዱማ ዱማሶፔካ ኢዛኮ ዪዴስ።