7
ላይማፔ ናጌታና ማላ ኢሜቲዳ ሴራ
1 ታ ናዞ! ታ ቃላ ናጋ፤
ታ ኣዛዞካ ኔ ዎዚናን
ቁምኣ ኦይካ።
2 ኔ ፓጻ ዴኣና ማላ
ታ ኣዛዞታ ናጋ፤
ታ ቲሚርቴዛካ
ኔ ኣይፌ ጪሮ ማላ ናጋ።
3 ሃይታ ኔ ቢራꬌታን ቃቻ፤
ኔ ዎዚናንካ ጻፋ።
4 ኣꬎ ኤራቴꬅ ኔ ታስ ሚቾ ጋ፤
ኣኬካካ ኔ ታስ ዳቦ ጋ።
5 ኢስቲ ኔና ላይማ ማጫሳፌኔ
ባ ቃላን ባሌꬂዛ
ሃዉሻ ማጫሳፌ ናጋና።
6 ኢሲ ጋላስ ታኒ
ታ ኬꬃ ማስኮቴዛራ
ካሬ ጼላዲስ።
7 ኣኬካይ ፓጪዳ ዬላጋታ ቤኣዲስ።
ኢስታ ጊዶፌ ኢሶይ ኬሂ ኤያ።
8 ሄ ዎዳላይ ኢዚ ሶ ኤፊዛ
ኦጌ ባጋራ ኦይኪ ቢሼ
ኢዚ ኬꬃ ኣቻራ
ኣꬊ ቢሺን፥
9 ሄ ዎዴ ሳኣይ ቃማናስ
ላንኪላንኪሺን፥
ꬉማይ ኣይፌ ኦይኪሺን፥
10 ኢሲ ማጫሳያ
ኢዛ ዴማናስ ኬዛዱስ፤
ላይማ ማጫሳ ማይኦ ማይኣዳ
ባሌꬃናስ ሙርታ ኬዛዱስ።
11 ኢዛ ጻላኔ
ዬላይ ባይንዳ ማጫሳ፤
ሶሆን ዎፑ ጋዳ ኡቱኩ።
12 ኢዛ ኢሲቶ ኦጌን፥ ኢሲቶ ጉላን፥
ኢሲቶ ዱቡሻን ኤቃዳ ናጋዉስ።
13 ኢዛ ሄ ናዛ
ሺሻ ኦይካዳ ዬራዉስ፤
ዬላይ ባይንዳ ኢዛ ኣይፌ
ቲሺ ሂስታ ጼላሼ፥
14 «ታኒ ታሶን ኢሲፌቴꬃ ያርሾ
ያርሻናስ ቤሴስ፤
ታኒ ታ ኣዲና ሃች ፖላዲስ።
15 ሂስታዳ ኔና ጼላናዉ ኬኣዲስ፤
ኔና ኬሃ ኮያዲስ፤
ሃኢ ቤያ ኔና ዴማዲስ።
16 ታኒ ጊብጼፔ ዪዳ
ኣሌቂሲዛ ኣንሶላካ
ታ ሂጻን ዬጋዲስ።
17 ታኒ ካርቤ፥ ኣልሙኒዬሜኔ
ቃራፋ ጌቴቲዛ
ሳዎታፔ ኦሴቲዳ
ሺቶ ታ ሂጻን ጫጫፋዲስ።
18 ሃ ያ፤ ኣኔ ዎንታና ጋካናስ
ሲቆ ኣሎስ፤
ቆሜቲዲካ ኡፋዬቶስ።
19 ታ ኬꬃዋይ ሶን ዴና፤
ሃኮ ዴሬ ቢዴስ።
20 ሚሽ ካራጺቴ ኩንꬂ
ኤኪ ቢዳ ጊሻስ
ኣጊናይ ዶርስ ዳጋንꬆንታ
ሲሜና» ጋዱስ።
21 ሂስታዳ ባ ማልኦ ሃሳያን
ኢዛ ባሌꬃዱስ፤
ባ ሊቆ ኢንጻርሳንካ ጪማዱስ።
22 ሹካስ ላጌቲ ቢዛ ቦራ ማላ፥
ዎጺማዴን ኦይኬታና
ቢዛ ጮፎሾ ማላ
ሄራካ ኣሙሶንታ
ኢዞ ካሊዲ ቢዴስ።
23 ዎንዳፌ ዪሺ
ኢዛ ቲሬ ጫዳና ጋካናስ፥
ኢዛ ሼምፖ ꬋይሳናይሳ
ኤሮንታ ዲሼ ፒራꬊዲ ያርዴን
ጌሊዛ ካፎ ማላ ጊዲዴስ።
24 ታ ናዞ! ኣኔ ሃኢ ሲያ፤
ታ ዶናፔ ኬዚዛ
ቃላካ ኤዝጋ።
25 ኔ ዎዚናይ ኢዚኮ ቦፖ፤
ኢዛ ቢዛ ባላ ኦጌን ጌሎፓ።
26 ኢዛ ካዉሻዳ ኦሊዳይቲ ኡንዴና፤
ኢዛ ዎꬊዳይታ ቆዳይ
ኬሂ ዳሮ።
27 ኢዚ ሶይ ዱፎን ኤፊዛ ኦጌ፤
ሄ ኦጌይ ዱጌ ሃይቆሶ ጋꬄስ።