6
Hachchas Hachchas Bessiza Zore
1 Ta naazoo! Neni ne shoorozas
waase gelidaa gidikko,
hara asa gishshas neni
kushe baqqa caaqqidaa gidikko,
2 neni gelida qaalan
oykettidaa gidikko,
ne doonappe ke7ida qaalan
ne oykettidaa gidikko,
3 ta naazoo! Neni ne shooroza
kushen kundida gishshas
nena ashshanaas baada
iza sinththan kunda;
ne shoorozakko baada shoobba.
4 Hessaththo ooththontta
dashe dhiskofa;
ne siphinththati liphopetto.
5 Shankkanchchatappe genessi
kessi ekki attiza mala,
yarden oykettontta attida
kafo mala nena ashsha.
6 Nenoo azallazoo!
Cunccalletaakko ba;
histtada isttafe tamaarada
aadho eranchcha gida.
7 Cunccalletas azazizay deenna;
istta haarizay deenna.
8 Gido attiin banttas maana miish
bone shiishsheettes;
kath shiishshiza wode
banttas kath shiishsheettes.
9 Nenoo azallazoo!
Neni awude gakkanaas
dhiskanee?
Dhiskofekka
ne awude beegganee?
10 «Tani guuththara dhiska ekkana;
guuththara liipha dendana;
ta kushe borkotada
guuththara shempa ekkana»
ne gishin,
11 he wode manqoteththi
panga mala,
pacey ola miishsha
oykkida asa mala
ne bolla puttu gaana.Leemi 24:33-34
12 Womaleynne menxe iita asi
yuuyi yuuyidi
iita qaala haasayzay,
13 ba ayfera qim7otizay,
ba tohon bessizay,
ba biradhdhetankka malatizay,
14 ba wozinan iita miish
woththi denththi qoppizay
ay wodekka oosh denththees.
15 Hessa gaason bashshi akeekontta
iza bolla yaana;
izi hassa7ay baynda meqqana;
meqqidikka paxenna.
16 GODAY ixxiza usuppun
yo7oti deettes;
laappunththaza
keehi harasettees.
17 Otoreteththan xeelliza ayfe,
wordotiza inxars,
xillo asata wodhiza kushe,
18 iita miish qoppiza wozina,
iitaso eesotiza tohota,
19 wordo bolla wordo gujji gujjidi
yootiza wordo markka,
ishantta giddon
oosh medhdhiza asa.
Laymappe Haako
20 Ta naazoo! Ne aawa azazo pola;
ne aaya tamaarsidayssaka aggofa.
21 Istta ubbato ne wozinan oykka;
ne qoodhenkka qachcha.
22 Neni hemettiza wode
istti nena kaaleththana;
neni ichchiza wode
istti nena naagana;
neni beegottiza wodekka
istti nena zorana.
23 Ays giikko ha azazoti nees xomppe;
timirtetikka poo7o;
qasse seeraykka
de7okko efiza oge.
24 Ha azazoti iita maccassafe
nena naagana;
doonan cimmiza hawusha
maccassafekka naagana.
25 Izi lo7eteththa
ne wozinan amottofa;
izi qim7oteththan oykettofa.
26 Issi addey
bana bayza diza maccassayo
guuththa miishshan
demmanaas dandayees;
asa machchi geedo kaaloy
nees shemppo dhayssana.
27 Issi asi tama idimmiin
iza may7oy
meetettontta attanaas dandayzee?
28 Issi asi bonqo tama yedhdhi bishin
iza tohoy
xuugettontta attana dandayzee?
29 Asa machcho laggeththiza asi
hessa mala;
izo bochchiza ubbay
qaxxayettontta attenna.
30 Kaysoy gafa attanaas kaysikko
asay iza kadhenna.
31 Gido attiin izas diza aqota
ubbaa oychchikokka
izi oykettidaa gidikko
laappun kushe qanxxana bessees.
32 Layma laymatiza asas
wozinay pace;
hessaadey barkka
ba shemppo dhayssees.
33 Bukaynne kawushshateththi
izas qaada;
yeellateththi izappe
mulekka qucettenna.
34 Qanaatey azina hanqettana mala denththeththees;
izi halo kessiza wode
izas qadhettenna.
35 Izi ay edakka ekkenna;
ay keena imotaykka
iza hanqo doshisenna.