1 ኪንኪራኦሴ ዎሳ ኬꬃን ኦꬂዛ ኣማኔቲዳ ሚቼዮ ፔቤኖ ኢንቴስ ሃዳራ ጋይስ። 2 ኣማኒዛ ኣሳስ ቤሲዛ ሞኮ ኢንቴ ኢዞ ጎዳ ሱንꬃን ሞኪ ኤካና ማላኔ ኢዛ ኢንቴፌ ኮይዛ ኣይ ሚሻንካ ኢንቴ ኢዞ ማዳና ማላ ታ ኢንቴና ቆፍሳይስ።

3 ካሴ ታናራ ጎዳ ዬሱስ ኪርስቶሳስ ኢሲፌ ኦꬂዳ ጲርሲቂላሲኔ ኣቂላስ ታ ሳሮካ ጋꬂቴ።ሃዋ 18፡2 4 ኢስቲ ታ ጊሻስ ሃይቃና ጋካናስ ባና ኣꬂ ኢሚዳ፤ ታና ጻላላ ጊዶንታ ኣይዛቤታፔ ኣማኒዳይቲካ ኢስታ ጋላቴቴስ። 5 ኢስታ ኬꬃን ዲዛ ኣማኒዛ ኣሳካ ሳሮ ጊቴ፤ ኢሲያፔ ኮይሮ ኪርስቶሳን ኣማኒዳ ታ ሲቆዛ ኤጴኔጾሴ ሳሮ ጊቴ። 6 ኢንቴስ ዳሮ ዳቡርዳሮ ማራሞ ሳሮ ጊቴ። 7 ታናራ ኢሲፌ ቃሼቲዳ ኣንዲራቆኔኔ ዩኒያሴ *ዩኒያሴ፡ ዩኒያሴ ኢሲ ኢሲ ጌሻ ማጻፋቲ ዮሊያ ጌቴስ። ሳሮ ጊቴ፤ ሄይታንቲ ሃዋሬታ ጋርሳን ሎኦ ሱንꬃራ ዲዛይታኔ ኪርስቶሳ ታፔ ካሴ ኣማኒዳይታ።

8 ታኒ ጎዳ ባጋራ ዳሮ ሲቂዛ ጲልያጾኔ ሳሮ ጊቴ። 9 ኪርስቶሳ ኦሶ ታናራ ኢሲፌ ኦꬂዛ ኢሮባኖኔኔ ታ ሲቂዛ ሴንጻኬካ ሳሮ ጊቴ። 10 ኪርስቶሳን ኢዛ ኣማኖይ ፓጬቲዲ ጋላቴቲዳ ኤጼሴኔሴስ ታ ሳሮካ ጋꬂቴ፤ ኣርሲጻባሎሶ ኣሳሲካ ታ ሳሮካ ጋꬂቴ። 11 ታ ዳቦ ሄሮዲያና ሳሮ ጊቴ፤ ጎዳን ዲዛ ኒሪቃሶሶ ኣሳ ሳሮ ጊቴ።

12 ጎዳን ጊዲዲ ሚኖቴꬃን ኦꬂዛ ማጫሳታ ቲሮፊሞኖኔ ጺሮፊሞኖ ሳሮ ጊቴ፤ ጎዳስ ኦሶን ዳሮ ዳቡርዳሪስ ኪርስቶሳን ታኒ ኢዞ ሲቂዛ ጻርሲዲስ ታ ሳሮካ ጋꬂቴ። 13 ጎዳን ዶሬቲዳ ኤሩፎኔስ፥ ታሲኔ ኢዛስ ኣዮ ጊዲዳሪስ ታ ሳሮካ ዮቲቴ። ማር 15፡21 14 ኣስቄሮኔስ፥ ኣፊላሶኔስ፥ ሄሮሜኔስ፥ ጳጺሮባኔስ፥ ሄርማኔሲኔ ኢስታራ ዲዛ ኢሻታ ኡባታስ ታ ሳሮካ ጋꬂቴ። 15 ፊሌጎኔስ፥ ዩሊያስ፥ ኔሪያሲኔ ኢዛ ሚቼይስ ሄሳꬆካ ኣልጾኔስ፥ ኢስታራ ዲዛ ኣማኒዛይታሲካ ታ ሳሮካ ጋꬂቴ።

16 ኢሶይ ኢሳ ዬሪ ዬሪ ኤኪዲ ሳሮኬቲቴ፤ ኪርስቶሳን ኣማኒዛ ዎሳ ኬꬃ ኣሳይ ዉሪካ ኢንቴና ሳሮ ጌስ።

17 ታ ኢሻቶ! ኣሳ ጋርሳን ሻኬቴꬅ ሜꬊዛይታፔኔ ኢንቴ ታማርዳ ቲሚርታ ኤኮንታ ኢጾን ኢንቴስ ꬉጴ ጊዲዛ ኣሳታፔ ኢንቴ ናጌቲቴ። 18 ሄይታንታ ማላ ኣሳቲ ዬሱስ ኪርስቶሳስ ኦꬂዛይታ ጊዶንታ ባ ቃንꬃ ካꬃ ጊሻስ ኦꬂዛይታ፤ ሹጎ ቃላራ ሃሳያኒኔ ዎዚና ኪያ ኣሳታ ባሌꬄቴስ። 19 ኢንቴ ሚሺራቾ ቃላስ ኣዛዜቲዛይታ ጊዲዳይሳ ኣሲ ዉሪ ሲዪዴስ፤ ሄሲካ ታና ዳሮ ኡፋይሲዴስ፤ ጊዲኮካ ኢንቴ ሎኦ ሃኖስ ጪንጫታ ቃሴ ኢታ ኦሶስ ኤያታ ጊዳና ማላ ታ ኮያይስ። 20 ሳሮቴꬃ ጎዳይ ጻላኤ ኤሶን ኢንቴ ቶሆ ጋርስ ኣꬂ ዲንጬሬꬃና።

ጎዳ ዬሱስ ኪርስቶሳ ኪያቴꬂ ኢንቴናራ ጊዶ።

21 ታናራ ኢሲፌ ኦꬂዛ ጺምቶሲ ቃሴካ ታ ዳቦ ሉቂዮሲ፥ ኢያሶኔይኔ ሱሲጴጺሮሲ ኢንቴና ሳሮ ሳሮ ጌቴስ። ሃዋ 16፡1

22 ሃይሳ ኪታ ጻፊዳይ ታኒ ጼሪጺዮሲ ኢንቴና ጎዳ ሱንꬃን ሳሮ ጋይስ።

23 ታኒኔ ሃይሳን ዲዛ ኩሜꬃ ዎሳ ኬꬃ ኣሳይ ሞኪ ኤኪዛ ጋዪዮሲካ ኢንቴና ሳሮ ጌስ፤ ካታማ ሚሻ ኦይኪዛ ኤሪስጾሲኔ ኑ ኢሻ ቆኣጺሮሲ ኢንቴና ሳሮ ጌቴስ። ሃዋ 19፡29፤ 1ቆሮ 1፡14፤ 2ጺም 4፡20 24 ጎዳ ዬሱስ ኪርስቶሳ ኪያቴꬂ ኢንቴናራ ኡባታራ ጊዶ። ኣሚን።

25 ታኒ ዮቲዛ ሚሺራቾ ቃላይ ዬሱስ ኪርስቶሳ ጊሻስ ዮቴቲዛ ኪታይኔ ቤኒ ዎዴፔ ዶሚዲ ቆታን ጋምኢዲ ሃኢ ቃሴ ቆንጪዳ ቱማ ጹራ ባጋራ ኢዚ ኢንቴና ኣማኖን ኤሳናስ ዳንዳዬስ። 26 ሃኢ ቃሴ ሃይሲ ቱማይ ቆንጪዴስ፤ ሜርና ጾሳ ኣዛዞን ዉሪካ ኣማኒዲ ኣዛዜታና ማላ ናቤታ ማጻፋ ባጋራ ዴሬቲ ዉሪካ ኢዛ ኤራና ማላ ሃኒዴስ።

27 ኢዚ ጻላላ ኤራ ጊዲዳ ጎዳስ ዬሱስ ኪርስቶሳ ባጋራ ሜርና ቦንቾይ ኢዛስ ጊዶ! ኣሚን።