Iyu7eele Tinbite
Giddo Qofa
Nabe Iyu7eeli hayssa biitta bolla aydeppe ayde gakkanaas de7idaakko iza duussa gishshas erettiza daro miishshi deenna; gido attiin maxaafazi beettiday Kirstoosi yelettanaappe kase 500 layththa heeran woykko 400 layththa heeran gidana geetetti qofettees. Hessi he wodezikka Paarise kawoteththa wodenna; Iyu7eeli Isra7eele deren wolqqama booley dendidi daro miish mooriin koshay biitta bolla dendidayssa yootees; heyti he hanoti Godaa yuussa gallassay matishin iza geeshsha qofaara eqettizayta ubbaa izi qaxxayanayssa gujjidi erisees. Nabezi derey maaroteththan gelana mala Xoossi asaa xeygizayssa qoncciseththan asay maaroteththan gelikko izikka beni dereza hanoteththaako simmidi deraa anjjanayssa asaa qofsees; iza tinbiteza giddofe keehi qoncci beettiza ufayssa qaalay Xoossi maccanne attuma naateththata bolla, cimata bolla, dereza ubbaa bollaka ba Ayana yeddanayssa qonccisees.
Ha Maxaafay Oykkida Kumeththa Qofa
Boolenne morkke ola 1:1—2:17
Godaa gallas 2:18-32
GODAY kawoteththata qaxxayana qaxxayo 3:1-21
1
Booley Gaththida Qoho
1 Sinththafe hananayssa Xoossi Iyu7eeles yootida qaalay hayssa;
2 intte cimati hayssa siyite;
Yuhuda deren dizayti wurikka
hayssa ezgi siyite.
Hayssa mala hanoy kase
intte wode gidiin woykko
kase intte aawata wode
hani erizee?
3 Intte hayssa intte naytas yootite;
intte nayti qasse
bantta naytas yootetto;
nayta naytikka
kaalliza yeletas yootetto.
4 Gondoy mishin attida kaththaa
biitta maate
booley mides;
izappe attidayssa uusho carkoththo
shociza di7o mala booley dhayssides;
izappe attidayssa qasse
gumbaroy mides.
5 Hessafe guye woyne ushshu
intte demmontta
gishshas yeekkite;
intteno maththottizaytoo!
Intte dhiskizasoppe
beeggidi waassite;
intteno wonttan wonttan
woyne ushshu uyizaytoo!
Camo yeeho yeekkite.
6 Qooday baynda booley
ola asa mala
ta dereza bolla yides;
iza achchay
gaammo achcha mala;
iza gaagina achchay
macca gaammo
gaagina achcha mala.Ajju 9:8
7 Ta woyne miththa ayfeza
mulera dhayssides;
balase geetettiza miththa
ubbaa menththereththides;
miththa haggati
mulera booxxana gakkanaas
poqoza mulera poqqi
denththichides.
8 Hessa gishshas izo ekkana
giigsidayssi hayqqiin
maaqa may7ada yeekkiza
geela7oy mala intteka yeekkite.
9 GODAA Keeththan yarshos shiiqana
kath gidiin woykko
woyne ushshay baynda gishshas
GODAAS ooththiza qeeseti
yeekkeettes.
10 Goyidi zerida kaththay meli dhayiin
woyne miththay tokettidi
melida gishshas zaytey dhaydes;
hessa gishshas
biittaya yeekkawus.
11 Gistteynne banggay haraykka
bone kaththi wurikka
dhayda gishshas
intteno goshshanchchatoo
ceecite;
intteno, woyne miththata
godatikka yeekkite.
12 Woyne miththatinne balase
miththati shullida;
oroomaanenne temire miththati,
laadeynne hara ayfe ayfiza
miththati wurikka melida;
hessa gaason addafe
ufayssi asappe haakkides.*Laade: Laade geetettizayssi issi issi bagga gamoththo qaalan dhano geetettees.
13 Intte intte Xoossa
yarsho shiishshiza kath gidiin
woykko woyne ushshi
baynda gishshas
intteno ta Godaa
oosanchchata gidida
qeesetoo! Ane haa yiidi
maaqa may7idi
kumeththa omars yeekkite.
Intteno yarsho yarshizason
ooththizaytoo!
Intte, «Wuu! Wuy!» gi waassite.
14 Dumma xooma gallas awajjite;
ayana shiiqos asa xeygite;
deren diza cimatanne asaa ubbaa
nu GODAA keeththan shiishshidi
pude GODAAKKO waassite.
15 Aye ana! GODAA gallassi matides.
Ubbaa dandayza Xoossay
dhayssizaaz ehiza
gallassi gakkides.
He gallassays aayye ana!Isa 13:6
16 Kaththi nu sinththafe dhaydes;
ufayssinne ilisi nu Xoossa
Keeththafe mule dhaydes.
17 Zerettida kaththay wuri
biitta garsan
wooqqi dhaydes;
kaththi biittafe dhayda gishshas
kase kath woththiza miishshati
wurikka mela deettes.
Gootaratikka laalettida.
18 Mehey miza maatay gaden
baynda gishshas
meheti koshattidi waasseettes;
dorsa wudetikka maatay dhayiin
daro waaye bolla deettes.
19 GODAWU! Demba maata ubbaa
tamay mida gishshas
wora miththaaka
tamay mida gishshas
ta neekko waassays.
20 Shaafati melida gishshas
demban diza maatay wurikka
xuugettida gishshas
wora do7atikka
neekko waasseettes.