1 Ŋulinyaramirriyunydjayi waluyu yolŋu ḏarramu yukurrana nhinana yäku *ElijahYelatja, yurru ŋayi ŋunhi dhäwu'‐gänharamirri yolŋunydja Godku, ga nhinananydja ŋayi yukurrana ŋunhala †TishbeḎitjpana wäŋaŋura. Waŋganymirriyunydja waluyu ŋayi gaŋgathina Yelatja, bala marrtjina withiyara ‡King AhabGiŋ Wayapnha ŋunha makarrŋura wäŋaŋura §IsraelYitjural. Ga ŋayi Yelatjayu waŋana ḻakaraŋala Wayapku bitjarra, “Ŋarranydja dhuwalanydja djämamirri ŋuriki Walŋa‐ḏikṯikku Waŋarrwu ŋunhi ŋayi Yitjuralpuyŋuwu Waŋarr. Nhanukalaŋumirri yäkumirri ŋarra yukurra ḻakaramanydja dhuwala gam'. Waltjaṉdja yurru bäyŋuthirri dhiyala wäŋaŋura; bukmak yurru dhuwala wäŋanydja ŋanhdharkthirrina ganbarkthirrina. Mak yurru märrma' dhuŋgarra, mak ḻurrkun' yurru djuḻkthunmarama, ga yaka yana yurru waltjaṉ buna, ga yana liŋgu ga ŋarrapi yurru waŋanydja.” Ga bitjarranydja yukurrana Yelatjayu ḻakaraŋala giŋgu.

2 Ga Garraynydja waŋana nhanukala Yelatjawala bitjarra, 3 “Gonha'yurra dhuwalanydja wäŋa, ga marrtjiya bala‐a‐a ŋunha ḻaypalili wäŋalili buḏapthurra, ga ŋunhamala nhe yurru djuḻuḻ'yundja galki mayaŋ'lili riyalalili, yutjuwaḻa ŋunhi mayaŋ ya' *CherithDjeratlili. 4 Nhuŋu gapunydja yurru ŋunhiyi gapu riyalanydja, ga munha‐ŋupan nhuŋu yurru gäma'‐gamanydja nhina ŋathanydja wäyindhu gaḻkarriŋu'yu.”

5 Dhunupana ŋayinydja Yelatjayunydja ŋäkulana yana dhäruktja, bala yana marrtjinana ŋunhimalayina wäŋalili, ga ŋunhalayina ŋayi nhinananydja yukurrana. 6 Ŋayi ŋuli ḻukanha gapunydja ŋuliŋuruyi riyalaŋuru, ga bitjana liŋgu walu‐mandhinya, munhakumirri ga milmitjpa ŋayi ŋuli gaḻkarriŋu'yunydja ŋathanydja yukurranha nhanŋu gänha, ga wäyin wiripunydja. 7 Nhinananydja ŋayi yukurrana ŋunhiliyi märr‐weyin ya', ga‐ga‐ga‐ga‐a‐a, ga yana liŋgu ga gapu ŋunhi nyimdhurrunana mayaŋ'tja, liŋgu waltjaṉnha ŋulinyaramirriyunydja bäyŋuthinana, bitjarra yana liŋgu ŋunhi nhaltjarra Godthu ḻakaraŋala.

8-9 Ga ŋunhi ŋayi gapunydja riyalanydja baṉḏanydhinana, bala ŋayi Garrayyunydja waŋanana ŋanya Yelatjanha bitjarrana, “Ma' gonha'yurrana dhuwalanydja wäŋa, ga marrtjiya biyakana ŋunha †17:8–9 ZarephathDjarapatlilina, ŋunha makarrŋura wäŋaŋura Djäytanŋura, ŋunhana bala barrkuna wal'ŋu ya'. Ŋunhiliyina nhiniya yukirriya, liŋgu ŋarra yawungu waŋanha ḻakaranha miyalkku buku‐wurthapuywu ŋunhalamiyi, ŋayina yurru nhuŋu yukurra djäkanydja, ŋathayunydja maranhu‐wekama nhuna nhina.”

10 Djar'tjar‐way ŋayinydja Yelatjanydja bala‐a‐a Djarapatlilina, ga ŋunhi ŋayi galkithinanydja mulkanana ŋunhi wäŋa Djarapatpuy, dharr‐way nhäŋala ŋunhiyi buku‐wurthapuynhanydja miyalknha, ŋayi marrtjina gurtha djoṉguŋala. Bala Yelatjanydja waŋanana nhanukala bitjarrana, “Gapu ŋarraku gäŋa go,” bitjarra. 11 Ga ŋunhi ŋayi marrtjinana nhinana bala ŋunhi miyalktja, ga biyapul ŋayi waŋana bitjarrana, “Ga' ŋathanydja gäŋana lili ŋarraku.”

12 Yurru ŋayi ŋunhi miyalktja waŋana bitjarra lili buku‐roŋiyinmaraŋalanydja, “Ŋarranydja marŋgina nhokalaŋuwunydja Godku, ŋunhi nhuŋunydja Waŋarr Walŋa‐ḏikṯik warray, yurru ŋarra dhuwala ŋathamiriwnha yulŋunydja, dhäparknha. Ŋathanydja ŋunha ŋarra yukurra ḏälkuma mitjpili'na yana, ḻurrkun'nha wal'ŋu, ga ḻurrkun'nha yana weyikany'tja. Dhuwala ŋarra marrtji gurthanydja galka'‐galkaṉ, märr ŋarra yurru bathan ŋunhayi ŋatha, gana'na yana ŋarrakuway ga ŋarrakalaŋuwu waku'mirriŋuwu, ŋilinyu yurru ḻukana, bala ŋuliŋurunydja dhäŋuru ŋilinyu boŋguŋu rakunydhina, liŋgu bäyŋuna biyapulnydja ŋatha ŋula, dhuwalana liŋgu ŋunhi yulŋunydja.”

13 Ga ŋayi Yelatjanydja waŋana nhanukala ŋurikala dhäykawalanydja, “Yaka nhe warwuyurra,” bitjarra. “Gatjuy marrtjiya, ga batharra ŋunhiyi ŋatha, ga gäŋa ŋarraku ŋäthilinydja lili, yurru dhuḏitjnha nhe yurru batharra nhuŋuwaynydja ga nhokalaŋuwu waku'mirriŋuwunydja. 14 Dhuwalanydja dhäruk Garraywu nhanŋuway, ŋayi waŋana nhuŋu bitjarranydja, ‘Rupa ŋunhi nhuŋu bitjanna liŋguna yukurra yurru ŋathamirrina yana dhärra, ga buthuḻu' ŋunhi weyika'mirri bitjanna liŋguna yukurra yurru weyika'mirrina yana dhärra, ga yana liŋgu ga walu ŋunhiyi mulki ŋunhi ŋarra boŋguŋu djuy'yurru waltjaṉnha.’ Ga bitjarranydja yukurrana Garray waŋana.”

15 Bala ŋunhiyi buku‐wurthapuynydja dhäyka marrtjinana, ga djämanydja ŋayi bitjarra yana liŋgu ŋunhi Yelatjayu yukurrana ḻakaraŋala nhanbala. Ga yuwalkthina bitjarranydja, yuwalknha yanana wal'ŋu; bitjarra liŋgu walu‐mandhinana ŋathamirriyinana yana yukurrana wäŋa dhärrana, yakana ŋula dhawar'yurruna. 16 Ŋathanydja ŋunhi dämbany'tja yakana winya'yurruna, dhawar'yurruna ŋula, ga weyika' ŋunhi yakana ŋula dhawar'yurruna, bitjarra yana liŋgu ŋunhi ŋayipi Garrayyu dhawu'‐nherrara.

17 Yo, Yelatjanydja nhinana yukurrana ŋunhili weyinŋumirri, bala yana ŋuriki dhäykawu yothu'na waku'mirriŋuna rirrikthurruna; wiṯthurrunana dhika ŋayi rirrikthurrunanydja, bala rakunydhinana ŋayi. 18 Ga dhäykanydja ŋunhi waŋanana nhanukala Yelatjawala bitjarrana, “Nhäku warray nhe bitjandja yawungu dhuwala ŋarraku? Nhe yawungu dhuwala marrtji lili dhipalanydja, märr yurru Godthu birrka'yun ŋarrakalaŋuwuy yätjpuy? . . . bala yawungu dhuwalana gay' ŋarraku waku'mirriŋuna rakunydhirri?”

19 Ga ŋayi Yelatjanydja yana waŋana bitjarrana, “Wekaŋa lili dhuwali gurrmulnha ŋarrakala.” Bala ŋayi ḻaw'maraŋala ŋanya ŋunhiyi gurrmulnha ḏarramunha, ga gäŋalana bala, ga yorrkuŋala nhanukiyingala wäŋalilina. 20 Bala yana ŋayi bukumirriyaŋala waŋana wirrkina wal'ŋu, “Garray ŋarrala Waŋarr, nhäku warray nhe dhuwala bitjandja yawungu? Dhuwala buku‐wurthapuynydja dhäyka ḻatju'na dhikana dhäyka; ŋayi yukurrana ŋarraku djäka gel'yurruna walaŋguŋala yana. Nhäku warray nhe buma yawungu nhanŋu yothunhanydja?” 21 Bala yana ŋayi Yelatja waṉa‐djarryurruna ga mulkana ŋunhi gurrmulnha, bala bukumirriyaŋalana, “Garray ŋarraku Waŋarr, walŋakuŋana dhuwala yothu'nhanydja.”

22 Bala Godthunydja ŋanya walŋakuŋalana; ŋunhiyi yothuny'tja biyapul ŋir'yurruna, bala walŋathinana, manymakthinana liŋguna. 23 Ga ŋayi Yelatjayunydja märraŋalana ŋunhiyi gurrmulnhanydja, ga gäŋala ŋanya balayi ŋäṉḏi'mirriŋuwala, bala ḻakaraŋalana waŋana ŋanya bitjarrana, “Nhäŋana ŋanya. Walŋana ŋayi.” 24 Ga ŋayinydja dhäykanydja waŋana buku‐ruŋiyinmaraŋala bitjarrana, “Liŋguna ŋarra marŋgithinana, ŋunhi nhenydja dhuwala nhanŋuwaynha yana wal'ŋu yolŋu Godkuna, bala ŋayi yukurra yuwalkkumana wal'ŋu waŋa nhokalaŋukurrunydja.”