1 ጎዳይ ሙሴስ ሂዝጊዴስ፥ 2 « ‹ኔኒ ኣሮኔስ ላፑን ጾምፔታ ኢስታ ቦላ ዎꬂዛ ዎዴ ጾምፔቲ ጾምፔ ኢስታ ቦላ ዎꬂዛ ባላታስ ሲንꬃ ባጋራ ዲዛሶ ፖኢሳና› ጋዳ ዮታ።»

3 ኣሮኔይካ ጎዳይ ሙሴ ኣዛዚዳ ማላ ኦꬂዴስ፤ ጾምፔታ ኢስታ ቦላ ዎꬂዛ ባላታፔ ሲንꬃ ባጋራ ዲዛሶዛ ፖኢሳና ማላ ጊግሲ ዎꬂዴስ። 4 ጾምፔታ ኢስታ ቦላ ዎꬂዛ ባላቲ ጋርሳ ቶሆሶፔ ዶሚዲ ጪሼ ሚሳቲዛ ባላታ ጼራ ጋካናስ ቆጼቲዳ ዎርቃፌ ኦሴቲዳ፤ ሄይቲካ ጎዳይ ሙሴ ቤሲዳ ማላ ጾምፔ ኢስታ ቦላ ዎꬂዛ ባላታ ሌሚሶን ኦሴቲዳ። ኬሳ 25፡31-40፤ 37፡17-24

5 ጎዳይ ሙሴስ ሂዝጊዴስ፥ 6 «ሃንኮ ኣቲዳ ኢስራኤሌ ዴራ ጋርሳፌ ሌዌ ቆሞታ ዱማ ሻካዳ ጌሻ። 7 ጌሾ ዎጋስ ጊጌቲዳ ሃꬃን ኢስታ ኣራጫ፤ ኢስቲ ባንታ ቦላ ዲዛ ኢስኬ ኡባ ሜዴታናሲኔ ባ ማይኦካ ሜጪዲ ባና ጌሻና ማላ ኦꬃ። 8 ሄሳፌ ካሊዲ ኢሲ ሚርጎኔ ካꬃ ያርሾስ ጊዲዛ ሊቆ ꬊሌፌ ዛይቴን ሙኑቄቲዳ ሙኑቃ ኤኪ ቤቶ፤ ኔካ ናጋራ ያርሾስ ሺቂዛ ኢሲ ሚርጎ ኤካ ባ። 9 ሄሳፌ ጉዬ ኔ ኢስራኤሌ ኣሳ ሺሻዳ ሌዌቲ ጋይቶቴꬃ ዱንካናስ ሲንꬃ ባጋራ ጎዳ ሲንꬃን ኤሳ። 10 ኢስራኤሌ ኣሳይካ ሌዌታ ሁኤ ቦላ ባ ኩሼ ዎꬆ። 11 ኣሮኔይ ሌዌታ ጎዳ ኦሶ ኦꬃናስ ጊጌቲዳይታ ጊዳና ማላ ኢስራኤሌ ኣሳ ጋርሳፌ ያኔ ሃ ቃሴꬂ ሺሺዛ ያርሾ ኦꬂዲ ኢስታ ጎዳ ሲንꬅ ሺሾ።

12 «ሄሳፌ ጉዬ ሌዌቲ ባ ኩሼታ ሄ ናምኡ ሚርጎታ ሁኤ ቦላ ዎꬄቶ፤ ኢሳ ናጋራ ዉርሶ ያርሾስ፥ ኢሳ ጹጌቲዛ ያርሾስ ኦꬃዳ ኢስታ ማሪሳናስ ጎዳ ሲንꬃን ያርሻ። 13 ሌዌታ ያኔ ሃ ቃሴꬂ ሺሺዛ ያርሾ ሂስታዳ ጎዳ ሲንꬅ ሺሻ፤ ኣሮኔኔ ኢዛ ናይታካ ኢስታ ቦላ ሹማ። 14 ሄሳ ማላን ሌዌቲ ታይታ ጊዳና ማላ ሃንኮ ኣቲዳ ኢስራኤሌ ኣሳ ጊዶፌ ኔ ታስ ኢስታ ሻካ።

15 «ኔኒ ሌዌታ ሻካ ጌሺዳፔኔ ያኔ ሃ ቃሴꬂ ሺሺዛ ያርሾ ሂስቲዳፔ ጉዬ ኢስቲ ጋይቶቴꬃ ዱንካኔዛ ጊዶን ኦꬃና ቤሲዛ ኦሶዛ ፖላናስ ዬቶ። 16 ታኒ ኢስታ ኮይሮ ባይራ ዬሌቲዛ ኢስራኤሌ ኣሳ ኣቱማ ናይታ ኡባ ጊሻስ ታስ ዶራዲስ፤ ኢስራኤሌ ኣሳ ጊዶፌ ኢስቲ ታስ ሙሌራ ቡዞ ጊዳና። 17 ጊብጼ ቢታን ባይራ ዬሌቲዳ ኣሳፔ ሜሄ ጋካናስ ዲዛይታ ታኒ ዎꬊዳ ዎዴ ኢስራኤሌ ኣሳ ኢሳ ኢሳ ኬꬃን ኣዴ ጊዲዲ ባይራ ዬሌቲዳ ኣሳፔ ሜሄ ጋካናስ ዲዛይታ ኡባ ታስ ዱማሳ ሻካዲስ። ኬሳ 13፡2 18 ሃኢ ቃሴ ኢስራኤሌ ኣሳ ባይራ ኣቱማ ናይታ ጊሻስ ሌዌ ዛርኬታ ታስ ሻካዲስ። 19 ኢስቲ ኢስራኤሌ ኣሳ ጊሻስ ጊዲዲ ጋይቶቴꬃ ዱንካኔዛ ጊዶን ታስ ኦꬃና ማላኔ ኢስራኤሌ ኣሳይ ጌዴ ጌሻሶዛኮ ሺቂዲ ቦሻን ቦሼቶንታ ማላ ኢስታ ናጋና ማላ ሌዌታ ኢስራኤሌ ኣሳ ጋርሳፌ ታስ ኢሞታ ማላ ኤካዳ ኣሮኔሲኔ ኢዛ ናይታስ ኢማዲስ።»

20 ሄሳ ጊሻስ ጎዳይ ሙሴ ኣዛዚዳ ማላ ሙሴይ፥ ኣሮኔይኔ ኢስራኤሌ ኣሳይ ኡባይ ሌዌታ ዱማሲ ሻኪዳ። 21 ሌዌቲ ሜጬቲ ጌዪዳ፤ ባ ማይኦካ ሜጪዳ፤ ኣሮኔይ ኢስታ ያኔ ሃ ቃሴꬂ ሺሺዛ ያርሾ ሂስቲ ጎዳ ሲንꬅ ሺሺዴስ፤ ጌሾ ዎጋካ ኢስታ ጊሻስ ፖሊዴስ። 22 ጎዳይ ሙሴስ ሌዌታ ጊሻስ ኢሚዳ ኣዛዞዛ ማላ ዴሬዚ ዉሪካ ኦꬂዴስ፤ ሄሳ ማላን ሌዌቲ ኣሮኔኔ ኢዛ ናይታ ኣላፌቴꬃ ጋርሳን ጋይቶቴꬃ ዱንካኔዛ ጊዶን ኦꬃናስ ጊጌቲዳ።

23 ጎዳይ ሙሴስ ሂዝጊዴስ፥ 24-25 «ሌዌቲ ኦሶ ዶማናስ ቤሲዛ ዎጋቲ ዬሌቲን ናምኡ ታማኔ ኢቻሹ ላይꬃፌ ቢዲ ኢቻሹ ታሙ ላይꬅ ጋካናስ ዲዛይቲ ዉሪ ጋይቶቴꬃ ዱንካኔዛ ጊዶን ኦꬄቶ፤ ኢቻሽ ታሙ ላይꬅ ኩሚሺን ኦꬆፌቶ። 26 ሄሳፌ ጉዬ ኢስታ ኢሻቲ ጋይቶቴꬃ ዱንካኔዛ ጊዶን ኦꬂዛ ዎዴ ማዳናስ ዳንዳዬቴስ ኣቲን ባርካ ጻላ ዲኮ ኣይ ኦሶካ ኦꬆፌቶ።»