30
ኣጉሬይ ሃሳይዳ ሌሚሶታ
1 ሃይሳፌ ካሊዲ ጻፌቲዳይሲ ያቄ ና ኣጉሬይ ሃሳይዳ ሌሚሶታ።
ኣጉሬይ ኢቲኤሌሲኔ
ኡካላስ ሃይሳ ሃሳይዴስ።
2 «ታኒ ኣሳ ኡባፌካ ኤያ ዳራይስ፤
ኣሳስ ዴኢዛ ኣኬካይ ታስ ባዋ።
3 ታኒ ኣꬎ ኤራቴꬅ ታማራቤኬ፤
ጌሻዛ ጊሻሲካ
ታኒ ኤሪዛ ሚሺ ዴና።
4 ሳሎ ፑዴ ኬኢዲ
ዱጌ ዎꬊዳይ ኦኔ?
ጫርኮ ባ ኩሼን ኦይኪዳይ፥
ሃꬅ ባ ኣፋላን ዪጪዳይ
ሳኣ ጋጻ ኢዛ ሶን ሶን
ዎꬂዳይ ኦኔ?
ኣኔ ኤሪኮ ኢዛ ሱንꬅ ታስ ዮታ፤
ኢዛ ናዛ ሱንꬂ
ኦና ጌቴቲዜ?
5 «ጾሳይ ዮቲዛ ቃላይ
ኡባይ ቱማ፤
ኢዛን ኣማኔቲዛ ኡባስ
ኢዚ ጎንዳሌ።
6 ኢዛ ቃላ ቦላ ኣይኮካ ጉጆፋ፤
ጉጂኮ ኢዚ ኔና ሴራና፤
ኔኒ ዎርዳንቻ ጊዲዳይሳካ
ኢዚ ቆንጪሳና።
7 «ጎዳዉ! ታኒ ኔና
ናምኡ ሚሽ ኦይቻይስ፤
ታኒ ሃይቃና ጋካናስ
ኢስታ ታና ዲጎፋ።
8 ታኒ ኣስ ጪሞንታ ማላኔ
ዎርዶ ሃሳዮንታ ማላ
ታና ናጋ፤
ታና ዱሬ ዎይኮ
ማንቆ ሂስቶፋ፤
ጊዶ ኣቲን ሃቺስ ሃቺስ
ጊዲዛ ካꬂ ታስ ኢማ።
9 ሂስቶንታ ኣጊኮ
ታኒ ኬሃ ካላዳ ኔና ካዳና፤
‹ጎዳይ ኢዚ ኦኔ?› ጋና፤
ዎይኮ ማንቃዳ ካይሳና፤
ሂስታዳ ታኒ ጾሳ
ሱንꬃ ጫይሳና።
10 «ኔና ቃንጎንታ ማላኔ
ኢዚ ቃንጊን ኔስ
ጎሜቶንታ ማላ፥
ኣይሌ ኢዛ ጎዳ ሲንꬃን
ኢታን ዴንꬆፋ።
11 ባ ኣዋ ቃንጊዛኔ
ባ ኣዮካ ኣንጆንታ
ዬሌታይ ዴስ።
12 ቱና ጊዲ ኡቲዲ
ባንታና ጌሻ ማላ
ቆዲዛ ኣሳቲ ዴቴስ።
13 ኦቶሮን ኩሚዳ ኣሳቲኔ
ኣስ ካꬊዲ ጼሊዛ ኣሳቲ ዴቴስ።
14 ሂዬሳታኔ ሜቶታንቻታ
ዴሬ ጊዶፌ ꬋይሳናስ
ኢስታ ኣቻይ ማሻ ማላ ጊዲዳ
ኢስታ ጋጊናይ ቢላማ ማላ
ጊዲዳ ኣሳቲ ዴቴስ።
15 «ኡሎስ ናምኡ ማጫ ናይቲ ዴቴስ።
ኢስቲ፥ ‹ኑስ ኢማ! ኑስ ኢማ!›
ጊዲ ዋሴቴስ።
ሙሌካ ካሊ ኤሮንታ
ሄꬓቲ ዴቴስ፤
ኦይዳንꬆዚ ቃሴ ሙሌራ፥
‹ጊዳና› ጊ ኤሬና።
16 ሄሳንቲካ ዱፎ፥ ማይኒዳ ኡሎ፥
ሃꬂ ካሊ ኤሮንታ
ሜላ ቢታኔ፥
‹ታስ ጊዳና!› ጊ ኤሮንታ ታማ።
17 «ባ ኣዋ ቂꬊዛ ና ኣይፌኔ፥
ባ ኣዮ ካꬊዛ ና ኣይፌ
ኬልካን ዴኢዛ ቁሮቲ ዎጫና፤
ኢዛ ኣሾዛ ኣንኮቲ ማና።
18 ታና ኬሂ ማላሊሲዛ
ሄꬑ ሚሻቲ ዴቴስ፤
ኦይዳንꬆዚ
ኡባራካ ታስ ጌሌና።
19 ሄሳንቲካ ጎሌቲ
ሳሎራ ፓሊዛ ፓሎ፥
ሾሺ ሹቻ ቦላራ
ሶሎሉ ጊ ቡስ፥
ማርካቤይ ኣባ ቦላራ ቢዛ
ቡስ ኣዴይ ማጫ ና ሲቆ
ዴማናስ ሃኒዛ ሃኖታ።
20 «ላይማ ማጫሳያ
ሃኒዛ ሃኖይካ
ሄሳ ማላ።
ኢዛ ሙሳ ማዉስ፤
ጊዶ ኣቲን ሚዳፔ ጉዬን፥
ባ ዶና ቁጫዳ፥
‹ታኒ ኣይኮካ
ሞራቤኬ› ጋዉስ።
21 «ሄꬑ ዮኦታን
ቢታይ ቃጼስ፤
ኦይዳንꬆዛ ኡባካ
ቶካናስ ዳንዳዬና።
22 ሄሳንቲካ ኣይሌይ ካዎቲዳ ዎዴ፥
ኤያይ ካꬅ ካሊዳ ዎዴ፥
23 ኣሲ ኢጺዳ ማጫሳያ
ኣዴ ጌሊዳ ዎዴኔ
ማጫ ኣሽካሪያ ባ ጎዳቴዮ
ላቲዳ ዎዴ ሃኒዛ ሃኖታ።
24 «ሳኣ ቦላ ኦይዱ
ጉꬃ ሜꬌታቲ ዴቴስ፤
ጊዶ ኣቲን ኢስቲ
ኬሂ ኣꬎ ኤራንቻታ።
25 ሄሳንቲካ ጩንጫሌቲ
ዎልቃይ ባይንዳ ሜꬌታ፤
ጊዶ ኣቲን ባንታስ ሚዛ ሚሽ
ቦኔ ሺሺ ዳጋሴቴስ።
26 ጉፓሌቲ ጉꬃ
ዎልቃይ ዴኢዛይታ፤
ጊዶ ኣቲን ባንታ ኬꬅ
ዛላ ጊዶን ኬጼቴስ።
27 ቦሌታስ ካዎይ ዴና፤
ጊዶ ኣቲን ኢስቲ ኡባይካ
ማራን ማራን ዛቴቴስ።
28 ዛሬቲ ኩሼን
ኦይኪንካ ኦይኬቴቴስ፤
ጊዶ ኣቲን ኢስቲ
ካዎ ኬꬃንካ ዴኤቴስ።
29 «ባንታ ማታ ቤሲሼ ሄሜቲዛ፥
ሄꬑ ሜꬌታቲ ዴቴስ፤
ኦይዳንꬆዚካ
ፑላቲዲ ሄሜቴስ።
30 ሄሳንቲካ ዶኣ ኡባፌ
ዎልቃማኔ
ኣይኮስካ ያዪዲ
ባቃቲ ኤሮንታ ጋሞ።
31 ማጫሳታ ጊዶን ኮሶሲ
ሄሜቲዛ ኣዴ ኩቶ፥
ዴይሻ ኦርጌኔ
ባ ኦላንቻታን
ኣጃቤቲዳ ካዎ።
32 «ኔኒ ኤያዳ
ኦቶሬቲዳ ጊዲኮኔ
ኢታ ሚሽ ኦꬃናስ
ሃልቺዳ ጊዲኮ
ኣኔ ታኪ ጋዳ ቆፓ።
33 ማꬂ ቡኪን ኦይሲ ኬኢዛ ማላ፥
ሲꬌ ኢጪንካ
ሱꬂ ዪዛ ማላ
ሃንቆ ዴንꬄꬂኮ
ኦሽ ሜꬌስ።»