4
ዜሬꬅ ዜሪዛዴ ሌሚሶ
(ማቶ 13፡1-9፤ ሉቃ 8፡4-8)
1 ቃሴ ዬሱሲ ሃራ ዎዴ ኣባ ኣቻን ታማርሶ ኦይኪዴስ። ኢዛኮ ኬሂ ዳሮ ዴሬይ ሺቂዳ ጊሻስ ኣባ ጊዶን ዲዛ ዎጎሎ ዲዛሪን ጌሊዲ ኡቲዴስ፤ ኣሳይካ ዉሪ ኣባ ኣቻን ሺቂዴስ። ሉቃ 5፡1-3 2 ኢዚካ ዳሮ ዮኦታ ሌሚሶን ሂዝጊ ታማርሲዴስ። 3 «ሲዪቴ! ኢሳዴይ ዜሬꬅ ዜራናስ ኬዚዴስ። 4 ኢዚ ዜሪሺን ኢሲ ኢሲ ዜሬꬂ ኦጌ ቦላ ዎꬊዴስ። ኦጌ ቦላ ዎꬊዳ ዜሬꬃ ካፎቲ ማጺ ሚዳ። 5 ባጋይ ሜላ ቢታን ዎꬊዴስ። ሄ ቢታይ ሜላ ጊዲዳ ጊሻስ ሄራካ ጫሪዴስ። 6 ጊዶ ኣቲን ኣርሼይ ኬዚዳ ማላ ሹሊዲ ጻጶ ዬዶንታ ጊሻስ ሜሊዴስ። 7 ቃሴ ኢሲ ዜሬꬂ ኣጉንꬃ ጊዶን ዎꬊዴስ፤ ኣጉንꬃይካ ዲጪዲ ጩሊዳ ጊሻስ ኣይፊቤና። 8 ሃራ ዜሬꬂ ቃሴ ሎኦ ኦርዴ ቢታ ቦላ ዎꬊዳ ጊሻስ ጫሪዲ ዲጪዴስ፤ ኣይፌካ ኣይፊዴስ፤ ኢሶይ ሄꬑ ታሙ፥ ኢሶይ ቃሴ ኡሱፑን ታሙ፥ ኢሶይ ቃሴ ጼቱ ኣይፊዴስ።»
9 ዬሱሲ ቃሴካ፥ «ሲዪዛ ሃይꬂ ዲዛዴይ ሲዮ!» ጊዴስ።
ዬሱሲ ሌሚሶራ ዮቲዛ ጋሶ
(ማቶ 13፡10-17፤ ሉቃ 8፡9-10)
10 ዬሱሲ ባርካ ዲሺን ታማኔ ናምኣቲኔ ካሴ ኢዛራ ዲዛ ኣሳይ ኢዚ ዮቲዳ ሌሚሶዛ ጊሻስ ኢዛ ዛሪ ኦይቺዳ። 11 ኢዚካ ኢስታስ፥ «ኢንቴስ ጾሳ ካዎቴꬃ ጹራ ኤሮይ ጌሊዴስ ሺን ካሬን ዲዛይታስ ጊዲኮ ዮኦይ ዉሪ ሌሚሶራ ዮቴቴስ። 12 ሄሲካ ካሴ፥ ‹ኢስቲ ቤኢዲ ቤኢዳይሳ ኣኬኮንታ ማላኔ ሲሞንታ ማላ፥ ቃሴካ ኢስታ ናጋራይ ማሬቶንታ ማላኮ› » ጊዴስ።
13 ቃሴካ ዬሱሲ፥ «ሃይሲ ሌሚሶይ ኢንቴስ ጌሊቤኔ? ሂስቲን ሃራ ሌሚሶ ኢንቴ ዎስቲ ኤራኔ? 14 ዜሪዛዴይ ቃላ ዜሬስ። 15 ኢሲ ኢሲ ኣሳቲ ኦጌ ቦላ ዎꬊዳ ዜሬꬃ ሚሳቴቴስ፤ ኢስቲ ቃላ ሲዪዛ ዎዴ ጻላኤይ ዪዲ ሄራካ ኢስቲ ሲዪዳ ቃላ ኢስታ ዎዚናፔ ኤኪቼስ። 16 ሄሳꬆካ ሃራቲ ሜላ ቢታ ቦላ ዎꬊዳ ዜሬꬃ ሚሳቴቴስ። ኢስቲ ቃላ ሲዪዲ ኡፋይሳን ኤኬቴስ። 17 ጊዶ ኣቲን ኢስቲ ጻጶ ዬዶንታ ጊሻስ ጉꬃ ዎዴ ጋምኢሺን ቃላ ጋሶን ሜቶይ ዎይኮ ጎዴታይ ኣሳታ ቦላ ዪዛ ዎዴ ሄራካ ꬉጴቴቴስ። 18 ሃራቲ ቃሴ ኣጉንꬃ ጊዶን ዎꬊዳ ዜሬꬃ ሚሳቴቴስ፤ ኢስቲ ቃላ ሲስ ሲዬቴስ። 19 ጊዶ ኣቲን ሃ ቢታ ሜቶይ፥ ሚሻ ሲቆይኔ ሃራ ኣሞይ ኢስቲ ሲዪዳ ቃላ ጩሊዲ ኣይፌ ኣይፎንታ ማላ ዲጌስ። 20 ሃንኮይቲ ሎኦ ቢታን ዜሬቲዳ ዜሬꬃ ሚሳቴቴስ፤ ሄይቲካ ቃላ ሲዪዲ ኤኪዛዴኔ ሄꬑ ታሙ ኣይፌ፥ ኡሱፑን ታሙ ኣይፌኔ ጼቱ ኣይፌ ኣይፊዛይታ» ጊዴስ።
ጌማን ዲዛ ጾምፔ
(ሉቃ 8፡16-18)
21 ቃሴካ ዬሱሲ፥ «ጾምፔ ኦይꬂዲ ጌማሶን ዎይኮ ኣርሳ ጋርሳን ዎꬂ ኤሬቲ? ፖኣና ማላ ቆንጬሶን ዎꬄታ ጊዴኔ?ማቶ 5፡15፤ ሉቃ 11፡33 22 ሄሳ ጊሻስ ቆቴቲዲ ቆንጬ ኬዞንታይ፥ ፖኦን ኬዞንታ ጌማን ኣታናይ ባ። ማቶ 10፡26፤ ሉቃ 12፡2 23 ሄሳ ጊሻስ ሲዪዛ ሃይꬂ ዲዛዴይ ሲዮ!» ጊዴስ።
24 ጉጂዲካ፥ «ኢንቴ ሲዪዛይሳ ዎዚናን ዎꬂቴ፤ ኢንቴ ማኪዛ ሚሻራ ኢንቴስ ማኬታና፤ ሄሳፌካ ዳሮይ ጉጄታና። ማቶ 7፡2፤ ሉቃ 6፡38 25 ዲዛዴስ ጉጄታና ሺን ባይንዳዴፌ ኢዛስ ዲዛራካ ኤኬታይቻና» ጊዴስ። ማቶ 13፡12፤ 25፡29፤ ሉቃ 19፡26
ዲጪዛ ዜሬꬃ ሌሚሶ
26 ቃሴካ ዬሱሲ፥ «ጾሳ ካዎቴꬂያ ዜሬꬅ ዜሪዛ ኢሲ ኣስ ሚሳታዉስ። 27 ዜሪዳዴይ ኦማርስ ꬊስኬስ። ዎንቲሺን ዴንዴስ፤ ጊዶ ኣቲን ኢዚ ኤሮንታ ዲሺን ዜሬቲዳ ካꬃይ ሞኪዲ ዲጬስ። 28 ጋዴያካ ኮይሮ ጫሬች፥ ካሌꬃዳ ፑꬌ፥ ቃሴካ ፑꬌዛ ቦላ ሎኦ ኣይፌ ኢማዉስ። 29 ካꬃይ ካጺዳፔ ጉዬ ቦኔይ ጋኪን ኬꬃ ኣዋይ ሄራካ ማጻ ኦይኬስ» ጊዴስ።
ሳናፊጬ ሚꬃ ኣይፌ ሌሚሶ
30 ዬሱሲ፥ «ጾሳ ካዎቴꬅ ኑ ኣዛራ ጊኒሳኔ? ኣዛራ ሌሚሳኔ? 31 ቢታ ቦላ ኡባፌ ላፋ ጊዲዳ ሳናፊጬ ኣይፌ ሚሳታዉስ። 32 ዜሬታዳ ዲጪዳፔ ጉዬ ቃሴ ኣታኪልቴታ ኡባፌ ኣꬊዛ ጊሻስ ካፎቲ ዪዲ ሄ ኣታኪልቴይ ሃጋታ ኩዋ ጊዶን ሼምፔቴስ» ጊዴስ።
33 ዬሱሲካ ኣሳይ ኤካናስ ዳንዳይዛይሳ ኬና ሃይታ ሚሳቲዛ ሃራ ዳሮ ሌሚሶራ ኢስታስ ዮቲዴስ። 34 ኣይ ሚሽ ጊዲኮካ ኣሳስ ሌሚሶይ ባይንዳ ዮቲ ኤሬና። ኢዚኔ ኢዛ ካሊዛይቲ ጻላ ዲዛ ዎዴ ጊዲኮ ዉርሲ ቢርሺ ዮቴስ።
35 ሄ ጋላስ ጋዴይ ቃሚሺን ባና ካሊዛይታ፥ «ኣኔ ጌዴ ሄ ፒንꬅ ፒኖስ» ጊዴስ። 36 ኢስቲ ኣሳ ሄን ኣጋጊዲ ኢዚ ኡቲ ዲዛ ዎጎሎዛራ ዬሱሳ ኤኪ ቢዳ። ሃራ ዎጎሎቲካ ኢስታራ ኢሲፌ ዴቴስ። 37 ሄ ዎዴ ዎልቃማ ዳምባላይ ኣባ ቦላ ዴንዲዲ ዎጎሎዛ ሃꬂ ኩማና ጋካናስ ሾጬቺዴስ። 38 ጊዶ ኣቲን ዬሱሲ ቦርኮꬅ ቦርኮቲዲ ዎጎሎዛስ ጉዬ ባጋን ኢቺዴስ። ኢስቲካ ኢዛ ዴንꬂዲ፥ «ኣስታማሬ! ኑኒ ꬋይሺን ኔና ሜቴኔ?» ጊዳ።
39 ኢዚካ ዴንዲዲ ጫርኮዛ፥ «ጮኡ ጋ!» ኣባካ፥ «ዎፑ ጋ!» ጊዴስ፤ ጫርኮይካ ጮኡ ጊዴስ፤ ሙሌካ ጮኡ ጊዴስ። 40 ባና ካሊዛይታካ፥ «ሃይሳꬆ ኣዛስ ባቢዴቲ? ሃይሳ ጋካናስ ኢንቴስ ኣማኖይ ባዌ?» ጊዴስ።
41 ኢስቲካ ኬሂ ባቢዲ ባ ጊዶን ኢሶይ ኢሳራ፥ «ጫርኮይኔ ኣባይ ኢዛስ ኣዛዜቲዛይ ሃይሲ ኦኔ?» ጌቴቲዳ።