2
Xoossa Yuussa Gallas Bessiza Malata
1 Xiyoonen zaye zayite;
geeshsha zuma bolla waassite!
GODAA yuussa
gallassi gakkida gishshas
biitta bolla dizay
wurikka kokkoro.
2 He gallassay dhumanne
tulala gallassa;
shaaranne sakkanna
dhuma gallassa;
wontta poo7oy eeson
zumata gakkiza mala
wolqqama booley
biitta ubbaan may7ana;
hessa malay
hayssafe kase hanibeenna;
hayssafe guyenkka
wodenkka hanenna.
3 He booleti ba sinththan beettidaazi
ubbaa tama mala maana;
tama laco mala xuuggana;
buro istta gakkontta biittay
Edene gannate mala
cilila biitta shin
istti gakki aadhdhida biittay
aykkoy baynda
bazzo biitta gidana;
booleti mishin attida
miishshika beettenna.
4 Isttas medhay para mala;
istta buussay
ola para buussa mala.
5 Para-gaare giirissa mala
giiris sissishe
zumata bollara guppeettes;
tamay buura miza mala
beettida miishsha
ubbaa xuuggana;
giigettida mino olanchchata
salfe mala giireettes.Ajju 9:7-9
6 Istta be7idi derey kokkorana;
asa ayfesoy wurikka
babon boottana.
7 Ola qarata mala
gede sinththe beettes;
olanchchata mala
dirsa bollara guppi aadhdhana;
wurikka sitti giidi
gede sinththe baana;
ba biza ogeppe hara oge beettenna.
8 Issoy issaara sugetettenna;
issoy issoy ba oge yeddenna;
ba morkke ola miish ubbaa
dhayssidi aadhdhi baana;
aykkoyka istta teqqenna.
9 Istti katamaza worajjana;
katama gimbeza bolla
istti woxxana;
guppi guppidi
keeththata bolla kezana;
kayso mala maskootera
soo gelana.
10 Biittay istta sinththan kokkorana
saloykka qaaxxana;
awa ayfeynne aginay dhumana;
xoolintteyka poo7o immenna.Ajju 8:12
11 GODAY ba olanchchata
sinththan dada mala guummana;
iza olanchchati ay mala daroo!
Iza azazo ooththizayti
ay mala wolqqamaa!
tumappeka GODAA gallassay
keehi wolqqama;
keehi babisiza he gallassaa
danday eqqanay oonee?Ajju 6:17
Maareteththa Xeys
12 GODAY, «Ha7ikka gidikko
xooman yeehoninne ceecen intte
kumeththa wozinappe
ha taakko simmite.
13 Intte intte kayo bessanaas
may7o daaketh xalla gidenna;
hessafe bollara intte wozinay
meqqiin maarettite;
GODAA intte Xoossay
kiyanne maariza Xoossa,
hanqoska eesotenna;
mernaa siiqon izi durenne
qaxxayanaas eesotontta Xoossa;
hessa gishshas
intte izakko simmite.
14 Oonee erizay GODAA intte Xoossay
ba hanqoza zaaridi
inttena anjjanaakko,
intteka he wode
GODAA intte Xoossas
kaththa yarshonne
ushsha yarsho shiishshandeta.
15 Xiyoone zuma bolla zaye punnite;
dereza ayana shiiqos xeygite;
xoomakka awajjite.
16 Dereza ubbaa issi soo shiishshite;
geeshsha duulatas giigsite;
cimata xeygite;
naytanne buro dhammiza
naytakka ubbaa shiishshite;
mishiratikka mishira keeththafe
attontta kezetto.
17 GODAAS ooththiza qeesetikka
yarsho yarshizasozassinne
asi simerettizaso
giddon eqqidi yeekketto;
GODAWU! Neni ne derezas qadhetta;
kawoteththati istta Xoossay
awan dizee?
giidi nuna kadhanaassinne
istti nu bolla
miicci kaa7ana mala
ne istta ooththofa» getto.
Goday Ba Deraas Immida Hidota
18 GODAY biittays diza
misheteththafe dendidayssan
ba derezas qadhettides.
19 Hessa gishshas GODAY,
«Intte kath, woyne ushshinne
wogara zayte kallana gakkanaas
ta inttes immanaas
hayssafe guye
kawoteththati inttena
baas kaassa miish histtana mala
ta isttas aaththa immike.
20 Pudehappe yaana olanchchata
ta inttefe haassana;
duge bazzo zaara gooddana;
sinththati yizayta duge
hayqo abban yeddana;
guyera yizayta Mediteraane
abban yeddana;
heen istta ahay zeeqqana;
tumappe tani GODAY
gita miish ooththadis.
21 Biittayee babbofa;
GODAY nees ooththida
gita miishsha gishshas ufayetta!
22 Intteno biitta bolla diza
do7atoo babbofte;
kase intte izan heemettiza
gadey cililides;
miththatikka ayfida; balaseynne
woyne miththay
keehi daro ayfides.
23 Intteno Xiyoone deretoo,
GODAAN intte Xoossan
ufayssi ooththite;
izi tumu pirdidi
badhdhesa iranne
ofinththa ira wogara immides.
24 Intte kase kath bukkiza balen
kaththi kumana;
woyne ushshinne
wogara miththa zaytey
kase isttan gum7ettiza
ollata kumi palahana.
25 Hayssafe kase wolqqama olanchcha
misatiza ta yeddida uusho
carkoththo shociza booleti,
gumbarotinne gondoti,
kase mida kaththaa gishshas
ta inttes zaara immana.
26 Intte buro daro miidi kallana;
inttes malalisiza miishshata
ta ooththida gishshas
intte tana GODAA
intte Xoossaa galatana;
hayssafe guye ta deraa
yeellay gakkenna.
27 Isra7eele asatoo
tani intte giddon dizayssanne
GODAA intte Xoossi
tana xalla gididayssanne
taappe haray bayndayssa
intte erana;
hessafe guye ta dereza
yeellay gakkenna» gides.
Godaa Gallassa
28 GODAY, «Hayssafe guye
tani asa ubbaa bolla
ta Ayana gussana;
intte macca naytinne attuma
nayti tinbite haasayana;
cima asaykka agumo agumettana;
yelaga naateththati ajjuuta beyana.Hawa 2:17-21
29 Hessaththoka he gallassatan
taas ooththiza maccassa bollanne
attumasa bolla tani
ta Ayana gussana.
30 Saloninne sa7an malalisiza
miishshata ta bessana;
suuththi, tamaynne
cuwa tuussi beettana.
31 Gita babisiza Godaa gallassay
yaanaappe kasetidi
arshey dhumana;
aginaykka suuth aaththana.Mato 24:29; Mar 13:24-25; Luqa 21:25; Ajju 6:12-13
32 GODAA sunth xeygizay
wurikka attana;
GODAY kase
yootida mala
Xiyoone zuma bollafenne
Yerusalaameppe
atoteththi beettana;
attanayta garsan GODAY
xeygidayti daana» gides.Oro 10:13