26
1 ቦኔን ሻቺ፥ ካꬅ ሺሺዛ ዎዴንካ
ኢራይ ኮሾንታይሳ ማላ፥
ኤያስ ቦንቾይ ኮሼና።
2 ካፎቲ ያኔ ሃ ፓሊሼ
ኣስ ቆሆንታይሳ ማላ፥
ጋሶይካ ባይንዳ
ቃንጊዛ ቃንጌꬂ
ኣስ ጋኬና።
3 ፓራሲ ሊሶ፥
ሃሬስ ኣንጫፋ ኮሺዛይሳ ማላ፥
ኤያ ዞኮዛስ ዱርቃ ኮሼስ።
4 ኤያ ኣሳስ
ኢዛ ኤያቴꬃ ማላ ዛሮፓ፤
ዛሪኮ ኔኒካ
ኢዛ ማላ ጊዳና።
5 ጊዲኮካ ኤያስ
ኢዛ ኤያቴꬃ ቤሳ፤
ሂስቶንታ ኣጊኮ ኢዚ ባና
ኤራንቻ ማላ ቆዳና።
6 ኤያ ኣሳ ቦላ ኪታ ዬዶይ
ባርካ ባ ቶሆታ
ቃንጺዛይሳ ማላ፤
ዎይኮ ዎꬊዛ
ማርዜ ኡሻ ማላ።
7 ኤያ ኣሳ ሌሚሶይ
ሲሊዳ ቶሆ ማላ።
8 ኤያ ኣሳስ ቦንቾ ኢሞይ
ያንባርሻ ቦላ
ቃቺ ዎꬂዲ
ዩሺዛ ሹቻ ማላ።
9 ኤያ ኣሳ ሌሚሶይ
ማꬆቲዳ ኣሳ ኩሼን ኤቂዳ
ኣጉንꬃ ማላ።
10 ኤያ ኣስ ዎይኮ
ባስ ኦጌራ ካንꬂ ቢዛ ኣስ
ኦሶስ ቃጻሪዛ ኣሲ
ባ ዎንዳፌን ጮ ዴሚዳ ኣስ
ዱኪ ማዱንꬂዛ ኣሳ ማላ።
11 ካናይ ባ ጮሺ
ሲሚ ላጪዛ ማላ፥
ኤያይ ባ ኤያቴꬃ ኦሶ
ዛሪ ዛሪ ዬጌስ።
12 ባርካ ባና፥
«ታኒ ኣꬎ ኤራንቻ»
ጊዛ ኣስ ቤያዲ?
ኢዛፔ ኤያ ኣሳስ
ሎኦ ቃዳይ ዴስ።
13 ኣዛላይ፥ «ኦጌን ጋሞይ ዴስ፤
ያሺዛ ጋሞይ
ዎጋ ኦጌን ዩዬስ» ጌስ።
14 ፔንጌይ ባ ማጻፋ ቦላን
ያኔ ሃ ቃጺዛ ማላ
ኣዛላይካ ባ ሂጻን ያኔ ሃ
ሺሬቲ ሺሬቲ ዎꬌስ።
15 ኣዛላይ ባ ኩሼ ማዳን ዬዴስ፤
ጊዶ ኣቲን ፑዴ ባ ዶናን
ዛራናስ ዋዬቴስ።
16 ኣዛላ ኣሲ ኣኬካን ዮቲዛ
ላፑን ኤራንቻታፔ
ባና ኣꬎ ኤራንቻ
ጊዲ ቆፔስ።
17 ባና ጋꬆንታ ኣሳ ዮኦን
ጉፒ ጌሊዛ ኣሲ
ካና ሃይꬅ ኦይኪዛ ኣሳ ማላ።
18 ጎዪዛ ኣሲ ታማ ጺፋ ኦሊዛ ማላ
ዎይኮ ዎንዳፌ ዱኪዛ ማላ፤
19 «ታኒ ካሳስ ኦꬃዲስ» ጊሼ
ባ ላጌዛ ጪሚዛ ኣሲካ
ሄሳ ማላ።
20 ሚꬂ ዉሪኮ ታማይ ቶኤስ፤
ዚጊርሲ ꬋይኮ ኦሺ ኣቴስ።
21 ጺጺንꬂ ቦንቆ ዳርሲዛይሳ ማላኔ
ሚꬂ ታማ
ዳርሲዛይሳ ማላ፥
ዶናማ ኣሲ ኦሽ ዳሪሴስ።
22 ዚጊርሳንቻ ቃላይ
ማልኦ ቁማ ማላ
ኣሳስ ዱጌ ማራጬ ጋኬስ።
23 ዎዚናን ኢታ ሚሺ ዲሺን፥
ባ ኢንጻርሳን ሊቆ ቃላ
ሃሳይዛ ኣሲ
ቢራን ሜሼቲዳ
ማና ሚሻ ማላ።
24 ጌኔ ኣሲ ባ ዶናን ጪሜስ፤
ጊዶ ኣቲን ባ ዎዚናን
ኢታቴꬅ ጹንቴስ።
25 ኢዛ ዎዚናን ላፑን ቱናቴꬂ
ኩሚ ኡቲዴስ፤
ሄሳ ጊሻስ ኢዚ
ሎኦ ቃላ ሃሳይኮካ
ኣማኖፓ።
26 ኢዚ ባ ጌኔ ባሌꬆን
ጌንꬃናስ ዳንዳዬስ፤
ጊዶ ኣቲን ኢዚ ኦꬂዳ
ኢታቴꬂ ዱላታን ቆንጫና።
27 ሃራታስ ኦላ ቦኪዛ ኣሲ
ሄ ኦላን ባስ ኩንዳና፤
ሃራታ ቦላ ሹች
ቡሉሊዛ ኣሳ ቦላ
ሄ ሹቻይ ሲሚ
ኢዛ ቦላ ኩንዳና።
28 ዎርዶቲዛ ኢንጻርሲ
ባ ቆሂዳ ኣሳታ ኢጻዉስ፤
ጪሚዛ ሜቴርሺካ ባሽ ኤሃዉስ።