ጊዶ ኣቲን ሱሬ

ጌዳራን ኡፋዬቴስ።

ኣሽኬቴꬂ ጊዲኮ

ኣꬎ ኤራቴꬅ ኤሄስ።

ጊዶ ኣቲን ዎርዳንቻታ

ኢስታ ዎርዶቴꬂ ꬋይሴስ።

ጊዶ ኣቲን ጺሎቴꬂ

ሃይቆፔ ኣሼስ።

ኢስታ ጺሎቴꬂ

ኢስታስ ኦጌ ሱሪሴስ፤

ጊዶ ኣቲን ኢታቲ ባንታ

ኢታቴꬃን ኩንዴቴስ።

ጊዶ ኣቲን ማልቴቲ

ባንታ ኢታ

ኣሞን ኦይኬታና።

ኢዛ ሂዶታይ

ሃዳ ጊዴስ፤

ባ ዎልቃን ኢዚ ጬቄቲዛዚ

ኡባይካ ꬋዬስ።

ጊዶ ኣቲን ሜቶይ

ኢታ ኣሳ ቦላ ጋኬስ።

ባ ላጌዛ ꬋይሴስ፤

ጊዶ ኣቲን ጺሎቲ ኤራቴꬃን

ኬሲ ኤኪ ኣቴቴስ።

ካታማይ ኡፋዬቴስ፤

ቃሴ ኢታቲ ꬋይዛ ዎዴ

ሃሹ ጌስ።

ካታማይ ዲጬስ፤

ኢታ ሃሳያን ጊዲኮ

ካታማይ ꬋዬስ።

ባ ሾሮዛ ካꬌስ፤

ኣኬካንቻ ኣሲ ጊዲኮ

ባ ዶና ሺሺ ኤኬስ።

ኣማኔቲዛ ኣሲ ጊዲኮ ጹራ ናጌስ።

ካዎቴꬂ ኩንዴስ፤

ዳሮ ዞራንቻቲ ዴኢኮ

ሳሮይ ዴስ።

ሜቶን ጌሌስ፤

ዋሴ ጌላናስ ጫቆንታዴ

ኣይኮይካ ቦቼና።

ቦንቼታዉስ፤

ዎልቃꬂዛ ኣሳቲ

ዱሬቴꬅ ጻላ ዱሬቴቴስ።

ሜንጼ ኢታ ኣሲ ጊዲኮ

ባ ቦላ ሜቶ ኤሄስ።

ጺሎቴꬅ ዜሪዛ ኣሲ ጊዲኮ

ሱሬ ዎይቶ ኤካና።

ጊዶ ኣቲን ኢታቴꬅ

ካሊዛ ኣሲ ሃይቃና።

ዴኢዛ ኣሳታ ሻቴቴስ፤

ጊዶ ኣቲን ሱሬ

ሄሜቲዛይታን ኡፋዬቴስ።

ጊዶ ኣቲን ጺሎቲ

ቃጻዬቴቴና።

ማጫሳ ፑላቴꬂ

ጉዱንꬃ ሲꬌን

ኣꬂዳ ዎርቃ ማላ።

ጊዶ ኣቲን ኢታታ ኣሞስ

ዉርሴꬂ ሃንቆ ጻላ።

ጮ ኪያቴꬅ ኢሜቴስ፤

ጊዶ ኣቲን ኢስታስ ኣቆይ

ሃ ሃ ዳሬስ።

ባጋቲ ኬሂ ኡዜቴቴስ፤

ጊዶ ኣቲን ኢስቲ

ማንቂ ማንቂ ቤቴስ።

ሃራታስ ኢሚዛይ

ባስ ዎፓ ዴሜስ።

ዴሬይ ቃንጌስ፤

ኬሲ ባይዚዛዴይ ጊዲኮ

ኣንጄቴስ።

ሎኦ ሚሺ ናጌስ፤

ጊዶ ኣቲን ኢታ ሚሽ ኮይዛዴ

ኢታ ሚሺ ጋኬስ።

ኣማኔቲዛ ኣሲ ኩንዳና፤

ጺሎቲ ጊዲኮ

ሎኦ ሚꬃ ማላ ጪሊላና።

ኣሲ ጎኣይ ባይንዳ ኣታና፤

ኤያቲካ ኣꬎ ኤራንቻታስ

ኣይሌ ጊዳና።

ኣይፊዛ ሚꬃ ማላ፤

ሼምፖታ ኣሺዛይ

ኣꬎ ኤራንቻ።

ባንታ ኦሶ ዋጋ

ኤኪዛ ጊዲኮ፥

ኢታቲኔ ናጋራንቻቲ

ባንታ ኦሶስ ኤካና ዋጋይ

ዋኒ ዳራንዴሻ!1ጴጽ 4፡18