8
ዬሱሲ ኦይዱ ሺ ኣስ ሚዚዴስ
(ማቶ 15፡32-39)
1 ሄ ዎዴ ቃሴ ዳሮ ኣሲ ሺቂዴስ። ሺቂዳ ኣሳስ ሚዛ ካꬂ ባይንዳ ጊሻስ ዬሱሲ ባና ካሊዛይታ ጼይጊዲ፥ 2 «ሃይቲ ኣሳቲ ታናራ ሄꬑ ጋላስ ጋካናስ ጋምኢዳ ጊሻሲኔ ቃሴካ ኢስታስ ሚዛ ካꬂ ባይንዳ ጊሻስ ታና ሚቼቴስ። 3 ኢስታፌ ኢሲ ኢሲ ኣሳቲ ሃሆፔ ዪዳ ጊሻስ ሃይሳ ጋፋራ ታ ኢስታ ሶ ዬዲኮ ዳቡርዲ ኦጌ ቦላ ኩንዳና» ጊዴስ።
4 ኢዛ ካሊዛይቲካ ዛሪዲ፥ «ሃይሳ ባዞን ሃይሳ ማላ ዴሬ ሚዛና ቁማ ኣዋፔ ዴማኔ?» ጊዳ።
5 ኢዚካ ኢስታ፥ «ኢንቴኮን ኣፑን ኡኬꬂ ዲዜ?» ጊ ኦይቺዴስ። ኢስቲካ፥ «ላፑን ኡኬꬂ ዴስ» ጊዳ።
6 ኢዚካ ኣሳይ ጋዴን ኡታና ማላ ኣዛዚዴስ፤ ላፑን ኡኬꬃ ባ ኩሼን ኦይኪ ጋላቲዲኔ ሜንꬂዲ ኣሳስ ጊሼቻና ማላ ባና ካሊዛይታስ ኢሚን ኢስቲካ ዴሬዛስ ጊሺዳ። 7 ቃሴካ ሄን ዲዛ ቄሪ ጉꬃ ሞሌታ ጊሻስ ጾሳ ጋላቲዲ ጉꬃ ሞሌታ ኣሳስ ጊሼቻና ማላ ባና ካሊዛይታ ኣዛዚዴስ። 8 ዴሬይካ ሚዲ ካሊዴስ። ሄሳፌካ ኢዛ ካሊዛይቲ ማዳፌ ፓላሂዳ ካꬅ ላፑን ሌማቴ ኩሜꬅ ዴንꬂዳ። 9-10 ሄሳ ሚዳ ኣሳይ ኦይዱ ሺ ጊዳና። ሄ ኣሳ ሞይዚዲ ባና ካሊዛይታራ ዎጎሎን ጌሊዲ ጌዴ ዳልማኑታ ጌቴቲዛሶ ቢዴስ።
11 ፋርሳዌቲ ዪዲ ዬሱሳራ ፓላሜቴꬅ ኦይኪዳ፤ ኢዛ ፓጫናስ ኮዪዲ ባንታና ሳሎፔ ማላታ ቤሳና ማላ ኦይቺዳ። ማቶ 12፡38፤ ሉቃ 11፡16 12 ኢዚካ ቶኪ ሼምፒዲ፥ «ሃይሲ ዬሌታዚ ኣዛስ ማላታ ኮይዜ? ታ ኢንቴስ ቱማ ጋይስ፤ ሃይሳ ዬሌታስ ኢሲ ማላታይካ ኢሜቴና» ጊዴስ። ማቶ 12፡39፤ ሉቃ 11፡29 13 ኢስታ ሄን ኣጊዲኔ ዎጎሎን ጌሊዲ ሄ ፒንꬅ ፒኒዴስ።
ፋርሳዌታ ኢርሾኔ ሄርዶሳ ኢርሾ
(ማቶ 16፡5-12)
14 ኢዛ ካሊዛይቲ ካꬅ ኦይኮንታ ባሌቲዳ ጊሻስ ኢሲ ኡኬꬂ ኣቲን ዎጎሎ ጊዶን ሃራ ኣይ ካꬂካ ዴና። 15 ዬሱሲ ኢስታ፥ «ፋርሳዌታ ኢርሾፌኔ ሄርዶሳ ኢርሾፌ ናጌቲቴ» ጊዲ ኣዛዚዴስ። ሉቃ 12፡1
16 ኢስቲ ቃሴ ባ ጊዶን ኢሶይ ኢሳራ፥ «ኢዚ ኑና ሃይሳ ጊዛይ ኑስ ካꬂ ባይንዳ ጊሻሳ» ጊ ሃሳዬቲዳ።
17 ቃሴ ዬሱሲ ኢስታ ቆፋ ኤሪዲ፥ «ኑስ ካꬂ ባይንዳ ጊሻስ ጋሳ ጊዲ ኢንቴ ጊዶን ኣዛስ ሃሳዬቴቲ? ሃኢካ ዩሺ ቆፔኬቲ? ዎዚናንካ ዎꬄኬቲ? ዎይኮ ኢንቴ ዎዚናይ ሹቻቲዴ? 18 ኢንቴስ ኣይፌይ ዴስ ሺን ጼሌኬቲ? ሃይꬂ ዴስ ሺን ሲዬኬቲ? ኣኬኬኬቲ?ኤር 5፡21፤ ሂዚ 12፡2፤ ማር 4፡12 19 ኢቻሹ ኡኬꬃ ኢቻሹ ሺ ኣሳስ ታ ሜንꬃ ኢሚን ኣፑን ሌማቴ ኩሜꬃ ካꬅ ዴንꬂዴቲ?» ጊዴስ።
ኢስቲካ ዛሪዲ፥ «ታማኔ ናምኡ» ጊዳ። 20 ኢዚካ፥ «ላፑን ኡኬꬃ ኦይዱ ሺ ኣሳስ ታ ሜንꬃ ኢሚን ኣፑን ሌማቴ ኩሜꬃ ካꬅ ዴንꬂዴቲ?» ጊ ኦይቺን ኢስቲካ፥ «ላፑን» ጊዳ።
21 ኢዚካ ኢስታስ፥ «ሂስቲን ሃኢ ጋካናስ ዩሺ ቆፒቤኬታካ!» ጊዴስ።
ዬሱሲ ቤቴሳይዳን ፓꬂዳ ቆቄ ኣዴዛ
22 ሄሳፌ ጌዴ ቤቴሳይዳ ጌቴቲዛሶ ቢዳ፤ ጉꬃ ኣሳቲካ ኣይፌ ቆቄ ኣስ ዬሱሳኮ ኤሂዲ ዬሱሲ ኢዛ ቦቻና ማላ ዎሲዳ። 23 ኢዚካ ሄ ቆቄዛ ኩሼ ኦይኪ ጎቺዲ ኣሲ ዲዛሶፔ ጌዴ ካሬ ኬሲዲ ኣዴዛ ኣይፌን ጩቲዲኔ ባ ኩሼ ኢዛ ቦላ ዎꬂዲ፥ «ሃኢ ኔስ ኣዚ ቤቲዜ?» ጊ ኦይቺዴስ።
24 ኢዚካ ꬎቁ ጊ ጼሊዲ፥ «ኣሳይ ሚꬅ ሚሳቲዲ ቃጼቲሼ ቤቴስ» ጊዴስ።
25 ቃሴካ ዬሱሲ ባ ኩሼታ ኢዛ ኣይፌታ ቦላ ዎꬂዴስ፤ ሄራካ ኢዛ ኣይፌቲ ጼሊዳ፤ ፖኦይካ ኢዛስ ሲሚን ዉርሲካ ጌሺ ጼሊዴስ። 26 ቃሴ፥ «ሃ ጉታታ ጊዶ ጌሎፓኔ ኦናስካ ዮቶፓ» ጊዲ ኢዛ ጌዴ ኢዛሶ ዬዲዴስ። *ጊኢዜ ጫቆ ኦራꬃ ማጻፋዚ 1,947 ማሮቴꬃ ላይꬃን ጻፌቲዳ ኣማራꬆ ጌሻ ማጻፋዚኔ ኢሲ ኢሲ ቤኒ ጊሪኬ ቃላን ጻፌቲዳ ጌሻ ማጻፋቲ ሃይሳፌ ካሊዛ ቆፋ ጉጄቴስ፤ ሂስቲኮ ሃይሳ ኦናስካ ዮቶፓ።
ዬሱሲ ጾሳፌ ኪቴቲዳዴ ጊዲዳይሳስ ጴጽሮሳ ማርካቴꬅ
(ማቶ 16፡13-20፤ ሉቃ 9፡18-21)
27 ዬሱሲ ባና ካሊዛይታራ ቂሳሪያ ፒሊጲሲዮሴ ጌቴቲዛ ዴሬ ኣቻን ዲዛ ጉታታ ቢዴስ፤ ኢስቲ ኦጌ ቦላ ዲሺን ባና ካሊዛይታ፥ «ታና ኣሳይ ኦና ጊዜ?» ጊዲ ኦይቺዴስ።
28 ኢስቲካ ዛሪዲ ኔና፥ «ጻማቂዛ ዮሃኒሳ ጊዛይቲካ ዴቴስ፥ ባጋይቲ ቃሴ ኤላሳ ጌቴስ፤ ሃራቲ ቃሴ ናቤታፔ ኢሳዴ ጌቴስ» ጊዲ ዮቲዳ። ማር 6፡14-15፤ ሉቃ 9፡7-8
29 ካሌꬂዲካ፥ «ኢንቴች ታና ኦና ጌቲ?» ጊዲ ኦይቺዴስ። ጴጽሮሲ፥ «ኔኒ ኪርስቶሳ» ጊዴስ።
30 ዬሱሲካ ባ ጊሻስ ኦናስካ ኢስቲ ዮቶንታ ማላ ሚንꬂ ዮቲዴስ።
ዬሱሲ ባ ሃይቃናይሳ ካሴቲዲ ዮቲዴስ
(ማቶ 16፡21-28፤ ሉቃ 9፡22-27)
31 ሄሳፌ ዬሱሲ ባና ካሊዛይታ፥ «ኣሳ ናይ ዳሮ ዋዬ ቤያናይሳኔ ዴሬ ጪማታን፥ ቄሴታ ሃላቃኒኔ ጻፌታን ካꬌታና፤ ኣሳ ኩሼን ሃይቃና፥ ሃይቆፔ ሄꬓንꬆ ጋላስ ዴንዳና ቤሴስ» ጊዲ ታማርሶ ኦይኪዴስ። 32 ኢዚካ ሄሳ ኢስታስ ቆንጪሲ ዮቲዴስ፥ ጴጽሮሲካ ኢዛ ዱማ ሻኪ ኤፊዲ፥ «ሄሳꬆ ጎፓ!» ጊዲ ሃንቂዴስ።
33 ዬሱሲ ቃሴ ባና ካሊዛይታ ዩሺ ጼሊሼ ጴጽሮሳ፥ «ሃይሶ ጻላኤ ኔ ታፔ ጌዴ ጉዬ ባ! ኔኒ ኣሳዛፔ ኣቲን ጾሳዝ ቆፓካ!» ጊዲ ሃንቂዴስ።
34 ሄሳፌ ጉዬ ኣሳ ባና ካሊዛይታራ ኢሲፌ ባኮ ጼይጊዲ፥ «ታና ካላናስ ዶሲዛዴይ ዲኮ ባና ካዶ፤ ባ ማስቃሌ ቶኪዲ ታና ካሎ። ማቶ 10፡38፤ ሉቃ 14፡27 35 ባ ሼምፖ ኣሻና ዶሲዛዴይ ꬋይሳና ሺን ታ ጊሻሲኔ ታ ሚሺራቾ ቃላ ጊሻስ ባ ሼምፖ ꬋይሲዛዴይ ዉሪካ ኣሻና። ማቶ 10፡39፤ ሉቃ 17፡33፤ ዮሃ 12፡25 36 ኣሲ ኣላሜ ኩሜꬅ ሃሪኮኔ ባ ሼምፖ ꬋይሲኮ ኢዛ ኣይ ጎኣኔ? 37 ዎይኮ ኣሲ ባ ሼምፖ ጊሻስ ላሜ ኤካናይ ኣዚ ዲዜ?
38 «ሃይሳ ላይማኔ ናጋራንቻ ዬሌታ ጊዶን ዲሼ ታናኒኔ ታ ቃላን ዬላቲዛ ኣሲ ዉሪ ታ ኣሳ ናይ ታ ኣዋ ቦንቾራኔ ጌሻ ኪታንቻታራ ዪዛ ዎዴ ኢዛን ዬላታና» ጊዴስ።