3
ኩሼ ሲሊዳ ኣዴዛ ፓጻቴꬅ
(ማቶ 12፡9-14፤ ሉቃ 6፡6-11)
1 ሃራ ጋላስ ዬሱሲ ኣይሁዳ ዎሳ ኬꬄ ጌሊዴስ። ሄንካ ኩሼይ ሲሊዳዴይ ዴስ። 2 ዬሱሳ ሞታናስ ጋሶ ኮይዛ ኣሳቲ ኢዚ ኣይሁዳታ ሳምባታ ጋላስ ፓꬃናኮን ጊዲ ፓꬂሺን ቤያና ኮዪዳ።
3 ኢዚካ ኩሼይ ሲሊዳ ኣዴዛ፥ «ሄን ሺቂ ኡቲዳ ኣሳ ሲንꬃን ዴንዳ ኤቃ» ጊዴስ። 4 ሄሳፌ ጉዬ ዬሱሲ ኣሳ፥ «ሳምባታ ጋላስ ቤሲዛይ ሎኦ ኦሶዬ? ኢታ ኦሶ? ኣሳ ሼምፖ ኣሾዬ? ዎይኮ ሼምፖ ዎꬎ?» ጊዲ ኦይቺዴስ። ኢስቲካ ጮኡ ጊዳ።
5 ኢስታ ዎዚና ሹቻቴꬃን ሚሼቲዲ ኢዛ ጊዶꬂዲ ዩዪ ኣꬊ ኤቂዳ ኣሳ ሃንቆራ ጼሊዲ ኣዴዛ፥ «ኔ ኩሼዛ ፒዲሳ!» ጊዴስ። ኣዴዚካ ባ ኩሼ ፒዲሲን ኩሼዚ ሙሌራ ፓጺዴስ። 6 ፋርሳዌቲ ኬዚ ቢዲ ኢዛ ዎስቲ ꬋይሳናኮ ሄርዶሳ ባጋ ጊዲዳ ኣሳታራ ዞሬቲዳ።
ኣባ ላንቄን ዳሮ ኣሳ ሺቆ
7 ዬሱሲ ባና ካሊዛይታራ ኣባኮ ቢዴስ። ጋሊላፔኔ ዩሁዳፔ ዪዳ ዳሮ ዴሬይ ኢዛ ካሊዴስ። 8 ኢዚ ኦꬂዛይሳ ሲዪዲ ኣሳይ ዩሁዳፔ፥ ዬሩሳላሜፔ፥ ኤዶሜፔ፥ ዮርዳኖሴ ፒንꬃን ዲዛ ዴሬታፔ ቃሴ ጺሮሴፔኔ ሲዶና ሄራፔ ኢዛኮ ዪዴስ። 9 ኣሳይ ዳሪዳ ጊሻስ ኢዛ ኡንኤꬆንታ ማላ ጉꬃ ዎጎሎ ኢስቲ ጊጊሳና ማላ ባና ካሊዛይታ ኣዛዚዴስ። 10 ኢዚ ዳሮ ሃርጋንቻታ ፓꬂዳ ጊሻስ ሳኮይ ዋዪሲዛይቲ ዉሪ ኢዛ ባ ኩሼራ ቦቻናስ ዳፌቲዳ። ማር 4፡1፤ ሉቃ 5፡1-3 11 ቱና ኣያናቲካ ዬሱሳ ቤኢዳ ማላ ኢዛ ሲንꬃን ኩንዲዲ፥ «ኔኒ ጾሳ ና» ጊዲ ዋሲዳ።
12 ጊዶ ኣቲን ኢዚ ኦናኮ ቱና ኣያናቲ ቆንጪሶንታ ማላ ኬሂፔ ሃንቂዴስ።
ዬሱሳ ካሊዛ ታማኔ ናምኣታ ዶሬቴꬅ
(ማቶ 10፡1-4፤ ሉቃ 6፡12-16)
13 ዬሱሲ ፑዴ ዙማ ቦላ ኬዚዲ ባ ኮይዛይታ ባኮ ያና ማላ ጼይጊዴስ፤ ኢስቲካ ኢዛኮ ዪዳ። 14 ኢዛራ ኢሲፌ ጊዳና ማላኔ ሳባካናስ ዬዳና ማላ ታማኔ ናምኣታ፥ «ሃዋሬታ» ጊ ሱንꬂዴስ። 15 ኣሳፔ ዳይዳንꬃታ ኬሳና ማላ ኢስታስ ጎዳቴꬅ ኢሚዴስ።
16 ኢዚ ሱንꬂዳ ታማኔ ናምኣታ ሱንꬂ ሃይሳፌ ካሊዛይሳ፤ ጴጽሮሳ ጌቴቲዳ ሲሞና፥ 17 ቢኦሪኔጌሴ ዎይኮ ዳዳ ናይታ ጌቴቲዳ ዛብዶሳ ናይታ ያቆቤኔ ዮሃኒሳ፥ 18 ኢንዲራሳ፥ ፒሊጶሳ፥ ባርቴሌሞሳ፥ ማቶሳ፥ ቶማሳ፥ ኢልፊዮሳ ና ያቆቤ፥ ታዶሳ፥ ባ ባጋስ ሚሼቲዛ ሲሞና፥ 19 ዬሱሳ ኣꬂ ኢሚዳ ኣስቆሮንቶ ዩሁዳ።
ዬሱሳኔ ቢኤሊዜቡላ
(ማቶ 12፡22-32፤ ሉቃ 11፡14-23፤ 12፡10)
20 ሄሳፌ ጉዬ ዬሱሲ ኢሲ ሶ ጌሊዴስ። ኢዚኔ ኢዛ ካሊዛይቲ ካꬅ ማና ዎዴይ ኢስታስ ꬋያና ጋካናስ ዴሬይ ቃሴካ ዳሪ ሺቂዴስ። 21 ኢዛ ሃኖታ ሲዪዳ ኢዛ ዳቦቲ፥ «ጎዮንታ ኣጌና» ጊዲ ባናራ ኤኪ ባናስ ኢዚ ዲዛሶ ጋኪዳ።
22 ዬሩሳላሜፔ ዪዳ ጻፌቲካ፥ «ቢኤሊዜቡላ ጌቴቲዛ ዳይዳንꬃታ ሃላቃይ ኢዛ ቦላ ዴስ። ኢዚ ዳይዳንꬃታ ኬሲዛይ ዳይዳንꬃታ ሃላቃ ዎልቃንኮ!» ጊዳ።
23 ኢዚካ ኢስታ ጼይጊዲ ሌሚሶራ፥ «ጻላኤይ ኣሳፔ ጻላኤ ዎስቲ ኬሳኔ? 24 ባ ጊዶን ሻኮይ ዲዛ ካዎቴꬂ ሚናናስ ዳንዳዬና። 25 ኢሲ ኬꬃ ኣሲካ ባ ጊዶን ሻኬቲኮ ኤቃናስ ዳንዳዬና። 26 ሄሳꬆካ ጻላኤይ ባ ጋርሳን ኢሶይ ኢሳራ ሻኬቲኮኔ ኢጼቲኮ ሚኒ ኤቃናስ ዳንዳዬና። ሄሲካ ኢዛስ ዉርሴꬅ ጊዳና።
27 «ሄሳ ጋሶን ኢሳዴይ ኮይሮቲዲ ዎልቃማ ኣስ ቃቾንታ ዲሼ ዎልቃማዛ ሶ ጌላናሲኔ ኢዛ ሚሼ ቦንቃናስ ዳንዳዬና፤ ኢዛ ኣቆ ቦንቃናስ ዳንዳዬቲዛይ ዎልቃማዛ ቃቺኮ ጻላላ።
28 «ታ ኢንቴስ ቱሙ ጋይስ፤ ኣሳ ናይታስ ናጋራይኔ ጫሺ ዉሪ ማሬታና። 29 ጊዶ ኣቲን ጺሎ ኣያና ቦላ ጫሻ ቃላ ሃሳይዛ ኣሳ ኡባስ ሜርናስ ናጋራ ኣጮ ጊዳና ኣቲን ማሬቴና» ጊዴስ። ሉቃ 12፡10 30 ሄሳ ኢዚ ጊዳይ ኢስቲ ኢዛ፥ «ኔ ቦላ ቱና ኣያናይ ዴስ» ጊዳ ጊሻሳ።
ዬሱሳ ኣዬዮኔ ኢዛ ኢሻታ
(ማቶ 12፡46-50፤ ሉቃ 8፡19-21)
31 ሄሳፌ ጉዬ ኢዛ ኣዬያኔ ኢዛ ኢሻቲ ካሬ ዪ ኤቂዲኔ ኣሴ ኢዛኮ ኪቲ ጼይጊሲዳ። 32 ኢዛ ጊዶꬂ ኡቲዳ ዳሮ ኣሳይ፥ «ሄኮ ኔ ኣዬያኔ ኔ ኢሻቲ ካሬን ኤቂዲ ኔና ኮዬቴስ» ጊዳ።
33 ኢዚካ ዛሪዲ፥ «ታ ኣያ ኦኔ? ታ ኢሻቲ ኦናንቴ?» ጊዴስ። 34 ኢዛ ዩዪ ኡቲዳ ኣሳኮ ጼሊዲ፥ «ታ ኣዬያኔ ታ ኢሻቲ ሃይታንታኮ! 35 ጾሳ ሼኔ ኦꬂዛይ ዉሪ ኢዚ ታ ኢሻ፥ ታ ሚቾኔ ታ ኣዮ» ጊዴስ።