7
Laymappe Naagettana Mala Imettida Seera
1 Ta naazoo! Ta qaala naaga;
ta azazokka ne wozinan
qum7a oykka.
2 Ne paxa de7ana mala
ta azazota naaga;
ta timirtezakka
ne ayfe ciro mala naaga.
3 Hayta ne biradhdhetan qachcha;
ne wozinankka xaafa.
4 Aadho erateth ne taas michcho ga;
akeekakka ne taas dabbo ga.
5 Istti nena layma maccassafenne
ba qaalan baleththiza
hawusha maccassafe naagana.
6 Issi gallas tani
ta keeththa maskootezara
kare xeelladis.
7 Akeekay paccida yelagata be7adis.
Istta giddofe issoy keehi eeya.
8 He wodallay izi soo efiza
oge baggara oykki bishe
izi keeththa achchara
aadhdhi bishin,
9 he wode sa7ay qammanaas
lankilankishin,
dhumay ayfe oykkishin,
10 issi maccassaya
iza demmanaas kezadus;
layma maccassa may7o may7ada
baleththanaas murtta kezadus.
11 Iza xalanne
yeellay baynda maccassa;
sohon woppu gaada uttuku.
12 Iza issito ogen, issito gulan,
issito dubbushan eqqada naagawus.
13 Iza he naaza
shiishsha oykkada yeerawus;
yeellay baynda iza ayfe
tishshi histta xeellashe,
14 «Tani tason issifeteththa yarsho
yarshanaas bessees;
tani ta adina hach poladis.
15 Histtada nena xeellanawu ke7adis;
nena keeha koyadis;
ha7i beya nena demmadis.
16 Tani Gibxeppe yida
alleqissiza ansolakka
ta hiixan yeggadis.
17 Tani karbbe, almmuniyemenne
qarafa geetettiza
sawotappe oosettida
shitto ta hiixan cacafadis.
18 Haa ya; ane wonttana gakkanaas
siiqo aloos;
qoomettidikka ufayettoos.
19 Ta keeththaaway soon deenna;
haako dere bides.
20 Miish karaxiite kunththi
ekki bida gishshas
aginay dors daganththontta
simmenna» gadus.
21 Histtada ba mal7o haasayan
iza baleththadus;
ba liiqo inxarsankka cimmadus.
22 Shukas laagetti biza boora mala,
woximaden oykettana
biza cofosho mala
heerakka aamusontta
izo kaallidi bides.
23 Wondafe yiishshi
iza tire caddana gakkanaas,
iza shemppo dhayssanayssa
erontta dishe piradhdhidi yarden
geliza kafo mala gidides.
24 Ta naazoo! Ane ha7i siya;
ta doonappe keziza
qaalaakka ezga.
25 Ne wozinay izikko booppo;
iza biza bala ogen geloppa.
26 Iza kawushshada olidayti undenna;
iza wodhidayta qooday
keehi daro.
27 Izi soy duufon efiza oge;
he ogey duge hayqoso gaththees.