Amoxe Tinbite
Giddo Qofa
Amoxes tinbite haasaya erateththi deenna; izi tinbite haasayo timirte tamaarbeenna. [7:14] Gido attiin izi pude haan diza kawoteththa garsan diza derezas izi kiita gaththana mala kiitettida wode Amoxey Yuhudan diza Tequhe geetettiza kase izi diza gutayo yeggidi bides. Izi heeppeka dendidi Isra7eele asaas erettida goynoso gidida gede Beetele katama bides. Hayssa ha maxaafazan koyro bolla Amoxey dereza Amatees; hessafe Isra7eele asa harappeka lo7o duussi diza dureta amatees. He dureti dereza bonqqidi baas aylle histti haaranaas isttas gita wolqqay dees. Isttafe daroti goynnanaas hara eeqa Xoossati diikkoka istta naagizay GODAA gididayssa ba wozinan qoppeettes. Amoxey gidikko istti ba nagara gishshas qaxxayettanayssa isttas yootides. «Iita miish ixxite lo7o gididaazi siiqite. Pirda pirdizason pirda tuccofte. Medheteththa GODAY attida Isra7eele deraa izi maarontta aggenna.» [5:15]
Ha Maxaafay Oykkida Kumeththa Qofa
Dereti ba mooron qaxxayeteth 1:1—3:2
Isra7eeleynne Samaariyay dhayana dhays 3:3—6:14
Isra7eele qixaate gishshas Amoxey be7ida ichchashu ajjuutata 7:1—9:10
Isra7eeles diza lo7o hidota 9:11-15
1
1 Ooziyay Yuhuda kawo; hessaththoka Iyo7aasa naa Iyorba7aamey Isra7eele kawo gidi dishin hessika biittay qaaxxanaappe nam7u layththafe sinththan Isra7eele gishshas Tequhen mehe heemmizayta giddofe Amoxey be7idi yootida qaalay hayssafe kaalli dizayssa;2Kawo 15:1-7; 2Taari 26:1-23; 2Kawo 14:23-29
2 Amoxey,
«GODAY Xiyooneppe
ba qaala dhoqqu histti sissees;
Yerusalaameppe giirees;
mehey heemettizasoti melana;
Qarmeloose zuman diza
cililati shullana» gides.Iyu 3:16
Isra7eele Heeran Diza Dereta Bolla Yaana Pirda
3 GODAY Aaraames,
«Damasqo asay zaari zaaridi
ooththida nagara gishshas
ta istta qaxxayontta aggike;
istti Gala7aade asaa
birata achchara diza kath
bukkiza lodan bukkida.
4 Kawo Azaheele keeththan
tama yeddana;
he tamay Kawo Beeni-Hadaade
miixata maana.
5 Damasqo katama pengeta
ta menththereththana;
Beeti-Edene dere kawozanne
Awe zullaan diza asaa
ta dhayssana;
Aaraame dere asaykka di7ettidi
gede Qiire dere baana» gees.Isa 17:1-3; Er 49:23-27; Zaka 9:1
6 GODAY Filisxeemes,
«Gaaza asay zaari zaaridi ooththida
nagara gishshas
ta istta qaxxayontta aggike;
istta dereza ubbaa di7i efidi
7 Izi gimbeta maana mala
Gaaza miixan tani tama yeddana.
8 Asqeloona dere kawozanne
Ashdoode dere asaa
ta pitta dhayssana;
Filisxeemen dizayti
wuri wurana gakkanaas
tani ta kushe Aqaroone bolla
denththana» gees.
9 GODAY Xirooses, «Xiroose asay
zaari zaaridi
ooththida nagaraa gishshas
ta istta qaxxayontta aggike;
istti ba ishateththa
caaqo qaala laallidi
ba di7ida dereza
ubbaa Eedoomes bayzida.
10 Hessa gishshas tani Xiroose katama
gimbeta bolla tama yeddana;
he tamay
izi miixataka maana» gees.Isa 23:1-8; Hizi 26:1—28:19; Iyu 3:4-8; Zaka 9:1-4; Mato 11:21-22; Luqa 10:13-14
11 GODAY Eedoomes,
«Eedoome asay
zaari zaaridi ooththida
nagara gishshas
ta istta qaxxayontta aggike;
istti ba ishata
Isra7eele naytas
qadhettontta mashshan gooddida;
ba hanqo doshisontta eexxidi
isttas mishettontta
ubbaa dippi histtida.Isa 34:5-17; 63:1-6; Er 49:7-22; Hizi 25:12-14; 35:1-15; Ab 14; Mil 1:2-5
12 Hessa gishshas tani
Temaane gimbeta bolla
tama yeddana;
he tamay
Booxira miixataka maana» gees.
13 GODAY Amoones,
«Amoone asay zaari zaaridi
ooththida nagara gishshas
ta istta qaxxayontta aggike;
istti dere zawa aassanaas
Gala7aade dere
shaara maccassata
ulo daakkida.Er 49:1-6; Hizi 21:28-32; 25:1-7; Sofo 2:8-11
14 Hessa gishshas Eraaba katama
gimbeta bolla
tani tama yeddana;
he tamay istta miixata maana.
Hessafe guye ola gallassan
waasoy darana;
olazikka gote carko mala
eesotana.
15 Istta kawoynne
daannati di7ettana» gees.
1:1 2Kawo 15:1-7; 2Taari 26:1-23; 2Kawo 14:23-29
1:2 Iyu 3:16
1:5 Isa 17:1-3; Er 49:23-27; Zaka 9:1
1:6 Isa 14:29-31; Er 47:1-7; Hizi 25:15-17; Iyu 3:4-8; Sofo 2:4-7; Zaka 9:5-7
1:10 Isa 23:1-8; Hizi 26:1—28:19; Iyu 3:4-8; Zaka 9:1-4; Mato 11:21-22; Luqa 10:13-14
1:11 Isa 34:5-17; 63:1-6; Er 49:7-22; Hizi 25:12-14; 35:1-15; Ab 14; Mil 1:2-5
1:13 Er 49:1-6; Hizi 21:28-32; 25:1-7; Sofo 2:8-11