ኣꬎ ኤራቴꬂ ዲዛ ናይ

ባ ኣዋ ኡፋይሴስ፤

ጊዶ ኣቲን ኤያ ናይ

ባ ኣዮ ጬጪሴስ።

ኣቆታይ ጎኤና፤

ጊዶ ኣቲን ጺሎቴꬂ

ሃይቆፔ ኣሼስ።

ጊዶ ኣቲን ናጋራንቻታ

ኣሞ ጫልቃሚሳና።

ሚኒ ኦሶይ ጊዲኮ ዱሬሴስ።

ካꬅ ዎዴራ ሺሼስ፤

ካꬅ ሺሺዛ ዎዴ ꬊስኪዛ

ኣሲ ጊዲኮ ካዉዬስ።

ኢታ ኣሳ ዶና

ማካላቴꬂ ጎርዴስ።

ኣንጆን ጼይጌቲሼ ዳና፤

ኢታታ ሱንꬂ ጊዲኮ ዶጌታና።

ኣዛዞ ኤሮ ጊ ኤኬስ፤

ሎምኡሎምኢዛ ኤያቲ ጊዲኮ

ባሻሶ ቤቴስ።

ጌላ ኦጌ ቢዛ ኣሲ ጊዲኮ

ባ ሞሮን ኦይኬታና።

ሜቶ ኤሄስ፤

ሎምኡሎምኢዛ ኤያይካ

ሜቶ ኤሄስ።

ኢታታ ሃሳያይ

ማካላቴꬅ ጌንꬄስ።

ሲቆይ ጊዲኮ

ባላ ኡባ ካሚ ኣꬌስ።ያቆ 5፡20፤ 1ጴጽ 4፡8

ኣꬎ ኤራን ሃሳዬስ፤

ኤያ ዞኮን ጊዲኮ

ጻምኣይ ሜቄስ።

ኤራቴꬅ ዳጋሴቴስ፤

ኤያ ሃሳያይ ጊዲኮ

ባሽ ጼይጌስ።

ጊምቤቲዳ ካታማ፤

ማንቆታ ማንቆቴꬂ

ኢስታስ ꬋዮሶ።

ኢታ ኣሳታስ

ዎꬌይ ጊዲኮ ቂጻቴ።

ዴኦ ኦጌን ሄሜቴስ፤

ሴራ ኢጺዛ ኣሲ ጊዲኮ

ሜቶ ቦላ ዎꬌስ።

ቆቲዛ ኣሲ ዎርዳንቻ፤

ዚጊርስ ዚጊርዛ

ኣሲ ጊዲኮ ኤያ።

ሞሮይ ꬋዬና፤

ባ ዶና ሺሺ ኤኪዛ

ኣሲ ጊዲኮ

ኣꬎ ኤራንቻ።

ጌሻ ቢራ ማላ፤

ኢታ ኣሳ ቆፋስ ጊዲኮ

ጎኣይ ዴና።

ኤያቲ ጊዲኮ

ባ ዎዚና ፓጬን ሃይቄቴስ።

ኢዚ ሄ ዱሬቴꬃን

ሜቶ ጉጄና።

ዎዚናማ ኣሲ ጊዲኮ

ኣꬎ ኤራቴꬃን ኡፋዬቴስ።

ኢዛ ቦላ ጋካና፤

ጊዶ ኣቲን ጺሎ ኣሞይ

ኢዛስ ፖሌታና።

ኢታቲ ፒቴቲ ꬋያና፤

ጺሎቲ ጊዲኮ

ሜርናስ ሚኒ ዳና።

ጩዋይ ኣይፌ ቆሂዛ ማላ

ኣዛላ ኣሲ ኪቲዳዴንታስ

ሄሳ ማላ።

ኢታታ ባሬይ ጊዲኮ ቃንꬃ።

ኢታታ ሂዶታይ ጊዲኮ

ሃዳ ጊዲ ኣቴስ።

ባቃቲ ኣቲዛሶሆ፤

ኢታ ኦꬂዛይታስ ጊዲኮ ባሻ ሶሆ።

ኢታቲ ጊዲኮ ቢታ ቦላ

ዴኤቴና።

ኣꬎ ኤራቴꬅ ሃሳዬስ፤

ጌላታ ኢንጻርሲ ጊዲኮ ቃንጼታና።

ቤሲዛ ዮኦ ሃሳዬስ፤

ኢታ ዶናይ ጊዲኮ

ቦካ ዮቴስ።