2
1 GODAY Mo7aabes,
«Mo7aabe asay zaari zaaridi
ooththida nagara gishshas
ta istta qaxxayontta aggike;
istti Eedoome kawo meqeththi
Bidinth gidana gakkanaas xuuggida.Isa 15:1—16:14; 25:10-12; Er 48:1-47; Hizi 25:8-11; Sofo 2:8-11
2 Hessa gishshas tani Mo7aabe bolla
tama yeddana;
he tamay Qiriyaate
miixata maana.
Olanchchati maggulth,
waasonne zaye giiris sissishe
Mo7aabe asaa wodhi wursana.
3 Tani istta haariza kawozanne
daannata ubbaa dhayssana» gees.
4 GODAY Yuhuda,
«Yuhuda asay
zaari zaaridi
ooththida nagara gishshas
ta istta qaxxayontta aggike;
istti ta woga kadhida;
ta azazotakka naagontta ixxida;
kase istta aawati goynnida eeqa
xoossata kaallidi istti balettida.
5 Hessa gishshas tani Yuhuda bolla
tama yeddana;
he tamay Yerusalaame
miixata maana» gees.
6 GODAY Isra7eeles,
«Isra7eele asay
zaari zaaridi ooththida
nagara gishshas
ta istta qaxxayontta aggike.
Xillo asata biras,
metotidayssa toho
caammas bayzida.
7 Istti manqota gudulla bolla
genderisidi istta
hu7e yedhetteettes;
qohettidaytas geella pirdeettes;
aawaynne nay
issi maccassayra laymateettes;
istti hessaththo ooththi ooththidi
ta sunth tuniseettes.
8 Asappe oyso ekettida
may7o hiixxidi
Yarsho yarshizasoza
garsan aqeettes;
istti bantta xoossa keeththan
edasi ekkidi woyne ushshu
izan uyeettes.
9 «Isttas adussateththay
ziga miththa mala;
minoteththayka xiidda mala
gidida Amoore asaa tani
intte sinththafe dhayssadis;
ayfontta mala
xaphoppe shodda diggadis.Zaare 3:8-11
10 Tani inttes Amoore dere
biitta immanaas
inttena Gibxeppe kessadis;
oyddu tammu layth kumeth
bazzora kaaleththa
ehada laatissadis.
11 Qasseka tani intte
attuma nayta garsafe nabeta,
naateththata giddofe
naaziraaweta denththadis.
Isra7eele derezoo!
Hessi tumu gidennee?» gees.
12 Xoossay, «Intte gidikko Naaziraaweta
woyne ushshu ushshideta;
nabetakka tinbite
yootontta mala azazideta.
13 Be7ite daro kath deexetti
caanettida gaarey
garsara diza miish liiqisiza mala
tanikka inttena liiqisana.
14 Pilata asi kessi ekki attenna;
minoykka ba minoteththan
maadettenna;
wolqqamaykka
ba shemppo ashshenna.
15 Wondafe oykkidaadey ba dizason
minni eqqidi ola zaarenna;
pilata olanchchayka
woxxi attenna;
toganchchayka ba shemppo ashshenna.
16 Ola qaratikka he gallas
gooro kallo baqatana» gees.