ታይቦ ማጻፋ
ጊዶ ቆፋ
ታይቦ ማጻፋይ ኢስራኤሌ ኣሳይ ሲና ዙማፔ ቦሶፔ ዶሚዲ ጾሲ ኢስታስ ኢማናስ ጫቂዳ ማላ ኣርሼይ ሞኪዛ ባጋራ ዲዛ ꬋሳኮ ማታና ጋካናስ ሃኒዳ 40 ላይꬃ ሃኖ ዮቴስ። ሃ ማጻፋዛ ሱንꬂ ማጻፋዛ ጊዶን ጻፌቲዳ ኣይፌ ዮኦ ቤሴስ። ሃ ማጻፋይ ሄꬑ ኣይፌ ዮኦታን ሻኬቴስ፤ ኮይሮዚ ኢስራኤሌ ኣሳይ ሲና ዙማ ዬዲ ባናፔ ካሴ ሄሳꬆካ ኢሲ ዬሌታፔ ጉዬ ዮርዳኖሴ ሻፋፔ ኣርሼይ ሞኪዛ ባጋራ ዲዛ ሞኣቤን ሙሴይ ዴሬዛ ቆዲዳይሳ ቤሴስ (1፡1—10፡10)። ናምኣንꬆዚ ዴሬይ ናምኡቶ ቆዴቲዳይሳ ጋርሳን ኢስራኤሌ ኣሳይ ዱጌሃ ባጋራ ዲዛ ካናኔ ꬋስ ጊዲዳ ቃዴሴ ባሪኔ ጋኪዴስ፤ ጊዶ ኣቲን ኢስታስ ሂዶታይ ኢሜቲዳ ዴሬዮ ጌላናስ ዳንዳይቤቴና፤ ሄሳ ጊሻስ ኢስቲ ሄን ዳሮ ላይꬅ ጋምኢዳፔ ጉዬ ዮርዳኖሴ ሻፋፔ ኣርሼይ ሞኪዛ ባጋራ ዲዛ ዴሬ ቢዳይሳ ቤሴስ (10፡11—21፡20)። ሄꬓንꬆዚ ባጋ ዴሬዚ ሄን ዳናስ ቃቺን ሃንኮ ኣቲዳ ዴሬይ ዮርዳኖሴ ሻፋፔ ጌዴ ፒኒዲ ካናኔ ባናስ ጊጌቲዳይሳ ቤሴስ (21፡21—36፡13)። ታይቦ ማጻፋይ ዮቲዛይ ዳሮ ዎዴ ሜቶይ ኢስታ ቦላ ጋኪሺን ባቢዛይታኔ ሂዶታ ቃንጺዛይታ፥ ጾሳ ቦላኔ ኢስታ ካሌꬃናስ ጾሲ ኢስታስ ዶሪዳ ሙሴ ቦላ ማካሊዛ ዴሬታ ጊሻሳ፤ ዴሬዚ ኣዛላኔ ማካላ ጊዲኮካ ጾሲ ኣሳ ሎኤꬂ ኣልኢሶን ኦይኪዳይሲ ታሪኬዛን ቆንጪዴስ፤ ሄሳꬆካ ኢሲ ኢሲቶ ሙሴስ ዳንዳያይ ꬋይኮካ ኢዛስ ሚኖ ኣማኖይ ዲዛ ጊሻስ ኢዚ ጾሳሲኔ ዴሬዛስ ኣማኔቴꬃን ኦꬂዳይሲ ቆንጪዴስ።
ሃ ማጻፋይ ኦይኪዳ ኩሜꬃ ቆፋ
ሲና ዙማፔ ዴንዲዲ ባናስ ኢስራኤሌ ኣሳ ጊጌቴꬅ 1፡1—9፡23
ዴሬዚ ዴንዳናፔ ሲንꬃን ቆዴቲዴስ 1፡1—4፡49
ዱማ ዱማ ዎጋታኔ ማራታ 5፡1—8፡26
ፓዚጋ ባኣሌ ናምኣንꬆ ቦንቾ 9፡1-23
ሲና ዙማፔ ሞኣቤ ዴሬ ቡስ 10፡1—21፡35
ሞኣቤ ዴሬን ፖሌቲዳ ሃኖታ 22፡1—32፡42
ጊብጼፔ ሞኣቤ ዴሬ ጋካናስ ቡስ 33፡1-49
ዮርዳኖሴ ሻፋ ፒናናፔ ካሴ ኢሜቲዳ ኣዛዞታ 33፡50—36፡13
1
ኢስራኤሌ ኣሳስ ኮይሮ ቆዴቴꬅ
1 ኢስራኤሌ ኣሳይ ጊብጼፔ ኬዚዳ ናምኣንꬆ ላይꬃን ናምኣንꬃ ኣጊናይ ዶሚዳ ኮይሮ ጋላስ ኢስቲ ሲና ባዞን ዲሺን ጎዳይ ጋይቶቴꬃ ዱንካኔ ጊዶን ሙሴራ ጋይቲዲ፥ 2 «ኣቱማሳ ኢሳ ኢሳ ሱንꬃን ሱንꬃን ጻፋዳ ኢስራኤሌ ኣሳ ቆሞን ቆሞኒኔ ዛርኬን ዛርኬን ቆዳ። 3 ኔኒኔ ኣሮኔይ ኢስታስ ላይꬃይ ናምኡ ታሙኔ ኢዛፔ ቦላራ ዲዛ ኦሌቲ ዳንዳያና ኣቱማሳታ ኢስታ ማራን ማራን ቆዲቴ። 4 ዱማ ዱማ ዛርኬታፔ ኢስታ ካሌꬂዛ ኢስታስ ኣዋቲዛ ኮራፒኔቲ ኢንቴናራ ጊዴቶ። 5 ኢንቴና ማዳናይታ ሱንꬂ ሃይሳፌ ካሊ ዲዛይታ፥ ኦሮቤሌ ዛርኬፌ ሻዱሬ ና ኤልጹሬ፥ 6 ሲሞና ዛርኬፌ ጹርሻዳዬ ና ሳሉምኤሌ፥ 7 ዩሁዳ ዛርኬፌ ኣሚናዳቤ ና ኔኣሶኔ፥ 8 ዪሳኮሬ ዛርኬፌ ጹኣሬ ና ናቲናኤሌ፥ 9 ዛቢሎኔ ዛርኬፌ ሄሎኔ ና ኤልያቤ፥ 10 ዮሴፌ ናይታፔ ኤፍሬሜ ቆሞቲ ኣሚሁዴ ና ኤልሻማ ሚናሴ ናይታፔ ፔዳጹሬ ና ጋማልኤሌ፥ 11 ቢኒያሜ ዛርኬፌ ጊዲኦኔ ና ኣቢዳኔ፥ 12 ዳኔ ዛርኬፌ ኣሚሻዳዬ ና ኣሂኤዜሬ፥ 13 ኣሴሬ ዛርኬፌ ኦክራ ና ፋጉኤሌ፥ 14 ጋዴ ዛርኬፌ ዳኡኤሌ ና ኤልያሳፌ፥ 15 ኒፍታሌሜ ዛርኬፌ ኤናኔ ና ኣሂሬ» ጊ ዮቲዴስ።
16 ማባራ ጋርሳፌ ዛርኬፌ ዛርኬፌ ኢስራኤሌ ኣሳ ካሌꬃናስ ዶሬቲዳ ኮራፒኔቲ ሃይታንታ።
17 ሙሴይኔ ኣሮኔይ ሃይታ ባንታ ሱንꬃን ጻፌቲዳይታ ኤኪዳ። 18 ናምኣንꬆ ኣጊናይ ዶሚዳ ኮይሮ ጋላስ ማባራዛ ኩሜꬅ ኢሲ ቦላ ሺሺዲ ዛርኬን ዛርኬኒኔ ዳቦን ዳቦን ሺሺዳፔ ጉዬ ዴሬዛ ቆዲዳ፤ ዬሌቲን ላይꬃይ ናምኡ ታሙ ኩሚዳይታኔ ሄሳፌካ ቦላራ ጊዲዳ ኣቱማሳ ኢስታ ሱንꬃን ሱንꬃን ማዝጋቢ ቆዲዳ። 19 ሄሳꬆካ ሙሴይ ጎዳይ ኣዛዚዳ ማላ ሲና ባዞን ዴሬዛ ቆዲዴስ።
20 ኦላ ኦሌታናስ ዳንዳይዛይታ ላይꬃይ ናምኡ ታማኔ ሄሳፌካ ቦላራ ዲዛይቲ ባንታ ዛርኬፌ ዛርኬፌ ቆዴቲዳ፤ ኣዴታ ቆዳይ ሃይሳፌ ካሊዛይሳ፤ 21 ኦሮቤሌ ዛርኬፌ 46,500፥ 22-23 ሲሞና ዛርኬፌ 59,300፥ 24-25 ጋዴ ዛርኬፌ 45,650፥ 26-27 ዩሁዳ ዛርኬፌ 74,600፥ 28-29 ዪሳኮሬ ዛርኬፌ 54,400፥ 30-31 ዛቢሎኔ ዛርኬፌ 57,400፥ 32-33 ዮሴፌ ና ኤፍሬሜ ዛርኬፌ 40,500፥ 34-35 ዮሴፌ ና ሚናሴ ዛርኬፌ 32,200፥ 36-37 ቢኒያሜ ዛርኬፌ 35,400፥ 38-39 ዳኔ ዛርኬፌ 62,700፥ 40-41 ኣሴሬ ዛርኬፌ 41,500፥ 42-43 ኒፍታሌሜ ዛርኬፌ 53,400።
44 ሙሴይ፥ ኣሮኔይኔ ታማኔ ናምኡ ኢስራኤሌ ዛርኬታ ኮራፒኔቲ ቆዲዳ ኣቱማ ኣሳይ ሃይታንታ፤ 45 ኦላስ ባና ዳንዳይዛ ኣዴቲ ኡባይ ኢስታስ ላይꬃይ ናምኡ ታማኔ ሄሳፌካ ቦላራ ዲዛይቲ ባ ዛርኬን ዛርኬን ቆዴቲዳ። 46 ሄይታ ቆዳይ ኢሲ ቦላ 603,550 ጊዲዴስ። ታይ 26፡1-51
47 ጊዶ ኣቲን ሃንኮ ዛርኬታራ ሌዌ ዛርኬቲ ቆዴቲቤቴና። 48 ካሴ ጎዳይ ሙሴስ፥ 49 «ኔ ኢስራኤሌ ኣቱማ ኣሳ ቆዳሼ ሌዌ ዛርኬታ ኢስታራ ጋꬃ ቆዶፓ። 50 ሌዌ ዛርኬቲ ጊዲኮ ጋይቶቴꬃ ዱንካኔኔ ኢዛ ጊዶን ጎኤቲዛ ሚሻ ቦላ ኣላፌቴꬅ ኢማ፤ ኢስቲ ዱንካኔዛኔ ኢዛ ጊዶን ጎኤቲዛ ሚሻታ ኡባ ቶኬቶ፤ ዱንካና ጊዶን ኦꬄቶ፤ ኢዛ ዩሾን ዱንካኒ ኡቴቶ። 51 ኢንቴ ካሴ ዱንካኒ ዲዛሶፔ ዴንዲ ቢዛ ዎዴ ሌዌ ዛርኬቲ ጻላላ ዱንካኔዛ ሾዲ ላሊዲ ኢስቲ ሼምፒዛ ኦራꬃሶን ኢስታካ ቶኬቶ፤ ኢስታፌ ኣቲን ዱንካናኮ ሺቂዛ ኣይ ኣሲካ ሃይቆን ቃጻዬቶ። 52 ሃንኮ ኣቲዳ ኢስራኤሌ ኣሳይ ባ ቡቴን ቡቴኒኔ ባ ዲዛ ጉታን ጉታን ባ ባንዲራ ባንዲራ ቶኬቶ። 53 ጊዶ ኣቲን ኣይ ኣሲካ ዱንካናኮ ሺቂዲ ታና ሃንቄꬂዲ ኢስራኤሌ ዴራ ꬋይሲሶንታ ማላ ሌዌ ዛርኬቲ ሄ ዱንካኔዛ ዩሾን ዱንካኒዲ ናጌቶ» ጊዴስ። 54 ሄሳ ጊሻስ ኢስራኤሌ ኣሳይ ጎዳይ ሙሴ ኣዛዚዳ ማላ ኡባካ ኦꬂዳ።