21
ካናኔ ኣሳ ጾኔቴꬅ
1 ኢዛስ ዱሳሶይ ኔጌቤ ጊዲዳ ካናኔ ዴሬ ካዎ ኣራዴይ ኢስራኤሌ ኣሳይ ኣታራሜ ባጋራ ዪዛይሳ ሲዪዲ ኢስታ ቦላ ኦላ ዴንꬂዲ ኢስታፌ ኣማርዳይታ ዲኢዴስ። ታይ 33፡40 2 ሄ ዎዴ ኢስራኤሌ ኣሳይ፥ «ኑኒ ሃይሳ ዴሬዛ ጾናና ማላ ኔ ኑና ማዲኮ ኢስታ ጊዲን ዎይኮ ኢስታ ካታማታ ናምኣንꬆ ዴንዶንታ ማላ ኦꬂዲ ኑ ኢስታ ሙሌራ ዲፒ ሂስታና» ጊዲ ጎዳስ ኣዲኒዳ። 3 ጎዳይ ኢስታ ዎሳ ሲዪዲ ማዲዳ ጊሻስ ኢስቲ ካናኔ ኣሳ ጾኒ ኦይኪዳ፤ ሄሳ ጊሻስ ኢስራኤሌ ኣሳይ ኢስታኔ ኢስታ ካታማ ሙሌራ ዲፒ ሂስቲ ꬋይሲዳ፤ ኢስቲ ዉሪ ዉሪዳይሳ ኤራናስ ሄሳ ሄ ጋዴዛ፥ «ሆርማ» ጊ ሱንꬂዳ።*ሆርማ ጉሲ ኢብራዌታ ቃላራ፥ «ጎሜ ዎይኮ ቃንጌꬅ ዎይኮ ቱና ሚሽ» ጉሳ።
ጻርቂማላፔ ኦሴቲዳ ሾሽ
4 ኢስራኤሌ ኣሳይ ኤዶሜ ዴሬ ዩዪ ኣꬊዲ ባናስ ቆፒዳ ሆሬ ዙማፔ ዴንዲዲ ጌዴ ዞኦ ኣባኮ ኤፊዛ ኦጌዛራ ቢዳ፤ ጊዶ ኣቲን ኢስቲ ቡሮ ኦጌን ዲሺን ዴሬዛፔ ዳንዳያይ ዉሪዴስ። ዛሬ 2፡1 5 ጎዳ ቦላኔ ሙሴ ቦላ ኢታ ቃላ ኬሲዲ፥ «ሃꬂኔ ካꬂ ባይንዳሶ ሃይሳ ባዞ ቢታን ኑ ሃይቃና ማላ ኑና ጊብጼፔ ኣይስ ኬሲዴቲ? ሃይሲ ሃ ኢታ ካꬃይ ኑና ሳሌꬂዴስ» ጊዳ። 6 ሄሳፌ ጉዬ ጎዳይ ኢታ ማርዜራ ዲዛ ሾሽ ዴሬዛ ጊዶ ዬዲዴስ፤ ሄ ሾሻይ ዱኪን ኢስራኤሌ ኣሳፔ ዳሮይ ሃይቂዴስ። 1ቆሮ 10፡9 7 ዴሬዚካ ሙሴኮ ቢዲ፥ «ጎዳ ቦላኔ ኔ ቦላ ኑ ኢታ ቃላ ሃሳይዳ ጊሻስ ኑኒ ቆሂዶስ፤ ሃኢካ ሃይቲ ዱኪዛ ሾሻቲ ኑፔ ኪቻና ማላ ኔኒ ኑስ ጎዳ ዎሳርኪ!» ጊዳ፤ ሙሴይካ ዴራስ ዎሲዴስ። 8 ሄ ዎዴ ጎዳይ ሙሴስ፥ «ኔኒ ጻርቂማላ ሾሽ ቆጻ ኬሳዳ ቱሳ ማላ ኣዱሳ ሚꬃ ቦላ ካቃ፤ ሾሺ ዱኪዳ ኣሲ ዉሪካ ሄሳ ቤኢዲ ኣታና» ጊዴስ። 9 ሙሴይካ ጻርቂማላፔ ሾሽ ሜꬊዲ ቱሳ ማላ ኣዱሳ ሚꬃ ቦላ ቃጲዴስ፤ ሾሺ ሳጺዳ ኣሲ ኡባይ ሄ ጻርቂማላ ሾሻ ꬎቁ ጊ ጼሊዳይ ጼሊዳይ ፓጺዴስ። 2ካዎ 18፡4፤ ዮሃ 3፡14
ኡሬፔ ዴንዲዲ ሞኣቤ ቡስ
10 ኢስራኤሌ ኣሳይ ባ ዲዛሶፔ ዴንዲ ቢዲ ኦቦቴን ዱንካኒ ኡቲዴስ። 11 ሄፔ ዴንዲዲ ሞኣቤፔ ኣርሼይ ሞኪዛ ባጋራ ዲዛ ኢዬ-ኣባሪሜ ባዞን ዱንካኒ ኡቲዴስ። 12 ሄፔ ዴንዲ ቢዲ ዛራዴ ሾባን ኡቲዴስ። 13 ሄፔካ ዴንዲ ቢዲ ኣሞሬታ ዴሬራ ካንꬂ ቢዛ ባዞ ኣርኖኔ ሻፋፔ ሄ ፒንꬃን ዲዛ ቢታን ዱንካኒ ኡቲዳ፤ ኣርኖኔ ሻፋዚ ሞኣቤ ዴሬሲኔ ኣሞሬ ዴሬዛስ ጊዶ ꬋሳን ዴስ። 14 ሄሳ ጋሶን ጎዳይ ካሌꬂን ኦሌቲዳ ኦላ ጊሻስ ዮቲዛ ታሪኬ ማጻፋዛን፥ «ሱፋ ሄራኒኔ ሾባታን ዲዛ ዋሄቤ ካታማን ኣርኖኔን ሃꬂ ባይንዳ ሻፋን፥ 15 ቢዲ ኤሬ ካታማኔ ሞኣቤ ꬋስ ጋካናስ ካንꬂ ቢዛ ዞዜታ» ጌቴቲዴስ። 16 ሄፔ ዴንዲዲ ቢኤሬ ቢዳ፤ ሄሲካ ጎዳይ ሙሴስ፥ «ዴራ ኢሲ ቦላ ሺሻ፤ ታኒ ኢስታስ ሃꬅ ኢማና» ጊዲ ዮቲዳ ሃꬃ ኦላ።
17 ሄ ዎዴ ኢስራኤሌ ኣሳይ ሃይሳ፥
«ሃይሶ ፑልቶዞ ፑልታ፤
ኢንቴካ ኢዛስ ዬጺቴ።
18 ካዎቲ ባ ካዎቴꬃ
ጉፌን ቦኪዳ፤
ዳናቲ ባ ጉፌን ዚቂሲዳ፤
ሃꬃ ኦላስ ዬጺቴ» ጊዳ።
ሄ ባዞዛፔ ዴንዲዲ ጌዴ ማታኔ ቢዳ። 19 ማታኔፔካ ጌዴ ናሃልኤሌራ ካንꬂዲ ጌዴ ባሞቴ ቢዳ። 20 ባሞቴፔ ዴንዲዲ ኣሞኔ ዴሬን ዲዛ ሾባ ቢዳ፤ ሄ ሾባይካ ፒዝጋ ዙማፔ ዳንኤ ባጋራ ባዞዛ ጊናን ዴስ።
ካዎ ሲሆኔ ጾኔቴꬅ
(ዛሬ 2፡26—3፡11)
21 ሄሳፌ ጉዬ ኢስራኤሌ ኣሳይ ኣሞሬ ዴሬ ካዎ ሲሆኔስ ቃስታኔ ዬዲዲ፥ 22 «ኑኒ ኔ ቢታራ ኣꬊ ባና ማላ ኑና ኣꬃ ዬዳርኪ! ኑኒኔ ኑ ሜሄይ ኦጌፔ ካሬ ኬዞኮ፤ ጌዴ ኔ ካꬃ ጊዶ ጊዲን ዎይኮ ኔ ዎይኔ ሚꬃ ጋርስ ኑ ጌሎኮ፤ ኔ ሃꬃ ኦላፌ ኤኪ ኡዮኮ፤ ኑኒ ኔ ዴሬራ ኣꬊ ባና ጋካናስ ኦጌፔ ሼርኢ ጎኮ» ጊዴስ።
23 ሲሆኔይ ጊዲኮ ኢስራኤሌ ኣሳይ ኢዛ ቢታራ ኣꬊ ባና ማላ ኮዪቤና፤ ሃራፔካ ኢዚ ባስ ዲዛ ኦላ ኣሳ ሺሺ ኤኪዲ ያሃጼ ባዞ ዎꬊዴስ፤ ኢስራኤሌ ኣሳራካ ኦላ ኦይኬቲዴስ። 24 ኢስራኤሌ ኣሳይ ጊዲኮ ኢስታ ጾኒዴስ፤ ኣርኖኔ ሻፋፔ ዶሚዲ ኣሞኔ ዴሬ ꬋስ ጊዲዳ ያቦቄ ሻፋ ጋካናስ ዲዛሶዛ ኦይኪዳ፤ ጊዶ ኣቲን ኣሞኔ ኣሳይ ባ ዛዋ ሚኒ ናጊዛ ጊሻስ ሄ ጌሊቤቴና። 25 ኢስራኤሌ ኣሳይ ሂስቲዲ ኣሞሬ ዴሬ ቢታን ዲዛ ካታማታ ሃሴቦኔኔ ሄ ሄራን ዲዛ ጉꬃ ካታማታካ ኦይኪዲ ዱንካኒ ኡቲዳ። 26 ሃሴቦኔይ ኣሞሬታ ካዎ ሲሆኔይ ካዎቲዳ ካታማ፤ ኢዚካ ካሴ ሞኣቤን ካዎቲዳ ካዎዛራ ኦሌቲዲ ኣርኖኔ ሻፋ ጋካናስ ዲዛ ቢታ ኡባ ኢስታፌ ዎꬂ ኤኪዴስ። 27 ጊንጾ ጊግሲዲ ዬጺዛይቲ ሄሳ ጊሻስ ዬጺሼ
«ሃሴቦኔኮ ሃ ዪቴ!
ሃና ካታማያ ጊምቤቱ!
ሲሆኔ ካታማያ
ኦሶ ዶሜቱ።
28 ሃሴቦኔፔ ታማይ ኬዚዴስ፤
ላጮይካ ሲሆኔ
ካታማፔ ኬዚዴስ፤
ሞኣቤ ዴሬን
ኤሬ ጌቴቲዛሶዛ ꬋይሲዴስ፤
ኣርኖኔ ቦላ ጌዜ ቢታን ዲዛ
ሃላቃታካ ዲፒ ሂስቲዴስ።
29 ሃኔ ሞኣቤ ኔስ ኣዬ ኣና!
ኢንቴኖ ካሞሼስ
ጎይኒዛይቶ!
ኢንቴ ዲፒ ጊ ꬋያና፤
ኢንቴ ኣቱማ
ናይታ ቤቴስ፥
ኢንቴ ማጫ ናይታካ
ዲኤቴꬃስ ኣሞሬ ካዎ
ሲሆኔስ ኣꬂ ኢሚዴስ። ኤር 48፡45-46
30 ሄሳ ጊሻስ ኢስታ ዜሬꬃይ
ሙሌራ ꬋይዴስ፤
ሃሴቦኔፔ ቢዲ
ዲቦኔ ጋካናስ
ኖፋፔ ቢዲ
ሜዴባ ጋካናስ ዲዛ
ኡባ ፒስኪ
ሂስቲ ላሊዶስ» ጊዳ።
31 ሄሳ ጊሻስ ኢስራኤሌ ኣሳይ ኣሞሬ ዴሬን ዱንካኒ ኡቲዴስ። 32 ሙሴይካ ኢያዜሬ ቢዲ ጾሞሳና ኣስ ዬዲዴስ፤ ኢስራኤሌ ኣሳይካ ሄ ካታማዮኔ ኢዚ ሄራን ዲዛ ቄሪ ካታማታ ኦሊ ኦይኪዳ፤ ካሴ ሄን ዲዛ ኣሞሬ ኣሳታ ጎዲዳ።
ካዎ ኣጌ ጾኔቴꬅ
33 ሄሳፌ ጉዬ ኢስራኤሌ ኣሳይ ጉዬ ሲሚዲ ጌዴ ባሳኔ ኤፊዛ ኦጌዛራ ቢዳ፤ ባሳኔ ካዎ ኣጌይ ኤዲራኤን ኢስታራ ኦላ ኦይኬታናስ ባ ኦላንቻታ ኡባ ኤኪ ኬዚዴስ። 34 ጎዳይ ሙሴስ፥ «ሃይሳ ኣዴዛስ ባቦፋ! ኢዛ ኣሳኔ ኢዛ ዴሬዛ ታ ኔስ ኣꬃ ኢማና፤ ካሴ ሃሴቦኔን ዴኢሼ ኣሞሬታ ሃሪዛ ካዎ ሲሆኔ ቦላ ኔ ኦꬆይሳꬆ ሃይሳ ቦላካ ኦꬃ» ጊዴስ። 35 ሄሳ ጊሻስ ኢስራኤሌ ኣሳይ ኣጌ፥ ኢዛ ናይታኔ ኢዛ ዴራ ኡባ ዲፒ ሂስቲዲ ቢታ ባስ ኤኪዴስ።