2
ዬሱሲ ቶሆ ሲላ ኣዴዛ ፓꬂዴስ
(ማቶ 9፡1-8፤ ሉቃ 5፡17-26)
1 ጉꬃ ጋላሳፌ ጉዬ፥ «ዬሱሲ ቂፊርናሆሜ ሲሚዲ ሶን ዴስ» ጊዛ ዎሬ ኣሳይ ሲዪዴስ። 2 ሄሳ ጊሻስ ኬꬃራ፥ ካሬራ ኡቲዛሶይ ꬋያና ጋካናስ ዳሮ ዴሬይ ሺቂዴስ። ኢዚካ ጾሳ ቃላ ኣሳስ ሳባኪዴስ። 3 ኦይዱ ኣስ ዳይቲ ቶሆይ ሲሊዳ ኢሲ ኣስ ቶኪዲ ኢዛኮ ኤሂዳ። 4 ኣሳ ዳሮቴꬃፌ ዴንዲዳይሳን ዬሱሲ ዲዛሶ ጋꬃናስ ዳንዳዮንታ ጊሻስ ዬሱሲ ዲዛ ጊናራ ካራ ቃሪዲ ሃርጋንቻዛ ኢዚ ኢቺዳ ሃላራ *ሃላራ፡ ሃላራ ጊዛይሳ ኢሲ ኢሲ ባጋ ጋሞꬆ ቃላን ዛጳራ ጌቴስ። ዬሱሳ ሲንꬅ ዱጌ ዎꬂዳ። 5 ዬሱሲ ኣሳታ ኣማኖ ቤኢዲ ቶሆይ ሲሊዳ ኣዴዛ፥ «ታ ናዞ! ኔ ናጋራይ ኣቶ ጌቴቲዴስ» ጊዴስ።
6-7 ሄን ጋዳን ኡቲዳ ኢሲ ኢሲ ሙሴ ዎጋ ጻፌቲ ባ ዎዚናራ ሃይሲ ኣዴዚ ዎስቲ ሃይሳꬆ ጊዜ? «ጾሳ ቦላ ጫሻ ቃላ ሃሳዬስ። ኢሲ ጾሳፌ ኣቲን ናጋራ ማራና ዳንዳይዛይ ኦኔ?» ጊዲ ቆፒዳ።
8 ዬሱሲ ሄራካ ኢስቲ ባ ዎዚናን ቆፒዳይሳ ባ ኣያናን ኤሪዲ፥ «ኢንቴ ዎስቲ ሃይሳꬆ ቆፔቲ? 9 ቶሆይ ሲሊዳ ኣዴዛ፥ ‹ኔ ናጋራይ ኣቶ ጌቴቲዴስ› ጉሳፌኔ ‹ዴንዳዳ ኔ ሃላ ቶካዳ ባ› ጉሳፌ ኣዋይሲ ማቲዜ? 10 ጊዶ ኣቲን ኣሳ ናስ ቢታ ቦላን ናጋራ ማራና ጎዳቴꬂ ዲዛይሳ ኢንቴ ኤራና ማላ» ጊዲ ቶሆ ሲላ ኣዴዛ፥ 11 «ዴንዳዳ ኔ ቶኬታ ዪዳ ሃላ ቶካዳ ኔሶ ባ» ጊዴስ።
12 ኢዚካ ዴንዲዲ ኣሳይ ዉሪ ቤዪሺን ሃላ ቶኪዲ ቢዴስ። ሄን ጋዳን ዲዛ ኣሳይ ዉሪ ሃኖዛን ማላሌቲዲ፥ «ካሴ ሃይሳ ማላይ ሃኒን ቤዪቤኮ» ጊዲ ጾስ ጋላቲዴስ።
ሌዌ ጼይጌቴꬅ
(ማቶ 9፡9-13፤ ሉቃ 5፡27-32)
13 ቃሴካ ዬሱሲ ጋሊላ ኣባ ላንቄ ቢዴስ። ዳሮ ዴሬይ ኢዛኮ ዪን ኢዚካ ዪዳ ኣሳ ታማርሲዴስ። 14 ኢዚ ኦጌራ ኣꬊ ቢሺን ኢልፊዮሳ ና ሌዌይ ቃራጻ ሺሺዛሶን ኡቲዳይሳ ቤኢዲ፥ «ሃ ያ ታና ካላ» ጊዴስ። ኢዚካ ዴንዲዲ ዬሱሳ ካሊዴስ።
15 ሄሳፌ ጉዬ ሌዌ ሶን ካꬃ ማዳን ኡቲ ዲሺን ቃራጻ ሺሺዛ ዳሮ ኣሳቲኔ ናጋራንቻቲ ኢዛራ ካሊ ዪዳ ጊሻስ ኢስቲ ዬሱሳራኔ ኢዛ ካሊዛይታራ ኢሲፌ ማዳን ኡቲዳ። 16 ፋርሳዌታ ባጋፌ ጊዲዳ ሙሴ ዎጋ ታማርሲዛይቲ ዬሱሲ ናጋራንቻታራኔ ቃራጻ ሺሺዛይታራ ሚሺን ቤኢዲ ኢዛ ካሊዛይታ፥ «ቃራጻ ቃንጺሲዛይታራኔ ናጋራንቻታራ ኣዛስ ሚዜ?» ጊዲ ኦይቺዳ።
17 ዬሱሲካ ኢስቲ ጊዛይሳ ሲዪዲ፥ «ኣኪሜይ ሃርጋንቻታስ ኮሼስ ኣቲን ሃርጎንታይታስ ጊዴና። ታኒካ ናጋራንቻታ ጼይጋናስ ያዲስ ኣቲን ጺሎታ ጼይጋናስ ያቤኬ» ጊዴስ።
ጾማ ጊሻስ ሺቂዳ ኦይሾ
(ማቶ 9፡14-17፤ ሉቃ 5፡33-39)
18 ዮሃኒሳ ካሊዛይቲኔ ፋርሳዌቲ ጾማ ጾሜቴስ። ኢሲ ኢሲ ኣሳቲ ዬሱሳኮ ዪዲ፥ «ዮሃኒሳ ካሊዛይቲኔ ፋርሳዌታ ካሊዛይቲ ጾሜቴስ ሺን ኔና ካሊዛይቲ ኣዛስ ጾሜቴኔ?» ጊ ኦይቺዳ።
19 ዬሱሲካ ኢስታስ፥ «ሚሺራይ ኢስታራ ዲሺን ሚሺራ ላጌቲ ጾሚ ኤሪዞ? ሚሺራይ ኢስታራ ዲሺን ጾሚ ኤሬቴና። 20 ሚሺራይ ኢስታፌ ኤኬታና ዎዴይ ያና። ሄ ዎዴ ኢስቲ ጾማና።
21 «ጋልኣ ማይኦ ቦላ ኦራꬃ ዎሶ ዎꬂ ሲኪዛዴይ ኦኒካ ዴና፤ ሄሳꬆ ኦꬂኮ ኦራꬃዚ ጋልኣ ዳኪ ዳኪ ዬጌስ፤ ዳኬꬃይካ ካሴፔ ጌዴ ኣꬊ ኢቴስ። 22 ሄሳꬆካ ኦራꬃ ዎይኔ ጫጄ ጋልኣ ሉካሞን ዎꬂዛዴይ ዴና። ዎꬂዛ ጊዲኮ ዎይኔ ጫጄዚ ጋልኣ ሉካሞዛ ꬉሴስ፤ ዎይኔ ጫጄዚኔ ሉካሞዚ ናምኣይ ሞሬቴቴስ። ሄሳ ጊሻስ ኦራꬃ ዎይኔ ጫጄይ ዳናስ ቤሲዛይ ኦራꬃ ሉካሞና» ጊዴስ።
ሳምባታ ጊሻስ ሺቂዳ ኦይሾ
(ማቶ 12፡1-8፤ ሉቃ 6፡1-5)
23 ዬሱሲ ኣይሁዳታ ሳምባታ ጋላስ ጊስቴ ቲያ ጊዶራ ኣꬊሺን ኢዛ ካሊዛይቲ ኢዛራ ኢሲፌ ቢሼ ቲያ ጹጶ ኦይኪዳ። ዛሬ 23፡25 24 ፋርሳዌቲ፥ «ኔና ካሊዛይቲ ሳምባታ ጋላስ ዲጌቲዳ ሚሽ ኣዛስ ኦꬂዞ?» ጊዲ ዬሱሳ ኦይቺዳ።
25 ኢዚካ ኢስታስ፥ «ዳዊቲ ጋፊዲ ሚዛ ሚሽ ኮዪዳ ዎዴ ኢዛራ ኢሲፌ ዲዛይታራ ኢዚ ኦꬂዳይሳ ናባቢቤኬቲ?1ሳሜ 21፡1-6 26 ኣቢያታሬይ ቄሴታ ሃላቃቴꬃን ዲሺን ኢዚ ጾሳ ኬꬄ ጌሊዲ ቄሴቲ ጻላላ ማና ቤሲዛ ዱማ ካꬃ ባስ ሚዲኔ ባናራ ዲዛይታስ ኢሚዴስ» ጊዴስ። ሌዌ 24፡9
27 ቃሴካ ዬሱሲ ኢስታስ፥ «ሳምባታይ ኣሳስ ሜꬌቲዴስ ኣቲን ኣሲ ሳምባታስ ሜꬌቲቤና። 28 ሄሳ ጊሻስ ታ ኣሳ ናይ ሳምባታ ጎዳ» ጊዴስ።