25
ሶሎሞኔይ ጻፊዳ ሃራ ሌሚሶታ
1 ዩሁዳ ካዎ ሂዝቂያሳ ኣሳቲ ዱቂዲ ጻፊዳ ሶሎሞኔ ሌሚሶቲ ሃይሳፌ ካሊዛይታ።
2 ጹራ ጌንꬆይ ጾሳስ ቦንቾ፤
ጹራ ፒልጊዲ ኬሶይ
ካዎታስ ቦንቾ።
3 ሳሎታ ꬎቃቴꬃኔ
ሳኣ ጪማቴꬃ
ኣሲ ጋኮንታይሳ ማላ፥
ካዎታ ቆፋካ ኣሲ ፒልጊ
ኤራናስ ዳንዳዬና።
4 ቢራፔ ቂታ ዲጋይቻ፤
ዎጋጬይካ ቆጺዲ
ሎኦ ሚሽ ኬሳና።
5 ካዎ ሲንꬃፌ ኢታታ ዲጋይቻ፤
ሂስቲኮ ኢዛ ካዎቴꬃ ኣራታይ
ጺሎቴꬃን ሚኒ ኤቃና።
6 ካዎ ሲንꬃን ኔና
ꬎቁ ꬎቁ ሂስቶፋ፤
ጊታ ኣሳታ ጊዶን
ቤታናስ ኣሞቶፋ።
7 ጊታ ኣሳ ሲንꬃን
ኔና ካዉሻናፔ
ኢዚ ባርካ ኔና፥
«ሃይሶ ꬎቁ ጋ»
ጊኮ ኔስ ሎኦ። ሉቃ 14፡8-10
8 ኔ ኣይፌዛን ቤኢዳ ኡባ
ማርካታናስ ዱቡሻ
ባናስ ኤሶቶፓ፤
ኣይስ ጊኮ
ኔኒ ማርካታ ሲሚን፥
ሃራ ኣሲ ኔ ማርካቴꬃይ
ባላ ጊዲዳይሳ ቆንጪሲኮ
ኔኒ ዬላታና።
9 ኔሲኔ ኔ ላጌዛስ ጊዶን
ፓላማይ ሜꬌቲኮ፥
ሄ ፓላማ ጋርሳን
ሃራ ኣሳ ጹራ ቆንጪሶፓ።
10 ሂስቶንታ ኣጊኮ
ኔኒ ዮቲዛይሳ ሲዪዳ ኣሲ
ኔና ካዉሻና፤
ሄሳን ኔ ሱንꬃይ
ናምኣንꬆ ሲሚዲ
ሎኦንታ ማላ ሞሬታና።
11 ኮሺዛ ዎዴዛን
ሃሳዬቲዳ ሊኬ
ቃላይ ቢራ ቦላ ቲጌቲዳ
ዎርቃ ኣሌቆ ማላ።
12 ኣꬎ ኤራቴꬂ ዲዛ ኣሲ
ዞሪዛ ዞሬይ ኤዝጊዛ ኣሳስ
ሃይꬃን ኣꬂዛ ዎርቃ ማላ፤
ዎይኮ ሙሩታ ዎርቃፌ
ኦሴቲዳ ኣሌቆ ማላ።
13 ካꬅ ሺሺዛ ዎዴ ኢርጻ ሃꬂ
ኡዪን ኣሊዛ ማላ፤
ኣማኔቲዛ ኪታንቻይ
ባና ኪቲዛይታ ኡፋይሴስ።
14 ኢሞንታይሳ፥ «ኢማና» ጊዲ
ጮ ፓፖቲዛ ኣሲ
ኢራይ ባይንዳ ሻራኔ ጫርኮ ማላ።
15 ዳንዳያንቻ ኣሲ
ዴሬ ሃሪዛዴ
ዮቲ ማይዜስ፤
ሊቆ ቃላይ
ሜቄꬅ ካንꬂ ጌሌስ።
16 ኤስ ዴሚኮ ጊናራ ማ፤
ጊዶ ኣቲን ዳርሲኮ
ኔና ጹጋና።
17 ኔና ኡፊዲ ኢጾንታ ማላ
ኔ ላጌ ሶ ኡባቶ ቦፓ።
18 ባ ላጌዛ ቦላ ዎርዶራ
ማርካቲዛ ኣሲ ኮጼይ፥
ጊꬃ ማሻይኔ ዎንዳፌይ
ኣስ ቆሂዛ ማላ ቆሄስ።
19 ሜቶ ዎዴ ኣማኔቶንታ
ኣሳን ዜምፖይ፥
ቃጺዛ ኣቻን
ጮሚዛ ማላኔ
ሲሊዳ ቶሆን ሄሜቲዛ ማላ።
20 ጬጪ ኡቲዳ ኣሳስ ማዛሙሬ ዬጼꬂ
ሜጎ ጋላስ
ማይኦ ቃሪዛ ማላኔ
ማዱንꬃ ቦላ ጹጊዛ ሚሽ
ቲጊዛ ማላ።
21 ኔ ሞርኬይ ጋፊኮ ሚዛ፤
ሳሜቲኮ ኡሻ።
22 ኔኒ ሄሳꬆ ኦꬂኮ
ኢዛ ሁኤን ታማ ቦንቆ ካሺዲ
ቆሊዛዴ ማላ።
ጎዳይካ ኔ ኦሶስ
ዋጋ ኢማና። ኦሮ 12፡20
23 ኣርሼይ ሞኪዛ ባጋ ጫርኮይ
ኢራ ኤሂዛ ማላ፥
ዚጊርሲ ሃንቆ ኤሄስ።
24 ዱናማ ማቺራ
ኢሲ ኬꬃን ዴኣናፔ
ኬꬃ ዳራንቻን
ዴꬂ ሎኦ።
25 ዳቡርዳ ኣሲ ኢርጻ ሃꬅ
ኡዪዲ ኣሊዛ ማላ
ሃኮ ቢታፌ ዪዛ
ሎኦ ቃላይ ኡፋይሴስ።
26 ኢታ ኣሳ ሲንꬃን
ኩንዲዛ ጺሎ ኣሲ
ቡልቆቲዳ ፑልቶኔ
ሞሬቲዳ ኦላ ሃꬃ ማላ።
27 ዳሮ ኤሳ ሙሲ ሎኦ ጊዴና፤
ሄሳꬆካ ባስ ቦንቾ
ኮሺ ቦንቺሴና።
28 ባና ሃሮንታ ኣሲ
ጊምቤይ ላሌቲዳ ካታማ ማላ።