1 « ‹ላፑንꬃ ኣጊናይ ጌሊዳ ኮይሮ ጋላስ ጎይናናስ ሺቂቴ፤ ሄ ጋላስ ኣይ ኦሶካ ኦꬆፍቴ፤ ሄ ጋላሳይ ዛዬይ ፑኔቲዛ ጋላሳ። 2 ኢስታ ቦላ ዎሶይ ባይንዳ ኢሲ ሚርጎ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ሳዎይ ቱኑ ጊዲ ጎዳ ኡፋይሲዛ ጹጌቲዛ ያርሾ ያርሺቴ። 3 ኢሲ ሚርጎዛራ ካꬃ ያርሾስ ሄꬑ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ꬋርሾዛራ ካꬃ ያርሾስ ናምኡ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ። 4 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ። 5 ቃሴካ ናጋራ ዉርሳናስ ዴይሻ ኦርጌ ናጋራ ያርሾስ ሺሺቴ። 6 ኢንቴ ሃይሳ ሃ ያርሾዛ ጋላስ ጋላሲኔ ኣጊናን ኣጊናን ኮይሮ ጋላስ ሺቂ ጹጌቲዛ ያርሾዛ፥ ካꬃ ያርሾዛኔ ኡሻ ያርሾዛ ቦላ ጉጂዲ ሺሺቴ፤ ሄይታንቲካ ሳዎ ቱኑ ጊዲ ጎዳ ኡፋይሲዛ ጹጌቲዛ ያርሾታ።

7 « ‹ላፑንꬆ ኣጊናይ ጌሊዳ ታማንꬃ ጋላስ ጎይናናስ ሺቂቴ፤ ሄ ጋላስ ጾሚቴ፤ ኦሶካ ኦꬆፍቴ። 8 ኢስታ ቦላ ዎሶይ ባይንዳ ኢሲ ሚርጎ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ሳዎይ ቱኑ ጊዲ ጎዳ ኡፋይሲዛ ጹጌቲዛ ያርሾ ያርሺቴ። 9 ኢሲ ሚርጎዛራ ካꬃ ያርሾስ ሄꬑ ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ꬋርሾዛራ ካꬃ ያርሾስ 2 ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ። 10 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ። 11 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ። ሌዌ 16፡29-34

12 « ‹ላፑንꬃ ኣጊናይ ጌሊዳ ታማኔ ኢቻሻንꬆ ጋላስ ጎይናናስ ሺቂቴ፤ ሄ ጋላስ ኣይ ኦሶካ ኦꬆፍቴ፤ ላፑን ጋላስ ጋካናስ ጎዳስ ዳሴ ባኣሌ ቦንቺቴ። 13 ሃ ኮይሮ ጋላስ ኢስታ ቦላ ዎሶይ ባይንዳ 13 ሚርጎታ፤ ናምኡ ꬋርሾታኔ ላይꬅ ኩሚዳ ታማኔ ኦይዱ ꬋርሾ ላቃታ ሳዎ ቱኑ ጊዲ ጎዳ ኡፋይሲዛ ጹጌቲዛ ያርሾ ሂስቲ ሺሺቴ። 14 ኢሲ ኢሲ ሚርጎራ ካꬃ ያርሾስ 3 ኪሎ ጊዲዛ ሊቆ ꬊሌ ዎጋራ ዛይቴን ሙኑቂዲ ሺሺቴ፤ ቃሴ ኢሲ ኢሲ ꬋርሾራ ካꬃ ያርሾስ 2 ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ። 15 ኢሲ ኢሲ ꬋርሾ ላቃራ ካꬃ ያርሾስ ኢሲ ኪሎ ጊዲዛ ሊቆ ꬊሌ ዎጋራ ዛይቴን ሙኑቂ ሺሺቴ።

16 « ‹ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።

17 « ‹ናምኣንꬆ ጋላስ ኢስታ ቦላ ኣይ ዎሶይ ባይንዳ 12 ሚርጎታ፥ 2 ꬋርሾታኔ ላይꬂ ኩሚዳ 14 ꬋርሾ ላቃታ ሺሺቴ። 18 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ። 19 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።

20 « ‹ሄꬓንꬆ ጋላስ ኢስታ ቦላ ዎሶይ ባይንዳ ታማኔ ኢሲ ሚርጎታ፥ ናምኡ ꬋርሾታኔ ላይꬂ ኩሚዳ ታማኔ ኦይዱ ꬋርሾ ላቃታ ሺሺቴ። 21 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ። 22 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።

23 « ‹ኦይዳንꬆ ጋላስ ኢስታ ቦላ ዎሶይ ባይንዳ ታሙ ሚርጎታ፥ ናምኡ ꬋርሾታኔ ላይꬂ ኩሚዳ ታማኔ ኦይዱ ꬋርሾ ላቃታ ሺሺቴ። 24 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ። 25 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።

26 « ‹ኢቻሻንꬆ ጋላስ ኢስታ ቦላ ዎሶይ ባይንዳ ኡዱፉን ሚርጎታ፥ ናምኡ ꬋርሾታኔ ላይꬂ ኩሚዳ ታማኔ ኦይዱ ꬋርሾ ላቃታ ሺሺቴ። 27 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ። 28 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።

29 « ‹ኡሱፑንꬆ ጋላስ ኢስታ ቦላ ዎሶይ ባይንዳ ኦስፑን ሚርጎታ፥ ናምኡ ꬋርሾታኔ ላይꬅ ኩሚዳ ታማኔ ኦይዱ ꬋርሾ ላቃታ ሺሺቴ። 30 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ። 31 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።

32 « ‹ላፑንꬃ ጋላስ ኢስታ ቦላ ዎሶይ ባይንዳ ላፑን ሚርጎታ፥ ናምኡ ꬋርሾታኔ ላይꬅ ኩሚዳ ታማኔ ኦይዱ ꬋርሾ ላቃታ ሺሺቴ። 33 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ። 34 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።

35 « ‹ኦስፑንꬃ ጋላስ ኢሲ ቦላ ጎይናናስ ሺቂቴ፤ ሄ ጋላስ ኣይ ኦሶካ ኦꬆፍቴ። 36 ኢስታ ቦላ ዎሶይ ባይንዳ ኢሲ ሚርጎ፥ ኢሲ ꬋርሾኔ ላይꬅ ኩሚዳ ላፑን ꬋርሾ ላቃታ ሳዎ ቱኑ ጊዲ ጎዳ ኡፋይሲዛ ጹጌቲዛ ያርሾ ሂስቲ ሺሺቴ። 37 ሚርጎታራ፥ ꬋርሾታራኔ ꬋርሾ ላቃታራ ኢሲፌ ሺቂዛ ካꬃ ያርሾዛኔ ኡሻ ያርሾዛ ካሴ ዎጋን ዎꬊዳ ቆዳ ማላ ያርሺቴ። 38 ናጋራ ዉርሳናስ ሺቂዛ ያርሾስ፥ ካꬃ ያርሾፌ፥ ኡሻ ያርሾፌኔ ጋላስ ጋላስ ሺቂ ጹጌቲዛ ያርሾፌ ሃራ ዴይሻ ኦርጌ ጉጂዲ ሺሺቴ።

39 « ‹ኢንቴስ ዎꬊዳ ባኣሌ ጋላሳታን ጎዳስ ሺሺቴ፤ ሄሲካ ኢንቴ ኣዲኔቲዲ ሺሺዛ ያርሾፌኔ ኢንቴ ኢንቴ ዶሳን ሺሺዛ ያርሾፌ ጹጌቲዛ ሃራ ያርሾ፥ ካꬃ ያርሾ፥ ኡሻ ያርሾኔ ኢሲፌቴꬃ ያርሾ ሺሺቴ› ጋ።»

40 ሙሴይካ ጎዳይ ኢዛ ኣዛዚዳ ማላ ኢስራኤሌ ኣሳስ ዮቲዴስ።