ባ ዴኦን ቦሬይ ባይንዳ

ሂዬሳ ኣሲ ሎኦ።

ሎኦ ጊዴና፤

ኤሶ ሄሜታይ ኦጌ ባሌꬄስ።

ባ ዴኦ ሞሬስ፤

ሂስቲዲ ጎዳ ቦላ ዪሎቴስ።

ጊዶ ኣቲን ማንቆቴꬂ

ካሴ ዲዛ ላጌ ሃሴስ።

ቃጻዬቶንታ ኣቴና፤

ዎርዶ ፑኪዛይካ

ቃጻዬቶንታ ኣቴና።

ዳና ሲንꬃን ኣላንꬄስ፤

ጮ ኢሚዛ ኣሳራ

ኣሲ ኡባይ ዳቦቴስ።

ሂስቲን ኢዛ ላጌቲ ኣይ ኬና

ኢዛፔ ባቃታኔ!

ካሊ ኣዳሺዲካ

ኢዚ ኢስታ ዴሜና።

ባስ ሚሽ ኦꬂዛይ

ባና ሲቄስ፤

ኣኬካ ሲቂዛዴስ ኢንጄቴስ።

ቃጻዬቶንታ ኣቴና፤

ዎርዶ ፑኪዛይካ ꬋያና።

ዳናስ ቤሴና፤

ኣይሌይ ጎዳ ቦላ ጎዳቲኮ

ሄሲ ኣይ ኬና ኢታ!

ኣስ ዳንዳያንቻ ኬሴስ፤

ቆሆ ዬꬊ ኣꬌꬂ ቦንቾን ጋꬄስ።

ጊዶ ኣቲን ኢዛ ሲንꬃን

ሳባ ዴሞይ

ማታ ጪሊሊሲዛ ኢራ ማላ።

ባሻስ ኣꬂ ኢሜስ፤

ኦሽ ኤሂዛ ማቻ

ኢራ ኣꬂዛ ኬꬃ ማላ።

ዬሊዳይታፔ ላቴቴስ፤

ኣኬካራ ዲዛ ማቻ ጎዳፔ ቤታዉስ።

ኦሶ ኦꬆንታ ኣሲ ጋፌስ።

ባ ሼምፖ ናጌስ፤

ጊዶ ኣቲን

ኢዞ ኢጺዛዴይ ሃይቄስ።

ጎዳስ ታልኤስ፤

ጎዳይ ሄ ሎኦ ኦሶ

ዋጋ ቃንጻና።

ኢዚ ሃይቆስ ቢሺን

ጮኡ ጋ ጼሎፋ።

ቃጻዬታናስ ቤሴስ፤

ኔኒ ኣጋ ኣꬊኮ

ሃራ ዎዴካ

ኔስ ሄሳꬆ ኦሶይ ኣቴና።

ሂስቲኮ ኔኒ ዉርሴꬃን

ኣꬎ ኤራንቻ ጊዳና።

ጊዶ ኣቲን

ጎዳ ቆፋይ ፖሌቴስ።

ዎርዳንቻ ጊዳናፔ

ማንቆቴꬂ ሎኦ።

ሄሳ ማላ ኣሲ ዎፓን ዴስ፤

ኢታይካ ኢዛ ቦቼና።

ጊዶ ኣቲን ፑዴ ባ ዶናን

ዛራናዉ ዋዬቴስ።

ዎዚና ፓጬይ ኣኬካ ታማራና፤

ኣኬካንቻ ኣሳ ሴሪኮ

ኢዚ ኤራቴꬅ ዴማና።

ባ ኣዮካ ኬሲ ዬዴꬂዛ ናይ

ኢዚ ዬላቴꬂኔ

ካዉሻቴꬅ ኤሂዛ ና።

ታ ዞሬ ኔ ሲዮንታ ኣጊኮ፥

ኔ ኤሪዛ ቃላካ ባላና።

ሱሬ ፒርዳ ቦላ ቂልጬስ፤

ኢታ ኣሳ ዶናይ

ኢታቴꬅ ባንቺኬስ።

ኤያታ ዞኮስ ሊሶይ

ጊጊ ኡቲዴስ።