7
ካሴ ኣይሁዳ ኣዋታ ዎጋ
(ማቶ 15፡1-9)
1 ሄሳፌ ጉዬ ፋርሳዌቲኔ ዬሩሳላሜፔ ዪዳ ኢሲ ኢሲ ጻፌቲ ዬሱሳ ላንቄን ዩዪ ኣꬊዳ። 2 ዬሱሳ ካሊዛይታፔ ባጋይቲ ሜጬቶንታ ቂታ ኩሼራ ካꬅ ሚሺን ቤኢዳ።
3 ፋርሳዌቲኔ ካሴ ጪማ ኣይሁዳ ኣሳቲ ካሴ ዴሬ ዎጋ ናጋናስ ኩሼ ሎኤꬂ ሜጬቶንታ ካꬅ ሚ ኤሬቴና። 4 ጊያ ቢ ሲሚኮካ ቦላ ሜጬቲ ጌዮንታ ዲሼ ካꬅ ሚ ኤሬቴና። ሄሳꬆካ ዋንጫካ፥ ኦቶካ፥ ኬሬካ፥ ኢቺዛ ሂꬄካ ሜቻ ማላ ሃራ ዎጋታካ ናጌቴስ።
5 ፋርሳዌቲኔ ጻፌቲ ዬሱሳ፥ «ኔና ካሊዛይቲ ካሴ ኣዋታ ዎጋ ማላ ዱስ ኣጊዲ ኣዛስ ኩሼ ሜጬቶንታ ካꬅ ሚዞ?» ጊዲ ኦይቺዳ።
6 ኢዚካ ኢስታስ፥
«ኢሳያሲ ቆꬌፔ ቆሞን
ሃኒዛ ኢንቴ ጊሻስ፥
‹ሃይሲ ዴሬይ
ባ ሜቴርሻን ጻላላ
ታና ቦንቼስ፤
ዎዚናይ ጊዲኮ
ታፔ ሃኪዴስ።
7 ታስ ሜላ ሃዳ ጎይኔስ፤
ኢስታ ቲሚርቴይካ
ኣሲ ዎꬂዳ ዎጋ ጻላ›
ጊዲ ዮቲዳይሲ ቱማ» ጊዴስ።
8 ጾሳ ዎጋ ኣጊዲ ኣሲ ዎꬂዳ ዎጋ ናጌቴስ። 9 ቃሴካ፥ «ኢንቴ ዎጋስ ጊዲ ጾሳ ዎጋ ኢንቴ ኣጋጊዛ ጪንጫቴꬃ ኦጌይ ኢንቴስ ዴስ። 10 ኣይስ ጊኮ ሙሴይ፥ ‹ኔ ኣዮኔ ኔ ኣዋ ቦንቻ፤ ባ ኣዮኔ ባ ኣዋ ጫዪዛዴይ ሙሌካ ሃይቆ› ጊዴስ። ኬሳ 20፡12፤ 21፡17፤ ዛሬ 5፡16፤ ሌዌ 20፡9 11 ጊዶ ኣቲን ኢንቴ ቃሴ፥ ‹ኢሲ ኣሲ ባ ኣዋ ዎይኮ ባ ኣዮ ኢንቴ ታፔ ዴማናስ ኮሺዛ ማዶ ታ ጾሳስ ኢማዲስ› ጊኮ፥ 12 ኢንቴ ቃሴ ሃይሳዴይ ባ ኣዋስካ ባ ኣዬይሲ ሃራ ኣይኮካ ኦꬃና ማላ ኮዬኬታ። 13 ሄሳ ጊሻስ ኢንቴ ዎጋ ናጋና ጊዲ ጾሳ ቃላ ላሜታ። ሄይታንታ ሚሳቲዛ ዳሮታ ኦꬄታ» ጊዴስ።
14 ቃሴካ ዬሱሲ ኣሳ ባኮ ጼይጊዲ፥ «ዉሪካ ታ ጊዛ ሲዪቴኔ ዎዚናን ዎꬂቴ። 15 ካሬፔ ኡሎ ጊዶ ጌሊዲ ኣስ ቱኒሲዛ ኢሲ ሚሺካ ዴና፤ ሃራፔካ ኣሴ ቱኒሲዛይ ኬꬃ ኣዋፔ ጌዴ ካሬ ኬዚዛ ሚሻ። 16 ሲዪዛ ሃይꬂ ዲዛይ ሲዮ!» ጊዴስ። *ኢሲ ኢሲ ጌሻ ማጻፋቲ ታይቦ 16 ቦላ ዲዛ ቆፋ ጉጄቴስ።
17 ኢዚ ኣሳ ካሬን ኣጊዲ ኬꬄ ጌሊን ኢዛ ካሊዛይቲ ኢዚ ዮቲዳ ሌሚሶዛ ቢርሼꬅ ዬሱሳ ኦይቺዳ። 18 ኢዚካ ኢስታ፥ «ኢንቴስካ ዮኦይ ጌሌኔ? ካሬፔ ጌሊዲ ኣሴ ቱኒሲዛ ሚሺ ኣዚካ ዴና። 19 ካሬፔ ጌሊዛይ ጌዴ ዎዚናን ጊዶንታ ዱጌ ቃንꬃ ጊዶ ጌሌስ፤ ቃሴ ሄፔ ኢዛዴ ኣሳቴꬃፌ ጌዴ ካሬ ኬዜስ» ጊዴስ፤ ዬሱሲ ሄሳ ጊዳይ ኣሲ ሚዛ ካꬂ ዉሪካ ጌሽ ጊዲዳይሳ ቆንጪሳናሳ።
20 ካሌꬂዲካ፥ «ኣሳፔ ኬዚዛዚ ኣሴ ቱኒሴስ። 21 ኣሳ ዎዚና ጊዶፌ ኬዚዛይ ኢታ ቆፋታ፥ ላይማ ኣሞኔ ካይሶቴꬅ፥ ኣሴ ዎꬎ፥ ላይማቴꬅ፥ 22 ዪቄቴꬅ፥ ኢታቴꬅ፥ ባሌꬆ፥ ላይማ ካስ፥ ቃናቴቴꬅ፥ ኣሳ ሱንꬅ ሞሮ፥ ኦቶሬቴꬂኔ ኣዛላ። 23 ሃይቲ ኢታ ሃኖቲ ዉሪ ኣሳፔ ኬዜቴሲኔ ኣሴ ቱኒሴቴስ» ጊዴስ።
ኢሲ ማጫሳይ ኣማኖ
(ማቶ 15፡21-28)
24 ዬሱሲ ሄፔ ኬዚዲ ጺሮሴ ጌቴቲዛ ዴሬ ቢዴስ፤ ሄን ኢሳዴ ኬꬄ ጌሊዲ ኢዚ ሄን ዲዛይሳ ኣሲ ኤሮንታ ማላ ኮዪዴስ። ጊዶ ኣቲን ኢዚ ሄን ኢዛ ዱሳይ ቆቴታናስ ዳንዳዬቲቤና።
25 ሄራካ ኢሲ ቱና ኣያናይ ኦይኪዳ ጉꬃ ና ዲዛሪ ኣያ ዬሱሲ ሄን ዲዛይሳ ሲያዳ ኢዛኮ ያዳ ኢዛ ቶሆ ቦላ ኩንዳዱስ። 26 ማጫሳያ ጊሪኬ ቃላ ሃሳይዛ ማጫስ ሺን ኢዛ ዬሌቲዳሶይ ሲሮፊንቄ ጌቴቴስ። ኢዛካ ዬሱሲ ናይፔ ቱና ኣያና ኬሳና ማላ ዎሳዱስ። 27 ዬሱሲ ዛሪዲ ኢዚስ፥ «ናይታ ቁማ ኤኪ ካናስ ዬጋናስ ቤሶንታ ጊሻስ ኮይሮ ናይቲ ሚ ካሌቶ» ጊዴስ።
28 ኢዛካ ዛራዳ፥ «ኤ ጎዶ! ካናቲካ ማዳ ማታን ዴኢዲ ናይታ ኩሼፔ ጋዴን ዎꬊዳይሳ ሜቴስ» ጋዱስ።
29 ኢዚካ፥ «ሂስቲኮ ኔኒ ሄሳ ጊዳ ጊሻስ ባ! ዳይዳንꬃይ ኔ ናይፔ ኬዚዴስ» ጊዴስ። 30 ኢዛ ሲማዳ ሶ ቢሺን ናያ ዳይዳንꬃይ ዬዲን ፓጻዳ ሂጻን ኢቺዳሮ ዴማዱስ።
ዬሱሲ ፓꬂዳ ዶና ዱዴኔ ሃይꬃ ቱሌ ኣዴዛ
31 ሄሳፌ ዬሱሲ ጺሮሴ ቢታፌ ዴንዲዲ ሲዶና ጌቴቲዛሶራ ኣꬊ ታሙ ካታማ ጌቴቲዛሶራ ካንꬂዲ ጌዴ ጋሊላ ኣባኮ ጋኪዴስ። 32 ኣሳይ ኢሲ ሃይꬃ ቱሌኔ ዶና ዱዴ ኣስ ኢዛኮ ሄ ኤኪ ዪዲ ዬሱሲ ኢዛ ቦላ ባ ኩሼ ዎꬃና ማላ ዎሲዳ።
33 ዬሱሲካ ኢዛ ኣሳፔ ሻኪ ኤኪ ቢዲ ባ ኩሼ ቢራꬌታ ኣዴዛ ሃይꬃን ጌልꬂዴስ፤ ቃሴካ ጩች ጩቲዲ ኣዴዛ ኢንጻርስ ቦቺዴስ። 34 ፑዴ ሳሎ ጼሊዲኔ ቶኪ ሼምፒዲ፥ «ኤፍታ» ጊዴስ። ሄሲካ፥ «ፖጌታ» ጉሳ። 35 ሄራካ ኣዴዛ ሃይꬃቲ ፖጌቲዳ፤ ኢንጻርሳይካ ቢርሼቲን ጌሺ ሃሳይዴስ።
36 ዬሱሲ ሃይሳ ቤኢዳይቲ ኦናስካ ዮቶንታ ማላ ኣዛዚዴስ፤ ጊዶ ኣቲን ኣሳይ ኢዚ ኣዛዚዛዳይሳፌ ቦላራ ኬሂ ጉጂዲ ዮቲዴስ። 37 ዴሬዚካ ኬሂ ማላሌቲዲ፥ «ኢዚ ኦꬂዳይሲ ዉሪ ሎኦ፤ ቱሌቲ ሲያና ማላ፥ ዶና ዱዴቲ ሃሳያና ማላ ኦꬂዴስ» ጊዳ።