ጌሻ ማጻፋ ሌሚሶ ማጻፋ 3

3

ጎዳን ኣማኔቴꬅ

1 ታ ናዞ!

ታኒ ኔና ታማርሲዛይሳ

ዶጎፓ፤

ታ ኣዛዞታካ

ኔ ዎዚናን ዎꬃ።

2 ኢስቲ ኔ ላይꬅ ኣዱሳና፤

ኢሻሎ ዴኦኔ

ሳሮቴꬅ ኔስ ጉጃና።

3 ሲቆይኔ ቱማቴꬂ

ኔፔ ሃኮፌቶ፤

ኢስታ ኔ ቆꬌን ቃቻ፤

ኔ ዎዚናንካ ጻፋ።

4 ሂስቲኮ ኔኒ ጾሳ ሲንꬃኒኔ

ኣሳ ሲንꬃን ሳቤታናኔ

ሎኦ ሱንꬅ ዴማና።

5 ኔኒ ፖሎ ዎዚናን

ጎዳን ኣማኔታ፤

ኔኒ ኔ ኣኬካን ዜምፖፋ።

6 ኔኒ ቢዛ ኦጌ ኡባን

ኢዛ ሲንꬃሳ፤

ኢዚካ ኔ ቢዛ ኦጌ ሱሪሳና።

7 ኔርካ ኔና

ኣꬎ ኤራንቻ ጎፓ፤

ጎዳስ ያያ፤

ኢታፔካ ሃካ።

8 ሄሲ ኔ ቦላ ፓያ ዎꬃና፤

ኔ ሜቄꬃታካ ጻሊሳና።

9 ጎዳ ኔ ኣቆታን ቦንቻ፤

ቢታይ ኔስ ኢሚዛ ኣይፌ ኡባፌ

ጼራ ኢዛስ ኢሞን ቦንቻ።

10 ኔ ሄሳꬆ ኦꬂኮ

ኔ ጎታራቲ ኩሚ ፓላሃና፤

ኔኒ ዎይኔ ኡሹ ኣጊዛሶቲ

ጪፒ ጊ ኩማና።

11 ታ ናዞ!

ጎዳ ሴራ ካꬎፓ፤

ኢዚ ኔና ሃንቂዛ

ዎዴካ ላንጮፋ።

12 ኣዋይ ባ ሲቂዛ ና

ሴሪዛይሳꬆ

ጎዳይካ ባ ዶሲዛ

ና ሴሬስ።

13 ኣꬎ ኤራቴꬅ ዴማናስ

ዎጺዛ ኣሲ፥

ኣኬካካ ባስ ሚሼ

ኦꬂዛ ኣሲ ኣንጄቲዳዴ።

14 ጋሶይካ ኢዚፔ ዴሚዛ ጎኣይ

ቢራፔ ዴሚዛ

ጎኣፔ ኣꬌስ፤

ኢዚፔ ቤቲዛ ጎኣይ

ዎርቃፌ ቤቲዛ ጎኣፔ ኣꬌስ።

15 ኣꬎ ኤራቴꬂ ዞኦ ኢንቁፌ

ኬሂ ኣልኦ፤

ኔኒ ዴማናስ ኣሞቲዛ ኡባይ

ኢዚራ ጊናቴና።

16 ኢዛ ኡሻቻ ኩሼን ኣዱሳ ላይꬅ፥

ሃዲርሳ ኩሼን ኣቆታኔ

ቦንቾ ኦይካዱስ።

17 ኢዚ ኦጌቲ ኡፋይሲዛ ኦጌታ፤

ኢዛ ሄሜቲዛ ኦጌ ኡባይካ ሳሮ።

18 ኢዛ ባና ኢዲሚዛይታስ

ዴኦ ሚꬃ፤

ኢዞ ኦይኪዛይቲካ ኣንጄታና።

19 ጎዳይ ባ ኣꬎ ኤራቴꬃን

ሳኣ ሜꬊዴስ፤

ባ ኣኬካንካ ሳሎታ

ኢስቲ ዲዛሶን ሚንꬂዴስ።

20 ሻፋቲ ኢዛ ኤራቴꬃን ጎጌቴስ፤

ሻራቲ ኢራ ኢሜቴስ።

21 ታ ናዞ! ሱሬ ፒርዳኔ

ሻኪ ኤሮ ናጋ፤

ኢስቲ ኔ ሲንꬃፌ ሃኮፌቶ።

22 ኢስቲ ኔስ ዴኦ ጊዳና፤

ኔ ቆꬌስካ ኣሌቆ ጊዳና።

23 ሄ ዎዴ ኔኒ ኦጌን

ሂርጋይ ባይንዳ ሄሜታና፤

ኔ ቶሆይካ ꬉጴቴና።

24 ኔኒ ኢቺዳ ዎዴ ባባካ፤

ኢቻዳካ

ማልኦ ꬊስኮ ꬊስካና።

25 ኣኬኮንታ ጋኪዛ ሜቶኔ

ኢታታ ቦላ ጋኪዛ

ꬋይሳስ ባባካ።

26 ኣይስ ጊኮ ጎዳይ ኔስ

ኣማኔቲዛዴ ጊዳና፤

ኔ ቶሆይ

ዎጺማዴን ኦይኬቶንታ ማላ

ኢዚ ኔና ናጋና።

27 ኔስ ማዳና ዎልቃይ ዲሺን

ማዶ ቤሲዛይታስ

ሎኦ ኦሶ ኣጎፋ።

28 ሃኢ ኔስ ዲሺን ኔ ሾሮዛስ፥

«ሲማዳ ያ፤

ታኒ ኔስ ዎንቶ ኢማና» ጎፓ።

29 ኔናን ኣማኔቲዲ ኔ ማታን ዲሺን

ኔ ሾሮዛ ቦላ

ኢታ ሚሽ ኦꬃናስ ሃልቾፋ።

30 ኔና ቆሆንታ ኣስ

ጋሶይ ባይንዳ ጮ ሞቶፓ።

31 ጌኔ ኦꬂዛ ኣሳታ ቁሎፋ፤

ኢስታ ኢታ ኦጌካ ካሎፋ።

32 ጋሶይካ ጎዳይ

ኢታ ኦꬂዛይታ ኢጼስ፤

ጊዶ ኣቲን ሱሬታስ ኢዚ

ባ ዎዚና ቆፋ ቆንጪሴስ።

33 ጎዳ ቃንጌꬂ

ኢታ ኦꬂዛይታ ኬꬃና፤

ጊዶ ኣቲን

ኢዛ ኣንጆይ ጺሎታሶና።

34 ኦቶሬቴꬃን ቂልጪዛይታ ቦላ

ጎዳይካ ቂልጬስ፤

ጊዶ ኣቲን ባንታና

ካዉሺዛይታ ቦንቼስ።

35 ኣꬎ ኤራንቻቲ

ቦንቾ ላታና፤

ኤያቲ ጊዲኮ ካዉሻቴꬃስ

ኣꬊ ኢሜታና።

3:4 ሉቃ 2፡52

3:7 ኦሮ 12፡16

3:11 ኢዮ 5፡17

3:12 ኢብ 12፡5-6

3:12 ኣጁ 3፡19

3:34 ያቆ 4፡6፤ 1ጴጽ 5፡5