3
1 ሂስቲኮ ኣይሁዳ ኣስ ጊዴꬃስ ኣዛ ጎኣይ ዲዜ? ቃጻራይ ኣይ ጎኢዜ? 2 ኣዋራካ ጊዲን ጎኣይ ዳሮ፤ ሃራፔ ኮይሮ ጾሳ ቃላይ ሃዳራ ኣይሁዳታስ ኢሜቲዴስ። 3 ኢስታፌ ኢሶታስ ኢሶታስ ኣማኖይ ባይንዳ ኣጊኮ ጾሳን ኣማኔቴꬅ ዲጊዜ? 4 ሙሌካ ዲጌና! ኣሲ ዉሪካ ዎርዳንቻ፥
«ኔኒ ኔ ቃላፔ
ዴንዲዳይሳን ቱማንቻ፤
ኔ ሞርኬ ፒርዳንካ ጾናሳ»
ጌቴቲ ጻፌቲዳ ማላ
ጾሲ ቃሴ ቱማንቻ። ማዛ 51፡4
5 ኑ ማካላ ኦሶይ ጾሳ ጺሎቴꬅ ቆንጬን ቤሲዛይሳ ጊዲኮ ሂስቲን ኑ ኣይ ጋኔ? ጮ ኣሳ ዎጋ ማላ ፓላሜታናስ ጾሲ ባ ሃንቆ ኑ ቦላ ኤሂዛይሲ ኑስ ቤሴና ጋኔዬ? ሄሳካ ታ ጊዛይ ኣሳꬆ ቆፋና። 6 ቱማፔ ሄሳꬆ ሃኔና፤ ሄሳꬆ ሃኒዛ ጊዲኮ ጾሲ ኣላሜ ቦላ ዎስቲ ፒርዳንዴ?
7 «ታ ዎርዶቴꬂ ጾሳ ቱማቴꬅ ቆንጪሲዛይሳን ኢዛ ቦንቾ ጌዴ ጉጂዛ ጊዲኮ ሂስቲን ሃኢ ጋካናስ ዎስቲ ታ ቦላ ናጋራንቻ ማላ ፒርዴቲዜ?» ጊዲ ፓላሜታና ኣሲ ዳና ዳንዳዬስ። 8 ሄሳ ጉሲ፥ «ሎኦይ ያና ማላ ኣኔ ኢታ ኦꬆስ» ጌቴስ ጊዲ ኢሲ ኢሲ ኣሳቲ ኑ ቦላ ዎሬሲዛይሳ ማላ። ሃይታ ኣሳታ ቦላ ጋኪዛ ፒርዳይ ቱሙ ፒርዳ።
ኣሲ ዉሪ ናጋራንቻ
9 ሂስቲን ኑ ኣይ ጊኖ? ኑኒ ኢስታፌ ኣꬊዞኒ? ሙሌካ ኣꬎኮ። ኣይሁዳታ ጊዲኮካ፥ ኣይዛቤታ ጊዲኮካ ዉሪካ ናጋራፔ ጋርሳ ባጋራ ዲዛ ጊሻስ ታ ዉርሳካ ካሴታዳ ኢስታስ ዮታዲስ።
10 «ጺሎይ ኦኒካ ዴና፤
ኢሳዴይካ ዴና።
11 ዩሺ ቆፒዛዴይ ባ፤
ጾስ ኮይዛይ ኢሳዴይካ ባ።
12 ዉሪካ ባሌቲዳኔ
ኢሲ ቦላ ጎኦንታይታ ጊዲዳ።
ሎኦ ኦꬂዛይ ኦኒካ ባ፤
ኢሳዴይካ ዴና።
13 ኢስታ ዶናይ ዶያ ዲዛ ዱፎ ማላ፤
ኢስታ ዶናይ ኡባ ዎዴ
ባሌꬆ ሃሳዬስ፤
ኢስታ ሜቴርሻይ
ሾሻ ማርዜራ ዴስ። ማዛ 5፡9፤ 140፡3
14 ኢስታ ዶናን ቃንጌꬂኔ
ጫሞ ሚሺ ኩሚዴስ። ማዛ 10፡7
15 ኢስታ ቶሆይ
ሱꬅ ጉሳናስ ኤሶቴስ።
16 ኢስታ ኦጌን ꬋዮይኔ
ላፋቴꬂ ዴስ።
17 ኢስቲ ሳሮቴꬃ ኦጌ ኤሬቴና።
18 ኢስታ ኣይፌሶን ጾሳስ ያሻቴꬂ ባ»
ጌቴቲ ጻፌቲዳ ማላ። ማዛ 36፡1
19 ሄሳ ጊሻስ ዶናይ ዉሪካ ጎርዴታና ማላ ዴሬይ ኩሜꬅ ጾሳስ ዛሮ ኢማና ማላ ዎጋይ ጊዛይ ዉሪካ ዎጋፔ ጊዶራ ዲዛይታስ ጊዲዳይሳ ኑ ኤሮስ። 20 ሄሳ ጊሻስ ዎጋይ ናጋራይ ኣዛኮ ኤሪሴስ ኣቲን ዎጋ ናጎን ኦኒካ ኢዛ ኣቻን ጺሎ ጌቴታናስ ዳንዳዬና።
ኣማኖን ቤቲዛ ጺሎቴꬅ
21 ሃኢ ቃሴ ካሴ ናቤቲ ኢዛስ ማርካቲዳይሲ ዎጋፔ ካሬራ ጊዲዳ ጾሳ ጺሎቴꬂ ቆንጪዴስ። 22 ሄሲ ጾሳ ጺሎቴꬂ ዬሱስ ኪርስቶሳ ኣማኖን ዱማቴꬂ ባይንዳ ቤቲዛ ጺሎቴꬃ።ጋላ 2፡16
23 ጋሶይካ ኣሲ ዉሪካ ናጋራ ኦꬂዴስ፤ ጾሳ ቦንቾይካ ኣሳ ናስ ፓጪዴስ። 24 ኣሳይ ዬሱስ ኪርስቶሲ ኣሳ ና ጊሻስ ኦꬂዳ ኪያቴꬃፌ ዴንዲዳይሳን ጮ ሜላ ጺሊዴስ። 25 ኢዛ ሱꬃን ጊዲዳ ኣማኖን ናጋራፔ ማሬታና ያርሾ ሂስቲዲ ጾሲ ዬሱሳ ሺሺዴስ፤ ኢዚ ሄሳ ኦꬂዳይ ካሴቲዲ ፖሌቲዳ ናጋራ ቃጻዮንታ ዳንዳያን ኣꬊዳ ባ ጺሎቴꬅ ቤሳናሳ። 26 ኢዚ ሄሳ ሃ ዎዴዛን ኦꬂዳይ ባ ጺሎቴꬃ፤ ሄሲካ ባ ባጋራ ጺሎ ጊዲዳ ዬሱስ ኪርስቶሳን ኣማኒዛዴ ጺሊሲዛይሳ ቤሳናሳ።
27 ሂስቲን ኑኒ ኢዛን ጬቄቲዛ ሚሺ ኣዚ ዲዜ? ኣይኮ ሚሻንካ ጬቄቶኮ፤ ኑ ጬቄታና ጋሶይካ ኣዜ? ዎጋ ናጊዛ ጊሼ? ጊዴና፤ ኣማኖና። 28 ኣይ ኣሲካ ኣማኖን ኣቲን ዎጋ ናጎን ኣቶንታይሳ ኑ ጌሺ ዮቶስ።
29 ጾሲ ኣይሁዳታስ ጻላ? ኣይዛቤታስካ ጾስ ጊዴኔ? ኤ ኣይዛቤታስካ ኢዚ ጾሳ። 30 ቃጻሬቲዳይሳ ኣማኖን ቃሴ ቃጻሬቶንታይሳካ ሄ ኣማኖንካ ጺሊሲዛይካ ኢዚ ኢሲ ጾሳ ጻላ። ዛሬ 6፡4፤ ጋላ 3፡20 31 ሂስቲን ሄሲ ሄሳ ጊዲኮ ኣማኖ ጋሶን ዎጋ ጎኣይ ባይንዳ ሚሽ ኦꬂኖ? ሙሌካ ሄሳꬆ ሃኔና፤ ዎጋ ኑ ሚንꬃና ኣቲን።