7
ቢኒያሜ ዛሬ ኩዜ ጋሶን ዳዊቲ ጎዳኮ ዚላሊዳ ዚላስ
1 ኣቤት ጎዳዉ!
ታ ጾሳዉ ኔኒ ታስ ቆቴቲዛሶ፤
ታና ጎዲዛ ኡባፌ
ኔኒ ታና ኣሻ።
2 ኔኒ ታና ኣሾንታ ኣጊኮ፥
ኢስቲ ታና ጋሞ ማላ
ሜንꬄሬꬂዲ፥
ኦኒኔ ኣሾንታሶን
ፑዜሬꬃና።
3-4 ኣቤት ጎዳዉ ታ ጾሳዉ!
ታኒ ኣስ ቆሂዳ ጊዲኮ፥
ታስ ሎኦ ኦꬂዳዴስ
ኢታ ዛሪዳ ጊዲኮ፥
ዎይኮ ጋሶይካ ባይንዳ
ታ ሞርኬፌ ቦንቂዳ ጊዲኮ፥
ሄይታ ማላ ዮኦታፔ ኢሲኖካ
ታኒ ኦꬂዳ ጊዲኮ፥
5 ታ ሞርኬይ ታና ጎዲ ኦይኮ፤
ታና ሳኣንካ ዬꬌሬꬆ፤
ታና ቢታን ዬጊዲ
ታ ቦንቾ ካዉሾ።
6 ኣቤት ጎዳዉ!
ኔ ሃንቆን ዴንዳ ኤቃ፤
ኤጺዛ ታ ሞርኬታ
ሃንቆ ቦላ ዴንዳ፤
ታ ጾሳዉ ቤጋ፤
ቱሙ ፒርዳ ፒርዳ።
7 ዴሬታ ዱላታይ
ኔ ዩሾዛን ሺቆ፤
ኔኒ ኢስታ ቦላ ካዎታ።
8 ጎዳይ ካዎቴꬃታ ቦላ ፒርዴስ።
ኣቤት ጎዳዉ!
ታስ ታ ጺሎቴꬃ ማላኔ
ታ ሱሬቴꬃ ማላ ፒርዳ።
9 ቆፋኔ ዎዚና ፒልጋ ኤሪዛ
ጺሎ ጾሳዉ!
ኢታታ ጌኔዛ ኔኒ ꬋይሳ፤
ጊዶ ኣቲን ጺሎታ ሳሮን ናጋ። ኣጁ 2፡23
10 ጾሲ ታስ ጎንዳሌ፤
ዎዚና ጺሎታ
ኢዚ ኣሺዛ ጾሳ።
11 ጾሳይ ጺሎ ፒርዲዛ ጾሳ፤
ኢዚ ጋላስ ጋላስ
ባ ሃንቆ ቆንጪሲዛ ጾሳ።
12 ኣሲ ባ ናጋራ ፓጺዲ
ሲሞንታ ኣጊኮ፥
ጾሲ ባ ማሻ ሌፌስ፤
ኢዚ ባ ዎንዳፌዛ
ዳፊ ኦይኬስ።
13 ኢዚ ዎꬊዛ ኦላ
ሚሻታ ጊጊሴስ፤
ታማ ላጮ ማላ
ፖፖልኡ ጊዛ
ባ ቶራ ዪሻ ጊጊሴስ።
14 ኢታቴꬅ ሻሪዲ፥
ጌኔ ቃንꬃቲዳይ ዎርዶ ዬሌስ።
15 ሃራ ኣሳታስ ኦላ ቦኪዳ ኣሲ
ባ ቦኪዳ ኦላን
ሲሚ ኩንዴስ።
16 ኢዚ ኤሂዛ ጌኔይ
ኢዛ ሁኤስ ሲሜስ፤
ኢዛ ማካላይካ ሲሚዲ
ኢዛስ ጊዴስ።
17 ጎዳ ጺሎቴꬃ ጊሻስ
ታኒ ኢዛ ጋላታና፤
ቃሴ ኡባፌ ꬎቃ
ጎዳ ሱንꬃስ
ታኒ ጋላታ ማዛሙሬ ዬጻና።