1 ጎዳይ ሙሴስ፥ 2 «ኔኒ ኢስራኤሌ ኣሳስ፥ ‹ኢዛ ሳዎይ ቱኑ ጊ ታና ኡፋይሳና ማላ ጹጌቲዛ ካꬃ ያርሾ ዎዴን ዎዴን ናጊዲ ኢስቲ ታስ ሺሻና ማላ ኔ ኢስታ ኣዛዛ› ጋ ዮታ። 3 ቃሴካ ኢስታስ፥ ‹ታማን ጹጌቲዲ ታስ ሺቃና ያርሾይ ሃይሳፌ ካሊዛይሳ፤ ኢስታ ቦላ ዎሶይ ባይንዳ ላይꬅ ጊዲዛ ናምኡ ꬋርሾ ላቃታ ጋላስ ጋላስ ሺቂ ጹጌቲዛ ያርሾስ ሺሺቴ። 4 ኢሲ ላቃ ማላዶ ናምኣንꬆዛ ኦማርሳ ዎዴ ሺሺቴ። 5 ኢሲ ኢሲ ላቃራ ኢሲ ኪሎ ጊዲዛ ሊቆ ꬊሌ ኢሲ ሊቲሮ ጊዲዛ ዎጋራ ዛይቴን ሙኑቄቲዲ ካꬃ ያርሾ ጊዲ ሺቆ። 6 ሄሲካ ጋላስ ጋላስ ሺቂዛ ጹጌቲዛ ያርሾ፤ ሄሳ ማላ ያርሾ ሳዎይ ታና ጎዳ ኡፋይሲዛ ያርሾ ጊዲዲ ኮይሮ ሲና ዙማ ቦላ ሺቃና ማላ ዎጋይ ዎꬊዴስ። 7 ኮይሮ ላቃዛራ ሺቂዛ ኡሻ ያርሾይ ኢሲ ሊቲሮ ጊዲዛ ሚኖ ኡሹ ጌሻሶዛን ጎዳስ ጉሲቴ። 8 ኦማርሳ ዎዴ ናምኣንꬆ ላቃዛ ኮይሮይሳꬆካ ኡሻ ያርሾዛ ጉጂዲ ሺሺቴ፤ ሄሳ ሳዎይካ ጎዳ ኡፋይሲዛ ካꬃ ያርሾ ጊዳና።

9 « ‹ሳምባታ ጋላስ፥ ላይꬅ ጊዲዳ ዎሶይ ኢስታ ቦላ ባይንዳ ናምኡ ꬋርሾ ላቃታ፥ ኡሻ ያርሾራኔ ናምኡ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ካꬃ ያርሾ ሂስቲ ሺሺቴ። 10 ሃይሲ ሃ ያርሾዚ ኡሻ ያርሾዛፔኔ ጋላስ ጋላስ ጹጌቲዛ ያርሾዛፔ ሳምባታ ጋላስ ጋላስ ሺቂዛ ሃራ ጹጌቲዛ ያርሾ።

11 « ‹ኣጊናን ኣጊናን ኮይሮ ጋላስ ጋላስ ኢስታ ቦላ ዎሶይ ባይንዳ ናምኡ ሚርጎታ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ጎዳስ ጹጌቲዛ ያርሾ ሂስቲ ሺሺቴ። 12 ኢሲ ኢሲ ሚርጎራ ካꬃ ያርሾስ ሄꬑ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ꬋርሾዛራ ካꬃ ያርሾስ ናምኡ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ፤ 13 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ፤ ሄ ጹጌቲዛ ያርሾታ ኡባ ሳዎይ ጎዳ ኡፋይሲዛ ካꬃ ያርሾ ጊዲ ሺቆ። 14 ኢሲ ኢሲ ሚርጎራ ናምኡ ሊቲሮ ጊዲዛ ዎይኔ ኡሹ፥ ꬋርሾዛራ ኢሲ ሊቲሮኔ ሳይሶ ጊዲዛ ዎይኔ ኡሹኔ ኢሲ ኢሲ ላቃራ ኢሲ ሊቲሮ ጊዲዛ ዎይኔ ኡሹ ያርሾስ ሺሺቴ፤ ሄሲካ ኣጊናን ኣጊናን ላይꬅ ኩሜꬅ ሺቂዛ ጹጌቲዛ ያርሾ። 15 ጋላስ ጋላስ ጹጌቲዛ ያርሾኔ ኢዛራ ሺቂዛ ኡሻ ያርሾዛ ቦላ ዴይሻ ኦርጌ ናጋራ ጊሻስ ያርሾ ጊዳና ማላ ጎዳ ሲንꬅ ሺሺቴ።

16 « ‹ጎዳስ ፓዚጋ ባኣሌ ኮይሮ ኣጊናይ ጌሊዳ ታማኔ ኦይዳንꬆ ጋላስ ቦንቺቴ። ኬሳ 12፡1-13፤ ዛሬ 16፡1-2 17 ሃ ኣጊናይ ጌሊዳ ታማኔ ኢቻሻንꬆ ጋላሳፌ ዶሚዲ ኡኬꬃ ባኣሌ ቦንቺቴ፤ ሄ ጋላሳፌ ቢዲ ላፑን ጋላስ ጋካናስ ኡኬꬅ ሚቴ። 18 ባኣሌዛስ ኮይሮ ጋላስ ጎይናናስ ሺቂቴ፤ ሄ ጋላስ ኣይ ኦሶካ ኦꬆፍቴ። 19 ኢስታ ቦላ ዎሶይ ባይንዳ 2 ሚርጎታ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ጹጌቲዛ ያርሾ ሂስቲ ጎዳስ ሺሺቴ። 20 ኢሲ ኢሲ ሚርጎራ ካꬃ ያርሾስ ሄꬑ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ꬋርሾዛራ ካꬃ ያርሾስ ናምኡ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ። 21 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ። 22 ቃሴካ ናጋራ ዉርሳናስ ዴይሻ ኦርጌ ናጋራ ያርሾስ ሺሺቴ። 23 ሄይቲ ዉሪካ ሺቃናይ ኡባ ዎዴ ማላዶ ማላዶ ጹጌቲ ሺቂዛ ያርሾራ ኢሲፌ ሺቄቶ። 24 ጎዳ ሳዎ ቱኑ ጊዲ ኡፋይሲዛ ካꬃ ያርሾ ላፑን ጋላስ ኩሜꬅ ኢሲ ማላን ሺሺቴ፤ ሄሳካ ጋላስ ጋላስ ሺቂዛ ጹጌቲዛ ያርሾ ቦላኔ ኡሻ ያርሾ ቦላ ጉጂዲ ሺሺቴ። 25 ላፑንꬆ ጋላስ ጎይናናስ ሺቂቴ፤ ሄ ጋላስ ኣይ ኦሶካ ኦꬆፍቴ።ኬሳ 12፡14-20፤ 23፡15፤ 34፡18፤ 16፡3-8

26 « ‹ካꬃ ሺሾን ባኣሌ ቦንቺዛ ኮይሮ ጋላስ ኢንቴ ኦራꬅ ጋኪዛ ካꬃፌ ጼራ ጎዳስ ሺሺዛ ጋላስ ጎይናና ሺቂቴፔ ኣቲን ሃራ ኣይ ኦሶካ ኦꬆፍቴ። 27 ናምኡ ሚርጎታ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ሳዎ ቱኑ ጊዲ ጎዳ ኡፋይሲዛ ጹጌቲዛ ያርሾ ሺሺቴ። 28 ኢሲ ኢሲ ሚርጎራ ካꬃ ያርሾስ ሄꬑ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ꬋርሾዛራ ካꬃ ያርሾስ ናምኡ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ፤ 29 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ። 30 ቃሴካ ናጋራ ዉርሳናስ ዴይሻ ኦርጌ ናጋራ ያርሾስ ሺሺቴ። 31 ሄሳ ሄ ያርሾዛ ኡባ ኡሻ ያርሾራ፥ ሄ ጋላስ ሺቂ ጹጌቲዛ ያርሾዛኔ ካꬃ ያርሾዛ ቦላ ጉጂዲ ሺሺቴ፤ ሄ ያርሾ ሜሄቲ ዎሶይ ባይንዳይታ ጊዲዳይሳ ሻኪ ኤሪቴ። ኬሳ 23፡16፤ 34፡22፤ ዛሬ 16፡9-12