5
1 Intteno qeeseto hayssa siyite!
Isra7eele asatoo akeekite!
Kawo keeththa asatoo
hayssa ezgite!
Hekko pirday intte bolla yides;
Gaasoykka
intte Mixiphphan narxa,
Taaboore zuman gite gidideta.
2 Makkallanchchati shemppo wodho
kaseppe haa darssida;
hessa gishshas tani istta
ubbaaka qaxxayana.
3 Tani Isra7eele asa ubbaa erays.
Isra7eeley ta ayfeppe
geemmabeekku;
Efreeme,*Efreeme: Efreeme geetettizayssi Isra7eeles nam7anththo sunththa. neni laymateththa
goynon tunadasa.
4 Isra7eele asay ooththida mooroy
istti ba Xoossaako
simmontta mala diggides.
Laymateththa ayanay
istta wozina kumides.
Hessa gishshas
istti GODAA erettenna.
5 Isra7eele asaa otoroy
istta bolla simmi markkattees.
Istti bantta nagaran dhuphettana.
Yuhudaykka isttara issife
dhuphetti kundana.
6 Istti GODAA koyanaas
bantta wude mehetanne
miizatakka laaggi efana;
gido attiin izi isttafe
shaakettida gishshas
istti iza demmettenna.
7 Istti eeqa xoossatas
goynniza gishshas
GODAAS ammanettibeettenna;
istti layman nayta yelida.
Hessa gishshas istti agina xeeron
bonchchiza ba7aaley
isttanne istta nayta
issife dhayssana.
Isra7eeleninne Yuhuda Giddon Dendana Ola
8 Asay olas kezana mala
Gibi7an zaye zayite;
Eraaman xurumba punnite.
Beeti-Awenen,
‹Biniyaame baggatoo!
Nu inttenara doos› gishe waassite.
9 Qixaatey yiza wode
Efreemey bula gidana;
hayssi Isra7eele bolla
gakkanayssa
ta lo7eththa erisays» gees.
10 GODAY, «Yuhuda
kaaleththizayti dhas
shoddiza asa mala
gidida gishshas
tani ta hanqo haaththa di7o mala
istta bolla yeddana.
11 Isra7eele asay hada xoos
kaalon minnides.
Hessa gaason naaqettidetanne
pirdan qohettideta.
12 Hessa gishshas tani
Isra7eele asaa piinno mala,
Yuhuda asas qasse
quno mala gidana.
13 Isra7eeley ba sakoza;
Yuhudaykka ba madunththa be7idi
Isra7eeley Asoorekko
ba ayfso zaaradus;
Isra7eeley maado demmanaas
gita Asoore kawookko
qasttanne kiittadus.
Gido attiin izi inttena ashshanaas
woykko intte madunththa
paththanaas dandaybeenna.
14 Hessafe dendidayssan
tani Isra7eeles gaammo mala
Yuhudaska wodalla
gaammo mala gidana;
ta istta nififi histta
menththereththa yeggana;
bonqqa ekkada baana;
oonikka istta ta kusheppe
ashshanaas dandayenna.
15 Istti ba bala eridi taakko simmana gakkanaas
tani isttafe haakkana.
Istta bolla metoy dariza wode
istti tana minththi koyana» gees.