24
1 ታ ናዞ! ኢታ ኣሳታ ማላ
ጊዳርኪና ጎፓ፤
ኢስታራ ላጌቴꬂካ
ኔና ሎኦፖ።
2 ኢስቲ ኡባቶ ማካላ
ሚሽ ማቄቴቴስ፤
ባንታ ኢንጻርሳንካ
ጌኔ ሃሳዬቴስ።
3 ኬꬂ ኣꬎ ኤራቴꬃን
ኬጼቴስ፤
ኣኬካንካ ሚኔስ።
4 ኤራይ ዴኢኮ፥
ኬꬂ ኣልኦኒኔ
ሎኦ ሚሻን ኩሜስ።
5 ዎዚናማ ኣሳስ ጊታ ዎልቃይ ዴስ፤
ኤራንቻ ኣሲካ
ሚኖቴꬅ ጉጄስ።
6 ኦላ ኦሌታናስ ኔስ ሎኦ ዞሬ
ጾኖ ዴማናስካ
ዳሮ ዞራንቻታ ኮሼስ።
7 ኤያ ኣሲ ኣꬎ ኤራቴꬃፌ
ኬሂ ሃሆን ዴስ፤
ዱላታ ሲንꬃን ኤቂዲ
ሃሳያና ዳንዳዬና።
8 ኢታ ኦꬃናስ ሃልቺዛ ኣሲ
«ጌናንቻ» ጌቴቴስ።
9 ኤያቴꬃ ቆፋይ ናጋራ፤
ቂልጪዛዴ ኣሲ ኢጼስ።
10 ኔኒ ሜቶ ጋላስ ላፊኮ፥
ኔ ዎልቃይ ኣይ ማላ ጉꬄ?
11 ሃይቆስ ላጌቲ ቢዛይታ ኣሻ፤
ሹኬታናስ ጎሼቲ
ቢዛይታ ኣሻ።
12 ኔኒ፥ «ታ ሃይሳ ኤሪኬ» ጊኮ፥
ዎዚና ፒልጊ ኤሪዛይሲ
ኢዚ ኣኬኬኔ?
ኔ ሼምፖ ናጊዛይሲ ኤሬኔ?
ኣስ ኡባስ ኢዛ
ኦሶ ኦሶ ማላ ኢሜኔ?
13 ታ ናዞ!
ሎኦ ጊዲዳ ጊሻስ ኤሳ ማ፤
ኢሊሎ ኤሲ ዶናን ማልኤስ።
14 ኣꬎ ኤራቴꬂካ ሄሳ ማላ፤
ኢዚ ኔ ሼምፖስ
ማልኦ ጊዲዳይሳ ኤራ።
ኔኒ ኢዞ ዴሚዛ ጊዲኮ
ዎንቶ ኔስ ዜምፖ ጊዳና፤
ኔ ሂዶታይካ ሃዳ ጊዴና።
15 ጺሎ ኣሳ ኬꬅ ቦንቃናስ
ፓንጋ ማላ ዛማዶፓ፤
ኢዛ ኬꬃ ቦላ ሜቶ ጋꬆፋ።
16 ጺሎ ኣሲ
ላፑንቶ ኩንዲኮካ ዴንዴስ፤
ጊዶ ኣቲን ኢታቲ
ሜቶን ꬋዬቴስ።
17 ኔ ሞርኬይ
ኩንዲዛ ዎዴ ኡፋዬቶፋ፤
ኢዚ ꬉጴቲዛ ዎዴካ
ኔ ዎዚናን፥ «ሃሹ!» ጎፓ።
18 ኔ ሂስቶንታ ኣጊኮ
ጎዳይ ሄሳ ቤኢዲ ኡፋዬቴና፤
ኢዚ ባ ሃንቆዛ
ኔ ሞርኬዛ ቦላፌ ዛራና።
19 ኢታ ኣሳታ ኦሶን ጬጮፓ፤
ኢስታ ማላ ጊዳርኪና ጎፓ።
20 ኢታ ኣሳስ ሂዶታይ ባዋ፤
ኢታታ ጾምፔይ ቲፒ ጊዲ ቶኣና።
21 ታ ናዞ! ጎዳሲኔ
ካዋስ ያያ፤
ማካሊዛይታራካ ዙፔቶፓ።
22 ኣይስ ጊኮ ሄሳ ማላ ኣሳታ
ቆፖንታ ሜቶይ ጋኬስ፤
ካዎፔኔ ጎዳፔ ያና
ሜቶ ኦኔ ኤሪዛይ?
ኣꬎ ኤራንቻይ ጉጂ ዮቲዳ ሃራ ሌሚሶታ
23 ኣꬎ ኤራንቻቲ
ጉጂዲካ ሃይሳꬆ ጊዳ፤
ፒርዲሼ ማዶ ፒርዳይ
ሎኦ ጊዴና።
24 ሞራንቻ፥ «ኔኒ ጺሎ» ጊዛዴ
ዴሬይ ቃንጌስ፤
ካዎቴꬃቲካ ኢዛ ሂሌቴስ።
25 ጊዶ ኣቲን ሞራንቻ፥
«ኔኒ ሞራዳሳ» ጊዛይታ
ኢስታራ ሎኦ ሚሺ ጋይታና፤
ኢስታስ ኬሂ ዳሮ ኣንጆይ ያና።
26 ሱሬ ዛሮ ኢሞይ
ዶና ዬሬቴꬃ ማላ።
27 ካሴታዳ ኔ ካሬን ዲዛ ኦሶ ኦꬃ፤
ኔ ጎሻ ጊጊሳ፤
ሄሳፌ ጉዬ ኔ ኬꬅ ኬጻ።
28 ኔ ሾሮዛ ቦላ
ጋሶይ ባይንዳ ማርካቶፋ፤
ኔ ዶናንካ ጪሞፋ።
29 ኢዚ ታስ ኦꬂዳ ማላ
ታኒ ኢዛስ ኦꬃና፤
«ታኒ ኢዛስ ኢዛ ኦሶ
ኩሼ ዛራና» ጎፓ።
30 ታኒ ኣዛላ ኣሳ ጋዴራ ኣꬋዲስ፤
ኣኬካይ ፓጪዳ ኣሳ
ዎይኔ ቱራ ጊዶራ ካንꬃዲስ።
31 ኡባሶን ኣጉንꬂ ሞኪዴስ፤
ጋዳ ሻራፋይ ጎዚዴስ፤
ጊምቤይካ ላሌቲዴስ።
32 ታኒ ቤኢዳይሳ ዩሻ ቆፓዲስ፤
ታኒ ቤዮይሳፌ
ቲሚርቴ ዴማዲስ።
33 ኔኒ፥ «ጉꬃራ ሊጲጲ ጋይስ፤
ጉꬃራ ꬊስካ ኤካይስ፤
ኔ ኩሼዛካ ሺሻዳ
ጉꬃራ ሼምፓ
ኤካይስ» ጊኮ፥
34 ማንቆቴꬂ ኔ ቦላ
ፓንጋ ማላ ያና፤
ፓጬይካ ኦላ ሚሻ
ኦይኪዳ ኣሳ ማላ ፑቱ ጋና። ሌሚ 6፡10-11