4
ኣማኖን ኣብራሃሜ ጺሌቴꬅ
1 ሄሳ ጊሻስ ቃሴ ኑ ኣብራሃሜይ ሃይሳፌ ኣይ ጎኣ ዴሚዴስ ጊኖ? 2 ኣብራሃሜይ ባ ኦሶን ጺሊዳኮ ኢዚ ጬቄታናዚ ኢዛስ ዴሲኮሺን፤ ኢዚ ጾሳ ሲንꬃን ጬቄታናስ ዳንዳዬና። 3 ጌሻ ማጻፋይ፥ «ኣብራሃሜይ ጾስ ኣማኒዴሲኔ ኢዛ ኣማኖይ ኢዛስ ጺሎቴꬃን ቆዴቲዴስ» ጌስ። ሜꬌ 15፡6፤ ጋላ 3፡6
4 ኢሳዴይ ኦሶ ኦꬂኮ ኢዚ ኤኪዛ ሚሻይ ኢዛስ ጮ ኪያቴꬅ ኢሜቲዛዝ ጊዶንታ ኢዛዴስ ኦሶ ዋጋ ጊዴስ። 5 ጊዶ ኣቲን ኦሶ ኦꬆንታ ናጋራንቻ ኣሲ ጺሎ ኬሲዛ ጾሳን ኣማኒዛዴስ ኢዛ ኣማኖይ ኢዛስ ጺሎቴꬃን ታይቤቴስ። 6 ዳዊቲካ ጺሎቴꬂ ኢዛዴስ ቆዴቲዛይ ሎኦ ኦሶን ጊዶንታ ኣሳ ጊሻስ፥
7 «ኢስታስ ኢስታ ባላ ኦሶይ
ኣቶ ጌቴቲዳይቲኔ
ናጋራፔ ማሬቲዳይቲ
ኣንጄቲዳይታ!
8 ኢዛ ናጋራ ጎዳይ
ሙሌካ ቆዶንታዴይ
ኢዚ ኣንጄቲዳይሳ!» ጊዴስ።
9 ሃ ኣንጆዚ ቃጻሬቲዳይታስ ጻላላዬ? ዎይኮ ቃጻሬቶንታይታሳራ? «ካሴ ኮይሮ ኑ ኣዋ ኣብራሃሜ ኣማኖይ ኢዛስ ጺሎቴꬃን ቆዴቲዴስ» ጊዶስ።
10 ሂስቲን ዋኒ ኢዛስ ሄሳꬆ ቆዴቲዴ? ኢዚ ቃጻሬቲዳፔ ጉዬ? ዎይኮ ቃጻሬታናፔ ካሴ? ኢዛስ ጺሎቴꬃን ቆዴቲዳይ ኢዚ ቃጻሬታናፔ ሲንꬃና። 11 ኢዚ ካሴ ቃጻሬታናፔ ካሴ ዴሚዳ ጺሎቴꬃይ ቃጻራስ ማላታ ጊዳና ማላ ጺሎቴꬃስ ማታሜ ኤኪዴስ። ሄሳ ጊሻስ ቃጻሬቶንታ ኣማኒዛይታስ ጺሎቴꬃን ቆዴታና ማላ ኡባታስ ኢዚ ኣዋ። ሜꬌ 17፡10 12 ኢዚ ቃጻሬቲዳይታስካ ኣዋ፤ ቃጻሬቲዳይታስ ጻላላ ጊዶንታ ኑ ኣዋ ኣብራሃሜይ ካሴ ቃጻሬታናፔ ሲንꬄ ኢዛስ ዲዛ ኣማኖ ጌዶ ካሊዛይታስ ኡባሳ።
ኣማኒዛ ኣሳስ ኢሜቲዳ ኡፋይስ
13 ኢዚ ኣላሜ ላቲዛዴ ጊዳና ማላ ኣብራሃሜይኔ ኢዛ ዜሬꬃቲ ኡፋይሳ ቃላ ኤኪዳይ ዎጋ ባጋራ ጊዶንታ ኣማኖን ጊዲዳ ጺሎቴꬃና።ሜꬌ 17፡4-6፤ 22፡17-18፤ ጋላ 3፡29 14 ዎጋ ናጊዛይቲ ላቲዛይታ ጊዲኮ ኣማኖስ ጎኣይ ዴና፤ ሂዶታይካ ጮ ሃዳ ጊዳናሺን፤ 15 ዎጋይ ሃንቆ ካሌꬄስ፤ ዎጋይ ባይንዳሶን ዎጋ ሜንꬆይ ዴና።
16 ሄሳ ጊሻስ ሂዶታይ ኣማኖን ዪዴስ፤ ሄሲካ ኢዛ ሂዶታይ ኢዛ ኪያቴꬃን ጊዳና ማላኔ ኣብራሃሜ ዜሬꬅ ኡባስ ኣማኔቲዛይሳ ጊዳና ማላ ሃኒዴስ፤ ሄሲካ ዎጋን ኢዛይታ ጊዲዳይታስ ጻላላ ጊዶንታ ኣማኖን ኣብራሃሜ ናይታ ጊዲዳይታስ ኡባታሳ፤ ኢዚካ ኑስ ኡባሲካ ኣዋ። ጋላ 3፡7 17 ሄሲካ፥ «ታ ኔና ዳሮ ዴሬ ኣዋ ኦꬃዲስ» ጌቴቲ ጻፌቲዳ ማላ ሃኒዴስ፤ ኢዚካ ሃይቂዳይታስ ዴኦ ኢሚዛዴን፥ ባይንዳይሳ ቃሴ ዲዛ ማላ ኦꬂዛዴን ኣማኒዳ ጾሳ ሲንꬃን ኢዚ ኑስ ኣዋ። ሜꬌ 17፡5
18 ካሴ ኢዛስ፥ «ኔ ዜሬꬂ ሄሳꬆ ሃናና» ጌቴቲዳ ማላ ሂዶታ ኦꬃናስ ዳንዳዬቶንታ ሚሻን ኣብራሃሜይ ጾሲ ሃናና ጊዳይሳ ኣማኒዲ ዳሮ ዴሬ ኣዋ ጊዲዴስ። ሜꬌ 15፡5 19 ኣብራሃሜስ ዬሌቲን 100 ላይꬅ ጊዲሺን ኣብራሃሜይ ባ ኣሳቴꬃይ ሃይቄꬃ ማላ ጊዲዳይሳኔ ሳራስ ዬሎ ዎዴይ ኣꬊ ቢዳይሳ ኤሪሼካ ኣማኖን ሌፒቤና። ሜꬌ 17፡17
20 ጌዴ ጉጂዲ ኣማኖን ሚኒዲ ጾሳስ ቦንቾ ኢሚዴስ ኣቲን ጾሲ ጊዳ ቃላ ሲꬊቤና። 21 ጾሲ ኢዛስ ኢሚዳ ሂዶታይ ፖሌታናይሳ ኩሜꬃ ዎዚናፔ ኣማኒዴስ። 22 ሄሳ ጊሻስ ኢዛስ ጺሎቴꬃን ቆዴቲዴስ። 23 «ኢዛስ ጺሎቴꬃን ቆዴቲዴስ» ጊዛ ቃላይ ጻፌቲዳይ ኢዛስ ጻላላ ጊዴና። 24 ጊዶ ኣቲን ጾሲ ኑ ጺሎቴꬃ ኢዛ ባጋራ ታይቢዛ ኑ ጎዳ ዬሱሳ ሃይቆፔ ዴንꬂዳይሳን ኣማኒዛ ኑሳራኮ። 25 ኢዚ ኑ ናጋራ ጊሻስ ሃይቃናስ ኣꬊ ኢሜቲዴስ፤ ኢዚ ኑና ጺሊሳናስ ሃይቆፔ ዴንዲዴስ። ኢሳ 53፡4-5