1 ጎዳይ ሙሴ ሲና ዙማ ቦላ ሃሳይሲዛ ዎዴ ኣሮኔ ዬሌታይኔ ሙሴ ዬሌታይ ሃይሳፌ ካሊ ዲዛይሳ፤ 2 ኣሮኔስ ኦይዱ ኣቱማ ናይቲ ዴቴስ፤ ሄይቲካ ባይራዚ ናዳቤ ጊዲሺን ሃንኮይቲ ኣቢሁ፥ ኤልኤዜሬኔ ኢታማሬ። ታይ 26፡60 3 ሄይቲ ቄሴቴꬃን ኦꬃና ማላ ቲዬቲዳኔ ሱሚዳ። 4 ጊዶ ኣቲን ኢስታ ጋርሳፌ ናዳቤይኔ ኣቢሁይ ሲና ባዞን ጎዳ ሲንꬃን ቤሶንታ ታማ ኤሂዲ ኤꬂዳ ጊሻስ ጎዳ ሃንቆን ቦሼቲ ሃይቂዳ፤ ኢስታስ ናይ ባይንዳ ጊሻስ ኤልኤዜሬይኔ ኢታማሬይ ጻላ ኢስታ ኣዋ ኣሮኔይ ሼምፖራ ፓጻ ዲዛ ዎዴ ኡባን ቄሴቴꬃን ኦꬂዳ።ሌዌ 10፡1-2፤ ታይ 26፡61

5 ጎዳይ ሙሴስ ሂዝጊዴስ፥ 6 «ኔኒ ሌዌ ዛርኬታ ሺሻዳ ኢስቲ ቄሴ ኣሮኔ ኦሶን ማዳና ማላ ዎꬃ። 7 ኢስቲ ኣሮኔኔ ኩሜꬃ ማባራ ጋይቶቴꬃ ዱንካኔዛ ጊዶን ኦꬂ ማዶን ባ ኦሶዛ ኦꬂ ፖሌቶ። 8 ጋይቶቴꬃ ዱንካኔዛ ጊዶን ዲዛ ኦሶ ሚሻታስ ኢስታ ኣላፌ ጊዴቶ፤ ዱንካኔዛ ጊዶን ኢስራኤሌ ኣሳስ ኦሴቲዛ ኦሶ ኦꬂ ፖሌቶ። 9 ኢስራኤሌ ኣሳ ኡባፌ ኢስቲ ሻኬቲዲ ኣሮኔኔ ኢዛ ናይታ ኦሶን ማዳና ማላ ሌዌ ዛርኬታ ዎꬃ። 10 ቄሴቴꬃ ኦሶዛ ኢስቲ ፖላና ማላ ኣሮኔኔ ኢዛ ናይታ ኔ ሱንꬃ፤ ኢስታፌ ኣቲን ሃራ ኣሲ ሃይሳ ሃ ኦሶዛ ኦꬃናስ ጋይቶቴꬃ ዱንካኔዛኮ ሺቂዛ ጊዲኮ ኢዛዴይ ሃይቆን ቃጻዬቶ።»

11 ጎዳይ ሙሴስ ሂዝጊዴስ፥ 12-13 «ሄኮ ሌዌ ቆሞቲ ታስ ሃጋዚዛይታ፤ ታኒ ጊብጼ ዴሬ ኣሳ ባይራ ዉርሳ ዎꬊዳ ዎዴ ኢስራኤሌ ኣሳፔ ኢሳፌ ኢሳፌ ዬሌቲዳ ባይራኔ ኢስታ ሜሄታ ባይራታ ኩሜꬅ ታስ ዱማሳዲስ፤ ጊዶ ኣቲን ሃኢ ቃሴ ባይራ ጊዲ ዬሌቲዳ ኣቱማ ናይታ ሶሆን ሌዌ ዛርኬታ ታኒ ታስ ዶራዲስ፤ ኢስቲ ታስ ኦꬂዛይታ ጊዳና፤ ታኒ ጎዳ።»ኬሳ 13፡2

14 ጎዳይ ሙሴስ ሲና ዙማ ቦላ ሂዝጊዴስ፥ 15 «ሌዌ ዛሬታ ኢስታ ኢስታ ዛርኬን ዛርኬኒኔ ኢስታ ቆሞን ቆሞን ቆዳ፤ ዬሌቲን ኢዛስ ኢሲ ኣጊና ኩሚዳይሳኔ ሄሳፌ ቦላራ ዲዛ ኣቱማ ና ዉርሳካ ቆዳ።» 16 ሙሴይካ ጎዳይ ኢዛ ኣዛዚዳ ማላ ቆዲዴስ። 17 ሌዌስ ሄꬑ ኣቱማ ናይቲ ዴቴስ፤ ሄይቲካ ጌርሾኔ፥ ቃኣቴኔ ሜራሬ ጌቴቴቴስ። 18 ጌርሾኔ ዛርኬቲ ሊቢናኔ ሺምኤ ጌቴቴቴስ። 19 ቃኣቴ ዛርኬቲ ኣሚራሜ ዪጺሃሬ፥ ኬብሮኔኔ ኡዚኤሌ ጌቴቴቴስ 20 ሜራሬ ዛርኬቲ ማሂሌኔ ሙሼ ጌቴቴቴስ፤ ሄይታንቲ ባ ሱንꬃን ሱንꬃን ባ ኬꬃ ኣሳስ ኣዋቲዛይታ።

21 ሊቢናኔ ሺምኤ ኬꬃ ኣሳይ ጌርሾኔ ዛርኬን ቆዴቲዳ። 22 ዬሌቲን ኢሲ ኣጊና ጊዲዳ ናፔ ዶሚዲ ማዝጋቤቲዳ ኣቱማሳ ቆዳይ 7,500። 23 ጌርሾኔ ባጋቲ ዱንካኔዛፔ ጉዬ ባጋራ ኣርሼይ ዉሊዛ ባጋራ ዱንካኒዳ። 24 ጌርሾኔ ባጋታ ካሌꬂዛይ ላኤሌ ና ኤልያሳፌ። 25 ጋይቶቴꬃ ዱንካኔን ጌርሾኔ ዛርኬታ ኣላፌቴꬂ፥ ጋይቶቴꬃ ዱንካኔዛ ካማታኔ ፔንጌ ቦላ ቃጴቲዛ ማጋላሻታ፥ 26 ጊቤዛ ጊዶ ማጋላሻታ፥ ዱንካኔዛኔ ያርሾ ያርሺዛሶዛ ዩዪ ኣꬊዳ ጊቤዛ ፔንጋ ማጋላሻ ቶሌታኔ ሄሳꬆካ ሄይታንታስ ጊዲዛ ሚሻታ ኡባታ ናጎ።

27 ኣሚራሜ፥ ዪጺሃሬ፥ ኬብሮኔኔ ኡዚኤሌ ሶ ኣሳይ ቃኣቴ ዛርኬን ቆዴቲዳ። 28 ዬሌቲን ኢሲ ኣጊናኔ ሄሳፌ ቦላራ ጊዲዳ ኣቱማሳ ቆዳይ 8,600፤ ሄይታንቲ ጋይቶቴꬃ ዱንካኔዛ ናጌቴስ። 29 ቃኣቴ ዛርኬቲ ጋይቶቴꬃ ዱንካኔዛፔ ጉዬራ ዱጌሃ ባጋራ ዱንካኒዳ። 30 ቃኣቴ ቆሞታ ካሌꬂዛ ኮራፒኔይ ኡዚኤሌ ና ኤልጻፋኔ። 31 ኢስታ ኣላፌቴꬂ ጫቆ ቃላ ታቦታ ቦላ፥ ማዳ ኢዛ ቦላ ዎꬂዛ ጻራጴዛ ቦላ፥ ጾምፔ ኢዛ ቦላ ዎꬂዛይሳ ቦላ፥ ያርሾ ኢዛ ቦላ ያርሺዛይሳ ቦላ፥ ቄሴቲ ዱማ ቆልኣዛን ጎኤቲዛ ሚሻታ ቦላ፥ ጌዴ ዱንካኔዛስ ኡባፌ ዱማቲዳ ጊዶ ቆልኣ ጌሊዛሶ ባጋራ ዲዛ ማጋላሻ ጊዲሺን ኩሜꬅ ሃይታ ሃ ሚሻታ ቦላ ኢስታስ ናጋና ኣላፌቴꬂ ዴስ።

32 ሌዌ ዛርኬ ኡባ ሃላቃይ ቄሴ ኣሮኔ ና ኤልኤዜሬ፤ ኢዚ ዱማቲዳ ቆልኣን ኦꬂዛይታ ኡባ ቦላ ኣላፌ።

33 ማሂሌ ሶ ኣሳይኔ ሙሼ ሶ ኣሳይ ሜራሬ ዛርኬራ ኢሲኖ ጊዲዳ፤ ሄይቲ ሜራሬ ዛርኬን ቆዴቲዳ። 34 ዬሌቲን ኢሲ ኣጊና ጊዲዳ ጉꬃ ናፔ ዶሚዲ ቆዴቲዳ ኣቱማሳ ቆዳይ ኡሱፑን ታማኔ ናምኡ ጼታ። 35 ሜራሬ ዛርኬታ ካሌꬂዛይ ጹሪኤሌ ና ኣቢኤሌ፤ ኢስቲ ጋይቶቴꬃ ዱንካኔዛፔ ፑዴሃ ባጋራ ዱንካኒ ኡቲዳ። 36 ኢስታ ኣላፌቴꬂ ዱንካኔዛ ቶሌታ፥ ኮላታታ፥ ቱሳታኔ ቱሳታ ኢስታን ኤሲዛ ቶሆታ፥ ሄሳꬆካ ሃራ ኦሶስ ጎኤቲዛ ሚሻታ ቦላኔ ሄይታንታስ ቤሲዛ ኦሶታ ኦꬃና ኣላፌቴꬂ ዴስ። 37 ሄሳꬆካ ጊቤዛ ዩሾን ዲዛ ቱሳታ፥ ዱንካኔዛ ቶሌታ፥ ꬊሽኬታኔ ቶሌ ዎዶሮታ ቦላ ኣላፌቴꬂ ዴስ።

38 ጋይቶቴꬃ ዱንካኔዛፔ ኣርሼይ ሞኪዛ ባጋራ ዱንካኒ ኡታናይቲ ሙሴ፥ ኣሮኔኔ ኢዛ ናይታ፤ ጋይቶቴꬃ ዱንካኔ ጊዶን ኢስራኤሌ ኣሳ ጊሻስ ኦሴቲዛ ኣይ ኦሶ ጊዲኮካ ሄ ኦሶዛ ዎጋ ፖሊሲዛ ኣላፌይ ኢስታ ጊዴቶ፤ ሃራይ ኦኒካ ጌዴ ጋይቶቴꬃ ዱንካኔ ኬꬃዛኮ ሺቂኮ ሃይቆን ቃጻዬቶ። 39 ጎዳይ ኢስታ ኣዛዚዳ ማላ ሙሴይኔ ኣሮኔይ ዬሌቲን ኢሲ ኣጊና ጊዲዳ ናፔ ዶሚዲ ኣሳይ ባ ኬꬃን ኬꬃን ማዝጋቢዳ ሌዌ ቆሞታፔ ኣቱማ ናይቲ ኩሜꬅ 22,000 ጊዲዳ።

40 ጎዳይ ሙሴስ፥ «ኢስራኤሌን ባይራ ጊዲ ዬሌቲዳ ኣቱማ ናይታስ ላይꬃይ ኢሲ ኣጊናኔ ሄሳፌ ቦላራ ጊዲዳይታ ቆዳዳ ኢስታ ሱንꬃ ጻፋ። 41 ኢስራኤሌ ኣሳ ባይራ ናይታ ኡባ ሳማ ሌዌ ናይታ፥ ሄሳꬆካ ኢስራኤሌ ኣሳ ሜሄ ባይራ ኡባ ሳማ ሌዌ ቆሞታ ሜሄ ኤካ፤ ታኒ ጎዳ» ጊዴስ። 42 ሙሴይካ ባና ጎዳይ ኣዛዚዳ ማላ ኢስራኤሌ ኣሳ ጋርሳን ባይራ ጊዲ ዬሌቲዳይታ ኡባ ቆዲዴስ። 43 ኢስቲ ዬሌቲን ኢሲ ኣጊናኔ ሄሳፌ ቦላራ ጊዲዳ ባይራ ኣቱማ ናይታ ኡባ ኢስታ ሱንꬃን ሱንꬃን ቆዲን ኢስታ ቆዳይ 22,273 ጊዲዴስ።

44 ጎዳይ ሙሴስ ሂዝጊዴስ፥ 45 «ሄሳ ጊሻስ ባይራ ጊዲ ዬሌቲዳ ኢስራኤሌ ኣሳ ኣቱማ ናይታ ሶሆን ሌዌታ ኔ ታስ ሻካ፤ ሄሳꬆካ ኢስራኤሌ ኣሳ ሜሄ ባይራ ሶሆን ሌዌታ ሜሄ ታስ ዱማሳ፤ ታኒ ጎዳ። 46 ኢስራኤሌ ኣሳይ ዬሊዳ ባይራ ናይታ ቆዳይ ሌዌ ቆሞታፔ 273 ጊዲ ዳሪዛ ጊሻስ ሄይታ ቲርፓ ኣቱማ ናይታ ሚሻን ዎዛ። 47 ኢሳ ኢሳ ዎዛናስ ጋይቶቴꬃ ዱንካኔ ሜዛኔዛ ማላ ኢቻሹ ሳቂሌ ቢራ ኤካ፤ 48 ሄ ኣቲዳ ዎዞ ሚሻ ኣሮኔሲኔ ኢዛ ናይታስ ኢማ።»

49 ሙሴይካ ሌዌ ቆሞታን ዎዜቲዳይታፔ ቦላራ ቲርፒዳ 273 ኣሳታ ጊሻስ ሺቂዳ ዎዞ ሚሻ ኤኪዴስ። 50 ኢስራኤሌ ኣሳ ባይራታፔ ጋይቶቴꬃ ዱንካኔ ሜዛኔዛ ማላ ሚሻ 1,365 ሳቂሌ ቢራ ኤኪዴስ። 51 ጎዳይ ኣዛዚዳ ማላ ሙሴይ ዎዞ ሚሻ ኣሮኔሲኔ ኢዛ ናይታስ ኢሚዴስ።