ጌሻ ማጻፋ ናሂሚያ ማጻፋ 9

ኢስራኤሌ ኣሳይ ባ ናጋራ ፓጼꬅ

1 ሄ ኣጊናን ናምኡ ታማኔ ኦይዳንꬆ ጋላስ ኢስራኤሌ ኣሳይ ኢሲ ቦላ ሺቂዲ ባ ናጋራ ጊሻስ ኬሂ ሞꬌቲዳይሳኔ ጬጪዳይሳ ቆንጪሲናስ ማቃ ማይኢዲ ባ ሁኤ ቦላ ጉዱላ ላሊዲ ጾሚዴስ። 2 ኢስራኤሌ ኣሳይ ኣላጋ ኣሳ ኡባፌ ባና ሻኪዴስ፤ ሄሳፌ ጉዬ ኣሳይ ዉሪ ዴንዲ ኤቂዲ ኢስቲኔ ካሴ ኢስታ ኣዋቲ ኦꬂዳ ናጋራ ኡባ ፓጺዳ። 3 ሄን ኢስቲ ኤቂዳ ማላ ዲሺን ኢስታ ጾሳ ዎጋ ማጻፋይ ሄꬑ ሳቴ ኩሜꬅ ኢስታስ ናባቤቲዴስ፤ ቃሴ ሃራ ሄꬑ ሳቴ ኩሜꬅ ኢስቲ ባ ናጋራ ፓጺሼ ጎዳስ ባ ጾሳስ ሆኪ ጎይኒዳ። 4 ሌዌ ባጋታስካ ኤቂዛ ማዲራኬይ ዴስ፤ ሄ ማዲራኬዛ ቦላ ኢያሶይ፥ ባኔይ፥ ቃዲምኤሌይ፥ ሼባኒያይ፥ ቡኔይ፥ ሼሬቢያይ፥ ባኔይኔ ካናኔይ ኤቂዲ ባ ቃላ ꬎቁ ሂስቲዲ ጎዳ ባንታ ጾሳኮ ዎሲዳ። 5 ኢያሶ፥ ቃዲምኤሌ፥ ባኔ፥ ሃሻቢናዬ፥ ሼሬቢያ፥ ሆዲያ፥ ሼባኒያኔ ፓታያ ጌቴቲዛ ሌዌ ባጋ ኣሳቲ፥

«ኢንቴ ዴንዲ ኤቂዲ ሜርና ጎዳ

ኢንቴ ጾሳ ጋላቲቴ፤

ጋላታፔኔ ኣንጆፌ

ꬎቁ ꬎቁ ጊዳ

ቦንቼቲዳ ጾሳ ሱንꬃ

ሳቢቴ» ጊዳ።

ማሬታና ዎሲዳ ዎሳ

6 ሄሳፌ ጉዬ ኢስራኤሌ ኣሳይ፥

«ጾሶ፥ ኔ ጻላ ጎዳ፤

ሳሎኔ ሳሎ ቦላ ዲዛይታ፥

ሳኣኔ ሳኣ ቦላ ዲዛይታ፥

ጊታ ኣባኔ ኢዛ ጊዶን ዲዛይታ

ኡባ ሜꬊዳይ ኔና።

ኡባስ ዴኦ ሼምፖ ኢማዳሳ፤

ሳሎ ሜꬌቴꬃቲ ኡባይ

ኔስ ጎይኔቴስ።

7 ጎዳዉ፥ ኔኒ ጾሳ!

ኔኒ ኣብራሜ ኡሬ ጌቴቲዛ

ካላዳዌ ዴሬፔ ዶራዳ

ጼይጋ ኬሳዳሳ፤

ኢዛ ሱንꬃካ

ኣብራሃሜ ጋዳሳ።

8 ኢዚ ኔስ ኣማኔቲዳ ኣስ

ጊዲዳይሳ ቤያዳ

ኢዛራ ጫቄታዳሳ፤

ካናኔ ኣሳይ፥ ሂቴ ኣሳይ፥

ኣሞሬ ኣሳይ፥

ፓሪዜ ኣሳይ፥ ያቡሴ ኣሳይኔ

ጌርጌሴ ኣሳይ

ኢዛን ዲዛ ቢታ፥

ኢዛ ዜሬꬃታስ

ዱሳ ቢታ ጊዳና ማላ

ላቲሳናስ ጫቆ

ቃላ ጌላዳሳ፤

ኔኒ ጺሎ ጊዲዳ ጊሻስ

ኔ ጫቆ ቃላ ሚንꬃ ናጋዳሳ።

9 «ኔኒ ኑ ኣዋታ ቦላ

ካሴ ጊብጼ ቢታን ጋኪዳ

ዋዬዛ ቤያዳሳ፤

ኢስቲ ዞኦ ኣባ ማታን ዲሼ

ማዶ ኮዪዲ

ኔና ዎሲዳ ዎሳ ሲያዳሳ።

10 ጊብጼ ካዎ ቦላ፥

ሹሜታ ቦላኔ

ሄ ቢታን ዲዛ ኣሳ

ኩሜꬃ ቦላ

ጊታ ማላታታ ቆንጪሳ ቤሳዳሳ።

ሄሳ ኔ ኦꬂዳይ ካሴ ኑ ኣዋታ

ጊብጼ ኣሳይ ኣይ ማላ ኢስታስ

ሜንጼ ኢቲዲ ዋዪሲዳኮ

ኔ ቤኢዳ ጊሻሳ፤

ኔ ሄሳ ኦꬆይሳ ጋሶን

ሃች ጋካናስ

ኔ ሱንꬃይ ቦንቾን

ጼይጌታና ማላ ኦꬃዳሳ።

11 ኢስታ ሲንꬃን ኣባ

ናምኡ ኬሳ ሻካዳ፥

ሜላ ቢታራካ

ኢስታ ፒንꬃዳሳ፤

ሹች ዱጌ ጪማ ሃꬃ

ጊዶን ዬጊዛ ማላ

ኢስታ ጎዲዛይታ ጪማ

ሃꬃ ጊዶ ዬጋዳሳ።

12 ጋላስ ቱሳ ማላ ኤቂዳ ሻራን፥

ኦማርሲ ቱሳ ማላ

ታማን ፖኢሳዳ

ኢስቲ ባናስ ቤሲዛ ኦጌራ

ባና ማላ ካሌꬃዳሳ።

13 «ሳሎፔ ዱጌ

ሲና ዙማ ቦላ ዎꬋዳ

ኔ ዴሬዛ ሃሳይሳዳሳ፤

ሎኦ ዎጋታኔ ሱሬ ቲሚርቴታ

ኔ ኢስታስ ኢማዳሳ።

14 ጌሻ ኔ ሳምባታ

ኢስቲ ቦንቻና ማላ

ታማርሳዳሳ፤

ኔ ኣዛዞታ፥ ዎጋታኔ ማራታ

ኔ ኦሳንቻ ሙሴ ባጋራ

ኢስታስ ኢማዳሳ።

15 ኢስቲ ጋፌቲዳ ዎዴ

ሳሎፔ ካꬅ ኢማዳሳ፤

ኢስቲ ሳሜቲዳ ዎዴ ሃꬅ

ዛላፌ ኢስታስ ፑልቲሳዳሳ፤

ቃሴ ኔ ኢስታስ ኢማና ጋዳ

ጫቂዳ ቢታ ጌሊዲ

ኤካና ማላ ኣዛዛዳሳ።

16 «ካሴ ኑ ኣዋቲ ኦቶራንቻኔ

ዎዚና ሙሜ ጊዲዳ ጊሻስ

ኔ ኣዛዞ ናጊቤቴና፤

17 ኔስ ኣዛዜቲቤቴና፤

ኔ ኢስታስ ኦꬂዳ ጊታ

ማላታካ ኡባ ዶጊዳ፤

ዎዚና ሙሜ ጊዲዳ፤

ቃሴ ጉዬ ጊብጼ ኣይሌቴꬃን

ዛራና ማላ

ባንታና ካሌꬂዛ

ኣስ ዶሪዳ።

ጊዶ ኣቲን ኔኒ ሲቆን

ኩሚዳ ጾሳ፥

ሃንቆስ ታኪዛ ጾሳ፥

ኣቶ ጊዛ ጾሳ፥

ኪያኔ ማሪዛ

ጎዳ ጊዲዳ ጊሻስ

ኔ ኢስታ ኣጋቤካ።

18 ማራ ሌሚሶን ባስ ኤቃ ጾስ ኦꬂዲ፥

‹ጊብጼ ቢታፌ

ኑና ካሌꬂዲ ኬሲዳ

ጾሲ ሃይሳኮ!› ጊዳ።

ኔ ሱንꬃካ ኣይ ማላ

ሞሮ ሞሪዶ!

19 «ኔ ማሮታይ ጊታ ጊዲዳ ጊሻስ

ኢስቲ ሄን ባዞ ቢታን ꬋዪ

ኣታና ማላ ኣጋቤካ፤

ጊዶ ኣቲን ኢስቲ ጋላስ

ቱሳ ማላ ሻራን

ኦማርስ ቱሳ ማላ ታማን

ኢስቲ ባናስ ቤሲዛ ኦጌራ

ኢስታ ካሌꬆ ኣጋቤካ።

20 ሎኦ ጊዲዳ ኔ ኣያና

ኢስታ ታማርሳና ማላ ኢማዳሳ፤

ኢስታስ ማና ማላ ማና፥

ኡያና ማላ ሃꬅ ኢማዳሳ።

21 ኦይዱ ታሙ ላይꬅ ኩሜꬅ

ኢስታ ባዞ ቢታን ማዳዳ

ኢስታስ ኮሺዛ ሚሼ

ኢሲኖካ ዲጋቤካ፤

ኢስቲ ማይኢዳ ማይኦይ

ዉሪቤና፤

ቃሴ ኢስታ ቶሆይካ

ፑሪቤና።

22 «ኢስታ ዴራ ዩዪ

ኣꬊ ዲዛ ዴሬታኔ

ኢስቲ ካዎቴꬃታ ኡባ

ጾኒዲ ሄ ቢታ

ኤካና ማላ ኦꬃዳሳ፤

ሄሳ ጊሻስ

ካዎ ሲሆኔይ ኣይሲዛ

ሃሴቦኔ ጌቴቲዛ ቢታኔ

ካዎ ኣጌይ ኣይሲዛ

ባሳኔ ጌቴቲዛ ቢታ

ጾኒዲ ላቲዳ።

23 ኢስታስ ቆዳይ ሳሎ ጾሊንቴ ማላ

ዳሪዳ ናይታ ኢማዳሳ፤

ካሴ ኢስታ ኣዋታስ ኔ ኢማና ጋ

ቃላ ጌሊዳ ቢታ

ኢስቲ ጾኒ ላታና ማላ

ኦꬃዳሳ።

24 ኢስታ ናይቲ ካናኔ ቢታ

ጾኒ ላቲዳ፤

ሄ ቢታን ዲዛ ኣሳታ

ኔኒ ጾናዳሳ፤

ኢስታ ካዎታ ቦላኔ ካናኔ

ቢታን ዲዛ ኣሳታ ቦላ

ባ ዶሲዳ ማላ ኦꬃና ማላ

ዎልቃ ኢማዳሳ።

25 ቃሴ ሎኢ ጊምቤቲዳ

ካታማታኔ ኣራዳ ቢታ፥

ሎኦ ሚሽ

ኢስታን ኩሚዳ ኬꬃታ፥

ሃꬃ ኦላታኔ

ዎይኔ ኣታኪልቴይ ቶኬቲዛ ጋዴ፥

ዎጋራ ሚꬃታኔ ዳሮ ኣይፌ

ኣይፊዛ ሚꬃታ ላቲዳ፤

ሚዲኔ ኡዪዲ ሞꬊዳ፤

ኔኒ ኔ ኪያቴꬃን ኢሚዳ ሎኦ ሚሻን ዉሪ ኡፋዬቲዳ።

26 «ጊዶ ኣቲን ኢስቲ ኔ ቦላ ማካሊዳ፤

‹ኔ ቃላስካ ኣዛዜቶኮ› ጊዳ፤

ኔ ዎጋ ሲዮኮ ጊዲ

ኔስ ዞኮ ዛሪዳ፤

ቃሴ ኢስቲ ኔኮ ዛራና ጊዲ

ሴሪ ታማርሲዳ ናቤታ ዎꬊዳ፤

ኡባ ዎዴ ኔ ቦላ

ጫሻ ቃላ ሃሳይዳ።

27 ሄሳ ጊሻስ ኢስታ ሞርኬቲ

ኢስታ ጾኒዲ ሃራና ማላ

ኣꬃ ኢማዳሳ፤

ሞርኬቲካ ኢስታ ሜቶꬂዳ፤

ኢስቲ ባንታና ሜቲዳ ዎዴ

ኔኮ ዋሲዳ፤

ኔካ ኢስታ ዋሳ

ሳሎን ዳዳ ሲያዳሳ፤

ኔ ማሮቴꬃ ጊታቴꬃፌ ዴንዲዳይሳን

ኢስታ ሞርኬታፔ ኣሻና

ካሌꬂዛይታ ዬዳዳሳ።

28 «ጊዶ ኣቲን ሳሮ ዴሚዳ ዎዴ

ቃሴካ ሲሚ ናጋራ ኦꬂዳ፤

ሄሳ ጊሻስ ኔ ኢስታ ሞርኬታስ

ኣꬃ ኢማዳሳ፤

ኢስታ ሞርኬቲካ ኢስታ ሃሪዳ፤

ጊዶ ኣቲን ኔ ማዳና ማላ ጊዲ

ኔኮ ሲሚ ዎሲዳ ዎዴ

ሳሎን ዳሼ ኢስታ ዎሳ ሲያዳሳ፤

ኔኒ ኔ ቃꬌቴꬃፌ

ዴንዲዳይሳን

ኢስታ ኡባ ዎዴ ማዳዳሳ።

29 ኔ ቃላኮ ሲማና ማላ

ኔኒ ኢስታ ሴራዳሳ፤

ጊዶ ኣቲን ባ ኦቶሮቴꬃፌ

ዴንዲዳይሳን

ኔ ኣዛዞታ ካꬊዳ፤

ኢስቲ ኣዛዜቲዳኮ

ኢስታስ ዴኦ ኢሚዛ

ኔ ዎጋታ ቦላ ናጋራ ኦꬂዳ።

ኢስታ ዎዚናይ ሙሚዳ ጊሻስ

ባ ሲንꬅ ሃራሶ ዛሪዳ፤

ቃሴ ባ ዎዚና ሙሚሲዲ

ኔ ኣዛዞታ ኢጺዳ።

30 ዳሮ ላይꬅ ኔ ኢስታ ዳንዳያዳሳ፤

ኢስታ ታማርሳና ማላ ናቤታ

ኔ ኣያናን ኢስታስ ዴንꬃዳሳ፤

ጊዶ ኣቲን ኢስቲ ሎኤꬂ

ሲዪቤቴና፤

ሄሳ ጊሻስ ኢስታ ዴሬ

ማታን ዲዛ ኣሳቲ

ጾናና ማላ

ኢስታ ኣꬃ ኢማዳሳ።

31 ጊዶ ኣቲን ኔ ማሮቴꬃ

ጊታቴꬃፌ ዴንዲዳይሳን

ኢስታ ኣጋቤካ፤

ኔ ኪያኔ ኣቶ ጊዛ

ጾሳ ጊዲዳ ጊሻስ

ኢስታ ꬋይሳቤካ።

32 ጊታ፥ ዎልቃማኔ ያሺዛ

ኑ ጾሳዉ!

ኔኒ ኔ ጫቆ ቃላኔ ሜርና ጋካናዉ ዲዛ

ኔ ሲቆ ናጋሳ፤

ኑ ቦላ፥ ኑ ካዎታ ቦላኔ

ኑና ካሌꬂዛይታ ቦላ

ኑ ቄሴታ ቦላኔ ኑ ናቤታ ቦላ

ኑ ኣዋታ ቦላ፥

ቃሴካ ዴሬ ኡባ ቦላ፥

ኣሶሬ ካዎታፔ ዶሚዲ

ሃች ጋካናስ ጋኪዳ ሜቶ

ኡባ ኔ ቆፓ።

33 ኔ ኑና ቃጻያና ጋዳ

ኔ ኦꬂዳይሲ ዉሪ ሊኬ፤

ኑኒ ናጋራ ኦꬂኮካ

ኔኒ ኔ ኣማኔቴꬃን

ሚና ኤቃዳሳ።

34 ካሴ ኑ ኣዋቲኔ

ኑ ካዎቲ፥

ኑና ካሌꬂዛይቲኔ ኑ ቄሴቲ

ኔ ዎጋ ናጊቤቴና፤

ቃሴ ኔ ኢስታስ ኢሚዳ

ኣዛዞታኔ

ሴራ ዞሬ ሲዪቤቴና።

35 ኔ ኢስታ ካዎቴꬃን

ኢስታስ ጊታ ኣንጆ ኢማዳሳ፤

ኣራዳኔ ኣሆ ቢታ

ኢስታስ ኢማዳሳ፤

ጊዶ ኣቲን ኢስቲ

ባ ናጋራፔ ሲሚዲ

ኔስ ጎይኒቤቴና።

36 ሄሳፌ ዴንዲዳይሳን

ኔ ኑ ኣዋቲ

ኣይፌዮ ማና ማላኔ

ሎኦ ሚሻን ኡፋዬታና ማላ

ኔ ኢስታስ ኢሚዳ ቢታን

ሃች ኑ ኣይሌ ጊዲዶስ።

37 ኑኒ ናጋራ ኦꬂዳ ጋሶን

ኔኒ ኑ ቦላ ካዎꬂዳ ካዎቲ

ኑ ቢታ ኣንጆ ኡባ

ኢስቲ ጎኤቴቴስ፤

ቃሴ ኑ ቦላኔ ኑ ሜሄታ ቦላ

ባ ኮዪዳ ማላ ኦꬄቴስ፤

ሄሳፌ ዴንዲዳይሳን

ኑኒ ሃኢ ጊታ ዋዬ ቦላ ዶስ።

ኣሳይ ቃቺዳ ቃላ ፒርማን ቆንጪሴꬅ

38 «ሃኒዳ ዮኦ ኡባስ ኑኒ ኢስራኤሌ ኣሳይ ቃላን ጋጊዳይሳ ጻፊ ዎꬃናስ ቃላ ቃቺዶስ፤ ኑ ቃቺን ጻፌቲዳ ቃላ ቦላ ኑና ካሌꬂዛይቲ፥ ሌዌ ባጋቲኔ ኑ ቄሴቲ ባ ማታሜ ሾጪዳ» ጊዳ።

9:7 ሜꬌ 11፡31—12፡1፤ 17፡5

9:8 ሜꬌ 15፡18-21

9:9 ኬሳ 3፡7፤ 14፡10-12

9:10 ኬሳ 7፡8—12፡32

9:11 ኬሳ 14፡21-29፤ 15፡4-5

9:12 ኬሳ 13፡21-22

9:14 ኬሳ 19፡18—23፡33

9:15 ኬሳ 16፡4-15፤ 17፡1-7፤ ዛሬ 1፡21

9:17 ኬሳ 34፡6፤ ታይ 14፡18

9:18 ኬሳ 32፡1-4

9:22 ታይ 21፡21-35

9:23 ሜꬌ 15፡5፤ 22፡17፤ ኢያ 3፡14-17

9:24 ኢያ 11፡23

9:25 ዛሬ 6፡10-11

9:28 ዳና 2፡11-16

9:29 ሌዌ 18፡5

9:30 2ካዎ 17፡13-18፤ 2ታሪ 36፡15-16

9:32 2ካዎ 15፡19፥29፤ 17፡3-6፤ ኢዝ 4፡2፥10