6
ናዚራዌቴꬃ ዎጋ
1 ጎዳይ ሙሴስ ሂዝጊዴስ፥ 2 «ኢስራኤሌ ኣሳስ፥ ‹ማጫ ጊዲን ዎይኮ ኣዴ ጊዲን ኣይ ኣሲካ ባና ጎዳስ ዱማሳናስ ኣዲና ኣዲኔቲኮ፥ 3 ሄሳዴይ ዎይኔ ኡሹ ዎይኮ ሃራ ማꬆሲዛ ኡሹ ኡዮፖ፤ ዎይኔፔ ዎይኮ ሃራፔ ኦሴቲዳ ጫላ ዎይኮ ማꬆሲዛ ኡሹ ኢዚ ኡዮፖ፤ ዎይኔ ሚꬃ ኣይፌፔ ቲያ ጊዲን ዎይኮ ሜላ ጊዲን ሞፖ። ሉቃ 1፡15 4 ኢዚ ባና ዱማሲዲ ዲዛ ዎዴን ዎይኔ ሚꬃ ሃጋ ቦላ ዲዛ ኣይፌ ጊዲን ዎይኮ ፖቆ ሞፖ።
5 « ‹ኢዚ ናዚራዌቴꬃስ ኣዲኔቲዳ ዎዴይ ዉራና ጋካናስ ኢዛዴ ሁኤ ቢናና ማጋላይ ቦቾፎ፤ ኢዚ ባና ጎዳስ ዱማሲዳ ዎዴይ ፖሌታና ጋካናስ ኢዚ ዱማቲዳዴ ጊዲዲ ባ ሁኤ ቢናና ዲቾ። *ማጋላ ጉሲ ካሴ ዎዴ ኣሳይ ሁኤ ሜዲዛ ቄሪ ቢላማ። 6 ኢዚ ናዚራዌ ጊዲ ዲዛ ዎዴ ኡባን ሃይቂዳ ኣሃኮ ሺቆፖ። 7 ኢዚ ባ ጎዳስ ባና ዱማሲዳ ማላታይ ኢዛ ሁኤ ቦላ ዲዛ ጊሻስ ኢዛስ ኣዋይ ዎይኮ ኣያ ዎይኮ ኢዛስ ኢሻይ ዎይኮ ሚቻ ሃይቂኮ ኢስታ ኣሃ ቦቺዲ ኢዚ ባና ቱኒሶፖ። 8 ኢዚ ባና ናዚራዌ ኦꬂዳ ዎዴ ኡባን ኢዚ ጎዳስ ዱማቲዳ ኣሳ።
9 « ‹ኢዚ ቆፖንታ ዲሺን ኢሳዴይ ኢዛ ኣቻን ሃይቂዲ ካሴ ዱማቲ ዲዛ ኢዛ ሁኤ ቢናና ቱኒሲኮ ኢዚ ላፑንꬃ ጋላስ ባ ሁኤ ቢናና ሜዴቲ ቡሉሶ። 10 ኦስፑንꬃ ጋላስ ናምኡ ሃራጴታ ዎይኮ ሃራጴ ጪዬታ ጋይቶቴꬃ ዱንካኔዛ ፔንጌን ዲዛ ቄሴዛኮ ኤሆ። 11 ቄሴዚካ ኢሲ ሃራጴዛ ናጋራ ያርሾስ ናምኣንꬆዛ ቃሴ ጹጌቲዛ ያርሾስ ሺሾ፤ ጋሶይካ ኢዚ ኣሃ ማታ ሺቂዲ ቱኒዳ ጊሻስ ቄሴዚ ኢዛ ናጋራ ዉርሳና፤ ሄ ጋላሲካ ናዚራዌይ ባ ሁኤ ኢስኬዛ ናምኣንꬆ ጎዳስ ዱማሶ። 12 ኢዚ ናዚራዌቴꬃን ኦꬃናስ ባና ጎዳስ ናምኣንꬆ ዱማሶ፤ ጎዳስ ዱማቲዳ ሄ ኢዛ ኢስኬዚ ቱኒዳ ጊሻስ ሄሳፌ ካሴ ኢዚ ናዚራዌቴꬃን ጋምኢዳ ዎዴይ ኢዛስ ቆዳን ጌሌና፤ ኢዚ ባ ቆሆዛ ጊሻስ ኢሲ ላይꬃ ꬋርሾ ላቃ ኤሆ።
13 « ‹ኢሲ ናዚራዌይ ባ ናዚራዌቴꬃ ኣዲና ኡባ ዎዴ ኢዚ ፖላና ዎጋይ ሃይሳፌ ካሊ ዲዛይሳ፤ ኢዚ ጌዴ ጋይቶቴꬃ ዱንካኔን ጌሊዛ ፔንጌዛኮ ቢዲ፥ 14 ሄን ባ ያርሾ ጎዳስ ሺሾ፤ ሄሲካ ጹጌቲዛ ያርሾስ ኢሲ ላይꬅ ኩሚዳ ꬋርሾ ላቃ፥ ናጋራ ያርሾስ ኢሲ ላይꬅ ኩሚዳ ኡዚ ዶርስ፥ ሄሳꬆካ ኢሲፌቴꬃ ያርሾስ ዎሶይ ባይንዳ ꬋርሾ ሺሾ። 15 ቃሴ ካꬃ ያርሾኔ ኡሻ ያርሾ ኢስታራ ኢሲፌ ያርሻናስ ኤሆ፤ ሄ ሌማቴዛን ካꬃ ያርሾይ ኢርሾይ ኢዛን ጌሎንታይሳ ጊዶ፤ ቃሴ ሊቆ ꬊሌ ዛይቴን ሙኑቂ ኡኪዳ ኦርዴ ኡኬꬂኔ ዛይቴን ቲዬቲዳ ሌኤ ኡኬꬅ ኤሆ።
16 « ‹ቄሴዚካ ሄሳ ኡባ ናጋራ ያርሾኔ ጹጌቲዛ ያርሾ ኦꬂዲ ጎዳ ሲንꬅ ሺሾ። 17 ꬋርሾዛኔ ሌማቴራ ኢርሾይ ኢዛን ጌሎንታ ኡኬꬃታ ኢሲፌቴꬃ ያርሾ ኦꬂዲ ጎዳስ ሺሾ፤ ቃሴ ሄሳራ ኢሲፌ ጋꬂዲ ካꬃ ያርሾኔ ኡሻ ያርሾ ያርሾ።
18 « ‹ሄሳፌ ጉዬ ጋይቶቴꬃ ዱንካኔዛን ጌሊዛ ፔንጌ ቦላ ሄ ናዚራዌዚ ጎዳስ ኣዲኔቲዳ ባ ሁኤ ቢናና ሜዴቲዲ ኢሲፌቴꬃ ያርሾይ ጹጌቲዛ ታማን ዬጎ።
19 « ‹ባና ጎዳስ ዱማሲዳ ናዚራዌይ ባ ሁኤ ቢናና ሜዴቲዳፔ ጉዬ ቄሴዚ ዶይሴቲዳ ꬋርሾዛ ሚሳ ኣሾ፥ ኢርሾይ ጌሎንታ ኡኬቲዳ ኦርዴ ኡኬꬂኔ ሌኤ ኡኬꬅ ሌማቴፔ ኤኪዲ ሄ ናዚራዌዛ ኩሼን ዎꬆ። 20 ሄሳፌ ጉዬ ቄሴዚ ኡባ ኤኪዲ ጎዳ ሲንꬃን ያኔ ሃ ቃሴꬂዛ ያርሾ ሂስቲ ሺሾ፤ ሄይቲካ ጎዳስ ዱማቲዳ ያርሾ፤ ሄ ቃሴꬂዳ ኣንጋሶይኔ ሚሳዚ ቄሴዛስ ጊዶ፤ ሄሳፌ ጉዬ ናዚራዌዚ ዎይኔ ኡሹ ኡያናስ ዳንዳዬስ።
21 « ‹ሄሳ ጊሻስ ጎዳስ ባና ዱማሳናስ ኣዲኒዳ ናዚራዌስ ዎꬊዳ ዎጋይ ባና ጎዳስ ያርሻናስ ኮሺዛ ያርሾታፔ ቦላራ ኣꬂ ጌፒኮ ኢዚ ቃላ ጌሊዳ ማላ ባ ኣዲና ፖላናስ ቤሴስ ጋ ዮታ› ጌስ።»ሃዋ 21፡23-24
ቄሴቲ ዉርሴꬃን ኣንጃና ኣንጆ
22 ጎዳይ ሙሴስ ሂዝጊዴስ፤ 23 «ኣሮኔይኔ ኢዛ ናይቲ ኢስራኤሌ ዴራ ኣንጂሼ ሂዝጊ ኣንጄቶ፥
24 ‹ጎዳይ ኔና ኣንጆ፤
ኢዚ ኔና ናጎ፤
25 ጎዳይ ባ ኣይፌሶ ፖኦ
ኔስ ቆንጪሶ፤
ኢዚ ኔስ ቃꬌቶ።
26 ጎዳይ ኔና ባ ማሮቴꬃ
ኣይፌን ጼሎ፤
ባ ሳሮቴꬅካ ኢዚ ኔስ ኢሞ›
ጋዳ ዮታ።»
27 ቃሴካ ጎዳይ፥ «ኢስቲ ኢስራኤሌ ኣሳ ታ ሱንꬃን ኣንጂዛ ዎዴ ታኒ ኢስታ ኣንጃና» ጊዴስ።