6
ሃቻስ ሃቻስ ቤሲዛ ዞሬ
1 ታ ናዞ! ኔኒ ኔ ሾሮዛስ
ዋሴ ጌሊዳ ጊዲኮ፥
ሃራ ኣሳ ጊሻስ ኔኒ
ኩሼ ባቃ ጫቂዳ ጊዲኮ፥
2 ኔኒ ጌሊዳ ቃላን
ኦይኬቲዳ ጊዲኮ፥
ኔ ዶናፔ ኬኢዳ ቃላን
ኔ ኦይኬቲዳ ጊዲኮ፥
3 ታ ናዞ! ኔኒ ኔ ሾሮዛ
ኩሼን ኩንዲዳ ጊሻስ
ኔና ኣሻናስ ባዳ
ኢዛ ሲንꬃን ኩንዳ፤
ኔ ሾሮዛኮ ባዳ ሾባ።
4 ሄሳꬆ ኦꬆንታ
ዳሼ ꬊስኮፋ፤
ኔ ሲጲንꬃቲ ሊጶፔቶ።
5 ሻንካንቻታፔ ጌኔሲ
ኬሲ ኤኪ ኣቲዛ ማላ፥
ያርዴን ኦይኬቶንታ ኣቲዳ
ካፎ ማላ ኔና ኣሻ።
6 ኔኖ ኣዛላዞ!
ጩንጫሌታኮ ባ፤
ሂስታዳ ኢስታፌ ታማራዳ
ኣꬎ ኤራንቻ ጊዳ።
7 ጩንጫሌታስ ኣዛዚዛይ ዴና፤
ኢስታ ሃሪዛይ ዴና።
8 ጊዶ ኣቲን ባንታስ ማና ሚሽ
ቦኔ ሺሼቴስ፤
ካꬅ ሺሺዛ ዎዴ
ባንታስ ካꬅ ሺሼቴስ።
9 ኔኖ ኣዛላዞ!
ኔኒ ኣዉዴ ጋካናስ
ꬊስካኔ?
ꬊስኮፌካ
ኔ ኣዉዴ ቤጋኔ?
10 «ታኒ ጉꬃራ ꬊስካ ኤካና፤
ጉꬃራ ሊጳ ዴንዳና፤
ታ ኩሼ ቦርኮታዳ
ጉꬃራ ሼምፓ ኤካና»
ኔ ጊሺን፥
11 ሄ ዎዴ ማንቆቴꬂ
ፓንጋ ማላ፥
ፓጬይ ኦላ ሚሻ
ኦይኪዳ ኣሳ ማላ
ኔ ቦላ ፑቱ ጋና። ሌሚ 24፡33-34
12 ዎማሌይኔ ሜንጼ ኢታ ኣሲ
ዩዪ ዩዪዲ
ኢታ ቃላ ሃሳይዛይ፥
13 ባ ኣይፌራ ቂምኦቲዛይ፥
ባ ቶሆን ቤሲዛይ፥
ባ ቢራꬌታንካ ማላቲዛይ፥
14 ባ ዎዚናን ኢታ ሚሽ
ዎꬂ ዴንꬂ ቆፒዛይ
ኣይ ዎዴካ ኦሽ ዴንꬄስ።
15 ሄሳ ጋሶን ባሺ ኣኬኮንታ
ኢዛ ቦላ ያና፤
ኢዚ ሃሳኣይ ባይንዳ ሜቃና፤
ሜቂዲካ ፓጼና።
16 ጎዳይ ኢጺዛ ኡሱፑን
ዮኦቲ ዴቴስ፤
ላፑንꬃዛ
ኬሂ ሃራሴቴስ።
17 ኦቶሬቴꬃን ጼሊዛ ኣይፌ፥
ዎርዶቲዛ ኢንጻርስ፥
ጺሎ ኣሳታ ዎꬊዛ ኩሼ፥
18 ኢታ ሚሽ ቆፒዛ ዎዚና፥
ኢታሶ ኤሶቲዛ ቶሆታ፥
19 ዎርዶ ቦላ ዎርዶ ጉጂ ጉጂዲ
ዮቲዛ ዎርዶ ማርካ፥
ኢሻንታ ጊዶን
ኦሽ ሜꬊዛ ኣሳ።
ላይማፔ ሃኮ
20 ታ ናዞ! ኔ ኣዋ ኣዛዞ ፖላ፤
ኔ ኣያ ታማርሲዳይሳካ ኣጎፋ።
21 ኢስታ ኡባቶ ኔ ዎዚናን ኦይካ፤
ኔ ቆꬌንካ ቃቻ።
22 ኔኒ ሄሜቲዛ ዎዴ
ኢስቲ ኔና ካሌꬃና፤
ኔኒ ኢቺዛ ዎዴ
ኢስቲ ኔና ናጋና፤
ኔኒ ቤጎቲዛ ዎዴካ
ኢስቲ ኔና ዞራና።
23 ኣይስ ጊኮ ሃ ኣዛዞቲ ኔስ ጾምፔ፤
ቲሚርቴቲካ ፖኦ፤
ቃሴ ሴራይካ
ዴኦኮ ኤፊዛ ኦጌ።
24 ሃ ኣዛዞቲ ኢታ ማጫሳፌ
ኔና ናጋና፤
ዶናን ጪሚዛ ሃዉሻ
ማጫሳፌካ ናጋና።
25 ኢዚ ሎኤቴꬃ
ኔ ዎዚናን ኣሞቶፋ፤
ኢዚ ቂምኦቴꬃን ኦይኬቶፋ።
26 ኢሲ ኣዴይ
ባና ባይዛ ዲዛ ማጫሳዮ
ጉꬃ ሚሻን
ዴማናስ ዳንዳዬስ፤
ኣሳ ማቺ ጌዶ ካሎይ
ኔስ ሼምፖ ꬋይሳና።
27 ኢሲ ኣሲ ታማ ኢዲሚን
ኢዛ ማይኦይ
ሜቴቶንታ ኣታናስ ዳንዳይዜ?
28 ኢሲ ኣሲ ቦንቆ ታማ ዬꬊ ቢሺን
ኢዛ ቶሆይ
ጹጌቶንታ ኣታና ዳንዳይዜ?
29 ኣሳ ማቾ ላጌꬂዛ ኣሲ
ሄሳ ማላ፤
ኢዞ ቦቺዛ ኡባይ
ቃጻዬቶንታ ኣቴና።
30 ካይሶይ ጋፋ ኣታናስ ካይሲኮ
ኣሳይ ኢዛ ካꬌና።
31 ጊዶ ኣቲን ኢዛስ ዲዛ ኣቆታ
ኡባ ኦይቺኮካ
ኢዚ ኦይኬቲዳ ጊዲኮ
ላፑን ኩሼ ቃንጻና ቤሴስ።
32 ላይማ ላይማቲዛ ኣሳስ
ዎዚናይ ፓጬ፤
ሄሳዴይ ባርካ
ባ ሼምፖ ꬋይሴስ።
33 ቡካይኔ ካዉሻቴꬂ ኢዛስ ቃዳ፤
ዬላቴꬂ ኢዛፔ
ሙሌካ ቁጬቴና።
34 ቃናቴይ ኣዚና ሃንቄታና ማላ ዴንꬄꬄስ፤
ኢዚ ሃሎ ኬሲዛ ዎዴ
ኢዛስ ቃꬌቴና።
35 ኢዚ ኣይ ኤዳካ ኤኬና፤
ኣይ ኬና ኢሞታይካ
ኢዛ ሃንቆ ዶሺሴና።