3
ጌላኦያ
1 «ኦማርስ ኩሜꬅ ታ ሂጻን ኢቻዳ፥
ታ ሲቆዛ ዴማናስ ኣሞታዲስ፤
ሚንꬃዳካ ኮያዲስ፤
ጊዶ ኣቲን ዴማናስ
ዳንዳያቤኬ።
2 ካታማ ጊዶን ዲዛ ኦጌታኒኔ
ዱቡሻታ ኡባን ዩያዲስ፤
ታ ሲቆዛ ዴማናስ ኣሞታዲስ፤
ሚንꬃዳካ ኮያዲስ፤
ጊዶ ኣቲን
ዴማናስ ዳንዳያቤኬ።
3 ካታማ ዩዪ ናጊዛይቲ
ታና ዴሚዳ፤
ታኒ ኢስታስ፥
‹ታ ሲቆዛ ቤዪዴቲ?›
ጋዳ ኦይቻዲስ።
4 ኢስታፌ ጉꬅ ኣꬋ ባዳ
ታ ሲቆዛ ዴማዲስ፤
ኢዚ ታፔ ኬሲ ኤኮንታ ማላ
ሚንꬃዳ ኦይካዲስ፤
ታ ኣዬይ ኬꬅ ኤካ ኤፋዲስ፤
ታ ዬሌቲዳ ኪፊሌ ጌልꬃዲስ።
5 ኢንቴኖ ዬሩሳላሜ ጌላኦቶ!
ሲቆዚ ባስ ዶሲዲ
ዴንዳና ጋካናስ፥
ኢዛ ኢንቴ ቤጎꬆንታ ማላ፥
ታኒ ኢንቴና ጌኔሳታኒኔ
ባዞ ዉሻታን ኣማታይስ» ጋዱስ።
ላጌቲ
6 «ካርቤፌ፥ ኤጻኔፔኔ
ዛልኣንቻታ
ሳዎፔ ጊጌቲዳ ሺቶ ማላ
ሳዎ ቱኑ ጋሼኔ
ጩዋ ማላ ቱሉ ጋሼ
ባዞራ ዪዛራ
ሃና ኢዛ ኦኔ?
7 ሄኮ ቤኢቴ፥ ሶሎሞኔ
ፓራ-ጋሬያ ዩሳን ዳዉስ፤
ኢስራኤሌፔ ዶሬቲዳ
ኡሱፑን ታሙ ኦላ ኣሳቲ
ኢዞ ኣዣቢዳ።
8 ኢስቲ ኡባይካ
ማሻ ኦይꬅ ሜዜቲዳ፥
ኦላ ኤሪዛይታኔ
ኦማርስ ዪዛ ሜቶ ኤቄታናስ
ኢሶይ ኢሶይ
ማሻ ጊጺዳ ማላ ኣቄቴስ።
9 ካዎ ሶሎሞኔይ
ፓራ-ጋሬ ጊዶን
ኡቲዛ ኣራታይ
ሊባኖሴ ሚꬃፌ ኦሴቲዴስ።
10 ኢዛ ኣራታ ቱሳቲ
ቢራን ቲዬቲዳ፤
ዜምፖዚ ዎርቃን ኣሌቄቲዴስ፤
ኡቲዛሶዚ ኦቻ ቴራ ሚሳቲዛ
ቃጪናፔ ኦሴቲዴስ፤
ጊዶዛ ዬሩሳላሜ
ጌላኦቲ ሲቆስ
ዳዲዳ ኣፋላን ኣሌቂሲዳ» ጊዳ።
ጌላኦያ
11 «ኢንቴኖ ጺዮኔ ጌላኦቶ!
ኢዚ ኬሂ ኡፋዬቲዳ
ኢዛ ቡላቻ ጋላስ
ኢዛ ኣያ ኢዛ ሁኤን ዎꬂዳ
ካላቻ ጎጺ
ኡቲዳይሳ ቤኣናስ
ካዎ ሶሎሞኔኮ
ሃ ዪቴ» ጋዱስ።