ሌሚሶ ማጻፋ
ጊዶ ቆፋ
ሌሚሶ ማጻፋይ ቶሴኒኔ ሌሚሶ ሃሳያን ጊጊዳ ኦሶኔ ኣማኖ ቲሚርቴ። ኢዛፔ ዳሪዛ ባጋይ ኣሳ ዴኦን ሃች ሃች ጋይቲዛ ሃኖታ ጊሻስ ዮቴስ። ኮይሮፔ ዶሚሼ፥ «ኣꬎ ኤራቴꬃስ ኮይሮይ ጾሳስ ያሻቴꬅ» ጊዛ ቆፋ ሃሳኢሶን ዶሜስ። ኢዚካ ታማርሲዛይሲ ኣማኖ ዎጋን ኣሲ ኦꬃናይሳ ጻላ ጊዶንታ፥ ኣሲ ባስ ሃች ሃች ዴኦን ሃናናስ ቤሲዛ ሎኦ ካንዶኔ ኦꬃናስ ቤሲዛ ሎኦ ኦሶ ጉጂዲ ታማርሴስ። ሃ ማጻፋ ጊዶን ኣሽኬቴꬃ ጊሻስ፥ ዳንዳያ ጊሻስ፥ ኣሳስ ቃꬌቴꬃ ጊሻሲኔ ኣማኔቴꬃ ጊሻስ ዳሮ ቲሚርቴይ ሌሚሶን ኢሜቲዴስ።
ሃ ማጻፋይ ኦይኪዳ ኩሜꬃ ቆፋ
ሌሚሶታ ዎስቲ ጎኤታናኮ ቤሲዛ ኦጌ 1፡1-7
ኣꬎ ኤራቴꬅ ኮያና ማላ ኢሜቲዳ ዞሬ 1፡8—7፡27
ኤራቴꬅ ሳባናስ ዬጼቲዳ ማዛሙሬ 8፡1—9፡18
ሶሎሞኔ ሌሚሶታ 10፡1—29፡27
ኣጉሬይ ሃሳይዳ ዮኦታ 30፡1-33
ሊሙኤሌ ኣያ ባ ናዛ ታማርሲዳ ቲሚርቴ 31፡1-31
1
ሌሚሶታ ዎስቲ ጎኤታናኮ ቤሲዛ ኦጌ
1 ሃይቲ ኢስራኤሌ ካዎ ዳዊቴ ና
ሶሎሞኔ ሌሚሶታ። 1ካዎ 4፡32
2 ሌሚሶቲ ኣሳይ ኣꬎ ኤራቴꬃ፥
ሴራኔ ኤራቴꬃ ሃሳያ
ኣኬካናስ ማዴቴስ።
3 ኢስቲካ ዴኣና ዴኦን
ኣꬎ ኤራቴꬅ፥
ጺሎቴꬅ፥ ሱሬ ፒርዳኔ
ሱሬ ሃኖ ታማርሲዛይታ።
4 ኤራቴꬂ ፓጪዳይታስ ኣኬካ፥
ናቴꬃታስ ኤራቴꬂኔ
ዎዚናማቴꬅ ኢሚዛይታ።
5 ኣꬎ ኤራንቻቲ
ሃ ሌሚሶታ ሲዪዲ
ኤራቴꬅ ጉጄቴስ፤
ኣኬካንቻ ኣሳቲካ
ሎኦ ዞሬታ ኤኬቴስ።
6 ሄሳ ማላን ሌሚሶታኔ
ኢስታ ቢርሼꬃታ፥
ኣꬎ ኤራንቻታ ሃሳያኔ
ኢስታ ማሌꬆ
ኣኬካናስ ዳንዳዬቴስ።
7 ኣꬎ ኤራቴꬃስ ኮይሮይ
ጎዳስ ያሻቴꬃ፤
ኤያቲ ጊዲኮ
ኣꬎ ኤራቴꬂኔ
ሴራ ካꬌቴስ።ኢዮ 28፡28፤ ማዛ 111፡10፤ ሌሚ 9፡10
ዬላጋ ናይታስ ኢሜቲዳ ዞሬ
8 ታ ናዞ!
ኔ ኣዋ ዞሬ ኤዝጋ፤
ኔ ኣያ ታማርሲዛይሳካ ኣጎፋ።
9 ሄሲ ኔ ሁኤስ
ቦንቾ ካላቻ፤
ኔስ ቆꬌን ኣꬂዛ
ኣሌቆ ማላ ጊዳና።
10 ታ ናዞ!
ኔና ናጋራንቻቲ
ባሌꬂኮ ኤኖ ጎፓ።
11 ኢስቲ ኔና፥ «ኣኔ ሃያ፤
ኢሲፌ ቢዲ
ሱꬅ ጉሳናስ ዙጎስ፤
ጺሎታካ ዎꬋናስ
ቆቴቲ ኡቶስ።
12 ዱፎይ ሚቲዛ ማላ
ኑኒካ ኣኔ ኢስታ
ፓጻ ዲሺን ሚቶስ፤
ኑኒ ኢስታ ጪማ ኦላን
ኦሌቲዛ ኣሳ ማላ
ኣኔ ኦꬆስ።
13 ኑኒ ኣልኦ ሚሽ
ኡባ ዴማና፤
ሂስቲዲ ኑ ኬꬃ
ቦንቂ ኤኪዳ
ሚሻን ኩንꬃና።
14 ኑናራ ዙፔታ፤
ዴሚዳዝ ኢሲፌ
ጎኤታና» ጋና።
15 ታ ናዞ!
ኢስታራ ኢሲፌ
ኦጌ ሄሜቶፋ፤
ኢስቲ ቢዛ ኦጌ ባና ጋዳ
ኔ ቶሆ ዴንꬆፋ።
16 ጋሶይካ ኢስቲ ኢታ ሚሽ
ኦꬃናስ ዎጼቴስ፤
ኣሳ ሱꬅ ጉሳናስካ
ጃሜቴስ።
17 ካፎይ ጼሊሺን
ኢዛ ኦይካናስ
ያርዴ ዎꬂኮ
ኣይኮካ ማዴና።
18 ሃይቲ ሃ ኣሳቲ ባንታ
ሱꬅ ጉሳናስ ዙጌቴስ፤
ባንታ ሼምፖ ዎꬋናስ
ቆቴቲ ኡቴቴስ።
19 ቤሶንታ ኦጌራ ጎኣ ዴማናስ
ዎጺዛ ኡባታ ዉርሴꬃይ
ሃይሳ ማላ፤
ኢስቲ ሺሺዳ ኣቆታይ
ኢስታ ሼምፖ ኤኪ ባና።
ኣꬎ ኤራቴꬅ ካꬊዛይታስ ኢሜቲዳ ሴራ
20 ኣꬎ ኤራቴꬃያ
ኦጌ ቦላ ዴኣሼ ጼይጋዉስ፤
ዱቡሻን ባ ቃላ
ꬎቁ ሂስታዳ ዋሳዉስ።
21 ኣꬎ ኤራቴꬃያ ጮራ ኣሲ
ሺቂዛሶን ዋሳዉስ፤
ካታማ ጌሊዛ ፔንጌን ኤቃዳ፥ ሌሚ 8፡1-3
22 «ኢንቴኖ ዎዚና ፓጬቶ!
ኢንቴ ኣዉዴ ጋካናስ
ኤያቴꬃ ኦጌ ካላኔ?
ቂልጪዛይቶ! ኢንቴ ቂልጪዛይሳን
ኣዉዴ ጋካናስ ኡፋዬቴቲ?
ኤያቶ! ኤራቴꬃ
ኣዉዴ ጋካናስ ኢጻኔ?
23 ታ ሴራን ኢንቴ ሲሚዳኮ፥
ታኒ ታ ቆፋ
ኢንቴስ ቆንጪሳናኮሺን፤
ታ ቃላካ
ኢንቴና ታማርሳናኮሺን።
24 ታኒ ጼይጊዳ ዎዴ
ኢንቴ ኮዮንታ ኢጺዴታ፤
ታኒ ታ ኩሼዛ ሚጪን
ኦኒካ ዉዱ ጊቤና።
25 ታ ዞሬ ኡባ ካꬊዴታ፤
ታ ሴራካ ኤኪቤኬታ።
26 ሄሳ ጊሻስ
ኢንቴና ሜቶይ ጋኪዛ ዎዴ
ታኒ ኢንቴ ቦላ ሚጫና፤
ባሺ ኢንቴ ቦላ ጋኪዛ ዎዴ
ታኒ ኢንቴ ቦላ ቂልጫና።
27 ባሺ ኣባ ዳምባላ ማላ
ኢንቴና ቃꬂዛ ዎዴ፥
ሜቶይ ጎቴ ጫርኮ ማላ
ኢንቴና ዴንꬂዛ ዎዴ፥
ቱጋይኔ ዋዬይ
ኢንቴና ሚቲዛ ዎዴ
ታኒ ኢንቴና ቂልጫና።
28 «ሄ ዎዴ ኢስቲ ታና ጼይጋና፤
ታ ጊዲኮ ኢስታስ ኮይኬ፤
ኢስቲ ታና ሚንꬂ ኮያና፤
ጊዶ ኣቲን ታና ዴሜቴና።
29 ኢስቲ ኤራቴꬅ ኢጺዳ፤
ጎዳስ ያሻቴꬅ
ዶሪቤቴና።
30 ታ ዞሬ ኤካናስ ኮዪቤቴና፤
ታ ሴራ ኡባ ካꬊዳ።
31 ሄሳ ጊሻስ
ኢስቲ ባንቲ ኦꬂዳ
ኦሶ ኣይፌዛ ማና፤
ባንቲ ቆፒዳ
ቆፋ ኣይፌካ ካላና።
32 ዎዚናይ ፓጪዳይታ
ኣꬎ ኤራቴꬃፌ
ሃኮይ ኢስታ ዎꬋና፤
ባላታ ዉዳ ꬋዮይ
ኢስታ ꬋይሳና።
33 ጊዶ ኣቲን ታና ሲዪዛይቲ
ኡባይ ሳሮን ዳና፤
ኣይኮ ሂርጋይ ባይንዳ
ዎፓን ዳና» ጋዉስ።