20
1 ማꬆሲዛ ኡሺ ኡዪዛይ
ቂልጪዛዴኔ ኤያ ጊዴስ፤
ሃይታንታን ባሌቲዳ ኡባይ
ኣꬎ ኤራንቻ ጊዴና።
2 ካዎ ሃንቆይ ጋሞ ጻጎ ማላ፤
ኢዛ ዪሎቺዛይ
ባ ሼምፖ ቦላ ፒርዴስ።
3 ፓላማፔ ሃኮይ
ኢዛዴስ ቦንቾ፤
ጊዶ ኣቲን ኤያ ኣሲ ኡባይ
ኦሻስ ኤሶቴስ።
4 ኣዛላ ጎሻንቻይ
ዎዴራ ጎዬና፤
ካꬅ ሺሺዛ ዎዴ
ሺሻናስ ኮዬስ፤
ጊዶ ኣቲን ኣይኮካ ዴሜና።
5 ኣሳ ዎዚና ሃልቾይ
ጪማ ኦላን ዴኢዛ
ሃꬃ ማላ፤
ጊዶ ኣቲን ዎዚናማ ኣሲ
ሄፔ ዱቂ ኬሴስ።
6 ዳሮ ኣሳቲ ባንታ
ኪያቴꬃ ዮቴቴስ፤
ጊዶ ኣቲን ኣማኔቲዛ ኣስ
ኦኒ ዴማናስ ዳንዳይዜ?
7 ጺሎ ኣሲ ቦሬይ ባይንዳ ዴኦ ዴስ፤
ኢዛፔ ካሊዲ
ኢዛ ናይቲካ ኣንጄቲዳይታ።
8 ካዎይ ፒርዳናስ ባ ካዎቴꬃ
ኣልጋን ኡቲዛ ዎዴ
ኢታ ኡባ ባ ኣይፌታን
ሃርቂዲ ኬሴስ።
9 «ታ ዎዚና ጌሻዲስ፤
ታ ጌሻ፤
ታናን ናጋራይ ባዋ»
ጋናይ ኦኔ?
10 ጎዳይ ዎርዶ ሜዛኔኔ
ናምኡ ቆሞ ጌዳራ
ሚሽ ኢጼስ።
11 ናይ ጌሺኔ ሱሬ ጊዲዛይሲ
ኢዚ ኦꬂዛ ኦሶን ኤሬቴስ።
12 ሲዪዛ ሃይꬂኔ ጼሊዛ ኣይፌ፥
ኢስታካ ጎዳይ ሜꬊዴስ።
13 ꬊስኮ ሲቆፓ!
ኔ ሂስቶንታ ኣጊኮ ማንቃና።
ሚናዳ ኦꬃ፤
ሂስቲኮ ኔኒ ካꬅ ካላና።
14 ሻሚዛ ኣሲ፥
«ሃይሲ ኣልኦ! ቆሄስ!» ጌስ፤
ጊዶ ኣቲን ሻሚ
ሲሚዳፔ ጉዬን፥
«ሂራይሶን ሻማዲስ»
ጊዲ ጬቄቴስ።
15 ኤራይ ኩሚዳ ቃላ ሃሳይዛ
ሜቴርሻቲ ዎርቃፌኔ
ዞኦ ኢንቁፌካ
ኣꬎ ጌጼ።
16 ኤሮንታ ኣሳስ
ዋሴ ጌሊዛ ኣሳ ማይኦ
ቃሪ ኤኪቴ፤
ሃዉሻ ማጫሳስ
ዋሴ ጌሊዛ ኣስ ኦይኪቴ። *ሃዉሻ ማጫስ ጊዛይሳስ ቢርሼꬃይ ካዉሻ ጉሳ።
17 ዎርዶን ዴሚዳ ካꬂ ማልኤስ፤
ጊዶ ኣቲን ኣቂ ፔኢዲ
ዶናን ኣጬ ጊዴስ።
18 ዞሬ ኤካዳ ሃልቾ ሃልቻ፤
ዞሬ ኤኮንታ ዴኣሼ
ኦላስ ቦፓ።
19 ዚጊራንቻይ ጹራ ላሌስ፤
ሄሳ ጊሻስ ሎምኡሎምኣ
ኣሳፔ ሃካ።
20 ባ ኣዋ ዎይኮ
ባ ኣዮ ጫዪዛዴስ፥
ጾምፔይ ሳካና
ꬉማን ቶኣና።
21 ኮይሮራ ኤሶን ቤቲዳ ኣቆታስ
ዉርሴꬃን ኣንጆይ ዴና።
22 ኔሲ ኢታ ኦꬂዳ ኣሳስ፥
«ታኒ ኢዛስ ሃሎ ኬሳና» ጎፓ፤
ጎዳን ኣማኔታዳ ናጋ፤
ኢዚ ኔና ኣሻና።
23 ጎዳይ ዎርዶ ሜዛኔን
ኡፋዬቴና
ናምኡ ቆሞ ጌዳራ
ሚሽ ኢጼስ።
24 ኣሳይ ባናስ ቤሲዛ ኦጌ
ጎዳይ ካሌꬄስ፤
ሂስቲን ኣሲ ባርካ
ባ ባና ኦጌ
ዎስቲ ኣኬካናስ ዳንዳይዜ?
25 ኢሲ ሚሽ ኤሶቲዲ፥
«ሃይሳ ታኒ ጾሳስ ኢማና»
ጊዲ ኣዲኔቲዳፔ ጉዬ
ዚልኤቴꬂ ኣስ ኦይኪዛ ያርዴ።
26 ኣꬎ ኤራቴꬂ ዲዛ ካዎይ
ማካላንቻታ ሻኪ ኤሬስ፤
ኢዚ ኢስታ ቃꬌቶንታ ቃጻዬስ።
27 ኣሳ ኣያናይ ጎዳ ጾምፔ፤
ሄሳ ጊሻስ
ጊዶ ኣሳቴꬅ ኡባ
ኢዚ ፒልጊ ጼሌስ።
28 ኪያቴꬂኔ ቱማቴꬂ
ካዎ ናጌቴስ፤
ኢዛ ካዎቴꬃ ኣራታይካ
ሲቆን ሚኔስ።
29 ዬላጋታ ዎልቃይ ኢስታስ ቦንቾ፤
ጪማታ ፑሉንꬂ
ኢስታስ ቦንቾ።
30 ሚኖ ቂጻቴይ ኢታቴꬅ ዲጌስ፤
ዋꬋይ ኢታ ዎዚና ላሜስ።