1 ጎዳይ ሙሴሲኔ ኣሮኔስ ሂዝጊዴስ፥ 2 «ኢስራኤሌ ኣሳይ ባ ባጋ ባጋ ኣሳ ኤሪሲዛ ማላታኔ ባንታ ዛርኬ ዛርኬ ኤሪሲዛ ባንዲራ ካሊዲ ጋይቶቴꬃ ዱንካኔዛፔ ጉꬃራ ሃኪዲ ኢዛ ዩሾን ዱንካኖ።»

3 ኣርሼይ ሞኪዛ ባጋራ ዩሁዳ ዛርኬቲ ኡቴቶ፤ ዩሁዳ ዛርኬ ካሌꬃናይ ኣሚናዳቤ ና ኔኣሶኔ። 4 ኢዚ ካሌꬂዛ ኣሳ ቆዳይ 74,600።

5 ዩሁዳ ዛርኬታፔ ካሊዲ ዪሳኮሬ ቆሞቲ ኢስታ ማታን ዱንካኒ ኡቴቶ፤ ዪሳኮሬ ዛርኬታ ካሌꬃናይ ጹኣሬ ና ናቲናኤሌ። 6 ሄ ኢዛፔ ጋርሳራ ዲዛ ኣሳ ቆዳይ 54,400። 7 ዪሳኮሬ ዛርኬታፔ ካሊዲ ዛቢሎኔ ዛርኬቲ ዱንካኒ ኡቴቶ፤ ዛቢሎኔ ዛርኬታ ካሌꬃናይ ሄሎኔ ና ኤልያቤ። 8 ኢዛስ ዲዛ ኣሳ ቆዳይ 57,400። 9 ባ ዛርኬን ዛርኬን ጊዲዲ ዩሁዳ ዛርኬቲ ዱንካኒዳ ባጋራ ኡቲዳ ኣሳ ቆዳይ ኩሜꬅ 186,400፤ ኣሳፔ ሲንꬅ ቢዛይ ሃይሳ ሃ ቡቴዛን ዲዛ ኣሳ።

10 ዱጌሃ ባጋራ ኦሮቤሌ ዛርኬቲ ባ ባጋታ ኤሪሲዛ ማላታ ጋርሳን ዱንካኒ ኡቴቶ፤ ኦሮቤሌ ዛርኬታ ካሌꬂዛይ ሻዱሬ ና ኤልጹሬ። 11 ኢስታ ቆዳይ 46,500። 12 ኦሮቤሌ ዛርኬታፔ ካሊዲ ሲሞና ዛርኬቲ ዱንካኒ ኡቴቶ፤ ኢስታ ካሌꬃናይ ጹርሻዳዬ ና ሳሉምኤሌ። 13 ኢስታ ቆዳይ 59,300። 14 ኢስታፌ ካሊዲ ጋዴ ዛርኬቲ ዱንካኒ ኡቴቶ፤ ጋዴ ዛርኬታ ካሌꬃናይ ኤራኡኤሌ ና ኤልያሳፌ። 15 ሄይታንታ ቆዳይ 45,650። 16 ኢስቲ ባ ዛርኬን ዛርኬን ጊዲዲ ኦሮቤሌይ ዱንካኒ ኡቲዳ ባጋራ ዱንካኒዳ ኣሳ ቆዳይ ኩሜꬅ 151,450 ጊዲዴስ፤ ዩሁዳ ቡቴዛፔ ካሊዲ ናምኣንꬆራ ቢዛይ ኦሮቤሌ ቡቴዛ።

17 ኮይሮ ናምኡ ቡቴታፔኔ ዉርሴꬃ ናምኡ ቡቴታፔ ጊዶን ሌዌ ባጋቲ ጋይቶቴꬃ ዱንካኔዛ ቶኪዲ ቤቶ፤ ኢሲ ኢሲ ቡቴይ ባ ቆሞይ ሻኬቲ ኤሬታና ማላ ዱማ ማላታ ጋርሳን ባንታ ታራ ታራ ናጊዲ ቤቶ።

18 ኣርሼይ ዉሊዛ ባጋራ ኤፍሬሜ ዛርኬቲ ባ ባጋታ ኤሪሲዛ ማላ ጋርሳን ዱንካኒ ኡቴቶ፤ ኤፍሬሜ ዛርኬ ካሌꬃናይ ኣሚሁዴ ና ኤልሻማ። 19 ኢስታስ ቆዳይ 40,500። 20 ኤፍሬሜ ዛርኬታፔ ካሊዲ ሚናሴ ዛርኬቲ ዱንካኔቶ፤ ሚናሴ ዛርኬታ ካሌꬃናይ ፔዳጹሬ ና ጋማልኤሌ። 21 ኢስታ ቆዳይ 32,200። 22 ኢስታፌ ካሊዲ ቢኒያሜ ዛርኬቲ ዱንካኒ ኡቴቶ፤ ቢኒያሜ ዛርኬታ ካሌꬃናይ ጊዲኦኔ ና ኣቢዳኔ። 23 ሄ ኢስታ ቆዳይ 35,400። 24 ኢስቲ ባ ዛርኬን ዛርኬን ጊዲዲ ኤፍሬሜ ዛርኬቲ ዱንካኒ ኡቲዳ ባጋራ ዱንካኒዳ ኣሳ ቆዳይ 108,100 ጊዲዴስ፤ ኦሮቤሌ ቡቴዛ ካሊዲ ሄꬓንꬆን ኤፍሬሜ ቡቴይ ቦ።

25 ፑዴሃ ባጋራ ዳኔ ዛርኬቲ ባ ባጋታ ኤሪሲዛ ማላታ ጋርሳን ዱንካኒ ኡቴቶ፤ ዳኔ ቆሞታ ካሌꬃና ሃላቃይ ኣሚሻዳዬ ና ኣሂኤዜሬ። 26 ኢስታ ቆዳይ 62,700። 27 ዳኔ ዛርኬታፔ ካሊዲ ኣሴሬ ዛርኬቲ ዱንካኒ ኡቴቶ፤ ኣሴሬ ዛርኬታ ካሌꬃና ሃላቃይ ኦክራ ና ፋጉኤሌ። 28 ኢስታ ቆዳይ 41,500። 29 ኢስታፌ ካሊዲ ኒፍታሌሜ ዛርኬቲ ዱንካኒ ኡቴቶ፤ ኒፍታሌሜ ዛርኬታ ካሌꬃና ሃላቃይ ኤናኔ ና ኣሂሬ። 30 ሄይታንታ ቆዳይ 53,400። 31 ኢስቲ ባ ዛርኬን ዛርኬን ጊዲዲ ዳኔ ዛርኬቲ ዱንካኒ ኡቲዳ ባጋራ ዱንካኒዳ ኣሳ ቆዳይ ኩሜꬅ 157,600 ጊዲዴስ። ሄሳꬆካ ዳኔ ዛርኬቲ ዉርሴꬃን ኦይዳንꬆ ማራን ቤቶ። 32 ኢስራኤሌ ኣሳይ ባሶን ባሶኒኔ ባ ዛርኬን ዛርኬን ማዝጋቤቲዳይታ ቆዳይ ኢሲ ቦላ 603,550 ጊዲዴስ። 33 ሌዌ ዛርኬቲ ጊዲኮ ጎዳይ ካሴ ሙሴ ኣዛዚዳ ማላ ሃንኮ ኢስራኤሌ ኣሳራ ቆዴቲቤቴና።

34 ሄሳ ማላን ኢስራኤሌ ኣሳይ ጎዳይ ካሴ ሙሴ ኣዛዚዳ ማላ ኦꬂዳ፤ ኢስታ ዛርኬታፔ ኢሶይ ኢሶይ ባ ባንዲራ ባንዲራ ካሊ ካሊ ዱንካኒ ኡቲዴስ፤ ኢሶይ ኢሶይ ባ ሶ ኣሳራ ኢሲፌ ሄሜቴስ።