31
ካዎ ሊሙኤሌ ኣያ ባ ናዛስ ኢሚዳ ቲሚርቴ
1 ካዎ ሊሙኤሌ ኣያ ካዎ ሊሙኤሌ ታማርሲዳ ቲሚርቴይ ሃይሳፌ ካሊዳይሳ።
2 «ታ ናዞ!
ታ ኡሎፔ ዎꬊዳ ታ ናዞ!
ታኒ ኣዲኔታ ዬሊዳ ታ ናዞ!
3 ማጫሳን ኔ ዎልቃ ዉርሶፋ፤
ካዎታ ባሺዛ ሚሻን
ኔ ኣካታ ꬋይሶፋ።
4 «ሊሙኤሌ ሃይሲ ካዎታስ
ቤሴና፤
ካዎቲ ዎይኔ ኡሹ
ኡያናስ ቤሴና፤
ዴሬ ኣይሲዛይቲ
ማꬆሲዛ ኡሹ
ያሬታናስ ቤሴና።
5 ኢስቲ ኡዪዛ ዎዴ ዎጋ ባሌቴቴስ፤
ቆሄቲዳይታ ማታ ሱጌቴስ።
6 ሃይቃና ሃኒዛይታስ
ማꬆሲዛ ኡሹ
ሜቶ ቦላ ዲዛይታስ
ዎይኔ ኡሹ ኢሚቴ።
7 ኢስቲ ኡዪዲ
ባንታ ማንቆቴꬃ ዶጌቶ፤
ባንታ ቱጋካ ዛሪ ቆፖፌቶ።
8 «ባንታ ጊሻስ ሃሳያናስ
ዳንዳዮንታይታስ
ኔኒ ሃሳያ፤
ሜቶታንቻታ ማታ ጊሻስ
ኔኒ ሞቴታ።
9 ሃሳያዳ ኢስታስ ሱሬ ፒርዳ ፒርዳ፤
ሂዬሳታኔ
ሜቶታንቻታ ማታ
ቦንቺሳ» ጋዳ ታማርሳዱስ።
ዎዚናማ ማቾ
10 ዎዚናማ ማቾ
ኦኒ ዴማናዉ ዳንዳይዜ?
ኢዛ ዞኦ ኢንቁፌካ
ኬሃ ኣꬋዉስ።
11 ኢዚ ኬꬃ ኣዋይ
ኢዞ ኡባ ሚሻንካ
ኣማኔስ፤
ኢዛስ ኣይኮይካ ፓጬና።
12 ኢዛ ባ ዴኦ ላይꬅ ኡባን
ኢዛስ ሎኦ ኣቲን
ኢታ ሚሽ ኦꬁኩ።
13 ዶርሳ ኢስኬፌኔ
ታልባ ቡጻ ኤካዳ፥
ኦሶ ዶሲዛ ባ ኩሼን ሱቃዉስ።
14 ኢዛ ዛልኣንቻታ ማርካቤ ማላ፤
ባ ካꬅ ሃኮ ቢታፌ ኤሃዉስ።
15 ኢዛ ባ ሶ ኣሳስ
ቁማ ካꬃናሲኔ
ባ ማጫ ኣይሌታስ
ኦሶ ሻካ ኢማናስ፥
ሳኣይ ቡሮ ዎንታና ጊሺን
ዴንዳዉስ።
16 ኢዛ ባርካ ቆፓዳ
ጎሻ ጋዴ ሻማዉስ፤
ባ ዴሚዳ ሚሻን
ዎይኔ ቶካዉስ።
17 ኢዛ ሚናዳ ባ ኦሶ ፖላዉስ፤
ኢዚ ቄሴቲካ ኦሶስ ሚኖ።
18 ኢዛ ባ ኦሶስ
ዎꬌይ ዲዛይሳ ኣኬካዉስ፤
ኦማርሲካ ኢዚ ጾምፔይ ቶኤና።
19 ኢዛ ባ ሊቃቃን ሱቃዉስ፥
ባ ኣፋላ ዳዳዉስ።
20 ኢዛ ሂዬሳታስ ባ ኩሼ ሚጫዉስ፤
ሜቶታንቻታስ
ኪያቴꬅ ኢማዉስ።
21 ኢዚ ሶ ኣሳይ ኡባይ
ሆኢዛ ማይኦ ማይኢዳ፤
ሄሳ ጊሻስ ኢዛ
ሻቺ ቡኪኮካ ሂርጉኩ።
22 ሂꬃን ኦንጊዛ
ማይኦ ኦꬃዉስ፤
ላይኖኔ ኦቻ ቴራ ሚሳቲዛ
ማይኦ ማይኣዉስ።
23 ዴሬ ጪማቲ ዱቡሻ ሺቂዛሶን
ኢዚ ኬꬃ ኣዋይ
ቦንቼቲዳ ኣሳ።
24 ላይኖፔ ሴሎ ማይኦታ
ኦꬃዳ ባይዛዉስ፤
ዛልኣንቻታስካ ዳንጮ
ዳዳ ሺሻዉስ።
25 ኢዛ ሚኖኔ ፑላራ ዲዛ ማጫሳ፤
ኢዛ ዪዛ ላይꬃታ
ኡፋይሳን ሞካዉስ።
26 ኣꬎ ኤራን ኢዛ ሃሳያዉስ፤
ኢዚ ኢንጻርሳፌ
ሱሬ ዞሬይ ኬኤስ።
27 ኢዛ ባ ሶ ኣሳ ሃኖ
ሎኤꬃ ካላዉስ፤
ኣዛላ ሃኖይ ኢዚ ቦላን
ቤቲ ኤሬና።
28 ኢዚ ናይቲ ኢዞ፥
«ኣንጄቲዳሬ» ጌቴስ፤
ኢዚ ኬꬃ ኣዋይካ
ኢዞ ጋላቲሼ፥
29 «ሎኦ ሚሽ ኦꬂዳ
ዳሮ ማጫሳቲ ዴቴስ፤
ጊዶ ኣቲን ኔኒ ኢስታ
ኡባፌ ኣꬋሳ» ጌስ።
30 ማላ ሎኦይ ባሌꬄስ፤
ፑላይካ ቆኬስ፤
ጊዶ ኣቲን ጎዳስ ያዪዛ
ማጫሲ ኢዛ ኣንጄቲዳሮ።
31 ኢዚስ ቤሲዛ ኢሞታ ኢሚቴ፤
ኢዛ ኦꬂዳ ኦሶይ ኡባይ
ዱቡሻን ኢዞ ጋላቲሶ።