1 ኮይሮ ኣጊናን ኢስራኤሌ ኣሳይ ኩሜꬅ ጺኔ ባዞን ቃዴሴ ጌቴቲዛሶን ዱንካኒ ኡቲዴስ፤ ማራማ ሃይቂን ሄን ሞጊዳ። 2 ኣሳይ ዱንካኒ ኡቲዳሶሆን ሃꬂ ባይንዳ ጊሻስ ሙሴ ቦላኔ ኣሮኔ ቦላ ዴንዲዴስ። 3 ዴሬዚ፥ «ኑኒ ካሴ ጋይቶቴꬃ ዱንካኔ ሲንꬃን ሃይቂዳ ኢስራኤሌ ኣሳ ማላ ኢስታꬆ ኑኒካ ሃይቂዳኮ ኑስ ሎኦ ጊዳናሺን፤ 4 ኢንቴ ጎዳ ማባራ ሃይሳ ሃ ባዞ ቢታ ኤሂዳይ ኑኒኔ ኑ ሜሄይ ሃይሳን ዉራና ማላ ኦꬃናሴ? 5 ኢንቴ ኑና ጊብጼፔ ኬሲዲ ሃይሳ ኣይኮይ ሞኮንታ ኢታ ባዞ ኑና ኣዛስ ኤሂዴቲ? ሃይሳን ካꬂ፥ ባላሴይ፥ ዎይኔ ኣይፌይኔ ኦሮማኔይ ዴና፤ ሃራይ ኣቶሺን ጋንጺ ኤኪዛ ሃꬂካ ዴና!» ጊዲ ሙሴራ ኦዬቲዳ። 6 ሙሴይኔ ኣሮኔይ ኣሳፔ ሻኬቲዲ ጌዴ ጋይቶቴꬃ ዱንካኔ ፔንጌ ቢዳ፤ ኢስቲ ዱጌ ቢታን ጉፋኒ ዲሺን ጎዳ ቦንቾይ ኢስታስ ቆንጪዴስ።

7 ጎዳይ ሙሴስ ሂዝጊዴስ፥ 8 «ጫቆ ቃላ ታቦታ ሲንꬃን ዲዛ ጉፌዛ ኤኪዳ ኔኒኔ ኣሮኔይ ኩሜꬃ ማባራ ኢሲ ቦላ ሺሺቴ፤ ኔኒ ሄን ኩሜꬃ ዴራ ሲንꬃን ዲዛ ዛላዚ ሃꬄ ኢማና ማላ ዮታ፤ ኔኒ ሄሳꬆ ኦꬃዳ ዛላዛፔ ኢስታስ ሃꬄ ኬሳ፤ ሂስቲኮ ኢስቲኔ ኢስታ ሜሄይ ሃꬅ ኡዪዲ ኣላና።»

9 ሙሴይ ጎዳይ ኢዛ ኣዛዚዳ ማላ ቢዲ ጋይቶቴꬃ ዱንካኔዛፔ ባ ጉፌዛ ኤኪ ዪዴስ። 10 ኢዚኔ ኣሮኔይ ኩሜꬃ ማባራ ዛላዛ ሲንꬃን ሺሺዳፔ ጉዬ ሙሴይ ዴሬዛ፥ «ኢንቴኖ ማካላንቻቶ! ሃይሳ ሃ ዛላዛፔ ኑ ኢንቴስ ሃꬄ ኬሳኔ!» ጊዴስ። 11 ሄሳፌ ጉዬ ሙሴይ ባ ጉፌዛን ዛላዛ ናምኣ ዛሪ ሾጪዴስ፤ ዎልቃማ ሃꬂ ዛላፌ ፑልቲዴስ፤ ዴሬዚኔ ሜሄይ ሃꬃ ኡዪዴስ።

12 ጊዶ ኣቲን ጎዳይ ሙሴ ቦላኔ ኣሮኔ ቦላ፥ «ኢንቴ ኢስራኤሌ ኣሳ ሲንꬃን ታ ዱማቴꬃ ማላ ታና ቦንቻናስ ኣማኔቲቤኬታ፤ ሄሳ ጊሻስ ታ ኢንቴና ላቲሳና ጋ ጫቂዳ ዴሬዛ ሃይሳ ዴራ ካሌꬂዲ ጌሌኬታ» ጊ ሃንቄቲዴስ።

13 ኢስራኤሌ ኣሳይ ጎዳራ ኦዬቲዳሶይኔ ኢዚ ባ ዱማቴꬃ ቆንጪሲዳሶይ ማሪባ ጌቴቲዳ ጊሻስ ሃꬃይካ ማሪባ ሃꬅ ጌቴቲ ሱሚዴስ።

14 ሙሴይ ኤዶሜ ካዎስ ኪታ ጋꬃና ማላ ቃስታኔ ኣስ ቃዴሴፔ ዬዲዴስ፤ «ኔ ኢሻ ኢስራኤሌይ፥ ‹ኑ ቦላ ጋኪዳ ሜቶዛ ኡባ ኔኒ ሲያዳሳ፤ 15 ቤኒ ኑ ኣዋቲ ዋኒ ዱጌ ጊብጼ ዎꬊዳኮኔ ኑኒካ ጊብጼን ዳሮ ላይꬃታ ዋኒ ዋኒ ዲዳኮ ኔ ኤራሳ፤ ጊብጼ ኣሳይ ካሴ ኑ ኣዋታ ጊዲን ኑናካ ዳሮ ዋዪሲዴስ። 16 ኑኒካ ኢዚ ኑና ማዳና ማላ ጎዳኮ ዋሲዶስ፤ ኢዚካ ኑ ዋሶዛ ሲዪዲ ጊብጼፔ ኑና ኬሳናስ ባ ኪታንቻ ኑስ ኪቲዴስ፤ ሄኮ ኑኒ ሃኢ ኔስ ꬋሳን ዲዛ ቃዴሴን ዶስ። 17 ሄሳ ጊሻስ ኑኒ ኔ ቢታራ ኣꬊ ባና ማላ ኑስ ኤሮ ጋርኪ! ኑና ጊዲን ኑ ሜሄይካ ኦጌፔ ካሬ ኬዞኮ፤ ካꬃ ጊዶ ጊዲን ዎይኮ ዎይኔ ሚꬃ ጊዶ ኑ ጌሎኮ፤ ኔ ሃꬃ ኦላፌካ ኡዮኮ፤ ኔ ዴሬፔ ኣꬋና ጋካናስ ኦጌፔ ካሬ ኬዞኮ› ጌስ» ጊ ኪቲዴስ።

18 ኤዶሜ ኣሳይ ጊዲኮ፥ «ኢንቴ ኑ ዴሬራ ኣꬊ ባና ማላ ኮዮኮ፤ ኢንቴ ኑ ዴሬ ጌላናስ ፓጪኮ ኑ ኢንቴ ቦላ ዎራጃና» ጊዳ።

19 ኢስራኤሌ ኣሳይካ፥ «ኑኒ ዋና ኦጌዛፔ ኬዞኮ፤ ኑና ጊዲን ዎይኮ ኑ ሜሄይ ኢንቴ ሃꬃፌ ኡዪኮ ኑ ኢንቴስ ኢዛ ዋጋ ቃንጻና፤ ኑ ዋና ኮይዛይ ኢንቴ ዴሬዛራ ኣꬊ ባናሳ» ጊዲ ኢስታስ ማልꬄ ኢሚዳ።

20 ኤዶሜ ኣሳይ ጊዲኮ፥ «ሄሲ ሃኔና! ኑ ኢንቴና ኣꬂ ዬዶኮ!» ጊዲ ሚኖ ኦላንቻታ ኤኪዲ ኢስራኤሌ ኣሳ ኦላናስ ኬዚዳ። 21 ኤዶሜ ዴሬ ኣሳይ ባ ቢታራ ኣꬂ ዬዶንታይሳ ኤሪዲ ኢስራኤሌ ኣሳይ ባ ቢዛ ኦጌዛ ላሚዲ ሃራሶራ ቢዴስ።

22 ኩሜꬃ ኢስራኤሌ ማባራይ ቃዴሴፔ ዴንዲ ሆሬ ዙማኮ ጋኪዴስ። 23 ሄ ዙማዚ ኤዶሜ ꬋሳን ዴስ፤ ጎዳይ ሄን ሙሴሲኔ ኣሮኔስ፥ 24 «ታኒ ኢስራኤሌ ኣሳስ ኢማና ጋዳ ካሴ ጫቂዳ ዴሬዮ ኣሮኔይ ጌሌና፤ ኢንቴ ዉሪካ ማሪባ ሃꬃ ኣቻን ታ ኣዛዞዛ ቦላ ማካሊዳ ጊሻስ ኣሮኔይ ሃይቃና። 25 ኣሮኔኔ ኢዛ ናዛ ኤልኤዜሬ ኔናራ ኤካዳ ፑዴ ሆሬ ዙማ ቦላ ኬዛ። 26 ኣሮኔይ ቄሴቴꬃስ ማይኢዳ ማይኦዛ ቃራ ኤካዳ ኤልኤዜሬ ማይዛ፤ ኣሮኔይ ሄን ሃይቃና» ጊዴስ።

27 ሙሴይካ ጎዳይ ኢዛስ ጊዳይሳ ኡባካ ኦꬂዴስ፤ ኩሜꬃ ማባራይ ኢስታ ጼሊሺን ኢስቲ ፑዴ ሆሬ ዙማ ቦላ ኬዚዳ። 28 ሙሴይካ ኣሮኔ ቄሴቴꬃ ማይኦዛ ቃሪ ኤኪዲ ኤልኤዜሬ ማይዚዴስ፤ ኣሮኔይ ሄን ዙማ ሁኤን ሃይቂዴስ፤ ሙሴይኔ ኤልኤዜሬይ ዙማ ቦላፌ ዱጌ ሲሚ ዎꬊዳ።ኬሳ 29፡29፤ ታይ 33፡38፤ ዛሬ 10፡6 29 ኣሮኔይ ሃይቂዳይሳ ኩሜꬃ ዴሬዚ ሲዪዲ 30 ጋላስ ጋካናስ ኢዛስ ሚሼቲዲ ዬኪዴስ።