ጳዉሎሲ
ቆሮንቶሴ ኣሳስ
ጻፊዳ ኮይሮ ኪታ
ጊዶ ቆፋ
ጳዉሎሲ ቆሮንቶሴ ኣሳስ ጻፊዳ ኮይሮ ኪታይ ጻፌቲዳይ ኢዚ ካሴ ቆሮንቶሴን ኤሲዳ ዎሳ ኬꬃ ጊዶን ዲዛ ኣማኖን ዱሳ ጊሻሲኔ ኣማኖ ጊሻስ ዴንዲዳ ሜቶታ ቢርሻናስ ጊዲኮ። ሄ ዎዴ ቆሮንቶሴ ካታማያ ኩሜꬃ ኣላሜን ኤሬቲዳ ጊሪኬ ኣሳ ካታማ ጊዶይሳፌካ ቦላራ ኣካያ ጌቴቲዛ ኦሮሜ ካዎይ ሃሪዛ ዋና ካታማ። ሂና ሄ ካታማያ ኢዚን ዳሮ ጊታ ዛልኤይ ዛልኤቲዛሶ፤ ሃንኮ ዴሬ ዎጋ ባጋራ ጊዲኮ ዳሮ ዲቻ ቦላ ዳዉሲኔ ኢታ ሃኖኒኔ ዱማ ዱማ ሚሼ ኣማኖን ዳሮ ኤሬቲዳሮ።
ሃዋሬይ ሃራፔካ ሎኤꬂ ጼሊዳይ ዎሳ ኬꬃይ ጊዶን ዲዛ ሻኬቴꬃ ጊሻስ፥ ኢስታ ኢታ ኦሶ ጊሻስ፥ ላይማ ጊሻሲኔ ኤኮኔ ጌሎ ጊሻስ፥ ዎሳ ኬꬃ ጊሻስ፥ ጺሎ ኣያና ኢሞታታ ጊሻሲኔ ሃይቆፔ ዴንꬃ ጊሻሳ፤ ሄሳꬆካ ሃዋሬይ ሚሺራቾ ቃላዛ ሃይታ ሃ ኦይሻታ ቦላ ኢስታስ ሎኤꬂ ሚንꬂ ዛሮ ኢሜስ።
«ሲቆይ» ጾሲ ባ ኣሳስ ኢሚዳ ኢሞታ ኡባፌ ኣꬌꬅ ጊዲዳይሳ ቆንጪሲዛይ ታማኔ ሄꬓንꬆ ሼምፖይ ሃይሳ ሃ ማጻፋ ጊዶን ዳሮ ኤሬቲዳ ኪፊሌ ጊዲ ቆፔቴስ።
ሃ ማጻፋይ ኦይኪዳ ኩሜꬃ ቆፋ
ጌሎሶ 1፡1-9
ኣማኒዛይታ ጋርሳን ሜꬌቲዳ ሻኬቴꬅ 1፡10—4፡21
ኢታ ኦሶኔ ሶ ኣሳ ዱስ 5፡1—7፡40
ኣማኒዛይታኔ ኣማኖንታ ኣሳ 8፡1—11፡1
ኣማኒዛይታ ዱሲኔ ጾስ ጎይኖ ዎጋ 11፡2—14፡40
ሃይቆፔ ኪርስቶሳ ዴንꬂኔ ኣማኒዛይታ ዴንꬅ 15፡1-58
ዩሁዳን ዋዬ ቦላ ዲዛ ኣማኒዛይታ ማዳናስ ኬሶ ሚሽ ሺሾ 16፡1-4
ኩሻ ቆፋ 16፡5-24
1
1 ጾሳ ሼኔን ዬሱስ ኪርስቶሳስ ኪቴታናስ ጼይጌቲዳ ጳዉሎሳፔኔ ኑ ኢሻ ሶስቲኔሴፔ፥
2 ቆሮንቶሴን ዲዛ ጾሳ ዎሳ ኬꬃስ፥ ጎዳ ዬሱስ ኪርስቶሳስ ዱማቲዳይታሲኔ ኢስታሳራ ኑሳራ ጎዳ ጊዲዳ ጎዳ ዬሱስ ኪርስቶሳ ሱንꬃ ኣዋንካ ጼይጊዛ ኣማኒዛይታራ ጊዳናስ ጼይጌቲዳ ኣሳ ኡባስ፥ 3 ኑ ኣዋ ጾሳፌኔ ጎዳ ዬሱስ ኪርስቶሳፔ ኪያቴꬂኔ ሳሮይ ኢንቴስ ጊዶ።
ጾሳስ ጋላታ
4 ጎዳ ዬሱስ ኪርስቶሳ ባጋራ ኢንቴስ ኢሜቲዳ ጾሳ ኪያቴꬃ ጊሻስ ኡባ ዎዴ ኢንቴ ጊሻሲካ ታኒ ጾሳ ጋላታይስ። 5 ጋሶይካ ኣይ ዮኦንካ፥ ሄሲካ ሃሳያን ጊዲን ኤራቴꬅ ኡባን ኢንቴ ዱሬቲዴታ። 6 ኪርስቶሳ ጊሻስ ኑ ኢንቴስ ማርካቲዳይሲ ኢንቴ ኣቻን ሚኒዴስ። 7 ሄሳ ጊሻስ ኢንቴ ዬሱስ ኪርስቶሲ ቆንጫና ጋላስ ናጊሺን ኣያና ኢሞታታፔ ኣይኮይካ ኢንቴስ ፓጬና። 8 ጎዳ ዬሱስ ኪርስቶሲ ናምኣንꬆ ያና ጋላሳን ኢንቴ ኢንቴ ቦላ ቦሬይ ባይንዳ ቤታና ማላ ዉርሴꬅ ጋካናስ ኢዚ ኢንቴና ሎኤꬂ ናጋና። 9 ኢዚ ባ ናዛ ኑ ጎዳ ዬሱስ ኪርስቶሳ ኢሲፌቴꬃኮ ኢንቴና ጼይጊዳ ጾሲ ኢዚ ኣማኔቲዳ ጾሳ።
ዎሳ ኬꬃን ሜꬌቲዳ ሻኬቴꬅ
10 ታ ኢሻቶ! ኢንቴ ጋርሳን ሻኬቴꬂ ዶንታ ማላ ኢንቴስ ኢሲ ዎዚናይኔ ኢሲ ቆፋይ ዳና ማላኔ ኢንቴ ኢንቴ ጋርሳን ኢሲኖ ጊዳና ማላ ጎዳ ዬሱስ ኪርስቶሳ ሱንꬃን ታ ኢንቴና ዎሳይስ። 11 ታ ኢሻቶ! ኢንቴ ጋርሳን ፓላማይ ዲዛይሳ ታ ቃሎኤ ሶ ኣሳፔ ሲያዲስ። 12 ዮኦዚካ ሃይሳ ማላ፤ ኢንቴ ጋርሳን ኢሲ ኢሲ ኣሳቲ፥ «ታ ጳዉሎሳ ባጋ» ጌቴስ፤ ባጋይ ቃሴ፥ «ታ ኣጲሎሳ ባጋ» ጌቴስ፤ ባጋይ ቃሴ፥ «ታ ኬፋ ባጋ» ጊሺን ሃራይ ቃሴ፥ «ታ ኪርስቶሳ ባጋ» ጌቴስ። *ኬፋ ጉሲ ጴጽሮሳ ጉሳ። ሃዋ 18፡24 13 ሂስቲኮ ኪርስቶሲ ሻኬቲ ዎꬊዴ? ኢንቴ ጊሻስ ጳዉሎሲ ካቄቲዴ? ዎይኮ ጳዉሎሳ ሱንꬃን ጻማቄቲዴቲ? 14 ኢንቴ ጊዶፌ ቄሪስጶሳፔኔ ጋዪዮሳፔ ኣቲን ሃራ ኦናካ ታ ጻማቆንታ ጊሻስ ጾሳ ጋላታይስ። ሃዋ 18፡8፤ 19፡29፤ ኦሮ 16፡23 15 ሄሳ ጊሻስ ኦኒካ፥ «ታ ጳዉሎሳ ሱንꬃን ጻማቄታዲስ» ጋና ኣሲ ዴና። 16 ቱሙካ ኢስቲፋኖሴ ሶ ኣሳ ጻማቃዲስ፤ ሄይታፔ ሃራ ታ ጻማቂዳኮ ታ ኤሪዛዴይ ዴና። 1ቆሮ 16፡15 17 ኪርስቶሲ ታና ኪቲዳይ ሚሺራቾ ቃላ ዮታናስ ኣቲን ጻማቃናስ ጊዴና፤ ኪርስቶሳ ማስቃሌይ ሃዳ ጊዶንታ ማላ ታኒ ኣሳፔ ጊዲዳ ጪንጫቴꬃን ሳባኪኬ።
ጾሳ ዎልቃኔ ኤራቴꬅ ጊዲዳ ኪርስቶሳ
18 ማስቃሌዛ ኪታይ ꬋያና ዲዛይታስ ኤያቴꬃ፤ ጊዶ ኣቲን ኣታና ዲዛ ኑስ ጊዲኮ ጾሳ ዎልቃ። 19 «ጪንጫታ ጪንጫቴꬅ ታ ኢስታፌ ꬋይሳና፤ ኤራንቻታ ኤራቴꬃ ታ ሃዳ ኦꬃና» ጌቴቲ ጌሻ ማጻፋን ጻፌቲዴስ። ኢሳ 29፡14
20 ጪንጫይ ኣዋን ዲዜ? ታማርዳ ኤራይ ኣዋን ዲዜ? ሃይሳ ዎዴዛ ፒልጊ ኤሪዛይ ኣዋን ዲዜ? ጾሲ ሃ ኣላሜዛ ኤራቴꬅ ኤያቴꬅ ኦꬂቤኔ?ኢዮ 12፡17፤ ኢሳ 19፡12፤ 33፡18፤ 44፡25 21 ጾሳ ኤራቴꬃፌ ዴንዲዳይሳን ኣላሜይ ባ ኤራቴꬃን ጾስ ኤሮይ ጾኒን ሳባኮ ኤያቴꬃን ኣማኒዛይታ ኣሻናስ ጾሳ ሼኔ ጊዲዴስ። 22 ኣይ ዎዴካ ኣይሁዳቲ ዱማ ማላታ ኮዬቴስ፤ ጊሪኬ ኣሳቲ ቃሴ ኤራቴꬅ ኮዬቴስ። 23 ኑኒ ጊዲኮ ካቄቲዳ ኪርስቶሳ ሳባኮስ፤ ሄሲካ ኣይሁዳታስ ꬉጴ፤ ኣይዛቤታስ ቃሴ ኤያቴꬃ። 24 ጾሲ ጼይጊዳይታስ ኢስቲ ኣይሁዳታ ጊዲን ዎይኮ ጊሪኬ ዴሬ ኣስ ጊዲኮካ ኪርስቶሲ ጾሳ ዎልቃኔ ጾሳ ኤራቴꬃ። 25 ጋሶይካ ኣሳ ኤራፔ ጾሳ ኤያቴꬂ ኣꬊዳ ኤራቴꬃ፤ ኣሳ ሚኖቴꬃፌ ጾሳ ላፋቴꬂ ኣꬌስ።
26 ታ ኢሻቶ! ካሴ ኢንቴ ጼይጌቲዛ ዎዴ ኢንቴ ኣይ ማላ ኣሳኮ ኣኔ ቆፒቴ፤ ኣሳ ቆፋ ማላ ጊዲኮ ኢንቴፌ ዳሪዛይቲ ኤራታ ጊዴኬታ። ኢንቴፌ ዳሮቲ ዎልቃይ ባይንዳይታ፤ ዳሮቲካ ጊታ ኬꬃ ኣሳፔ ዬሌቲቤኬታ። 27 ጊዶ ኣቲን ጾሲ ኤራታ ዬላቻናስ ዴራፔ ኤያታ ዶሪዴስ፤ ጾሲ ሚኖታ ዬላቻናስ ኣላሜዛፔ ዳቡራንቻታ ዶሪዴስ። 28 ጾሲ ሃንኮ ኣማኖንታ ኣሳ ኣቻን ዴቴስ ጌቴቲ ኤሬቲዛ ሚሻታ ባይንዳ ሚሻ ማላ ኦꬃና ሃይሳ ኣላሜዛን ሌቄቲዳይታኔ ካዉዪዳይታ ላፋታ ዶሪዴስ። 29 ሄሳካ ኢዚ ኦꬂዳይ ኦኒካ ኢዛ ሲንꬃን ጬቄቶንታ ማላሳ። 30 ኢንቴና ቃሴ ጾሲ ዬሱስ ኪርስቶሳራ ኢሲፌቴꬂ ዳና ማላ ኦꬂዴስ፤ ሄሳ ጊሻስ ጾሲ ዬሱስ ኪርስቶሳ ኑ ኤራቴꬅ፥ ኑ ጺሎቴꬅ፥ ኑ ጌሻቴꬂኔ ኑና ኣሺዛዴ ጊዳና ማላ ኦꬂዴስ። 31 ሄሳ ጊሻስ ካሴ ጌሻ ማጻፋን ጻፌቲዳ ማላ፥ «ጬቄቲዛ ኣሲ ጎዳን ጬቄቶ።»