1 ሄሳ ጊሻስ ኔኖ ሃራ ቦላ ፒርዲዛይሶ ኔኒ ታ ሃኒ ጋሶን ኦꬃዲስ ጊዛ ጋሶይካ ኔስ ዴና፤ ኔ ሃራ ኣሳ ቦላ ፒርዲዛይሳን ኔርካ ኔስ ኩናኔ ኤካሳ፤ ጋሶይካ ሃራ ኣሳ ቦላ ኔ ፒርዲዛይሳ ኔካ ዛራዳ ኢዛ ኦꬂዛ ጊሻሳ። ማቶ 7፡1፤ ሉቃ 6፡37 2 ሃይታ ማላታ ኦꬂዛ ኣሳታ ቦላ ጾሳ ፒርዳይ ሊኬ ጊዲዳይሳ ኑ ኤሮስ። 3 ሄሳ ጊሻስ ኔ ኣሳ ቦላ ፒርዳሼ ሄ ኔ ፒርዲዛይሳ ዛራ ኦꬂዛዴ ጊዲኮ ኔ ጾሳ ፒርዳፌ ኬሳ ኤካ ኣታና ኔስ ሚሳቲዜ? 4 ዎይኮ ጾሳ ኪያቴꬂ ኔና ማሮቴꬃኮ ካሌꬂዛይሳ ሻካ ኤሮንታ ዳሼ ኢዛ ጊታ ኪያቴꬃኔ ኢዛ ዳንዳያ ዱሬቴꬃ ኔ ሌቃይ?

5 ጊዶ ኣቲን ኔኒ ኔ ዎዚና ሙሜቴꬃኒኔ ማሮቴꬅ ኮዮንታ ኔ ዎዚና ጋሶን ጾሳ ቱማ ፒርዳይ ቆንጪዛ ዎዴ ጾሳ ሃንቆ ጋላሳስ ኔ ቦላ ዳሮ ሃንቆ ሺሻሳ። 6 ጾሲ ኢሳስ ኢሳስ ኢዛ ኦሶ ማላ ኢማና። ማዛ 62፡12፤ ሌሚ 24፡12 7 ሎኦ ኦሶ ኣጎንታ ኦꬂዲ ቦንቾ ሳባኔ ሜርና ዴኦ ኮይዛይታስ ሜርና ዴኦ ኢማና። 8 ጊዶ ኣቲን ባርካ ባና ዶሲዛይታሲኔ ቱማ ኣጋጊዲ ኢታ ካሊዛይታ ቦላ ፒርዳይኔ ሃንቆይ ጋካና። 9 ኢታ ኦꬂዛ ኣይ ኣሳ ቦላካ ኮይሮ ኣይሁዳ ኣሳ ቦላ፥ ካሊዲ ኣይዛቤታ ቦላ ዋዬይኔ ሜቶይ ጋካና። 10 ጊዲኮካ ሎኦ ኦꬂዛዴስ ኦናስካ ኣይሁዳ ኣሳስ ጊዲን ኣይዛቤታስ ሳባይ፥ ሳሮቴꬂኔ ቦንቾይ ጊዳና። 11 ጾሲ ኦናካ ሻኪ ማዴና። ዛሬ 10፡17

12 ካሴ ዎጋይ ኤቆንታ ዎዴ ናጋራ ኦꬂዳ ኣሳይ ዉሪካ ዎጋይ ባይንዳ ꬋያና፤ ዎጋይ ኤቂ ሲሚን ናጋራ ኦꬂዳይቲ ዎጋን ኦይኬቲዲ ፒርዴታና። 13 ኣይስ ጊኮ ጾሳ ኣቻን ጺሎ ጌቴቲዛይቲ ኤቂዳ ዎጋስ ኣዛዜቲዛይታፔ ኣቲን ዎጋ ሲስ ሲዪዛይታ ጻላ ጊዴቴና። 14 ዎጋይ ባይንዳ ኣይዛቤቲ ዎጋይ ዮቲዛይሳ ጮ ሜላ ሃኖቴꬃፌ ኤሪዲ ኦꬂሺን ኢስታስ ዎጋይ ባይንዳ ኣጊኮካ ኢስታስ ሜꬌቴꬃ ዎጋይ ዲዛ ጊሻስ ኢስቲ ባ ኦꬃናይሳ ኤሬቴስ። 15 ኢስታ ዎዚናይ ኢስታስ ማርካቲዛ ጊሻሲኔ ኢስታ ቆፋይ ኢስታ ሞቲዛ ጊሻስ ቃሴካ ኢስታ ማዲዛ ጊሻስ ዎጋይ ዮቲዛይ ኢስታ ዎዚናን ጻፌቲዳይሳ ኤሬቴስ። 16 ሄሲካ ታ ሚሺራቾ ቃላን ታማርሲዛ ማላ ጾሲ ኣሳ ዎዚናን ቆቴቲዳይሳ ኪርስቶሳ ባጋራ ፒርዲዛ ጋላሳን ቆንጪሳና።

17 ኔ ኔና ኣይሁዳ ኣስ ጊኮ ዎጋን ኣማኔታሳኔ ኔስ ጾሳራ ዲዛ ኢሲፌቴꬃን ጬቄታሳ። 18 ዎጋ ካሊዛ ጊሻስ ጾሳ ሼኔ ኤራዳ ኩሜꬅ ጊዲዛዝ ሻካ ኤሪዳ ጊዲኮ፥ 19 ኔ ቆቄታ ካሌꬂዛዴ፤ ꬉማን ዲዛይታስ ፖኦ ጊዲዳይሳ ኔ ኣማኔቲዳዴ ጊዲኮ 20 ዎጋፔ ኔ ዴሚዳ ኤራቴꬃኒኔ ቱማቴꬃን ሃንኮ ኤሮንታይታ ዞሪዛዴ፥ ጉꬃ ናይታ ታማርሲዛዴ ጊዲኮ፥ 21 ኔኒ ሃራታ ታማርሶ ኣጋዳ ኔ ሁኤስ ኣዛስ ታማርኪ? ኔኒ ሃራ ኣስ ካይሶቶፓ ጋ ሳባካሼ ኔስ ካይሶታይ? 22 ኔኒ ሃራ ኣሲ ላይማቶንታ ማላ ዮታሼ ኔስ ላይማታይ? ኔስ ኤቃ ኢጻሳ ሺን ጾሳ ኬꬃ ሚሻ ቦንቃይ? 23 ኔኒ ዎጋን ጬቄታሳ ሺን ዎጋ ኔ ባጋራ ኦꬆንታ ኣጋዳ ጾሳ ካዉሻይ? 24 ሄሲካ፥ «ኢንቴ ጋሶን ጾሳ ሱንꬂ ኣይዛቤታ ኣቻን ጫዬቴስ» ጌቴቲ ጻፌቲዳ ማላ ሃኒዴስ። ኢሳ 52፡5

25 ኔ ዎጋ ናጋ ፖሊዛዴ ጊዲኮ ቃጻራስ ጎኣይ ዴስ፤ ኔ ዎጋ ኦꬆንታዴ ጊዲኮ ቃሴ ኔ ቃጻራይ ጮ ሃዳ። 26 ቃጻሬቶንታ ዲሼ ዎጋይ ጊዛይሳ ፖሊኮ ቃጻሬቲዳዴራ ጊና ቆዴቴኔ? 27 ኔስ ጻፌቲዳ ዎጋይኔ ቃጻራይ ኔስ ዲኮ ዲዛ ዎጋ ኔ ናጎንታዴ ጊዲኮ ሃንኮ ቃጻሬቶንታ ዲሼ ዎጋስ ኣዛዜቲዳይ ኔ ቦላ ፒርዳና።

28 ኢሳዴይ ጮ ሜላ ሱንꬃስ ኣሳ ኣይፌን ታ ኣይሁዳ ኣስ ጊዳና ጊኮ ኢዚ ኣይሁዳ ኣስ ጊዴና፤ ቱማፔ ቃጼሬቴꬂ ጮ ካሬራ ኣሾ ኣይፌን ቤቲዛ ቃጻራ ጊዴና። 29 ጊዲኮካ ኢሲ ኣሲ ኣይሁዳ ኣስ ጊዳናስ ዳንዳይዛይ ኢዛስ ጋꬃ ባጋይ ኣይሁዳ ኣስ ጊዲሺና። ቃጻራይካ ቃጻራ ጊዲዛይ ጻፌቲዳ ዎጋ ጻላላ ጊዶንታ ኣያናን ዎዚናፔ ጊዲዳ ቃጻራ ጊዲኮኮ! ሄሳ ማላ ኣሲ ጋላታ ኣሳፔ ጊዶንታ ጾሳፌ ዴሜስ። ዛሬ 30፡6