ኤራንቻታ ማጻፋን ጻፌቲዳይ ቢታ ቦላ ኣሳ ዱሲ ቃንꬅ ጊዶይሳፌካ ቦላራ ዳሮ ሜቶይ፥ ቃጻ ፒርዳይኔ ዳቡራይ ኩሚዳይሳ ኤሪዳ ጊሻስ «ኣሳ ዴኦይ ጮ ሃዳ» ጊዲ ቃቺዳ ኢሲ ኤራ ኣሳ ቆፋታ። ሄ ኤራንቻዛስ ኣሳ ዴኦ ሃኖታ ካሌቲዛ ጾሳ ኦሶ ጹራይ ኤሬቶንታ ኢጺዴስ። ጊዶ ኣቲን ኣሲ ባ ዲዛ ላይꬅ ኡባን፥ ባስ ዳንዳዬቲዳ ኬና ሚኒ ኦꬃና ማላኔ ጾሲ ኣሳስ ኢሚዳ ኢሞታታን ኣሲ ኡፋዬታና ማላ ቤሲዛይሳ ዞሬስ። ኤራንቻዛ ቆፋታፔ ዳሪዛ ባጋይ ሚሳቶን ቆፋኒኔ ሂዶታ ቃንጾን ኩሚዳይታ፤ ጊዶ ኣቲን *ሚሴና ጊዛ ቃላዛ ኢሲ ኢሲ ባጋን ጹሴ ጊሺን ሃራ ባጋን ጹሳ ዎይኮ ፓልቄ ጌቴቴስ። ሃይሲ ሃ ማጻፋይ ጌሻ ማጻፋ ጋርሳን ቤቶይ ጌሻ ማጻፋን ጻጲዳ ኣማኖ ሃራይ ኣቶሺን ሃይሳ ሃራ ዱማ ቆፋይኔ ሲꬌይ ኢዛን ኩሚዳ ማጻፋካ ጋꬂ ኢሲ ቦላ ኦይካና ጋካናስ ኢዚ ኣሆ ጊዲዳይሳ ኤሪሴስ። ሃ ማጻፋዚ ኣሳ ዴኦ ሄሬጋ ማላ ቤሲዛ ጊሻስ ዳሮ ኣሳይ ሃይሳ ሃ ማጻፋዛፔ ባና ሚንꬄꬂዛ ሚሽ ዴሚዴስ። ሄሳꬆካ ሃይታ ሃ ቆፋታ ቤሲዛይ፥ ሃ ኢሲ ጌሻ ማጻፋይ ዴኦስ ጊታ ቢርሼꬅ ኢሚዛ ጾሳን ኡፋይስ ኦꬃና ማላ ዞሪዛይሳ ኣሳይ ኤሪዴስ።