ኔኒ ኣይ ማላ ጊጋ!

ኔ ኣይፌቲ ኔ ኣይፌሶ ካሚዛ

ቁራጬ ጊዶራ ጼሊዛ ዎዴ

ሃራጴ ማላ ሎኤቴስ፤

ኔ ቢናናይ ጋላኣዴ

ዙማራ ዱጌ

ዎꬊዛ ዴይሻ

ዉዴ ሚሳቴስ።

ሜንቴ ሜንቴ ዬሊዛ

ኢስኬይ ዲሬቲን

ሜጬቲ ኬዚዛ

ቦꬃ ዶርሳ ዉዴታ ማላ

ኔ ኣቻቲ ታና ኡፋይሴቴስ።

ዞኦ ቃጪና ማላ ሎኤቴስ፤

ኔ ሃሳይዛ ዎዴ

ኬሂ ኡፋይሴቴስ፤

ኔ ሻጋላቲ ኣይፌሶ ካሚዛ

ቁራጬ ጊዶራ ጼሊዛ ዎዴ

ኦሮማኔ ናምኡ ኬሲ

ጳልቂዳ ሚሳቴቴስ።

ቆዴቲዛ ጎንዳሌቲ፥

ኦላ ማሳራቲ ኢዛ ቦላ

ካቄቲ ቤቲዛኔ

ኦላ ሚጻ ጊዳናስ

ኦሴቲዳ ዳዊቴ ጊምቤ ሚሳቴስ፤

ሱፌ ጪሻታ ጊዶን

ሚዛ ጌኔሳ

ላቃታ ሚሳቴቴስ።

ꬉማይ ኣꬋና ጋካናስ

ካርቤይ ዲዛ ዙማ ቦላኔ

ኤጻኔይ ኢዛ ዙምቡላ ቦላ

ባዳ ሼምፓና።

ኔ ኣሳቴꬃይ ኩሜꬅ ሎኦ፤

ኔ ቦላ ኣይኮ ዎሶይካ ባዋ።

ሃ ዱጌ ዎꬋ፤

ጋሞይኔ ማሄይ ዲዛሶ

ኣማና ዙማፔ፥

ሳኒሬ ዙማፔኔ

ሄርሞኔ ዙማፔ ዎꬋዳ

ሃ ያ።

ታ ሚሺራዬ!

ኔ ጼሊዛ ጼሎይኔ

ኔ ቆꬌን ዲዛ ኣሌቆይ

ታ ዎዚና ኤኪዴስ።

ታ ሚሺራዬ!

ኔ ሲቆይ ታና ኣይ ማላ ኡፋይሲዜ!

ኔ ሲቆይ ዎይኔ ኡሻፌ

ኣꬊ ኡፋይሴስ፤

ኔ ሺቶይ ኡባፌካ

ኣꬊዲ ሳዌስ።

ኔ ሜቴርሻራ

ኤሳ ኢሊሎይ ጾኬስ።

ኔ ዶናፔ ኤሲኔ

ማꬂ ፑልቴስ፤

ኔ ማይኦ ሳዎይ

ሊባኖሴ ሺቶ ማላ ሳዌስ።

ታ ሚሺራዬ!

ኔ ታስ ዲርሳ ጊዶን ናጌቲዛ

ኣታኪልቴ ማላ፥

ኢዛስ ዩሾይ ሹሬቲዳ

ፑልቶ ሃꬃ ማላኔ

ኣሲ ጋኮንታ ፒሳ ሃꬃ ማላ።

ማልኢዛ ሚꬃ ኣይፌቲ ኩሚዳ፤

ሄይቲካ ኦሮማኔ

ኣታኪልቴሶሆታ ማላ።

ሳዎ ማታይኔ ቃራፋይ፥

ቃሴካ ኤጻኔ ማላ ሳዊዛ

ዱማ ዱማ

ኣታኪልቴቲ ዴቴስ፤

ሃራይ ቃሴ ካርቤይ፥

ጎዳሬ ኡꬃ ጪሻይኔ

ዱማ ዱማ

ሳዎ ኣታኪልቴቲ ሞኬቴስ።

ፑልቶ ሃꬃ ማላ፤

ዴኦ ሃꬂ ኬዚዛ ኦላ ማላ፤

ሊባኖሴ ዙማ ጋርሳፌ

ጎጊዛ ሻፋ

ሃꬃ ማላ» ጊዴስ።

ዱጌሃ ባጋ ጫርኮዞ! ሃ ያ!

ታ ኣታኪልቴ ቦላ ጫርካ!

ሄራዚ ኡባይ ሳዎ ቱኑ ጎ።

ታ ሲቆዚ

ባ ኣታኪልቴ ጊዶ ዮ፤

ዶሬቲዳ ሚꬃ

ኣይፌታካ ሞ» ጋዱስ።